Dov-ail
1 Bheiqsaqleiqlav dai khi Aqhaolliqbhal maqkhaiq, uqhuq thaoq nail haqphal saiqgov cov nail galduq, Heeqphaq Miqyail-i mail neenoeq neekha dai khi lavqmaoq aqmeeq-ai nl nia nail phao kovpavq bivq-ai thaq nail tsaol-aq juq maqkhaiq, Heeqphaq Miqyail-i mail daoq bivq-ai thaq nail khe-ai ya nl gil lal nail ngaol" dai, Maolseiq ge bhiq-a nail ngaol.
2 A bhai nee ngal-aq, Maolseiq neq, Bheiqsaqleiqlav dai khi Aqhaolliqbhal bhai maqkhaiq, haqphal saiqgov cov nail galduq lavqmaoq aqmeeq-ai nl nia nail kovpavq ya-ai thaq khi, ganl nl nail phao neema kev nail tsaol-aq juq bhai maqkhaiq, khul-a nail ngaol.
3 Aqyu juq neq, haqphal saiqgov cov nail galduq Ilsaqleiqlav nail tsaol-aq juq-i mail danq lal-a nail yalkav juq, Maolseiq nee mail teevq tiv ya-a nail ngaol. Nqhao phao yaoq haoq yaoq-ao nee mail Ilsaqleiqlav nail tsaol-aq juq neq, neema kev nail lavqkhoel nee, lavqkhiq teevq tsail danq nail yalkav juq, Maolseiq jaol nail bha oil lavq-ai haq nail ngaol.
4 Aq-u phao, uqhuq thaoq nail haqphal saiqgov cov nail phao nl nia hal nia nail juq yovqgavq nail ganl yovqgavq naq-a nail lavqkhoel nee,
5 Maolseiq jaol nail bha lal khi, "Tsaol-aq niil juq-i mail oil lavq-a nail yalkav juq neq, Heeqphaq Miqyail-i mail ngadao bhai bhi nl nail galduq khoel lavq-a nail nee maq tsil, mao jaiq nail ngaol" dai, ge bhiq-a nail ngaol.
6 Aq-u phao Maolseiq neq, "Uqhuq thaoq nail haqphal saiqgov cov nail galduq yaqyov-aq juq maqkhaiq, yaqmai-aq juq maqkhaiq, danq nail yalkav thaq gaoq lainq" dai, yaoq dao yaoq-ao nee bhi gul kha-a nail ngaol. Al heel ngel-i mail, tsaol-aq al juq danq nail dai khi lainq-ai thaq nail naq gil lai-a nail ngaol.
7 Khul khi mail dai ngal-aq, aqyu juq-i mail danq lal thaq nail yalkav juq neq, ganl bhai yuq nail nee maq tsil maoq jaiq nail ngaol.
Uqhuq thaoq nail haqphal saiqgov cov-a nail ganl
8 Aqmeeq-ai lavq mao nl nia nail al juq neq, uqhuq thaoq nail haqphal saiqgov nail galduq, lenl nail kheeljoe, govnav lavmav nail kheeljoe, kheeljoe aqnel dai khi yavq-ai thaq nail haqphal aqjeel yuq khi, haqphal 10 keiv yavq-a nail ngaol. Haqphal phal ma al 10 keiv nail lavqkhoel bhai, Kheiqlulbhinq nail maolkhoel iqsanl aqmeeq-ai lav sav bhoel-a nail ngaol.
9 Haqphal al juq iqsanl mail teevq gaq khe-ai ya bhi eeq khi, eeq nail phao liq cav, heelma nail phao neq, 28 cav bhi bhee-a nail ngaol.
10 Haqphal ngaq keiv neq, teevq dao bhai guvq jil-a nail ngaol. Jail nail ngaq keiv gail al hai guvq jil-a nail ngaol.
11 Guvq jil-aiq thaq nail haqphal phalma teevq keivq nail aqjaq bhai neq, lenl nail kheeljoe-i mail lav sav khi lavqceiv guvq bav gai-a nail ngaol.
