Dov-ail 27
Miqjaq kheq poiv khi laol bhiq nail laolduq nail ganl
1 Heeqphaq Miqyail gaoq ge nail: "Aqkaqsal nail aqbhaol-i mail laolduq liq phao liq khoel dov lal dai, lav sav yaoq. Laolduq al neq, eeq nail phao dai khi heelma phao neq, ngaq cav ya bhi bhee nail nee ovqtavq, daqmoe phao neq hail cav ya bhi bhee nail ngaol.
2 Laolduq al nail lavqtsoel liq tsoel bhai neq, uqkheel khe-ai dul nail bhiltsoel liq laiq ya lav sav gai nail ngaol. Uqkheel al neq, laolduq nee mail teevq gaq khe-ai, ya bhi jiav khi teevq laiq laiq lao-ail, giqheel-i mail ya leivq pheeq gil gai nail ngaol.
3 Laolduq nee tavq nail yalkav juq pevq nail aqtseel leivq nail khaqlail juq bhi khuq bhoel nail iqlaoq juq, khaqlail khaoq dov nail daillav juq, thailphail juq, haqjoil coev tsaoq nail khulu juq, miqjaq miqjiiv tsi bhoel nail iqlaoq juq, niil juq iqsanl giqheel nee mail ya lav sav gil nail ngaol.
4 Laolduq bhai neq giqheel-i mail lav sav-ai thaq nail pheeqjaiq gail ya lav sav nail ngaol. Pheeqjaiq al nail liq phao liq khoel bhai giqheel lavqceiv liq khaoq ya lav sav covq gai nail ngaol.
5 Al ovqtavq, laolduq nail daqmoe teevq gaol pav nee mail ya pheeq thaiq gai nail ngaol.
6 Laolduq bhai bavq nail haqbhoil, aqkaqsal nail aqbhaol-i mail bavqkhaoq lav sav khi bavqkhaoq al neq, giqheel heel leivq ya leivq nail ngaol.
7 Bavqkhaoq neq, a phao nia phao khe covq-ai thaq nail lavqceiv bhai ya tsaoq bhoel gai nail ngaol.
8 Laolduq cov-u phao iqsanl, lavqkhoel bhai khaolbhaoq bhi daol lal dai, dailpav-i mail ya cov nail ngaol. Gaoqjaoq bha ngaq-i mail bhi moel-a nail khe-ai, al hai lav sav gil yaoq" dai, ge bhiq-a nail ngaol.
Uqhuq thaoq nail haqphal saiqgov nail khainl nail ganl
9 Heeqphaq Miqyail gaoq ge nail: "Uqhuq thaoq nail haqphal saiqgov nail khainl lav sav yaoq. Al ovqtavq, khainl nail lavqmal phao 100 cav bhi bhee khi yavq-ai thaq nail haqphal aqjeel juq-i mail iqsanl he jaoq yaoq.
10 Haqphal al juq he jaoq gai nail haqbhoil ilkhel 20 khel dai khi ilkhel tsiq tsaoq nail saiqnaov 20 tsaoq bhai, giqheel-i mail ya lav sav nail nee ovqtavq, ilkhel nail khulu dai khi pultavq phao tsaoq ceiv nail phaq bhai neq, phul-i mail ya lav sav nail ngaol.
11 Lavqtsel phao khe khainl iqsanl, lavqmal phao khe-ai, 100 cav bhi bhee khi haqphal he jaoq nail haqbhoil, ilkhel 20 khel dai khi ilkhel tsiq tsaoq nail saiqnaov 20 tsaoq bhai neq, giqheel-i mail ya lav sav nail nee ovqtavq, ilkhel nail khulu dai khi pultavq phao tsaoq ceiv nail phaq bhai neq, phul-i mail ya lav sav nail ngaol.
12 Haoqnaol phao jiav khi, nlma ga khoeq phao khe khainl neq, 50 cav ya bhi bhee nail ngaol. Haqphal juq he jaoq nail galduq iqsanl ilkhel 10 khel dai khi ilkhel tsiq tsaoq nail saiqnaov 10 tsaoq ya bhi jiav nail ngaol.
