Dov ail 28

Dov ail 28

Philma juq nail aqgaq aqdoi nail ganl

1 Heeqphaq Miqyail gaoq ge nail: "Naoq nail algao Aqlonq dai khi aivq nail yaqyov juq pevq nail Naqdal, Aqbhilhuv, Eilleiqaqsaq dai khi Iltaqmaqlav niil juq Ilsaqleiqlav nail tsaol-aq juq nail lavqkhoel nee khul lavq khi ngaq nail haqbhoil ganl nl nail philma bhi jiovq yaoq.

2 Naoq nail algao Aqlonq nail galduq meeq nail haol nail aqgaq aqdoi ya guvq bhiq nail ngaol. Aqgaq aqdoi al neq, hel daiq meeq dee dee khi seiqleiq khaoqsail ya bhi jiav nail ngaol.

3 Aqlonq bhai tsel dov khi ngaq nail sivtavq bhai philma nail ganl bhi nl nail haqbhoil, ngaq-i mail neenoeq neekha dai khi lavq maoq nl nia nail phao kovpavq bivq-ai thaq nail juq khul jil khi, aivq nail haqbhoil aqgaq aqdoi bhi guvq yaoq.

4 Aqyu juq-i mail ya guvq nail aqgaq aqdoi neq, niil heel ngaol: neema khe doi pheeq nail phaq, Eipho dai khul nail pultavq phao doi dav nail phailkhaoq, lenl nail phailkhaoq heelma, lavqkhoel phao doi bhoel nail yavq-ai thaq nail phailkhaoq heelma, uqjeeq dai khi haqkhaoq, thoil juq pevq nail ngaol. Aqgaq aqdoi al neq, Aqlonq dai khi aivq nail yaqyov juq philma jiovq khi ngaq nail ganl nl-u phao, ya doi nail meeq nail haol nail aqgaq aqdoi juq pevq nail ngaol.

5 Aqgaq aqdoi al juq guvq-u phao, heel nail kheeljoe, lenl nail kheeljoe, govnav lavmav nail kheeljoe, kheeljoe aqnel, dai khi haqphal aqjeel al juq-i mail ya guvq nail ngaol.

Eipho dai khul nail pultavq phao doi dav nail phailkhaoq

6 Eipho dai khul nail pultavq phao doi dav nail phailkhaoq bhai neq, heel nail kheeljoe, lenl nail kheeljoe, govnav lavmav nail kheeljoe, kheeljoe aqnel dai khi yavq-ai thaq nail haqphal aqjeel al juq yuq khi lavqmaoq aqmeeq-ai nl nia nail juq-i mail ya bhi guvq nail ngaol.

7 Eipho nail sivtavq haoqnaol nvq laiq bhai oil cavq nail haqbhoil, bavqpuv bhai tsaq nail neeqtsaq bhilbhai nvq deeq ya bhi jiav nail ngaol.

8 Aqjiovq bhai phee thaiq nail aqmeeq-ai yavq-ai thaq nail haqkhaoq iqsanl, Eipho khe-ai, heel nail kheeljoe, lenl nail kheeljoe, govnav lavmav nail kheeljoe, kheeljoe aqnel, dai khi yavq-ai thaq nail haqphal aqjeel-i mail ya guvq nail ngaol.

9 A bhai nee ngal-aq, sainl aqnav nvq heeq bhai oil khi al nail kovtavq bhai neq, Yaqkov nail yaqyov 12 gaq nail aqmil gevq bhoil gai yaoq.

10 Teevq heeq nail kovtavq bhai neq, kovq gaq nail aqmil eeq nail nee nil nail phao gevq khal leevq khi, nvq heeq teevq heeq bhai gail, jail nail kovq gaq nail aqmil ya gevq bhoel gai nail ngaol.

