Dov-ail 35
Jaol-n n-gaol nee tavq nail bivq-ai thaq nail aoldaoq kovqdaoq juq
1 Maolseiq neq, Ilsaqleiqlav nail tsaol-aq juq bhi jil lai khi niail hai ge bhiq-a nail ngaol: "Nul juq ya tsao the nail galduq Heeqphaq Miqyail niail hai aoldaoq kovqdaoq bivq-ai thaq nail ngaol:
2 Nul juq jaol n teevq jao nail lavqkhoel, kovq n ganl nl kivq nail ngaol. Thail hai ngaol-aoq, sivq n n-gaol neq, Heeqphaq Miqyail nail galduq meeq nail haol nail jaol-n n-gaol pevq nail ngel-i mail, ya naq nail ngaol. Aq-u n-gaol ganl nl nail gaq neq, ya sil nail ngaol.
3 Jaol-n n-gaol neq, nul juq nail ilkhaol bhai miqjaq gail, maq ya siv tovq-ail" dai, ge bhiq-a nail ngaol.
Uqhuq thaoq nail haqphal saiqgov nail galduq danq nail phaq
4 Maolseiq neq, Ilsaqleiqlav nail tsaol-aq juq bhai niail hai gaoq ge bhiq-a nail ngaol: "Niil neq, Heeqphaq Miqyail-i mail bivq-ai thaq nail daoq juq ngaol.
5 Nul juq Heeqphaq Miqyail bhai oil lavq khi ya danq bhiq nail ngaol. Heeqphaq Miqyail bhai danq bhiq nail haqbhoil neema kev nail juq neq, niil juq danq kivq nail ngaol: Phul maqkhaiq, heel maqkhaiq, giqheel maqkhaiq,
6 lenl nail kheeljoe maqkhaiq, govnav lavmav nail kheeljoe maqkhaiq, kheeljoe aqnel maqkhaiq, haqphal aqjeel maqkhaiq, civqmeiv nail aqmevq juq maqkhaiq,
7 aqnel leivq-ai thaq nail yaol yaol bhuq nail bavkov maqkhaiq, civqmeiv nail bavkov aqjeel maqkhaiq, aqkaqsal nail aqbhaol dailpav maqkhaiq,
8 miqjaq tovq nail saqloq aqtseel maqkhaiq, hoel dav bhiq nail aqtseel lav sav-u phao, goe nail phaq maqkhaiq, huqbhiq nil nail phaq tovq khi danq bhiq nail haqbhoil goe nail phaq maqkhaiq,
9 Eipho dai khul nail pultavq phao doi dav nail phailkhaoq dai khi philma juq nail neema bhai doi pheeq nail phaq bhai thel bav gai bhiq nail galduq, sainl aqnav dai khi sainl yaoq phaq yaoq maqkhaiq, ya oil lavq nail ngaol" dai, ge bhiq-a nail ngaol.