12 Iqmoeq khal moeq khe keiv nail galduq, lavqceiv 50 khaoq maqkhaiq, nvq keiv teevq keiv nail galduq lavqceiv 50 khaoq bhai maqkhaiq, teevq gaq khe-ai oil covq gai-a nail ngaol.
13 Al ovqtavq, heel nail khulu 50 khaoq lav sav-a nail nee ovqtavq, khulu-i mail guvq jil-a nail haqphal phal ma al nvq keiv neq, haqphal saiqgov nail haqbhoil teevq keiv taivq-ail bhi pevq lal nail galduq nl-a nail ngaol.
14 A bhai nee ngal-aq, aqyu juq neq, uqhuq thaoq nail haqphal saiqgov nail kovtavq bhai he pheeq nail galduq, civqmeiv nail aqmevq-i mail yavq-ai thaq nail haqphal 11 keiv guvq-a nail ngaol.
15 11 keiv, 11 keiv-ail heelma davq nil dul nail ngel-i mail, teevq keiv neq, eeq nail phao liq cav, heelma phao 30 cav bhee nail ngaol.
16 A bhai nee ngal-aq, haqphal ngaq keiv neq, teevq dao bhai guvq jil-a nail ngaol. Jail nail kovq keiv gail teevq dao bhai guvq jil-a nail ngaol.
17 Iqmoeq khal moeq khe guvq jil-a nail al keiv nail daoqloi bhai lavqceiv 50 khaoq maqkhaiq, haoqnao khe keiv nail daoqloi bhai lavqceiv 50 khaoq maqkhaiq, guvq bav gai-a nail ngaol.
18 Aqyu juq neq, giqheel nail khulu 50 laiq lav sav nail nee ovqtavq, khulu al-i mail, haqphal nvq keiv teevq dao bhai, he jil-a nail ngaol.
19 Al ovqtavq, haqphal saiqgov nail kovtavq bhai he pheeq nail haqphal nvq tiv lav sav khi teevq tiv neq, aqnel leivq-ai thaq nail yaol yaol bhuq nail bavkov-i mail maqkhaiq, al nail kovtavq bhai he pheeq nail galduq civqmeiv nail bavkov aqjeel-i mail maqkhaiq, lav sav-a nail ngaol.
20 Aqyu juq neq, haqphal saiqgov nail lavqkhoel khe kha thul-ai thaq nail dailpav bhai, aqkaqsal nail aqbhaol-i mail lav sav-a nail ngaol.
21 Kha thul-ai thaq nail dailpav teevq pav bhai eeq nail phao, teevq cav ovqtavq teevq pav, heelma phao neq, 10 cav bhi bhee-a nail ngaol.
22 Dailpav al teevq pav nail daoqthaoq bhai, khaoltsoe nvq tsoe teevq gaq khe-ai di dai, lav sav covq-a nail ngaol. Aqyu juq, thao jaoq nail dailpav iqsanl mail al hai lav sav gil-a nail ngaol.
23 Haqphal saiqgov nail lavqmal phao thao jaoq nail galduq dailpav 20 pav lav sav-a nail ngaol.
24 Al ovqtavq, dailpav al 20 pav 20 pav-ail, dailpav teevq pav khe khaoltsoe nvq tsoe nail pul-nvq bhai, phul nail saiqnaov nvq tsaoq lav sav covq gai-a nail ngaol. Al bhaq da nee, saiqnaov iqsanl mail 40 tsaoq bhee nail ngaol.
25 Al hai dul dai, haqphal saiqgov nail lavqtsel phao dailpav 20 pav lav sav khi,
26 dailpav al 20 pav 20 pav-ail, teevq pav nail pul-nvq bhai, phul nail saiqnaov nvq tsaoq lav sav covq khi saiqnaov iqsanl mail 40 tsaoq bhee nail ngaol.
