Dov-ail 29
Aqlonq dai khi aivq nail yaqyov juq bhai philma bhi pevq nail galduq aqmeeq aqhaol lav haol bhiq nail ganl
1 "Philma juq khe-ai ngaq nail ganl bhi nl nail galduq, Aqlonq dai khi aivq nail yaqyov juq bhai niail hai lav meeq lav haol bhiq yaoq. Malbavq maq daol nail aqkovq maq jiav lal thaq nail niaoqnel laqsil dai khi yaol yaol bhuq nvq maol bhi oil lavq yaoq.
2 Khaqmul aqyav, saqloq aqtseel oil bhoel-ai thaq nail khaqmul aqbhaq dai khi saqloq aqtseel oil deev-ai thaq nail khaqmul aqthul niil juq, bhi oil lavq yaoq. Khaqmul al juq bhai deqtsiq maq oil bhoel dai khal meeq jaiq nail tsoel thoel nail aqthail-i mail ya lav sav nail ngaol.
3 Khaqmul al juq iqsanl mail kavjiav teevq jiav bhai oil bhoel yaoq. A bhai nee ngal-aq, aqkovq maq jiav lal thaq niaoqnel laqsil dai khi yaol yaol bhuq nvq maol nee teevq gaq khe-ai, khaqmul al oil lavq yaoq.
4 Aqlonq dai khi aivq nail yaqyov juq bhai uqhuq thaoq nail haqphal saiqgov govkhoiq nail sivtavq bha khul lavq khi naol aqyu juq nail aqmaol bhai ulcuvq-i mail ya hoel haol bhiq nail ngaol.
5 A bhai nee ngal-aq, philma nail aqgaq aqdoi juq pevq nail, lavqkhoel phao doi bhoel nail yavq-ai thaq nail phailkhaoq heelma, lenl nail phailkhaoq heelma, Eipho dai khul nail pultavq phao doi dav nail phailkhaoq dai khi neema khe doi pheeq nail phaq niil juq, Aqlonq bhai ya bhi doi nail ngaol. Al hai doi gaq gil haq neq, aqmeeq-ai yavq-ai thaq nail haqkhaoq iqsanl ya bhi pavq nail ngaol.
6 Uqhuq bhai neq, uqjeeq ya bhi jeeq khi meeq nail haol nail dailpav al laiq uqjeeq bhai ya phee thaiq bhiq nail ngaol.
7 Al ovqtavq, aqtseel oil khi, aivq nail uqhuq bhai ya hoel dav bhiq nail ngaol..
8 Aivq nail yaqyov juq bhai iqsanl hevq khi, lavqkhoel phao doi bhoel nail yavq-ai thaq nail phailkhaoq heelma ya bhi doi nail ngaol.
9 Al ovqtavq, uqjeeq heelma ya bhi jeeq khi aqjiovq bhai haqkhaoq bhi pavq gaq haq neq, aqyu juq bhai khaq mao iqsanl aolthaq kovqthaq jiav nail khe-ai, philma bhi jiovq kivq nail ngaol.
Al hai nl gil haq neq, Aqlonq dai khi aivq nail yaqyov juq bhai philma nail ganl bhi nl nail dai khi, tsel pav nail phaq pevq nail ngaol.
10 Daonq thail thaiq nail niaoqnel laqsil al maol bhai, uqhuq thaoq nail haqphal saiqgov nail govkhoiq sivtavq bha tseel lavq khi Aqlonq dai khi aivq nail yaqyov juq bhai niaoqnel al maol nail uqhuq-ai aqlavq bhi bavq dav yaoq.
11 Al hai bavq dav gaq haq neq, uqhuq thaoq nail haqphal saiqgov nail govkhoiq-ai ngaq nail sivtavq bhai niaoqnel al maol ya heivq nail ngaol.
12 A bhai nee ngal-aq, naoq nail lavqnoil-i mail niaoqnel al maol nail aqsivq bhai tsaoq deev khi laolduq kovtavq khe jiav nail uqkheel khe-ai dul nail bhiltsoel bhai ya leivq bhiq nail ngaol. Jail nail aqsivq juq neq, laolduq nail daoqthaoq bhai ya hoel nail ngaol.
13 Niaoqnel al maol nail ovqmav lavqkhoel khe aol nail aqtseel iqsanl mail maqkhaiq, aqtseeq khe covq thaiq-ai thaq juq maqkhaiq, aqpeovq nvq laiq dai khi, a bhai covq nail aqtseel maqkhaiq, al juq iqsanl oil khi laolduq kovtavq bhai miqjaq ya kheq poiv gil nail ngaol.
