Dov-ail 32
Heel nail niaoqnel maolkhoel teivq-a nail ganl
1 Maolseiq neq, gaoqjaoq daoqthaoq bhai maq yavq kha-ail dai, mao dai jaol maol lavq-u phao, Ilsaqleiqlav nail tsaol-aq juq, Aqlonq jaol nail bha lal khi, niail hai ge bhiq-a nail ngaol: "Lal yaoq, ngadao juq bhai Iljiltuv nail milkhaoq nee mail hevq dol leevq lavq-a nail Maolseiq al gaq neq, khul pevq ail-aoq thaq nail dai, maq heeq kivq nail bhaq da nee, ngadao juq bhai hevq daiq nia nail miqyail teevq gaq gaq nav lav sav lavq yaoq" dai, hal bhiq-a nail ngaol.
2 Aqlonq gail, "Nul juq nail khaqma dai khi yaqmiq yaqyov juq-i mail oil-nvq thaq nail heel nail naqdev juq bhai loev khi ngal jaol nail bha oil leevq yaoq" dai, ge bhiq-a nail ngaol.
3 Al heel ngel-i mail, tsaol-aq al juq neq, yaoq gaq yaoq-ao nee mail aqyu juq nail heel naqdev juq oil loev khi, Aqlonq jaol nail bha oil laivq bhiq-a nail ngaol.
4 Aqlonq neq, heel nail naqdev al juq cavq phaq khi mail heel nail niaoqnel niaoq yaq nail maolkhoel teivq bhiq-a nail ngaol. Aq-u phao, aqyu juq neq "Ilsaqleiqlav nail tsaol-aq juq-ol, miqyail niil gaq neq, nul juq bhai Iljiltuv nail milkhaoq nee mail hevq dol leevq lavq-a nail ngadao juq nail miqyail pevq nail ngaol" dai, ge-a nail ngaol.
5 Aqlonq ganl al juq bhai ya moel-u phao, heel nail niaoqnel niaoq yaq nail sivtavq bhai laolduq lav sav khi, "Niaohao Heeqphaq Miqyail bhai aqbhee lav sav bhiq nail ngaol" dai, ge kha bhiq-a nail ngaol.
6 Haoqnao n n-gaol nqhao lao ma, Ilsaqleiqlav nail tsaol-aq juq neq, miqjaq kheq poiv khi laol bhiq nail phaq dai khi, aqtsaoq tsaoq tavq nail laol bhiq nail phaq laol bhiq-a nail ngaol. Laol bhiq nail phaq laol bhiq gaq-u phao, aqyu juq jaq bov daol bov khi yaqyov-aq yaqmai-aq juq teevq gaq khe-ai, jaol tavq-a nail ngaol.
7 Aq-u phao, Heeqphaq Miqyail neq, Maolseiq bhai niail hai ge bhiq-a nail ngaol: "Lavqtsail mail gaoqjaoq daoqthaoq bhai yavq kha-ail yaoq. Iljiltuv milkhaoq khe naoq-i mail hevq dol leevq-a nail naoq nail tsaol-aq juq neq, luq-ail seil-ail dai, nl-ao nail ngaol.
8 Aqyu juq neq, ngaq-i mail bivq-ai thaq nail daoq bhai lavqtsail mail khaonq ha-a nail ngaol. Al ovqtavq, heel nail niaoqnel niaoq yaq teivq khi mail a bhai uqhuq thaoq thaoq-ail laol bhiq-a nail ngaol. Aqyu juq ge nail: 'Ilsaqleiqlav nail tsaol-aq juq-ol, niil neq, ngadao juq nail miqyail ngaol. Miqyail niil gaq neq, ngadao juq bhai Iljiltuv nail milkhaoq nee mail hevq dol leevq lavq-a nail gaq ngaol' dai, ge kha nail ngaol" dai, ge bhiq-a nail ngaol.
