Dov-ail 26
Uqhuq thaoq nail haqphal saiqgov nail ganl
1 Heeqphaq Miqyail gaoq ge nail: "Uqhuq thaoq nail haqphal saiqgov cov nail haqbhoil, lenl nail kheeljoe, govnav lavmav nail kheeljoe, kheeljoe aqnel, yavq-ai thaq nail haqphal aqjeel, al juq-i mail haqphal 10 keiv lav sav yaoq. Haqphal al nail lavqkhoel bhai neq, lavqmaoq aqmeeq-ai nl nia nail juq-i mail Kheiqlulbhinq nail maolkhoel bhi guvq bhoel gai yaoq.
2 Haqphal al juq neq, heelma phao 28 cav, eeq nail phao liq cav bhee dai iqsanl, ya lav sav dul gil nail ngaol.
3 Haqphal ngaq keiv dai ya guvq cavq nail ngaol. Haoqnao ngaq keiv gail thail hai ya guvq nail ngaol.
4 Guvq jil-ai thaq nail haqphal phal ma teevq keiv nail aqjaq bhai neq, lenl nail kheeljoe-i mail lav sav-ai thaq nail lavqceiv guvq bav gai yaoq.
5 Haqphal al nvq keiv nvq keiv-ail, haoqnao nao saq phao teevq di daljaol 50 laiq bhee dai, ya lav sav covq gai nail ngaol.
6 Al ovqtavq, haqphal al nvq keiv teevq keiv taivq-ail he cavq kivq nail galduq, khu cavq nail heel nail khulu 50 laiq lav sav yaoq. Al hai nl haq neq, uqhuq thaoq nail haqphal saiqgov teevq gov taivq-ail pevq lal nail ngaol.
7 Haqphal saiqgov pultavq phao he pheeq nail galduq, haqphal 11 keiv bhai civqmeiv nail aqmevq-i mail yavq yaoq.
8 Haqphal al 11 keiv neq, iqsanl mail heelma phao 30 cav, eeq nail phao liq cav ya bhi bhee nail ngaol.
9 Ngaq keiv bhai teevq keiv guvq cavq, haoqnao kovq keiv bhai teevq keiv gaoq guvq cavq khi, kovq keiv teevq keiv bhai neq, haqphal saiqgov nail govkhoiq aol lai nail pultavq phao ya teiv kovq gai nail ngaol.
10 Iqmoeq khal moeq khe keiv nail haoqnao nao saq khe aqjaq bhai maqkhaiq, nvq keiv teevq keiv nail haoqnao nao saq khe aqjaq bhai maqkhaiq, daljaol 50 laiq bhee dai, ya oil covq gai nail ngaol.
11 Haqphal al nvq keiv he jil kivq dai, giqheel nail khulu 50 laiq lav sav khi daljaol al juq bhai khu tseq bhiq yaoq. Al hai nl haq neq, uqhuq thaoq nail haqphal saiqgov teevq gov taivq-ail pevq lal nail ngaol.
12 Jail nail haqphal nvq cav bhai neq, haqphal saiqgov nail haoqnaol phao ya bhi ga kha nail ngaol.
13 Haqphal heelma a phao nia phao jaiq nail teevq cav neq, al hai ya bhi ga kha nail ngaol. Al hai nl haq neq, haqphal saiqgov nail teevq jaoq ga pheeq nail ngaol.
14 Pultavq phao he pheeq nail nvq tiv gaoq ya lav sav nail ngaol. Teevq tiv bhai neq, aqnel leivq-ai thaq nail yaol yaol bhuq nail bavkov-i mail ya lav sav nail ngaol. Pultavq khal tavq khe teiv bhai neq, civqmeiv nail bavkov aqjeel-i mail ya lav sav nail ngaol.
15 Uqhuq thaoq nail haqphal saiqgov nail lavqkhoel kha thul-ai thaq nail dailpav juq neq, aqkaqsal nail aqbhaol-i mail ya lav sav nail ngaol.
16 Dailpav al juq neq, eeq nail phao teevq cav ovqtavq teevq pav, daqmoe phao 10 cav ya bhi bhee nail ngaol.
17 Dailpav iqsanl mail, teevq gaq khe-ai yaoq pav yaoq-ao nee, daoqthaoq bhai khaoltsoe nvq tsoe ya lav sav covq gil gai nail ngaol. Al heel ngel-i mail, dailpav iqsanl mail teevq gaq khe-ai ya lav sav gil gai nail ngaol.
18 Uqhuq thaoq nail haqphal saiqgov nail lavqmal phao nail galduq, dailpav 20 pav ya lav sav nail ngaol.
19 Al ovqtavq, dailpav al 20 pav bhai tsiq tsaoq nail haqbhoil, teevq pav nail daoqthaoq-ai phul nail saiqnaov nvq tsaoq lav sav covq yaoq. Al heel ngel-i mail, saiqnaov iqsanl mail 40 tsaoq bhee khi khaoltsoe teevq tsoe bhai saiqnaov teevq tsaoq covq nail ngaol.