13 Sivtavq phao jiav khi nlma dov khoeq phao khe khainl iqsanl, 50 cav ya bhi bhee nail ngaol.
14 Khainl nail govkhoiq teevq phao bal-nvq bhai neq, ilkhel hail khel dai khi ilkhel tsiq tsaoq nail saiqnaov hail tsaoq bhai, 15 cav bhee nail haqphal heelma ya khu tsoiq gai nail ngaol.
15 Al ovqtavq, yaoq bal-nvq yaoq bhai iqsanl, iqmoeq-u khe bal-nvq khe-ai dul dai, ilkhel hail khel dai khi ilkhel tsiq tsaoq nail saiqnaov hail tsaoq bhai 15 cav bhee nail heel nail haqphal ya khu tsoiq gai nail ngaol.
16 Khainl nail govkhoiq lav sav nail haqbhoil, eeq nail phao neq, 20 cav bhee nail haqphal ya lav sav nail ngaol. Haqphal al neq, haqphal aqjeel-i mail ya yavq khi, lenl nail kheeljoe, malkhoeq nail kheeljoe, kheeljoe aqnel niil juq-i mail, aqlavq-i mail aqgevq ya guvq dov nail ngaol. Al ovqtavq, haqphal al keiv ilkhel liq khel bhai ya he jaoq gai khi, ilkhel tsiq tsaoq nail saiqnaov liq tsaoq ya bhi tsaoq nail ngaol.
17 Khainl nail ilkhel iqsanl nail haqbhoil, phul-i mail lav sav-ai thaq nail pultavq phao tsaoq ceiv nail phaq maqkhaiq, phul nail khulu maqkhaiq, giqheel nail saiqnaov maqkhaiq, ya bhi jiav nail ngaol.
18 Khainl he jaoq-u phao, heelma phao 100 cav, eeq nail phao neq, 50 cav ya bhi bhee nail ngaol. He jaoq nail haqphal juq neq, daqmoe phao neq, ngaq cav ya bhi bhee nail nee ovqtavq, yavq-ai thaq nail haqphal aqjeel-i mail maqkhaiq, ilkhel tsiq tsaoq nail saiqnaov bhai neq, giqheel-i mail maqkhaiq, ya lav sav nail ngaol.
19 Uqhuq thaoq nail haqphal saiqgov nail haqbhoil yuq nail yalkav juq iqsanl mail neq, giqheel-i mail ya lav sav gil nail ngaol. Yalkav al juq neq, haqphal saiqgov dai khi khainl nail galduq ya deeq tsaoq gai nail heeqthaiq juq iqsanl aol nail ngaol" dai, ge bhiq-a nail ngaol.
Phalmanq nail haqbhoil aqtseel nail ganl
20 Heeqphaq Miqyail gaoq ge nail: "'Phalmanq khaq mao iqsanl bhi bhaol nail haqbhoil, saqloq aqheeq khe thaoq dov-ai thaq nail haol nail saqloq aqtseel oil lavq yaoq' dai, Ilsaqleiqlav nail tsaol-aq juq bhai daoq bivq yaoq" dai, ge bhiq-a nail ngaol.
21 Aqlonq dai khi aivq nail yaqyov juq neq, uqhuq thaoq nail haqphal saiqgov nail lavqkhoel khe daoqma saljial nail thunq gaiqlaq khe thao pav-ai thaq nail haqphal nail lavqniil phao jiav nail phalmanq juq bhai, kivqhail lail ma phao nee daq-n khi, nqhao lao ma phao kev dai, Heeqphaq Miqyail nail sivtavq bhai ya tovq bhaol gai nail ngaol. Ilsaqleiqlav nail tsaol-aq juq neq, aolthaq kovqthaq niil niai teevq yeel nee teevq yeel, khaq mao iqsanl, ya tsao the nail ngaol" dai ge bhiq-a nail ngaol.