9 Al ovqtavq, Heeqphaq Miqyail gaoq ge nail: "Tsaol-aq niil juq neq, neema aqgaol kha dai gaol nail dai, ngal heeq kivq-ao nail ngaol.
10 Ngaq bhai thaq lav tsoiq lal. Ngal neema phail nail lavqkhoel aqyu juq bhai lav cov gil nail ngaol. Al ovqtavq, naoq bhai tsaol jeq-e je ma bhi pevq lal nail ngaol" dai iqsanl, ge bhiq-a nail ngaol.
11 Thail hai ngaol-aoq, Maolseiq neq, aivq nail Heeqphaq Miqyail neema phail nail sivq ail dai, niail hai thaoq hal-a nail ngaol: "Heeqphaq Miqyail-ol, naol neq, Iljiltuv milkhaoq nee mail eeq dee dee nail naoq nail bhaqaoq dai khi gaq kav nail naoq nail aqlavq-i mail hevq dol leevq lavq-a nail naoq nail tsaol-aq juq bhai khul khi mail neema thoi dai, phail nail-aiq.
12 Khul khi mail Iljiltuv nail tsaol-aq bhai, 'Ilsaqleiqlav nail tsaol-aq juq nail Miqyail neq, aqyu juq iqsanl mail bhai gaoqjaoq juq bha hevq dal laivq khi, miltsaq kovtavq nee siv peivq gil nail galduq, hevq dol laivq thaq nail niil' dai, bhi ge nail-aiq. Naoq-i mail neema phail nail miqjaq khe-ai bhaol nail phaq lav phal khi, jeenq thaiq nail lavqkhoel nee, naoq nail tsaol-aq juq bhai thaq lav cov lavq.
13 Naoq nail yaqkav pevq nail Aqbhaqlaqhaq, Ilcav dai khi Yaqkov aqyu juq bhai noeq kev lavq yaoq. Naol neq, aqyu juq nee mail yavq kha lee thaq nail yaq juq bhai, nqtavq khe aqgil khe-ai bhi mao lal naol dai maqkhaiq, naoq-i mail saljial jaq-ai thaq nail milkhaoq bhai, aqyu juq nee mail yavq kha lee thaq nail yaq juq bhai khaq mao kev dai, bivq naol dai, naoq-i mail khanq khi jaq-ai thaq nail saljial bhai maqkhaiq, noeq kev lavq yaoq" dai, hal-a nail ngaol.
14 Al heel ngel-i mail, Heeqphaq Miqyail neq, neema phail nail sivq-ail khi, aivq nail tsaol-aq juq bhai, lav cov nail dai, lainq-ai thaq nail phaq nee, bhi jel ail-a nail ngaol.
15 A bhai nee ngal-aq, Maolseiq neq, haoqnaol naol kovq kovq nail lavqkhoel nee, daoqma saljial nee tavq khi salkhil pevq nail lovmav dailpav nvq pav nvq pav-ail bavq khi gaoqjaoq daoqthaoq bhai yavq kha ail-a nail ngaol.
16 Lovmav dailpav al nvq pav neq, Miqyail-i mail lav sav dov-ai thaq khi, lovmav dailpav khe gevq-ai thaq nail haoqgavq iqsanl, aivq nail aqlavq-i mail gevq-ai thaq nail phaq pevq nail ngaol.
17 Yaolsuv neq, tsaol-aq al juq-i mail gul nail aqthel bhai ya gaiq-u phao, Maolseiq bhai, "Haqphal saiqgov juq cov khi, gaq naq naq nail aqduq-ai genl dev nail aqthel khe-ai, gaiq lal-il" dai, ge bhiq-a nail ngaol.
18 Maolseiq ge nail: "Ngaq bhai gaiq lal nail aqthel neq, genl dev gaq thaq nail aqthel gail maq ngel, genl dev sunq thaq nail aqthel gail maq ngel. Daoqsel gul nail aqthel niil" dai, ge bhiq-a nail ngaol.