14 Thail hai ngaol-aoq, niaoqnel al maol nail haqjoil, bavkov dai khi aq-ul juq neq, Ilsaqleiqlav nail haqphal saiqgov juq cov khi gaq naq naq nail aqduq nail lavqniil phao ya kheq poiv nail ngaol. Laol bhiq nail niil phaq neq, oeqbal phaiq nail haqbhoil, laol bhiq nail phaq pevq nail ngaol.
15 Yaol yaol bhuq nvq maol nail lavqkhoel khe teevq maol tseel lavq khi, Aqlonq dai khi aivq nail yaqyov juq neq, yaol al maol nail uqhuq bhai aqlavq ya bavq dav nail ngaol.
16 A bhai nee ngal-aq, yaol yaol bhuq al maol bhai heivq khi aqsivq neq, laolduq nail liq phao liq phao-ail ya jiivq bav bhiq nail ngaol.
17 Yaol yaol bhuq al maol teevq daov-nvq teevq daov-nvq dai, ya dev ceiv nail ngaol. Al ovqtavq, aqtseeq aq-ul dai khi aqkhil juq bhai neq, tsiq khi mail uqhuq dai khi jail nail juq bhai teevq gaq khe-ai ya oil jil gai nail ngaol.
18 A bhai nee ngal-aq, yaol teevq maol maol lao, laolduq kovtavq bhai bavq dav khi mail miqjaq ya kheq poiv nail ngaol. Laol bhiq nail niil neq, Heeqphaq Miqyail nail sivtavq bhai miqjaq kheq poiv khi laol bhiq nail phaq pevq nail ngaol. Al ovqtavq, Heeqphaq Miqyail bhai huqbhiq nil nail, miqjaq nee tavq nail laol bhiq nail phaq iqsanl, pevq nail ngaol.
19 Al gil haq neq, yaol yaol bhuq nvq maol teevq maol tseel lavq khi, Aqlonq dai khi aivq nail yaqyov juq bhai yaol al maol nail uqhuq-ai aqlavq ya bhi bavq dav nail ngaol.
20 Yaol al maol heivq gaq haq neq, aqsivq micil oil khi, Aqlonq dai khi aivq nail yaqyov juq nail lavqmal phao khe naqkov naqdaoq bhai maqkhaiq, aqlavq lavqmal lavq phao khe lavqmav bhai maqkhaiq, aqkhil lavqmal khil phao khe phaqma bhai maqkhaiq, ya leivq bhiq nail ngaol. Jail nail aqsivq juq neq, laolduq nail liq phao liq phao-ail nail kovtavq bhai ya jiivq dav bhiq nail ngaol.
21 Laolduq nail kovtavq khe jiav nail aqsivq micil oil khi, aqtseel hoel dav nail aqtseel micil dai oil khi Aqlonq dai khi aivq nail aqgaq aqdoi juq nail kovtavq bhai maqkhaiq, aivq nail yaqyov juq dai khi aqyu juq nail aqgaq aqdoi juq nail kovtavq bhai maqkhaiq, ya jiivq dav bhiq nail ngaol. Thail hai nl nail lavqkhoel, aqyu juq dai khi, aqyu juq nail aqgaq aqdoi meeq lal haol lal-a nail phaq pevq nail ngaol.
22 Yaol yaol bhuq al maol neq, Aqlonq dai khi aivq nail yaqyov juq bhai philma bhi jiovq nail haqbhoil tsel pav-u phao khe yaol pevq nail ngel-i mail, yaol nail aqtseel, aqtseel aol nail daoqmiq, lavqkhoel khe aqtseel, aqtseeq khe covq thaiq-ai thaq nail phaq, aqpeovq nvq laiq, a bhai khe covq nail aqtseel dai khi lavqmal phao khe aqphaq niil juq iqsanl bhai ya oil nail ngaol.
23 A bhai nee ngal-aq, Heeqphaq Miqyail nail sivtavq khe tsiq thaq-ai thaq nail deqtsiq maq aol nail kavjiav nail lavqkhoel khe khaqmul aqyav teevq heeq, saqloq aqtseel oil bhoel-ai thaq nail khaqmul aqbhaq teevq heeq dai khi khaqmul aqthul teevq heeq niil juq oil yaoq.
