Dov-ail 31
Uqhuq thaoq nail haqphal saiqgov nail galduq nl nia hal nia nail juq
1 A bhai nee ngal-aq Heeqphaq Miqyail neq, Maolseiq bhai niail hai gaoq ge bhiq-a nail ngaol:
2 "Nal daiq yaoq. Ngal neq, Yuldav nail jeq-e nail lavqkhoel khe Hullav nail aqjievq, Ulliv nail yaqyov pevq nail Bheiqsaqleiqlav bhai tsel-aoq nail ngaol.
3 Ngal aivq bhai ngaq nail aqhaqlal hoel dav bhiq-a nail ngel-i mail, aivq neq, neenoeq neekha maqkhaiq, nl nia nail phaq maqkhaiq, aqlavq-i mail aqmeeq-ai teivq nia nail phaq maqkhaiq, bhee nail ngaol.
4 Aivq neq, phul, heel dai khi giqheel-i mail teivq nail phao neq, aqmeeq-ai nl nia nail teevq gaq ngaol.
5 Al ovqtavq, lovmav aqmeeq gaiq dov khi niavq bav nail phao maqkhaiq, aqbhaol bhai maolkhoel lav sav dov nail phao maqkhaiq, aqlavq-i mail khal lav sav nail phao maqkhaiq, aqmeeq-ai nl nia nail teevq gaq iqsanl pevq nail ngaol.
6 Aivq bhai bhi tsao jao-ai nail galduq Danq nail jeq-e pevq nail Aqhilsaqmal nail yaqyov Aqhaolliqbhal bhai ngal tsel-aoq nail ngaol. Ngaq-i mail naoq bhai daoq khal bivq-a nail khe-ai, lav sav nia nail galduq, yaoq gaq yaoq-ao nee bhai iqsanl lav sav nia nail phaq, ngal bivq-ai thaq nail ngaol.
7 Aqyu juq neq, uqhuq thaoq nail haqphal saiqgov maqkhaiq, daoqma saljial nail thunq dai khi 'Oeqbal pheeq thaiq nail' dai, khul nail khaoqpheeq maqkhaiq, haqphal saiqgov nail lavqkhoel khe jiav nail nlmaoq juq iqsanl mail maqkhaiq,
8 kovqkhail dai khi al nail kovtavq khe yalkav juq maqkhaiq, heel aqhaol nail phalmanq tsiq dav duq dai khi a bhai nee tavq nail nlmaoq juq maqkhaiq, huqbhiq nil nail phaq tovq khi danq bhiq nail laolduq maqkhaiq,
9 miqjaq kheq poiv nail lavqkhoel nee laol bhiq nail laolduq dai khi a bhai nee tavq nail yalkav maqkhaiq, thailphail phail ma dai khi tsiq thaq duq maqkhaiq,
10 aqmeeq-ai guvq-ai thaq nail philma Aqlonq nail meeq nail haol nail phailkhaoq maqkhaiq, aivq nail yaqyov juq philma jiovq khi ganl nl-u phao, doi nail aqmeeq-ai guvq-ai thaq nail phailkhaoq juq maqkhaiq,
11 meeq nail haol nail aqduq nail haqbhoil hoel dav nail aqtseel maqkhaiq, huqbhiq nil nail phaq maqkhaiq, al juq iqsanl mail ngal naoq bhai daoq bivq-a nail khe-ai, ya lav sav nail ngaol" dai, ge bhiq-a nail ngaol.
Jaol n n-gaol
12 A bhai nee ngal-aq, Heeqphaq Miqyail Maolseiq bhai niail hai gaoq ge bhiq-a nail ngaol:
13 "Ilsaqleiqlav nail tsaol-aq juq bhai niail hai ge bhiq yaoq: 'Ngaq nail jaol-n n-gaol bhai aqmeeq-ai tsao the yaoq. Khul khi mail dai ngal-aq, jaol-n n-gaol neq, ngal khi mail nul juq nail gaiqlaq bhai teevq yeel nee teevq yeel saljial jaq-ai thaq nail salkhil pevq nail, ngel-i mail ngaol. Ngal neq, nul juq bhai bhi meeq bhi haol lal lavq-a nail Heeqphaq Miqyail pevq nail ganl bhai nul juq ya heeq kivq nail galduq, bhi tsao the-a nail phaq pevq nail ngaol.
14 Jaol n n-gaol bhai aqmeeq dai, ya tsao the nail ngaol. Jaol n n-gaol neq, nul juq nail galduq meeq nail haol nail aq-n pevq nail ngel-i mail, jaol-n n-gaol bhai maq tsao the nail gaq neq, heivq nail bhai ya daq khi, ganl nl nail gaq neq, ngaq nail tsaol-aq juq nail lavqkhoel nee mail ya the dov bhiq nail ngaol.
15 Nul juq jaol-n yaoq jao yaoq-ao nee mail, kovq n ganl nl nail ya nail ngaol. Thail hai ngaol-aoq, sivq n teevq n bhai neq, Heeqphaq Miqyail nail galduq danq-ai thaq nail gaq naq naq nail aq-n pevq nail ngaol. Aq-u n-gaol ganl nl nail gaq bhai neq, ya heivq nail ngaol.
16 Ilsaqleiqlav nail tsaol-aq juq neq teevq yeel nee teevq yeel jaol-n n-gaol ya tsao the nail ngaol. Niil neq, nqmaq maqluv halyeel ivq nail daoqma saljial pevq nail ngaol.
17 Niil neq, khaq mao gail ngal dai khi Ilsaqleiqlav nail tsaol-aq juq-i mail jaq-ai thaq nail daoqma saljial nail salkhil pevq nail ngaol. Khul khi mail dai ngal-aq, kovq n bhee dai Heeqphaq Miqyail neq, nqtavq khi mail miltsaq teivq-a nail ngaol. Thail hai ngaol-aoq, sivq n n-gaol neq, aivq ganl maq nl dai, gaq naq naq-a nail ngaol'" dai, Maolseiq bhai ge bhiq-a nail ngaol.
18 Heeqphaq Miqyail neq, Silnaq gaoqjaoq bha Maolseiq bhai ge bhiq gaq-u phao, aivq nail aqlavq-i mail gevq-ai thaq nail daoqma saljial nee tavq khi salkhil pevq nail lovmav dailpav nvq pav bivq-a nail ngaol.