27 Haqphal saiqgov nail haoqnaol phao jiav khi nlma ga khoeq phao kha thul nail galduq dailpav kovq pav lav sav-a nail nee ovqtavq,
28 haoqnaol phao goivqloiv bhai kha thul nail galduq neq, dailpav nvq pav lav sav-a nail ngaol.
29 Goivqloiv khe dailpav al nvq pav neq, pul-nvq phao aqmeeq-ai bavq tsaq khi pultavq phao neq, lavqceiv-i mail he thaiq gai-a nail ngaol. Al hai khi, goivqloiv nvq loiv nail galduq teevq gaq khe-ai, lav sav gai-a nail ngaol.
30 Al heel ngel-i mail, haqphal saiqgov nail haoqnaol phao neq, dailpav eivq pav bhee khi, teevq pav nail daoqthaoq bhai neq, phul nail saiqnaov nvq tsaoq covq nail bhaq da nee, phul nail saiqnaov iqsanl mail, 16 tsaoq bhee nail ngaol.
31 Dailpav bhai tsaoq ceiv nail aqbhaol neq, aqkaqsal nail aqbhaol-i mail lav sav-a nail ngaol. Haqphal saiqgov nail lavqmal phao tsaoq ceiv nail aqbhaol ngaq khaoq,
32 lavqtsel phao, tsaoq ceiv nail aqbhaol ngaq khaoq dai khi haoqnaol phao khe, nlma ga khoeq phao, ngaq khaoq dai, lav sav-a nail ngaol.
33 Dailpav juq nail gaoltsi bhai tsaoq ceiv-ai thaq nail aqbhaol neq, heelma phaq-ail nia phao daoq loi nee, a phao daoqloi bha kev dai, tsaoq bhoel-a nail ngaol.
34 Dailpav juq bhai neq, heel heel leivq leivq khi tsaoq ceiv nail aqbhaol juq bhai bhi he thaiq nail galduq, heel nail lavqceiv oil covq-a nail ngaol. Aqbhaol al juq gail, heel heel leivq leivq-a nail ngaol.
35 A bhai nee ngal-aq, aqyu juq neq, uqhuq thaoq nail haqphal saiqgov nail lavqkhoel khe aqkhaon bhai, thao pav nail haqbhoil, lenl nail kheeljoe, govnav lavmav nail kheeljoe, kheeljoe aqnel, yavq-ai thaq nail haqphal aqjeel al juq oil khi, haqphal bhi lav sav-a nail nee ovqtavq, lavqmaoq aqmeeq-ai nl nia nail juq-i mail, Kheiqlulbhinq nail maolkhoel iqsanl bhi guvq bhoel-a nail ngaol.
36 Haqphal al keiv bhai bhi he jaoq gai nail galduq, heel nail khulu lav sav covq nail dai khi, aqkaqsal nail aqbhaol-i mail ilkhel liq khel lav sav-a nail ngaol. Ilkhel al juq bhai heel heel leivq leivq khi phul nail saiqnaov liq tsaoq bhai tsiq tsaoq-a nail ngaol.
37 Uqhuq thaoq nail haqphal saiqgov nail govkhoiq bhai he jaoq nail haqphal neq, lenl nail kheeljoe, govnav lavmav nail kheeljoe, kheeljoe aqnel, yavq-ai thaq nail haqphal aqjeel, niil juq yuq khi aqlavq-i mail aqgevq guvq dov-a nail ngaol.
38 Haqphal al keiv thao pav nail galduq ilkhel ngaq khel kha khi, pultavq phao khulu lav sav covq-a nail ngaol. Pultavq phao tsaoq ceiv nail phaq bhai dai khi khulu bhai neq, heel heel leivq leivq-a nail ngaol. Ilkhel tsiq tsaoq nail saiqnaov ngaq tsaoq bhai neq, giqheel-i mail lav sav-a nail ngaol.