11 Sainl lav sav nail tsaol-aq juq, junq nail kovq tavq bhai gevq bav gai nail khe-ai, sainl al nvq heeq nail kovtavq bhai iqsanl, Yaqkov nail yaqyov 12 gaq nail aqmil juq bhi gevq bhoel khi, heel nail dailpav liq phao liq khoel bhai ya niavq bav gai nail ngaol.

12 Ilsaqleiqlav nail jeq-e 12 jeq-e pevq nail Yaqkov nail yaqyov juq bhai bhi noeq moel nail haqbhoil, sainl al nvq heeq bhai, Eipho nail bavqpuv bhai tsaq nail neeqtsaq bhilbhai bhi guvq bav gai nail ngaol. Aqlonq neq, Heeqphaq Miqyail nail sivtavq bha lal-u phao, aqyu juq nail aqmil juq bhai bavqpuv kovtavq-ai al hai guvq bav-ai thaq nail ngel-i mail, Heeqphaq Miqyail pevq nail ngal neq, ngaq nail tsaol-aq juq bhai khaq mao gail noeq kev noeq moel nail ngaol.

13 Heel nail dailpav liq phao liq khoel bhao nail nvq laiq lav sav khi,

14 heel aqhaol nail neeqtsaq nvq deeq dai iv khi, heel nail dailpav liq phao liq khoel bhai ya lav sav covq gai nail ngaol" dai, ge bhiq-a nail ngaol.

Neema bhai doi pheeq nail phaq

15 Heeqphaq Miqyail gaoq ge nail: "Ngal neema tsaq nail phaq neq, khul dai, heeq kivq nail galduq yuq nail, neema bhai doi pheeq nail phaq guvq yaoq. Neema bhai doi pheeq nail phaq bhai guvq-u phao, Eipho dai khul nail pultavq phao doi dav nail phailkhaoq al keiv khe-ai, heel nail kheeljoe, lenl nail kheeljoe, govnav lavmav nail kheeljoe, kheeljoe aqnel dai khi, yavq-ai thaq nail haqphal aqjeel niil juq yuq khi lavqmaoq aqmeeq-ai nl nia nail juq-i mail ya bhi guvq nail ngaol.

16 Neema bhai doi pheeq nail phaq neq, haqphal nvq teiv teiv kovq khi davq nil heelma teevq thaol bhee nail liq phao liq khoel ya bhi pevq nail ngaol.

17 Neema bhai doi pheeq nail phaq bhai neq, sainl liq hel ya guvq bav gai nail ngaol. Iqmoeq khal moeq khe hel bhai neq, aqnel nel heel heel nail sainl, aqheel heel nel nel nail sainl dai khi aqniul niul nav nav nail sainl niil juq, ya guvq bav nail ngaol.

18 Nvq hel teevq hel bhai neq, aqheel heel niul niul nail sainl, aqheel heel nail sainl dai khi aqphul phul nail sainl niil juq, ya guvq bav nail ngaol.

19 Hail hel teevq hel bhai neq, aqnel bhai boivq boivq kheq nail sainl, phul leq deel sainl dai khi aqnel bhai aqpheel kheq nail sainl niil juq, ya guvq bavq nail ngaol.

20 Liq hel teevq hel bhai neq, heel tsaiq deel sainl, sainl aqnav dai khi aqniul niul nav nav nail sainl, niil juq iqsanl mail heel nail dailpav liq phao liq khoel bhai ya guvq bav gai nail ngaol.

21 Sainl 12 heeq bhai neq, aivq nail heeq aivq, Ilsaqleiqlav jeq-e nail aqmil teevq mil gevq bav yaoq. Aqmil 12 mil al, junq deeq-ai thaq nail khe-ai, ya gevq bav nail ngaol.

22 Neema bhai doi pheeq nail phaq nail galduq heel aqhaol nail neeqtsaq juq-i mail ya yee nail ngaol.

23 Neema bhai doi pheeq nail phaq nail pultavq khal tavq khe daoq loi nvq laiq bhai, heel nail lavqceiv nvq khaoq dai, ya lav sav covq nail ngaol.

