Dov-ail 30
Huqbhiq nil nail phaq tovq khi danq bhiq nail laolduq
1 Huqbhiq nil nail phaq tovq khi danq bhiq nail galduq laolduq neq, aqkaqsal nail aqbhaol-i mail lav sav yaoq.
2 Laolduq al laiq neq, liq phao liq khoel ya pevq khi, eeq nail phao dai khi heelma phao neq, teevq cav, daqmoe phao neq, nvq cav ya bhi bhee nail ngaol. Lavq tsoel phao jiav nail uqkheel khe-ai dul nail bhiltsoel liq laiq neq, laolduq nee teevq gaq khe-ai, pultavq phao ya bhi covq nail ngaol.
3 Laolduq nail pultavq khe maivphaoq, pul-nvq nee pultavq bha kev dai goivqloiv liq loiv dai khi uqkheel al juq bhai haol nail heel heel leivq ya leivq bhiq nail ngaol. Laolduq nail pultavq phao teevq jaoq iqsanl haol nail heel-i mail aqgevq ya gevq bhiq nail ngaol.
4 Laolduq nail jail-nq, aqgevq nail pul-nvq phao khe, nvq phao nvq phao-ail bhai neq, bavq nail bavqkhaoq tsaoq bhoel nail galduq, heel nail lavqceiv nvq khaoq ya lav sav covq gai nail ngaol.
5 Bavqkhaoq al neq, aqkaqsal nail aqbhaol-i mail lav sav khi heel heel leivq ya leivq gai nail ngaol.
6 Daoqma saljial thunq nail sivtavq bhai jiav nail haqphal nail lavqniil phao khe 'Oeqbal pheeq thaiq nail' dai, khul nail khaoqpheeq nail sivtavq bhai neq, laolduq al laiq ya bavq thaq gai nail ngaol. Jaol duq al dao bhai, ngal naoq-ai nee mail moel tavq lee nail ngaol.
7 Aqlonq neq, yaoq haoq yaoq-ao nee phalmanq bhai hel daiq lal-u phao, laolduq nail kovtavq bhai huqbhiq nil nail phaq tovq khi ya danq bhiq nail ngaol.
8 Kivqhail lail ma phalmanq tovq-u phao gail, huqbhiq nil nail phaq tovq khi ya danq bhiq nail ngaol. Huqbhiq nil nail phaq danq bhiq nail al, Heeqphaq Miqyail nail sivtavq bhai maq ceiv lai dai, teevq yeel nee teevq yeel, ya nl bhiq nail ngaol.
9 Laolduq al duq bhai yaoq phaq yaoq maq ya laol bhiq-ail. Miqjaq kheq poiv khi laol bhiq nail jaiqyaq juq maqkhaiq, govtsail tsail neev laol bhiq nail phaq maqkhaiq, laol bhiq nail ullul yaoq phaq yaoq maqkhaiq, maq ya laol bhiq-ail.
10 Aqlonq neq, teevq kovq bhai teevq pov oeqbal phaiq bhiq nail haqbhoil, laol bhiq nail jaiqyaq nail aqsivq oil khi laolduq nail pultavq khe uqkheel khe-ai dul nail bhiltsoel liq laiq bhai ya leivq bhiq nail ngaol. Al hai leivq khi pultavq, laolduq aqhaol haol lal nail ngaol. Ganl thoil neq, teevq yeel nee teevq yeel, yaoq kovq yaoq-ao nee, al hai ya nl dal laivq nail ngaol. Khul khi mail dai ngal-aq, laolduq thoil laiq neq, Heeqphaq Miqyail nail galduq meeq dee haol dee dee nail laolduq pevq nail ngaol.
Uqhuq thaoq nail haqphal saiqgov nail galduq phul danq nail ganl
11 A bhai nee ngal-aq Heeqphaq Miqyail Maolseiq bhai niail hai gaoq ge bhiq-a nail:
12 "Naol Ilsaqleiqlav nail tsaol-aq juq bhai aqmil gov-u phao, nalgoel maq bhi kev lee nail galduq, aqyu juq yovqgavq nail doevqyeel nail aqphoiq yovqgavq, Heeqphaq Miqyail bhai ya bivq nail ngaol.
