Dov-ail 34
Lovmav dailpav nvq pav, nvq pov teevq pov oil lai-a nail ganl
1 A bhai nee ngal-aq, Heeqphaq Miqyail Maolseiq bhai niail hai gaoq ge bhiq-a nail ngaol: "Iqmoeq-u khe lovmav dailpav nvq pavq khe-ai dul lai nail, lovmav dailpav aqsivq nvq pav gaoq lav sav yaoq. Naoq-i mail liv pav-a nail lovmav dailpav khe gevq-ai thaq nail khe-ai, ngal lovmav dailpav niil niai gaoq gevq pov bhiq nail ngaol.
2 Niaohao nqhao phao gaoqjaoq bha ngaq bhai moel lal nail galduq, lainq dan khi Silnaq nail gaoqjaoq bha dav lal yaoq.
3 Naoq-ai nee teevq gaq iqsanl mail, thaq bhi tsao thel lavq. Gaoqjaoq teevq jaoq jaoq lao, tsaol-aq teevq gaq iqsanl mail maq ya jaol-ail. Gaoqjaoq daoqthaoq bhai gail, jaiqyaq juq aqjal maq ya bhi jaq lal-ail" dai, ge bhiq-a nail ngaol.
4 Al heel ngel-i mail, Maolseiq neq, Heeqphaq Miqyail-i mail daoq bivq-a nail khe-ai, lovmav dailpav nvq pav lav sav gaq khi, haoqnao n n-gaol nqhao navq mav-ail, lovmav dailpav al bavq khi mail, Silnaq gaoqjaoq bha dav lai-a nail ngaol.
5 Heeqphaq Miqyail neq, nqdil nee mail yavq kha lee khi, Maolseiq nail aqjail bhai naq lai-a nail ngaol. Heeqphaq Miqyail neq, aivq nail aqmil aivq 'Yawei' dai, khul dov-a nail ngaol.
6 A bhai nee ngal-aq, Heeqphaq Miqyail neq, Maolseiq nail sivtavq nee mail ail ceiv gai-aivq khi ge bhiq-a nail: "Yawei dai khul nail Heeqphaq Miqyail neq, gaoq haq nail phaq dai khi, gaiq-a nail phaq nee bhee lovq nail Miqyail pevq nail nee ovqtavq, neema lavqtsail mail maq phail lal dai ol tsaol khi, gaoq haq goil gaiq-a nail teevq bhee teevq lovq aol nail lavqkhoel nee, saljial ivq nail Miqyail pevq nail ngaol.
7 Ngal neq, aqmeel-nq, aqhinl nee mao nail tsaol-aq juq bhai, ngaq nail gaoq haq goil gaiq-a nail phaq bhi ivq nail ngaol. Ngal haq-eiv nail phaq nl nail juq bhai maqkhaiq, laiq nail tsa nail phaq nl nail juq bhai maqkhaiq, oeqbal nl nail juq bhai maqkhaiq, oeqbal phaiq bhiq nail ngaol. Thail hai ngaol-aoq, ngaq bhai nl laiq nail juq bhai neq, aqyu juq nee mail yavq kha lee thaq nail yaq juq, hail ceevq liq ceevq bha kev dai, aqbhu aqma nail oeqbal bhaq da nee, ngal dal bhiq nail ngaol" dai, ge bhiq-a nail ngaol.
8 Maolseiq neq, teevq pov taivq-ail miltsaq bhai gaol beiv khi uqhuq thaoq-a nail ngaol.
9 A bhai nee ngal-aq, aivq ge nail: "Heeqphaq-ol, naol ngaq bhai mal dil neekhaol sil haq neq, nv juq nee mail teevq gaq khe-ai tsao thel leevq lavq yaoq. Tsaol-aq niil juq neq, neema aqgaol ngaol. Thail hai ngaol-aoq, nv juq nail oeqbal phaiq lavq khi, nv juq bhai naoq nail tsaol jeq-e dai, naol hav bhoel lavq yaoq" dai, ge bhiq-a nail ngaol.
10 A bhai nee ngal-aq, Heeqphaq Miqyail neq, Maolseiq bhai niail hai gaoq ge bhiq-a nail ngaol: "Ngal niil aq-il, naoq-ai nee mail daoqma saljial jaq nail ngaol. Ngal neq, Ilsaqleiqlav nail tsaol-aq juq nail sivtavq bhai miltsaq kovtavq khe jaol nail tsaol jeq-e juq teevq thal-iq maq moel daiq-a nail, noeq-u maq dov nail phaq nl bhiq nail ngaol. Naoq nail teevq jaoq jaol nail tsaol-aq juq iqsanl mail, Heeqphaq Miqyail-i mail naoq nail haqbhoil nl bhiq nail gee sil lal heeq phaq-ail tsaq bhaqaoq eeq nail ganl juq bhai moel nia lal nail ngaol.
