Dov-ail 33
Silnaq gaoqjaoq nee mail dov-ail nail galduq, Miqyail-i mail bivq-a nail daoq
1 A bhai nee ngal-aq, Heeqphaq Miqyail Maolseiq bhai niail hai gaoq ge bhiq-a nail ngaol: "Naol Iljiltuv nail milkhaoq nee hevq dol leevq-a nail tsaol-aq niil juq nee mail teevq gaq khe-ai, jaol duq niil duq nee dov-ail khi, ngaq-i mail Aqbhaqlaqhaq, Ilcav dai khi Yaqkov bhai bivq naol dai, saljial jaq-ai thaq nail milkhaoq bha lai yaoq. Ngal aqyu juq bhai, 'Nul juq nee mail yavq kha lee thaq nail yaq juq bhai milkhaoq al khaoq bivq naol' dai, ge bhiq-a nail ngaol.
2 Nul juq bhai sivtavq phao nee gailkhaol bhi hevq daiq nail galduq nqtavq gaqkhoel bhai ngal bhi lee naol. Khaqnanq nail jeq-e, Aqmaolliv nail jeq-e, Hiltiv nail jeq-e, Pheiqliqsil nail jeq-e, Hilwil nail jeq-e dai khi Yeiqbhulsil nail jeq-e niil juq bhai ngal the dov nail ngaol.
3 Bhaiqtsil bhaiqeel dai khi niaoqnel aqtsil il nail milkhaoq bhai lai yaoq. Thail hai ngaol-aoq, nul juq neq, neema aqgaol ngel-i mail, gailkhaol dov ail-u phao, ngal nul juq bhai ya lav heivq nail bhai gee sil lal nail ngel-i mail, nul juq nee mail teevq gaq khe-ai maq lal ail" dai, ge bhiq-a nail ngaol.
4 Ilsaqleiqlav nail tsaol-aq juq neema bhai yao lal nail daoq al daoq ya gaiq-u phao, aqyu juq noeq haq nail lavqkhoel nee, aqyu juq-i mail goe-nq thaq nail yalkav juq maq goe dai, loev hav gil-a nail ngaol.
5 Khul khi mail dai ngal-aq, Heeqphaq Miqyail Maolseiq bhai Ilsaqleiqlav nail tsaol-aq juq nail galduq niail hai bhi ge bhiq-a nail ngaol: "Nul juq neq, neema aqgaol juq pevq nail ngaol. Nul juq nee teevq yanq taivq-ail, ngal gailkhaol ya dov khi ngaol-aoq, nul juq ya sil gil nail ngaol. Niil aq-il nee nul juq-i mail goe-nq thaq nail yalkav juq loev gil yaoq. Ngal nul juq bhai khal hai ya nl bhiq nail dai noeq ceiv nail ngaol" dai, ge bhiq-a nail ngaol.
6 Al heel ngel-i mail, Ilsaqleiqlav nail tsaol-aq juq Silnaq gaoqjaoq nee mail dov lee khi pultavq neq, aqyu juq-i mail goe nail yalkav juq teevq pov gail maq goe dai, pevq ail-a nail ngaol.
Heeqphaq Miqyail moel tavq lee nail haqphal saiqgov
7 Ilsaqleiqlav nail tsaol-aq juq, gailkhaol khal dov ail-u phao, haqphal saiqgov juq cov khi gaq naq naq nail aqduq lavqniil phao micil eqyal bha, Maolseiq neq, haqphal saiqgov teevq gov gaoq cov-a nail ngaol. Haqphal saiqgov al gov bhai Heeqphaq Miqyail moel tavq lee nail aqduq dai, khul nail ngaol. Heeqphaq Miqyail bhai teevq phaq ga nav hal movq nail tsaol-aq juq neq, haqphal saiqgov jiav nail bha ya-ail nail ngaol.
8 Maolseiq haqphal saiqgov al gov jiav nail bha khal ail-u phao, tsaol-aq iqsanl mail neq, aqyu juq nail haqphal saiqgov juq nail sivtavq bhai thul phaol khi, Maolseiq haqphal saiqgov al gov nail lavqkhoel bha maq aol kev lai-u kev dai, daonq khi hel daiq nail ngaol.
9 Maolseiq haqphal saiqgov al gov nail lavqkhoel bha aol kev lai khi, Heeqphaq Miqyail Maolseiq nee daoq ge tsaoq lee-u phao, nqdil nail ilkhel nee yavq kha lee-a nail nee ovqtavq, saiqgov nail govkhoiq bhai jaol naq lee-a nail ngaol.
10 Tsaol-aq al juq yaoq gaq yaoq-ao nee nqdil ilkhel haqphal saiqgov nail govkhoiq bhai jaol naq lee nail bhai ya moel-u phao, aqyu juq nail haqphal saiqgov nail sivtavq bhai thul phaol khi Miqyail bhai uqhuq thaoq-a nail ngaol.