24 Heel nail neeqtsaq nvq deeq nail aqjaq neq, neema bhai doi pheeq nail lavqtsoel khe jiav nail lavqceiv al nvq khaoq bhai, ya covq gai nail ngaol.

25 Jail nail aqjaq nvq jaq neq, Eipho dai khul nail pultavq phao doi dav nail phailkhaoq nail bavqpuv khe tsaq nail neeqtsaq bhilbhai nvq laiq bhai covq nail, heel nail dailpav liq phao liq khoel nvq laiq bhai, ya bhi cavq nail ngaol.

26 A bhai nee ngal-aq, heel nail lavqceiv nvq khaoq lav sav khi neema bhai doi pheeq nail phaq nail ildaoq khal daoq haoqnaol phao khe naltsoel nvq laiq bhai Eipho nail aqjail bhai ya lav sav covq gai nail ngaol.

27 Heel nail lavqceiv nvq khaoq gaoq lav sav khi Eipho sivtavq phao iqsanl ya niavq bav gai nail ngaol. Lavqceiv al nvq khaoq neq, haqkhaoq nail pultavq bavqpuv khe neeqtsaq nail pul-nvq bhai ya bhi tsaq lai nail ngaol.

28 Al ovqtavq, neema bhai doi pheeq nail phaq khe lavqceiv al juq neq, Eipho khe lavqceiv juq nee mail lenl nail neeqtsaq-i mail, ya phee thaiq nail ngaol. Al hai phee thaiq haq neq, neema bhai doi pheeq-ai thaq nail phaq maq ga kha-ail dai, haqkhaoq nail pultavq bhai jiav nia nail ngaol.

29 Aqlonq neq, meeq nail haol nail aqduq bhai aol lai-u phao, ngal neema tsaq nail phaq neq, khul dai, heeq kivq nail galduq yuq nail, neema bhai doi pheeq nail phaq ya doi nail ngaol. Neema bhai doi pheeq nail phaq bhai Yaqkov nail yaq yov juq nail aqmil 12 mil aol nail ngel-i mail, Heeqphaq Miqyail pevq nail ngal neq, ngaq nail tsaol-aq juq bhai khaq mao gail noeq kev nail ngaol.

30 Naol Ullinq dai khi Thulminq oil khi neema bhai doi pheeq nail phaq bhai oil bhoel thaq gai yaoq. Aqlonq, ngaq nail sivtavq bhai khal aol lal-u phao, neema bhai doi pheeq nail phaq doi khi al nvq laiq neema nail aqjail bhai aol haq neq, Ilsaqleiqlav nail tsaol-aq juq bhai Heeqphaq Miqyail pevq nail ngal, neema khal hai tsaq nail-aiq dai, heeq kivq lal naol" dai, ge bhiq-a nail ngaol.

Gaoq jail-ai haq nail philma nail aqgaq aqdoi juq

31 Heeqphaq Miqyail gaoq ge nail: "Eipho dai khul nail pultavq phao doi dav nail phailkhaoq nail lavqkhoel phao, ya doi bhoel nail phailkhaoq heelma bhai neq, lenl nail haqphal-i mail, teevq keiv-i mail ya guvq nail ngaol.

32 Uqhuq nee he tsaoq nail galduq gaoltsi bhai khaolbhaoq ya bhi daol nail ngaol. Khaol bhaoq al maq bhi pav ail nail galduq jail-nq teevq jaoq bhai neq, yavq-ai thaq nail haqphal-i mail aqjaq ya laiq gai nail ngaol.

33 Phailkhaoq heelma nail phail daoq teevq jaoq jaoq lao bhai neq, lenl nail kheeljoe, govnav lavmav nail kheeljoe, kheeljoe aqnel niil juq-i mail aqheeq khe-ai guvq-ai thaq nail phaq dai khi heel nail tsullul ya lav sav covq gai nail ngaol.