19 Maolseiq neq, aqyu juq-i mail gaq naq naq nail haqphal saiqgov juq bhai kev ail-u phao, niaoqnel niaoq yaq nail maolkhoel bhai maqkhaiq, tsaol-aq juq bhoeloe niu nail bhai maqkhaiq, ya moel khi neema al jaiq-ail phail lal bhiq-a nail lavqkhoel nee, aivq-i mail bavq khal leevq-a nail lovmav dailpav al nvq pav bhai gaoqjaoq daoqthaoq-ai liv pav gai aivq-a nail ngaol.
20 Aivq neq, aqyu juq-i mail teivq-ai thaq nail heel nail niaoqnel niaoq yaq bhai poiv khi, aqthail thaoq thail-a nail nee ovqtavq, aqthail al ulcuvq nail kovtavq bhai haiq dav khi Ilsaqleiqlav nail tsaol-aq juq bhai bhi daol-a nail ngaol.
21 A bhai nee ngal-aq, Maolseiq neq, Aqlonq bhai, "Tsaol-aq niil juq, naoq bhai khul nl lavq-a nail ngel-i mail, naol aqyu juq bhai niil daiq daiq-ail eeq nail oeqbal nl dai, hevq dai bhiq-a nail-aiq" dai, nal daiq bhiq-a nail ngaol.
22 Aq-u phao, Aqlonq ge nail: "Ngaq bhai neema thaq phail lavq, ngaq nail heeqphaq-ol. Tsaol-aq niil juq neq, haq-eiv nail phaq nl nail galduq neema kha dai kev nail-aiq dai, naol heeq nia nail ngaol.
23 Aqyu juq neq, ngaq bhai niail hai hal lal-a nail ngaol: 'Iljiltuv nail milkhaoq nee ngadao juq bhai hevq dol leevq lavq-a nail Maolseiq al gaq neq, sil thaq nail meeq, doevq-ai haq nail meeq dai, maq heeq kivq nail ngel-i mail, nv juq bhai gailkhaol bhi hevq daiq nail miqyail teevq gaq lav sav lavq-o' dai, hal nail ngaol.
24 Al heel ngel-i mail, ngal aqyu juq bhai, 'Nul juq nail heel goe-nq thaq nail juq loev khi ngaq bhai oil lavq yaoq" dai, ge bhiq-a nail ngaol. A bhai nee ngal-aq, aqyu juq nail heel, khal ya-a nail juq miqjaq bhai liv poiv-u phao, niaoqnel niaoq yaq niil dov lal-a nail ngaol" dai, ge bhiq-a nail ngaol.
25 Ilsaqleiqlav nail tsaol-aq juq neq, Aqlonq-i mail gaq bivq nail lavqkhoel he thaiq nail maq ya nail tsaol-aq pevq ail-a nail ngel-i mail, aqyu juq bhai neejiav jiav nail juq-i mail el hel kha nail phaq pevq lal-a nail ngaol dai, Maolseiq ya moel-a nail ngaol.
26 Al heel ngel-i mail, Maolseiq aqyu juq nail gaq naq naq nail haqphal saiqgov juq nail khainl nail govkhoiq bhai thul phaol khi "Heeqphaq Miqyail phao jaol nail yaoq gaq yaoq-ao nee mail, ngal jaol nail phao lal yaoq" dai, gul kha bhiq-a nail ngaol. Aq-u phao, Leiqbhil nail jeq-e juq iqsanl mail, Maolseiq jaol nail phao jil gil lal-a nail ngaol.