11 Haqphal saiqgov al gov nail lavqkhoel bhai Heeqphaq Miqyail neq, Maolseiq nee mail maivphaoq tsiq tavq khi aqtsaoq aqlaol nee mail daoq ge tsaoq nail khe-ai, ge tsaoq lee-a nail ngaol. Ge tsaoq gaq-al nee ngal-aq, Maolseiq neq, gaq naq naq duq bha kovq lal-a nail ngaol. Thail hai ngaol-aoq, aivq bhai tsao jao-ai nail Nunq nail yaqyov pevq nail yaqyov-aq yaqnoil Yaolsuv neq, haqphal saiqgov lavqkhoel bhai jaol-ail ceevq-a nail ngaol.
Heeqphaq Miqyail nail seiqleiq khaoqsail bhai Maolseiq moel-a nail ganl
12 Teevq n kev lal-u phao, Maolseiq Heeqphaq Miqyail bhai niail hai ge bhiq-a nail ngaol: "'Tsaol-aq niil juq bhai saljial jaq-ai thaq nail milkhaoq bha hel laivq bhiq-o' dai, naol ngaq bhai ge lavq-a nail ngaol. Thail hai ngaol-aoq, ngaq-ai nee mail teevq gaq khe-ai bhi tsao the nail gaq neq, khaq sil gaq dai, maq ge lavq-al. Al ovqtavq, naol ngaq bhai, 'Ngal naoq bhai aqmil nee heeq kivq nail ngaol. Ngal naoq bhai neekhaol sil lal-il' dai, iqsanl, ge lavq-a nail ngaol.
13 Naol ngaq bhai mal dil neekhaol sil haq neq, naoq bhai ngal heeq kivq jaiq lal khi, naol neekhaol gaoq ya sil dal laivq dai, naoq nail gailkhaol ngaq bhai bhi moel lavq yaoq. Al ovqtavq, tsaol jeq-e niil jeq-e neq, naoq nail tsaol-aq pevq nail dai iqsanl, noeq kev noeq moel lavq yaoq.
14 Aq-u phao, Heeqphaq Miqyail neq, "Ngaq nail aqmaol naoq-ai nee mail teevq gaq khe-ai tsao khi naoq bhai gaq naq bhi naq nail ngaol" dai, ge bhiq-a nail ngaol.
15 Maolseiq ge bhiq-a nail: "Naol nv juq nee mail maq tsao haq neq, nv juq bhai jaol duq niil duq nee mail thaq bhi dov-ail lavq.
16 Naol nv juq nee maq tsao haq neq, naoq nail tsaol-aq juq dai khi ngaq bhai naol neekhaol sil khi yu nee bheeq-n nail ngaol dai, miltsaq kovtavq khe jaol nail tsaol-aq khaq sil gaq heeq nia heeq" dai, ge bhiq-a nail ngaol.
17 Heeqphaq Miqyail Maolseiq bhai gaoq ge bhiq-a nail: "Ngal naoq bhai aqmil nee heeq kivq khi naoq bhai neekhaol sil nail ngel-i mail, naoq-i mail ge nail khe-ai ngal nl nail ngaol" dai, ge bhiq-a nail ngaol.
18 Al heel ngel-i mail, Maolseiq neq, "Naoq nail seiqleiq khaoqsail bhi moel lavq yaoq" dai, hal bhiq-a nail ngaol.
19 Heeqphaq Miqyail ge kovq bhiq-a nail: "Ngaq nail aqmeeq phaq naoq nail sivtavq bhai bhi moel khi ngaq nail aqmil Yawei ngaol dai gail, naoq nail sivtavq bhai gul kha bhiq naol. Ngal gaiq-a movq nail gaq bhai gaiq-a khi ngal gaoq haq movq nail gaq bhai gaoq haq nail ngaol.
20 Thail hai ngaol-aoq, naol ngaq nail maivphaoq bhai maq moel kivq-ail. Khul khi mail dai ngal-aq, tsaol-aq yaq ngaq nail maivphaoq bhai moel haq neq, aqdoevq maq doevq nia-ail" dai, ge bhiq-a nail ngaol.
21 Heeqphaq Miqyail gaoq ge nail: "Nal daiq yaoq, ngaq nail aqjail bhai jiav nail lovphail niil nail kovtavq bha thul phaol khi mail jaol yaoq.
22 Ngaq nail seiqleiq khaoqsail ail ceiv-u phao, ngal naoq bhai lovphail pav-ai thaq nail gaiqlaq bhai bhi jaol khi, ngal maq ail ceiv jel-u kev dai, naoq bhai ngaq nail aqlavq-i mail pheeq thaiq gai nail ngaol.
23 Ngal ail jel gaq-u phao, ngaq nail aqlavq phaiq ha khi ngaq nail haoqnaol phao, naol ya moel nail ngaol. Thail hai ngaol-aoq, ngaq nail maivphaoq bhai maq ya moel-ail" dai, ge bhiq-a nail ngaol.