10 Nul juq nail lavqkhoel khe nl nia hal nia nail phao kovpavq ya-ai thaq nail juq, Heeqphaq Miqyail-i mail daoq bivq-ai thaq nail khe-ai lal khi,
11 haqphal saiqgov nail khainl lavqkhoel khe tavq nail yaoq phaq yaoq-ao nee dai khi, uqhuq thaoq nail haqphal saiqgov maqkhaiq, he pheeq nail haqphal juq maqkhaiq, khu cavq nail khulu juq maqkhaiq, dailpav juq maqkhaiq, tsaoq ceiv nail aqbhaol juq maqkhaiq, ilkhel dai khi ilkhel tsiq tsaoq nail saiqnaov juq maqkhaiq,
12 daoqma saljial nail thunq dai khi bavq nail bavqkhaoq juq maqkhaiq, 'Oeqbal pheeq thaiq nail' dai, khul nail thunq nail khaoqpheeq maqkhaiq, thunq bhai he pheeq-ai thaq nail haqphal maqkhaiq,
13 kovqkhail dai khi bavqkhaoq juq maqkhaiq, kovqkhail nee tavq nail yalkav juq maqkhaiq, ngaq nail sivtavq bhai khaq mao iqsanl bhi jiav dai, ngaq bhai danq nail khaqmul maqkhaiq,
14 phalmanq tsiq dav duq dai khi, al nee tavq nail yalkav juq maqkhaiq, phalmanq dai khi phalmanq tovq nail aqtseel maqkhaiq,
15 huqbhiq nil nail phaq tovq khi danq bhiq nail laolduq dai khi bavqkhaoq juq maqkhaiq, hoel dav bhiq nail aqtseel maqkhaiq, huqbhiq nil nail phaq maqkhaiq, uqhuq thaoq nail haqphal saiqgov nail govkhoiq khe he pheeq nail haqphal maqkhaiq,
16 miqjaq kheq poiv khi laol bhiq nail laolduq dai khi giqheel nail pheeqjaiq maqkhaiq, laolduq nail galduq bavqkhaoq dai khi, al nee tavq nail yalkav juq maqkhaiq, giqheel nail thailphail phail ma dai khi, tsiq dav duq maqkhaiq,
17 uqhuq thaoq nail haqphal saiqgov nail lavqniil phao khe khainl bhai thao pheeq nail haqphal juq dai khi ilkhel juq maqkhaiq, ilkhel tsiq tsaoq nail saiqnaov juq maqkhaiq, khainl nail govkhoiq khe he pheeq nail haqphal maqkhaiq,
18 haqphal saiqgov dai khi khainl nail galduq ya deeq tsaoq gai nail heeqthaiq juq dai khi, ya he gai nail neeqtsaq maqkhaiq, niil juq lav sav lal yaoq.
19 Al ovqtavq, meeq nail haol nail aqduq bhai ganl nl-u phao, doi nail galduq haqphal-i mail philma nail phailkhaoq juq aqmeeq-ai ya guvq bhiq nail ngaol. Phailkhaoq al juq neq, niil heel ngaol: Aqlonq nail haqbhoil, meeq nail haol nail phailkhaoq dai khi, aivq nail yaqyov juq nail haqbhoil philma jiovq khi ganl nl-u phao doi nail, aqmeeq-ai guvq-ai thaq nail phailkhaoq juq ngaol" dai, ge bhiq-a nail ngaol.
20 Aq-u phao, Ilsaqleiqlav nail tsaol-aq juq neq, Maolseiq jaol nail nee mail dov-ail khi,
21 Heeqphaq Miqyail bhai danq bhiq nail neema kev nail juq neq, uqhuq thaoq nail haqphal saiqgov nail haqbhoil loq nail yalkav juq maqkhaiq, al nail lavqkhoel phao ganl-u bhai loq nail yalkav juq maqkhaiq, philma juq nail meeq nail haol nail aqgaq aqdoi guvq nail galduq loq nail yalkav juq maqkhaiq, oil lavq-a nail ngaol.
22 Neema kev nail yovqgavq yaoq-ao nee, yaqyov-aq juq maqkhaiq, yaqmai-aq juq maqkhaiq, heel-i mail lav sav-ai thaq nail neema khe thel bav bhiq nail phaq maqkhaiq, heel nail naqdev juq maqkhaiq, heel nail noiltsaoq juq maqkhaiq, heel ju juq maqkhaiq, danq nail yalkav teevq laiq khe-ai, Heeqphaq Miqyail bhai gaol jai khi laol bhiq nail haqbhoil oil lavq-a nail ngaol.
23 Lenl nail kheeljoe, govnav lavmav nail kheeljoe, kheel joe aqnel, haqphal aqjeel, civqmeiv nail aqmevq dai khi, aqnel leivq-ai thaq nail yaol yaol bhuq nail bavkov khi civqmeiv nail bavkov aqjeel jiav nail juq neq, yalkav al juq oil lavq-a nail ngaol.
24 Phul maq ngel haq neq, giqheel danq nia nail juq gail, Heeqphaq Miqyail bha danq lal-a nail ngaol. Aqkaqsal nail aqbhaol jiav nail juq gail, cov nail phaq bhai bhi yuq nail galduq, yalkav al juq danq lal-a nail ngaol.