34 Al ovqtavq, phail daoq bhai aqheeq khe-ai guvq-ai thaq nail phaq guvq bav, heel nail tsullul guvq bav guvq bav-ail al hai teevq jaoq ya bhi jiav nail ngaol.

35 Aqlonq neq, philma nail ganl nl-u phao, lenl nail phailkhaoq niil ya doi nail ngaol. Aivq neq, meeq nail haol nail aqduq lavqkhoel Heeqphaq Miqyail nail sivtavq bha aol lai-u phao maqkhaiq, dov ail-u phao maqkhaiq, tsullul nail aqthel bhai ya gaiq nail ngel-i mail, aivq sil nail phaq nee mail ya jel-ail nail ngaol.

36 Heel aqhaol nail dailpav jaol laol-i deel teevq laiq lav sav khi "Heeqphaq Miqyail nail meeq nail haol nail gaq" dai, junq nail kovtavq bhai gevq bav gai nail khe-ai, gevq bav gai yaoq.

37 Neeq thel nail pultavq uqjeeq nail kovtavq bhai heel nail dailpav al laiq bhai ivq dao dai, lenl nail neeqtsaq-i mail ya phee thaiq gai nail ngaol.

38 Aqlonq neq, heel nail dailpav al aivq nail neeqthel bhai khaq mao gail ya phee thaiq gai nail ngaol. Al hai phee thaiq gai nail ngel-i mail, Ilsaqleiqlav nail tsaol-aq juq Heeqphaq Miqyail bhai laol bhiq lai-u phao, teevq phaq phaq lav laiq khi mail ngaol-aoq, laol bhiq nail al laiq bhai ngal hav bhoel kivq nail ngaol.

39 Lavq khoel phao khe doi bhoel nail yavq-ai thaq nail phailkhaoq heelma dai khi uqjeeq neq, haqphal aqjeel-i mail ya lav sav nail ngaol. Haqkhaoq iqsanl aqlavq-i mail aqgevq aqmeeq-ai ya guvq dov nail ngaol.

40 Al hai dul dai, Aqlonq nail yaqyov juq doi nail haqbhoil lavqkhoel phao doi bhoel nail yavq-ai thaq nail phailkhaoq heelma, haqkhaoq dai khi uqjeeq heelma niil juq aqyu juq hel daiq meeq khi seiqleiq khaoqsail jiav dai, ya guvq bhiq nail ngaol.

41 Aqgaq aqdoi al juq neq, naoq nail algao Aqlonq dai khi aivq nail yaqyov juq bhai bhi doi yaoq. Aqyu juq ngaq nail ganl bhai nl nail philma pevq nia dai aqtseel ya hoel dav bhiq khi ya tsel pav bhiq nail nee ovqtavq, aqmeeq aqhaol haol dai ya lav haol bhiq nail ngaol.

42 Aqyu juq nail haq sil nail phaq tsoiq lai dai aqjiovq nee mail aqphaq bhai kev nail lavqkhoel phao khe gaq bhoel nail khiltsaoq khilde haqphal aqjeel-i mail guvq bhiq yaoq.

43 Aqlonq dai khi aivq nail yaqyov juq neq, uqhuq thaoq nail haqphal saiqgov nail lavqkhoel bhai aol lal-u phao maqkhaiq, meeq nail haol nail nail aqduq bhai philma nail ganl nl nail galduq laolduq nail aqjail bhai lal-u phao maqkhaiq, oeqbal thaq duq maq jiav dai, maq ya sil nail galduq khiltsaoq khilde al ya gaq nail ngaol. Aol thaq kovq thaq niil laiq neq, Aqlonq dai khi aivq nee mail yavq kha lee thaq nail yaq juq khaq mao kev dai ya tsao the nail ngaol.