11 Yaq n n-gaol ngaq-i mail bivq-a nail daoq bhai aqmeeq dai, nal daiq yaoq. Ngal nul juq nail sivtavq phao lai khi Aqmaolliv nail jeq-e, Khaqnanq nail jeq-e, Hiltiv nail jeq-e, Pheiqliqsil nail jeq-e, Hilwil nail jeq-e dai khi Yeiqbhulsil nail jeq-e juq bhai the dov nail ngaol.
12 Nul juq-i mail ya aol lai nail milkhaoq khe jeq-e jaq-a juq nee mail daoqma saljial jaq thaq nail galduq yaol phaol yaoq. Maq ngel haq neq, nul juq aqyu juq nail lavq phee bhai ya phee lai nail ngaol.
13 Nul juq aqyu juq nail laolduq bhai maqkhaiq, uqhuq thaoq nail lovmav maolkhoel juq bhai maqkhaiq, aqyu juq nail miqyail pevq nail Aqsaillaq dai khul nail maolkhoel ilkhel bhai maqkhaiq, ya deeq peiv gil nail ngaol.
14 Nul juq miqyail yaoq gaq yaoq bhai uqhuq maq ya thaoq-ail. Khul khi mail dai ngal-aq, Heeqphaq Miqyail pevq nail ngal neq, neekhaol maq sil nail Miqyail pevq khi ngaq nail aqmil iqsanl neekhaol maq sil nail gaq dai, khul nail ngaol.
15 Nul juq aqyu juq nee mail daoqma saljial maq ya jaq tavq-ail. Khul khi mail dai ngal-aq neq, aqyu juq nail miqyail juq nee khaqmiq se khi, aqyu juq nail miqyail juq bhai laol bhiq-u phao, nul juq bhai iqsanl khul lavq nail nee ovqtavq, aqyu juq nail miqyail bhai laol bhiq thaq nail aqjal al, nul juq ya jaq nail ngel-i mail ngaol.
16 Al ovqtavq, nul juq nail yaqyov juq neq, aqyu juq nail yaqmiq juq bhai hevq khi yaqmiq al juq neq, aqyu juq nail miqyail juq bhai uqhuq bhi thaoq nail galduq, nul juq nail yaqyov juq bhai jalmul mul lal khi ngaq bhai saljial bhi pheeq lal nail ngaol.
17 Nul juq phul heel juq-i mail teivq khi, thaoqphaoq aqma maolkhoel juq maq ya lav sav dov-ail.
18 Yaoq kovq yaoq-ao nee, Aqbhilbha dai khul nail bhala al heeq kev lal-u phao, deqtsiq maq aol nail khaqmul jaq nail aqbhee ya lav sav nail ngaol. Khul khi mail dai ngal-aq, bhala al heeq bhai, nul juq Iljiltuv milkhaoq nee ya dov lal-a nail ngaol. Al heel ngel-i mail, ngaq-i daoq bivq-ai thaq nail khe-ai, sivq n bhee dai, deqtsiq maq aol nail khaqmul ya jaq nail ngaol.
19 Nul juq nail lavqkhoel khe jaol nail uqbhao aqivq juq, ngaq nail pevq nail ngaol. Al ovqtavq, iqmoeq ilmoeq phaoq lee-a nail niaoqnel laqsil maqkhaiq, yaol yaol bhuq maqkhaiq, civqmeiv civq bhuq maqkhaiq, ngaq nail pevq nail ngaol.
20 Thail hai ngaol-aoq, iqmoeq khal moeq khe phaoq nail moeqphaq laljieiv neq, yaol teevq maol nee ya phal kovq nail ngaol. Maq phal kovq haq neq, moeqphaq laljieiv al maol nail leelkhaol ya deeq khoi bhiq nail ngaol. Nul juq nail uqbhao yaq khal pevq nail iqsanl mail, ya ul kovq nail ngaol. Laol bhiq nail phaq maq aol dai, teevq gaq gail ngaq nail siv tavq bha maq ya aol lal-ail.
21 Nul juq kovq n n-gaol bhai kev dai, ganl lai jai khi nl kivq nail ngaol. Thail hai ngaol-aoq, sivq n n-gaol neq, ganl maq ya nl-ail. Daiyal nl nail aqyanq dai khi heeqlaoq gaoqjal oil kovq nail aqyanq pevq khi ngaol-aoq, sivq n bhee lal haq neq, ya naq nail ngaol.
22 Iqmoeq khal moeq khe gov gaiq gaq-u phao, sivq n nail aqbhee maqkhaiq, haoqnao nao saq khe, heeqlaoq gaoqjal juq oil kovq gaq-u phao, heeqlaoq gaoqjal oil kovq nail aqbhee maqkhaiq, ya lav sav nail ngaol.
23 Yaoq kovq yaoq-ao nee teevq kovq hail pov bhee dai, yaqyov-aq juq yaoq gaq yaoq-ao nee mail 'Yawei' dai khul nail Ilsaqleiqlav nail Heeqphaq Miqyail nail sivtavq bha ya lal gil nail ngaol.