24 Al juq iqsanl mail, Aqlonq dai khi aivq nail yaqyov juq bhai bivq khi, Heeqphaq Miqyail nail sivtavq bha gaol jaia khi bhi laol bhiq yaoq. Al neq, gaol jai khi laol bhiq nail phaq pevq nail ngaol.
25 A bhai nee ngal-aq, aqyu juq nail aqlavq khe laol bhiq nail al phaq oil khi laolduq kovtavq bhai ya bavq dav nail nee ovqtavq, miqjaq kheq poiv khi laol bhiq nail phaq nee teevq gaq khe-ai, ya kheq poiv nail ngaol. Al hai nl nail neq, Heeqphaq Miqyail bhai miqjaq nee tavq nail huqbhiq nil nail laol bhiq nail phaq pevq nail ngaol.
26 Aqlonq philma bhi jiovq nail haqbhoil tsel pav-u phao khe, yaol al maol nail neema khe haqjoil oil khi, Heeqphaq Miqyail nail sivtavq bha gaol jai nail lavqkhoel nee, ya oil lavq nail ngaol. Thail hai ngaol-aoq, neema khe haqjoil al neq, naoq nail haqbhoil pevq nail ngaol.
27 Philma bhi jiovq nail haqbhoil tsel pav-u phao khe yaol al maol nail neema khe haqjoil dai khi aqphaq khe haqjoil bhai, aqmeeq aqhaol haol dai, lav haol yaoq. Haqjoil al nvq phaq neq, Aqlonq dai khi aivq nail yaqyov juq nail haqbhoil pevq nail nee ovqtavq, Heeqphaq Miqyail nail sivtavq bhai gaol jai khi laol bhiq-a nail phaq iqsanl pevq nail ngaol.
28 Niai nee pultavq, Ilsaqleiqlav nail tsaol-aq juq aqtsaoq tsaoq tavq nail laol bhiq nail phaq laol bhiq-u phao, laol bhiq nail jaiqyaq nail neema khe haqjoil dai khi aqphaq neq, Aqlonq dai khi aivq nee mail yavq kha lee thaq nail yaq juq nail haqbhoil pevq nail nee ovqtavq, yaqhao khaq mao gail, ya tsao the nail ngaol. Niil neq, Ilsaqleiqlav nail tsaol-aq juq-i mail Heeqphaq Miqyail nail sivtavq bhai aqtsaoq tsaoq tavq nail laol bhiq nail phaq pevq nail ngaol.
29 Aqlonq sil-u phao, aivq nee mail yavq kha lee thaq nail yaq juq neq, philma gaoq bhi jiovq dal laivq dai, tsel pav khi aqtseel hoel dav bhiq nail haqbhoil doi nail galduq, Aqlonq nail philma nail aqgaq aqdoi ya oil thaq gai nail ngaol.
30 Aqlonq nail jiq dan aivq nail yaqyov philma jiovq lal khi meeq nail haol nail aqduq bhai ganl nl nail galduq, uqhuq thaoq nail haqphal saiqgov bhai aol lal-u phao, oil thaq-ai thaq nail Aqlonq nail philma nail aqgaq aqdoi sivq n bhee dai, ya doi nail ngaol.
31 Philma bhi jiovq nail haqbhoil tsel pav-u phao, laol bhiq nail yaol yaol bhuq al maol nail haqjoil meeq nail haol nail aqduq teevq dao bhai, naol ya puvq nail ngaol.
32 A bhai nee ngal-aq, Aqlonq dai khi aivq nail yaqyov juq neq, puvq-ai thaq nail haqjoil al dai khi kavjiav nail lavqkhoel khe jail nail khaqmul-ai, uqhuq thaoq nail haqphal saiqgov nail govkhoiq nee, ya jaq nail ngaol.
33 Aqyu juq bhai philma bhi jiovq nail haqbhoil aqmeeq aqhaol lav haol bhiq khi tsel pav-u phao, oeqbal phaiq nail haqbhoil laol bhiq-ai thaq nail haqjoil dai khi khaqmul al juq neq, aqyu juq taivq-ail ya jaq nail ngaol. Aqjal al juq neq, meeq nail haol nail phaq pevq nail ngel-i mail yu maq ya jaq-ail.
34 Haqjoil al dai khi khaqmul al juq, maq jaq gil dai nqhao phao kev dai jiav haq neq, miqjaq-i mail ya kheq poiv nail ngaol. Aqjal al juq neq, meeq nail haol nail ngel-i mail, teevq gaq gail maq ya jaq-ail.