27 Maolseiq aqyu juq bhai ge bhiq-a nail: "Ilsaqleiqlav nail tsaol-aq juq nail Heeqphaq Miqyail ge nail: 'Nul juq yaoq gaq yaoq-ao nee mail thaoma bavq khi nul juq nail gaq naq naq nail haqphal saiqgov juq nail sivtavq phao maqkhaiq, haoqnaol phao maqkhaiq, doi dai ail khi, nul juq nail aqivq jaqbheq juq, aqtsaoq aqlaol juq, yovqgavq nee ilkhaiq tavq nail tsaol-aq juq bhai heivq yaoq' dai, ge lavq-a nail ngaol" dai, ge bhiq-a nail ngaol.
28 Leiqbhil nail jeq-e juq neq, Maolseiq-i mail daoq bivq-a nail khe-ai nl-a nail ngel-i mail, aq-u n-gaol tsaol-aq 3000 gaq sil-a nail ngaol.
29 A bhai nee ngal-aq, Maolseiq neq, Leiqbhil nail jeq-e juq bhai niail hai gaoq ge bhiq-a nail ngaol: "Yaq n n-gaol nul juq, nul juq nail aqmaol Heeqphaq Miqyail bhai danq bhiq khi, nul juq nail yaqyov aqthel, aqivq jaqbheq aqthel juq bha kev dai, genl dev-a nail ngel-i mail, yanq n n-gaol nul juq geeqlaoq ya nail ngaol" dai, ge bhiq-a nail ngaol.
30 Haoqnao n n-gaol Maolseiq neq, Ilsaqleiqlav nail tsaol-aq juq bhai, "Nul juq neq, oeqbal eeq dee dee nail teevq laiq nl laiq-ao nail ngaol. Niil aq-il, ngal Heeqphaq Miqyail jaol nail gaoqjaoq bha dav lai nail ngaol. Nul juq nail oeqbal phaiq lavq nail galduq aivq bhai thaoq hal nail ya-ail jaol-aq" dai, ge bhiq-a nail ngaol.
31 Al heel ngel-i mail, Maolseiq neq, Heeqphaq Miqyail jaol nail bha gaoq kovq dav lai khi, "Hel daiq yaoq. Tsaol-aq niil juq neq, eeq dee dee nail oeqbal nl laiq-ao nail ngaol. Heel nail miqyail lav sav khi uqhuq thaoq-a nail ngaol.
32 Thail hai ngaol-aoq, niil aq-il aqyu juq nail oeqbal bhai phaiq bhiq lavq yaoq. Maq phaiq bhiq kivq haq neq, ngaq nail aqmil naoq nail haoqgavq phaldoiq nail lavqkhoel nee mail siv peivq lavq yaoq" dai, thaoq hal lai-a nail ngaol.
33 Aq-u phao, Heeqphaq Miqyail Maolseiq bhai niail hai ge kovq bhiq-a nail ngaol: "Ngaq-ai oeqbal nl bheeq-a nail tsaol-aq juq nail aqmil bhai taivq-ail ngaq nail haoqgavq phaldoiq lavqkhoel nee mail siv peivq bhiq nail ngaol.
34 Niil aq-il, ail khi ngaq-i mail naoq bhai ge bhiq-a nail milkhaoq bhai aqyu juq-ai hel-aivq bhiq yaoq. Ngaq nail nqtavq gaqkhoel neq, naoq nail iqmoeq phao ail khi, gailkhaol hevq daiq lavq nail ngaol. Thail hai ngaol-aoq, aqyu juq nail oeqbal nail galduq ngaq-i mail yalkhaq dal nail aqyanq kev lee nail ngaol" dai, ge bhiq-a nail ngaol.
35 Al heel ngel-i mail, Heeqphaq Miqyail neq, Ilsaqleiqlav nail tsaol-aq juq nail kovtavq bhai nal dee goel dee dee nail phaq bhi kev lee-a nail ngaol. Khul khi mail dai ngal-aq, aqyu juq neq, Aqlonq-i mail lav sav-a nail heel nail niaoqnel niaoq yaq bhai uqhuq thaoq-a nail ngel-i mail ngaol.