20 Haqphal saiqgov lavqtsel phao nail galduq iqsanl dailpav 20 pav ya lav sav khi
21 dailpav al 20 pav nail daoqthaoq bhai neq, yaoq pav yaoq-ao nee, phul nail saiqnaov nvq tsaoq ya lav sav covq nail ngaol. Al heel ngel-i mail, saiqnaov iqsanl mail 40 tsaoq bhee nail ngaol.
22 Haqphal saiqgov nail haoqnaol phao jiav khi nlma ga khoeq phao nail galduq, dailpav kovq pav ya lav sav nail ngaol.
23 Al nail haoqnaol phao khe lavqkhoel nail goivqloiv nvq loiv nail haqbhoil iqsanl, dailpav nvq pav ya lav sav nail ngaol.
24 Goivqloiv khe dailpav al nvq pav neq, daoqthaoq phao aqmeeq-ai bavq tsaq khi pultavq phao neq, lavqceiv-i mail ya bhi he thaiq gai nail ngaol. Goivqloiv nvq loiv nail haqbhoil dailpav nvq pav bhai niail hai ya lav sav nail ngaol.
25 Al heel ngel-i mail, haoqnaol phao dailpav eivq pav jiav khi teevq phaq nail daoqthaoq bhai saiqnaov nvq tsaoq covq nail bhaq da nee, phul nail saiqnaov iqsanl 16 tsaoq bhee nail ngaol.
26 Dailpav bhai tsaoq ceiv nail aqbhaol neq, aqkaqsal nail aqbhaol-i mail ya lav sav nail ngaol. Uqhuq thaoq nail haqphal saiqgov nail lavqmal phao tsaoq ceiv nail aqbhaol ngaq khaoq,
27 lavqtsel phao, tsaoq ceiv nail aqbhaol ngaq khaoq dai khi haoqnaol phao khe, nlma ga khoeq phao, ngaq khaoq dai, ya lav sav nail ngaol.
28 Haqphal saiqgov khe dailpav nail gaoltsi bhai tsaoq ceiv-ai thaq nail aqbhaol neq, heelma phaq-ail jiav nail nia phao khe daoq loi nee, a phao khe daoq loi bha kev dai, ya tsaoq ceiv nail ngaol.
29 Dailpav juq bhai heel heel leivq leivq khi tsaoq ceiv nail aqbhaol juq bhai he thaiq nail galduq heel nail lavqceiv ya oil covq nail ngaol. Al ovqtavq, aqbhaol al juq bhai heel heel leivq ya leivq thaq gai nail ngaol.
30 Naoq bhai ngaq-i mail gaoqjaoq bha bhi moel-a nail khe-ai, uqhuq thaoq nail haqphal saiqgov cov yaoq" dai, ge bhiq-a nail ngaol.
31 Heeqphaq Miqyail gaoq ge nail: "Lenl nail kheeljoe, mal khel nail kheeljoe, kheeljoe aqnel, yavq-ai thaq nail haqphal aqjeel, al juq-i mail gaiqlaq khe thao pav nail haqphal bhi yavq yaoq. Haqphal al nail lavqkhoel bhai Kheiqlulbhinq nail maolkhoel iqsanl lavqmaoq aqmeeq-ai nl nia nail juq bhai ya bhi guvq bhoel nail ngaol.
32 Haqphal al neq aqkaqsal nail aqbhaol-i lav sav thaq nail ilkhel liq khel bhai covq nail heel nail khulu-ai ya khu tseq gai nail ngaol. Ilkhel al neq, heel heel leivq leivq gai khi phul nail saiqnaov liq tsaoq bhai ya tsiq tsaoq gai nail ngaol.
33 Haqphal al khu tseq gaq haq neq, al nail haoqnaol phao, daoqma saljial nail thunq bavq thaq gaiq yaoq. Haqphal al neq, meeq nail haol nail aqduq dai khi meeq dee haol dee dee nail aqduq nvq gaiqlaq bhai thao pav-ai thaq nail ngaol.
34 Meeq dee haol dee dee nail aqduq bhai jiav nail daoqma saljial nail thunq al bhai 'Oeqbal pheeq thaiq nail' dai, khul nail khaoqpheeq ya pheeq thaiq gai nail ngaol.
35 Kovqkhail dai khi phalmanq tsiq dav duq bhai neq, gaiqlaq khe thao pav-aiq thaq nail haqphal nail lavqniil phao ya bhi jiav nail ngaol. Kovqkhail bhai neq, lavqtsel phao maqkhaiq, phalmanq tsiq dav duq bhai neq, lavqmal phao maqkhaiq, teevq phao teevq bal-nvq ya tsiq thaq gai nail ngaol.
36 Haqphal saiqgov nail govkhoiq bhai he pheeq nail haqphal neq, haqphal aqjeel bhai lenl nail kheeljoe, govnav lavmav nail kheeljoe, kheeljoe aqnel yuq khi aqlavq-i mail aqgevq ya guvq dov nail ngaol.
37 Haqphal al khu tseq gai nail haqbhoil aqkaqsal nail aqbhaol-i mail ilkhel ngaq khel lav sav khi heel nail khulu ya khu tseq gai nail ngaol. Ilkhel bhai heel heel leivq leivq gai khi ilkhel ngaq khel nail haqbhoil aqkhil ngaq khaoq bhai neq, giqheel-i mail ya lav sav nail ngaol" dai, ge bhiq-a nail ngaol.