35 Ngaq-i mail daoq bivq-ai thaq nail khe-ai, Aqlonq dai khi aivq nail yaqyov juq bhai philma bhi jiovq nail haqbhoil tsel pav-u phao, sivq n bhee dai, aqbhee ya lav sav bhiq nail ngaol.
36 Oeqbal phaiq nail galduq, niaoqnel laqsil teevq maol yaoq n yaoq n nee mail ya laol bhiq nail ngaol. A bhai nee ngal-aq, laolduq nail haqbhoil laol bhiq nail lavqkhoel nee lav haol khi, aqtseel hoel dav bhiq nail lavqkhoel nee bhi meeq bhi haol lal yaoq.
37 Sivq n bhee dai, yaoq n yaoq n nee al hai ya lav haol nail ngaol. Aq-u phao, laolduq neq, meeq dee haol dee dee lal-a nail ngel-i mail, laolduq bhai lav tuv lai nail khul phaq maqkhaiq, meeq lal haol lal nail ngaol.
Yaoq n yaoq n nee maq ceiv lai dai, laol bhiq nail phaq
38 Laolduq kovtavq bhai yaoq n yaoq n nee maq ceiv lai dai, teevq kovq bhee lal thaq nail yaol yaq nvq maol ya laol bhiq nail ngaol.
39 Nqhao phao teevq maol, kivqhail phao teevq maol dai, ya laol bhiq nail ngaol.
40 Iqmoeq khe yaol aqyaq al maol nee teevq gaq khe-ai, khal meeq jaiq nail tsoelthoel aqthail teevq bhanqb oil khi thaoq dov-ai thaq nail saqloq nail aqtseel aqhaol teevq bhanq nail lavqkhoel khe teevq khe le-nq oil kheq khi, ya laol bhiq nail ngaol. Al ovqtavq, aqheeq tsilju nail ullul iqsanl, teevq bhanq nail lavqkhoel khe teevq khe le-nq bhee dai, laolduq bhai ya hoel dav bhiq nail ngaol. Al hai nl nail neq, ullul juq laol bhiq nail phaq pevq nail ngaol.
41 Kivq hail phao neq, yaol yaol yaq nvq maol teevq maol ya laol bhiq nail ngaol. Nqhao phao khe laol bhiq-a nail tsoel thoel aqthail, saqloq nail aqtseel khi aqheeq tsilju nail ullul bhai khal ge-ai thaq nail khe-ai, kivqhail phao gail ya laol bhiq nail ngaol. Niil neq, Heeqphaq Miqyail bhai miqjaq nee tavq nail huqbhiq nil nail laol bhiq nail phaq pevq nail ngaol.
42 Uqhuq thaoq nail haqphal saiqgov nail govkhoiq bhai miqjaq kheq poiv khi mail laol bhiq nail al nvq phaq, ngaq nail sivtavq bhai teevq yeel nee teevq yeel, ya laol lavq nail ngaol. Jaol duq al duq bhai ngal, nul juq nee mail moel tavq lee khi daoq ge tsaoq lee nail ngaol.
43 Jaol duq al duq bhai ngal neq, Ilsaqleiqlav nail tsaol-aq juq nee mail moel tavq khi ngaq nail seiqleiq khaoqsail-i mail jaol duq al duq bhai meeq nail haol nail aqduq bhi pevq lal nail ngaol.
44 Uqhuq thaoq nail haqphal saiqgov dai khi laolduq bhai bhi meeq bhi haol lal nail nee ovqtavq, ngaq nail galduq philma nail ganl bhi nl nail dai khi, Aqlonq khi aivq nail yaqyov juq bhai ngal lav meeq lav haol bhiq nail ngaol.
45 Ngal neq, Ilsaqleiqlav nail tsaol-aq juq nee mail teevq gaq khe-ai jaol khi aqyu juq nail Miqyail pevq nail ngaol.
46 Al ovqtavq, ngal aqyu juq nee mail teevq gaq khe-ai jaol kivq dai, aqyu juq bhai Iljiltuv milkhaoq nee mail hevq dol lavq-a nail aqyu juq nail Heeqphaq Miqyail ngaol dai, aqyu juq heeq nia lal nail ngaol. Ngal neq, aqyu juq nail Heeqphaq Miqyail pevq nail ngaol" dai, Maolseiq bhai ge bhiq-a nail ngaol.