13 Aqmil khal gevq bhoel nail yaoq gaq yaoq-ao nee, doevqyeel nail aqphoiq neq, phul teevq bavq. Phul al teevq bavq neq, Heeqphaq Miqyail bhai danq bhiq nail phaq pevq nail ngaol. (Doevqyeel nail aqphoiq al neq, uqhuq thaoq nail haqphal saiqgov lavqkhoel bhai dal ceiv-ai thaq nail phul teevq bavq a dai taivq-ail ya bhi pevq nail ngaol. Phul al teevq bavq neq, geiqlal nail phul 20 phoiq nail ngaol.)
14 20 kovq nee mail pultavq, yaoq gaq yaoq-ao nee mail Heeqphaq Miqyail bhai phul al hai ya danq bhiq nail ngaol.
15 Heeqphaq Miqyail bhai nul juq nail doevqyeel nail galduq phul danq oil lavq-u phao, hulmeeq juq maqkhaiq, ge-ai thaq nail nee jaiq dai, maq ya oil bhoel-u khe-ai, haq nail juq maqkhaiq, maq bhee dai iqsanl mail, maq ya oil bhoel-ail.
16 Naol neq, Ilsaqleiqlav nail tsaol-aq juq nail haqbhoil oeqbal phaiq bhiq nail phul al juq bhai hav bhoel khi, uqhuq thaoq nail haqphal saiqgov nail galduq ya yuq nail ngaol. Phul al bhaq da nee, aqyu juq nail doevqyeel haol lal khi, ngal aqyu juq bhai maq nioil peivq-ail" dai, ge bhiq-a nail ngaol.
Giqheel nail thailphail phail ma
17 A bhai nee ngal-aq, Heeqphaq Miqyail Maolseiq bhai niail hai gaoq ge bhiq-a nail ngaol:
18 Aqlavq tsiq nail galduq, giqheel nail thailphail phail ma dai khi giqheel-i mail bavq dav duq lav sav yaoq. Thailphail phail ma al laiq bhai, uqhuq thaoq nail haqphal saiqgov dai khi laolduq nail gaiqlaq bhai bavq thaq gai khi, ulcuvq laoq bhoel thaq gai yaoq.
19 Aqlonq dai khi aivq nail yaqyov juq neq, aqyu juq nail aqkhil aqlavq bhai thailphail phail ma al phail khe aol nail ulcuvq-i mail ya tsiq nail ngaol.
20 Aqyu juq neq, haqphal saiqgov bhai maq aol lai nail iqmoeq bhai maqkhaiq, miqjaq kheq poiv khi laol bhiq nail phaq Heeqphaq Miqyail bhai maq laol bhiq nail iqmoeq bhai maqkhaiq, aqkhil aqlavq tsiq nail bhaq da nee, sil nail phaq nee mail ya jel-ail nail phaq pevq nail ngaol.
21 Aqyu juq maq ya sil dai, yaoq pov yaoq-ao nee, aqkhil aqlavq ya tsiq nail ngaol. Ya tsao the nail niil laiq neq, Aqlonq dai khi aivq nee mail yavq kha lee thaq nail yaq juq iqsanl mail teevq yeel nee teevq yeel, ya tsao the nail phaq pevq nail ngaol" dai, ge bhiq-a nail ngaol.
Uqhuq-ai hoel dav nail aqtseel
22 A bhai nee ngal-aq, Heeqphaq Miqyail Maolseiq bhai niail hai gaoq ge bhiq-a nail ngaol:
23 "Khal meeq jaiq nail goe nail phaq niil juq oil lavq yaoq. Mullaq nail aqtseel kovq kiqloq, huqbhiq nil nail aqbhaol bavkov hail kiqloq, phaoqphil hail kiqloq,
24 aqbhaol bavkov aqthail aqheel kovq kiqloq, niil juq bhai uqhuq thaoq nail haqphal saiqgov lavqkhoel bhai dal ceiv-ai thaq nail khe-ai, hav daiq khi saqloq nail aqtseel nee mail teevq bhun oil kheq yaoq.
25 Al juq iqsanl mail oil kheq khi, meeq nail haol nail hoel dav nail aqtseel lav sav yaoq. Huqbhiq nil nail aqtseel aqmeeq-ai lav sav nia nail juq khe-ai, lav sav yaoq. Al neq, meeq nail haol nail hoel dav nail aqtseel pevq nail ngaol.