24 Nul juq, nul juq nail Heeqphaq Miqyail pevq nail ngaq nail sivtavq bha teevq kovq hail pov lal-u phao, nul juq nail miltsaq-ai yu oil lal nail bhai, khaoq maq ya laol-ail, ngal nul juq nail sivtavq nee jeq-e jaq-a iqsanl bhai the dov khi, nul juq nail miltsaq gaoq bhi mao jaiq lal nail ngaol. Al heel ngel-i mail, teevq gaq iqsanl nul juq nail miltsaq bhai maivjeel maq jeel lal-ail.
25 Ngaq bhai jaiqyaq laol lal-u phao, deqtsiq kheq nail khaqmul nee mail maq ya laol lal-ail. Bhaqsaqkhaq aqbhee lav sav-u phao, heivq thaq nail jaiqyaq nail haqjoil neq, haoqnao n n-gaol nqhao phao kev dai, maq ya bhi jiav-ail.
26 Yaoq kovq yaoq-ao nee nul juq-i mail kha-ai thaq nail iqmoeq ilmoeq khe kev lee-a nail lavqkhoel nee, khal meeq jaiq nail aqheeq allu juq nul juq nail Heeqphaq Miqyail nail ilkhaol bha ya oil lavq nail ngaol.
Civqmeiv civq yaq juq bhai aivq nail aqma nail aqtsil nee mail maq ya nl jaq khe-ail" dai, ge bhiq-a nail ngaol.
27 A bhai nee ngal-aq, Heeqphaq Miqyail Maolseiq bhai niail hai teevq pov gaoq ge bhiq-a nail ngaol: "Daoq niil juq bhai gevq thaq gai yaoq. Khul khi mail daiq ngal-aq, daoq niil juq neq, ngaq-i mail naoq-ai nee maqkhaiq, Ilsaqleiqlav nail tsaol-aq juq nee maqkhaiq, jaq-ai thaq nail daoqma saljial nee tavq nail ngaol" dai, ge bhiq-a nail ngaol.
28 Maolseiq neq, aoq maq jaq, ulcuvq maq daol dai, 40 n 40 kivq bhee dai Heeqphaq Miqyail nee mail teevq gaq khe-ai gaoqjaoq bha jaol-a nail ngaol. Aivq neq, lovmav dailpav nvq pav nail kovtavq bhai daoqma saljial nee tavq nail bivq-ai thaq nail aoldaoq kovqdaoq 10 daoq gevq-a nail ngaol.
Maolseiq gaoqjaoq nee yavq kha lee-a nail ganl
29 Maolseiq neq, daoqma saljial nee tavq nail lovmav dailpav nvq pav bavq khi Silnaq gaoqjaoq nee mail yavq kha lee-u phao, Heeqphaq Miqyail nee mail daoq ya ge tsaoq thaq nail ngel-i mail, aivq nail maivphaoq aqbhaq bhaq nail ngaol. Thail hai ngaol-aoq, aivq bhai aivq maq heeq nia-ail.
30 Aqlonq dai khi Ilsaqleiqlav nail tsaol-aq juq, Maolseiq nail maivphaoq aqbhaq bhaq nail bhai ya moel-u phao, aivq nail aqjail bhai maq jiiv bal laivq tseq-ail.
31 Thail hai ngaol-aoq, Maolseiq neq, Aqlonq dai khi Ilsaqleiqlav nail tsaol-aq juq nail aqivq aqtsu juq bhai khul-a nail ngel-i mail, aqyu juq iqsanl aivq nail aqjail bhai gaoq kovq lal-a nail ngaol. Aq-u phao, aivq iqsanl, aqyu juq nee mail daoq ge tsaoq-a nail ngaol.
32 A bhai nee ngal-aq, Ilsaqleiqlav nail tsaol-aq juq iqsanl mail, Maolseiq nail aqjail bha jiiv bal lavq-a nail ngaol. Aq-u phao, aivq neq, Silnaq gaoqjaoq khe Heeqphaq Miqyail-i mail bivq-ai thaq nail aoldaoq kovqdaoq juq iqsanl mail aqyu juq bhai ge bhiq-a nail ngaol.
33 Aivq neq, aqyu juq nee mail daoq ge gaq-al nee ngal-aq, aivq nail maivphaoq bhai lavqsiv-i mail he pheeq-a nail ngaol.
34 Thail hai ngaol-aoq, aivq neq, Heeqphaq Miqyail nee mail haqphal saiqgov bhai daoq khal ge tsaoq lai-u phao, aivq nail maivphaoq khe he pheeq-ai thaq nail lavqsiv he phao-a nail ngaol. Aivq dov lee-u phao, Heeqphaq Miqyail-i mail daoq khal bivq-a nail iqsanl, Ilsaqleiqlav nail tsaol-aq juq bhai ge bhiq-a nail ngaol.
35 Aq-u phao, Ilsaqleiqlav nail tsaol-aq juq neq, aivq nail maivphaoq aqbhaq bhaq nail bhai ya moel-a nail ngaol. Al heel ngel-i mail, Heeqphaq Miqyail nee mail daoq ge tsaoq lai nail haqphal saiqgov bha maq aol lai-u phao kev dai aivq nail maivphaoq he pheeq gai-a nail ngaol.