25 Kheeljoe lav sav nia khi, haqphal yavq nail phao nl nia nail yaqmai-aq juq iqsanl mail, aqyu juq-i mail lav sav-a nail lenl nail kheeljoe, govnav lavmav nail kheeljoe, kheeljoe aqnel dai khi haqphal aqjeel juq danq lal-a nail ngaol.
26 Civqmeiv nail aqmevq-i mail kheeljoe yavq nia nail nee ovqtavq, neema kev nail yaqmai-aq juq iqsanl mail, al hai yavq khi danq lal-a nail ngaol.
27 Ilsaqleiqlav nail tsaol-aq nail aqivq jiovq nail juq neq, Eipho dai khul nail pultavq phao doi dav nail phailkhaoq bhai maqkhaiq, neema khe he pheeq nail haqphal bhai maqkhaiq, thel bav bhiq nail galduq, sainl aqnav dai khi sainl yaoq phaq yaoq bhai maqkhaiq,
28 goe nail phaq dai khi saqloq aqtseel neq, phalmanq nail haqbhoil maqkhaiq, hoel dav bhiq nail aqtseel nail haqbhoil maqkhaiq, huqbhiq nil nail phaq tovq khi danq bhiq nail haqbhoil maqkhaiq, danq lal-a nail ngaol.
29 Maolseiq nee mail teevq tiv, Heeqphaq Miqyail-i mail daoq bivq-a nail khe-ai, Ilsaqleiqlav nail tsaol-aq nail lavqkhoel khe neema kev nail yaqyov-aq khi mail yaqmai-aq juq neq, lavqkhiq teevq tsail, Heeqphaq Miqyail bhai danq lal-a nail ngaol.
Bheiqsaqleiqlav khi mail Aqhaolliqbhal dai khul nail nvq gaq nail ganl
30 A bhai nee ngal-aq, Maolseiq neq, Ilsaqleiqlav nail tsaol-aq juq bhai niail hai gaoq ge bhiq-a nail ngaol: "Heeqphaq Miqyail neq, Yuldav nail jeq-e pevq nail Hullav nail aqjievq Ullil nail yaqyov Bheiqsaqleiqlav bhai tsel-aiq thaq nail ngaol.
31 Al ovqtavq, Bheiqsaqleiqlav bhai, aivq nail aqhaqlal hoel dav bhiq khi neenoeq neekha maqkhaiq, noeq dov nail phaq maqkhaiq, lavqmaoq aqmeeq-ai nl nia nail phao maqkhaiq, bivq-a nail ngaol.
32 Aivq neq, phul, heel dai khi giqheel juq-i mail maolkhoel aqmeeq-ai lav sav dov nia nail ngaol.
33 Lovmav lavqkhoel khe sainl iqsanl aqmeeq-ai gaiq dov nia khi, aqbhaol peivq nail phao maolkhoel lav sav dov nia nail nee ovqtavq, aqlavq-i mail lav sav nail phao nee tavq lai khi, iqsanl mail lav sav dov gil nia nail ngaol.
34 Heeqphaq Miqyail neq, aivq bhai maqkhaiq, Danq nail jeq-e lavqkhoel khe Aqhilsaqmal nail yaqyov Aqhaolliqbhal bhai maqkhaiq, aqyu juq-i mail nl nia nail phaq, yu bhai saol bhiq nia nail phaq, bivq-ai thaq nail ngaol.
35 Aivq, aqyu nvq gaq bhai lavq mao aqmeeq-ai nia nail phao maqkhaiq, maolkhoel gevq dov nia nail phao maqkhaiq, lenl nail kheeljoe, govnav lavmav nail kheeljoe, kheeljoe aqnel-i mail haqphal aqjeel bhai guvq bav nia nail phaoq maqkhaiq, haqphal yavq nia nail neegeel iqsanl bivq-ai thaq nail ngaol. Aqyu nvq gaq neq, lavqmaoq aqmeeq-ai nl nia nail phao maqkhaiq, maolkhoel gevq dov nia nail phao maqkhaiq, al jaiq-ail lav sav meeq nia nail ngaol.