26 Aqtseel niil niai yuq khi uqhuq thaoq nail haqphal saiqgov dai khi daoqma saljial nail thunq bhai maqkhaiq,
27 kovqkhail nee tavq nail yalkav yaoq phaq yaoq-ao nee bhai maqkhaiq, phalmanq tovq nail nee tavq lai nail yaoq phaq yaoq-ao nee bhai maqkhaiq, huqbhiq nil nail phaq tovq khi danq bhiq nail laolduq bhai maqkhaiq,
28 miqjaq kheq poiv khi laol bhiq nail laolduq nee tavq nail yalkav yaoq phaq yaoq-ao nee bhai maqkhaiq, thailphail phail ma dai khi tsiq thaq duq bhai maqkhaiq, huqbhiq nil nail aqtseel al leivq bhiq yaoq.
29 Thoil juq bhai thail hai lav meeq lav haol nail bhaq da nee, mal dil meeq lal haol lal nail ngaol. Al ovqtavq, a bhai khal yao lai nail yaoq phaq yaoq-ao nee iqsanl, meeq lal haol lal nail ngaol.
30 Aqlonq dai khi aivq nail yaqyov juq bhai philma jiovq khi ngaq nail ganl bhi nl nail haqbhoil, huqbhiq nil nail aqtseel al-i mail aqyu juq bhai hoel dav khi bhi meeq bhi haol lal yaoq.
31 Al ovqtavq, Ilsaqleiqlav nail tsaol-aq juq bhai niail hai ge bhiq yaoq: 'Niil neq, ngaq nail meeq nail haol nail aqtseel teevq yeel nee teevq yeel ya hoel dav nail phaq pevq nail ngaol.
32 Aqtseel niil khaq sil gaq bhai gail maq ya hoel dav-ail. Aqtseel niil niai nee dul lai nail aqtseel gail, maq ya lav sav dov-ail. Khul khi mail dai ngal-aq, aqtseel niil neq, meeq nail haol nail aqtseel pevq nail ngel-i mail, nul juq gail meeq nail haol nail aqtseel al ya hav bhoel nail ngaol.
33 Khaq sil gaq maqkhaiq, aqtseel niil niai nee dul lai dai, lav sav dov khi philma maq ngel nail juq bhai hoel dav bhiq haq neq, ngaq nail tsaol-aq juq nee mail ya bhi dov-ail nail ngaol" dai, ge bhiq-a nail ngaol.
Huqbhiq nil nail danq bhiq nail phaq
34 A bhai nee ngal-aq, Heeqphaq Miqyail Maolseiq bhai niail hai gaoq ge bhiq-a nail ngaol: "Bheiqdeiqlal dai khul nail aqbhaol nee dov lee thaq nail huqbhiq nil nail khaqjiq, laoqpav laolpav, gaqlaqbhanq dai khul nail aqbhaol nail khaqjiq dai khi aqhaol haol deel huqbhiq nil nail ullul aqheel al juq iqsanl mail teevq gaq khe-ai, hav daiq yaoq.
35 Huqbhiq nil nail aqtseel aqmeeq-ai lav sav nia nail juq-i mail lav sav nail khe-ai, huqbhiq nil nail al juq oil kheq khi lav sav dov yaoq. Aqmeeq aqhaol haol khi haol taiv dai bhi pevq lal nail galduq, huqbhiq nil nail al bhai cavq devq oil bhoel yaoq.
36 Huqbhiq nil nail teevq pav ga nav juq bhai aqmel mel dai thaoq khi aqthail al neq, uqhuq thaoq nail haqphal saiqgov khe jiav nail daoqma saljial nail thunq nail sivtavq bhai ya haiq nail ngaol. Huqbhiq nil nail al bhai meeq dee haol dee dee nail huqbhiq nil nail phaq dai ya hav bhoel nail ngaol.
37 Nul juq yovqgav yovqgavq yuq nail galduq, huqbhiq nil nail al phaq maq ya lav sav dov-ail. Huqbhiq nil nail niil neq, Heeqphaq Miqyail bhai danq bhiq nail phaq pevq nail ngel-i mail, meeq nail haol nail huqbhiq nil nail phaq dai, ya hav bhoel gai nail ngaol.
38 Huqbhiq nil nail niil niai yovqgav yovqgavq nail galduq dai lav sav nail gaq neq, ngaq nail tsaol-aq juq nee mail ya bhi dov-ail nail ngaol" dai ge bhiq-a nail ngaol.