Dov-ail 37
Daoqma saljial nail thunq lav sav-a nail ganl
1 Bheiqsaqleiqlav neq, aqkaqsal nail aqbhaol-i mail, heelma phao neq, nvq cav ovqtavq teevq pav, eeq nail phao dai khi daqmoe phao neq, teevq cav ovqtavq teevq pav bhee nail thunq teevq heeq lav sav-a nail ngaol.
2 Thunq al nail lavqniil lavqkhoel neq, haol nail heel heel leivq leivq bhiq-a nail nee ovqtavq, jaoq jaoq laol laol teevq jaoq bhai, heel-i mail aqgevq gaoq gevq dav bhiq-a nail ngaol.
3 Al ovqtavq, heel nail lavqceiv liq khaoq lav sav khi thunq nail aqkhil liq khil bhai neq, iqmoeq phao nvq khaoq, haoqnaol phao nvq khaoq dai, oil covq gai-a nail ngaol.
4 A bhai nee ngal-aq, aqkaqsal nail aqbhaol-i mail bavqkhaoq lav sav khi, heel heel leivq leivq-a nail nee ovqtavq,
5 thunq nail teevq phao teevq bal-nvq lav sav covq-ai thaq nail lavqceiv bhai, tsaoq bhoel gai-a nail ngaol.
6 A bhai nee ngal-aq, heelma phao neq, nvq cav ovqtavq teevq pav, eeq nail phao neq, teevq cav ovqtavq teevq pav bhee nail 'Oeqbal pheeq thaiq nail' dai, khul nail thunq nail khaoqpheeq bhai haol nail heel-i mail lav sav-a nail ngaol.
7 Al ovqtavq, khal dov-ai thaq nail heel-i mail, thunq nail khaoqpheeq nail heelma phao, Kheiqlulbhinqa nail maolkhoel teevq phao teevq maol dai lav sav dov-a nail ngaol.
8 A bhai nee ngal-aq, Kheiqlulbhinq nail maolkhoel al nvq maol bhai, thunq nail khaoqpheeq lavqkhoel nee mail oil dov khi, khaoqpheeq nail kovtavq bhai teevq gaq khe-ai teevq phao teevq maol lav sav covq-a nail ngaol.
9 Kheiqlulbhinq-i mail gaol phai-ai thaq nail aqdaol al neq, thunq nail khaoqpheeq bhai bhi joe pheeq-a nail ngaol. Aqyu nvq maol nail maivphaoq iqsanl, teevq gaq khe-ai tsiq phaoq-ai thaq khi, thunq nail khaoqpheeq bhai bhi hel daiq-a nail ngaol.
Kovqkhail lav sav-a nail ganl
10 A bhai nee ngal-aq, Bheiqsaqleiqlav neq, heelma phao nvq cav, eeq nail phao teevq cav, daqmoe phao teevq cav ovqtavq teevq pav bhee nail kovqkhail bhai aqkaqsal nail aqbhaol-i mail lav sav-a nail ngaol.
11 Kovqkhail bhai haol nail heel heel leivq leivq bhiq khi, kovqkhail teevq jaoq, heel-i mail aqgevq gaoq gevq dav bhiq-a nail ngaol.
12 Al ovqtavq, kovqkhail teevq jaoq bhai hail noil daq bhee dai aqjaq lav sav khi, aqjaq al bhai, heel-i mail aqgevq gaoq gevq dav bhiq-a nail ngaol.
13 A bhai nee ngal-aq, heel nail lavqceiv liq khaoq lav sav dov khi, kovqkhail nail liq phao liq khoel bhai jiav nail aqkhil liq khil nail aqjail bhai, lav sav covq gai-a nail ngaol.
14 Lavqceiv al juq neq, bavqkhaoq-i mail bavq nail galduq, kovqkhail teevq jaoq jiav nail aqjaq bhai lav sav covq gai-a nail ngaol.
15 Bavq nail bavqkhaoq juq neq, aqkaqsal nail aqbhaol-i mail lav sav khi heel leivq-a nail ngaol.
16 Kovqkhail nee mail tavq nail thailphail juq, maiqgaoq juq, khaoqanq juq, lavqcovq juq, niil juq-i sanl haol nail heel-i mail lav sav khi ullul juq laol bhiq-u phao, yuq nail galduq ngaol.
Phalmanq tovq dav duq lav sav-a nail ganl
17 A bhai nee ngal-aq, Bheiqsaqleiqlav neq, phalmanq tovq dav duq bhai khal dov-ai thaq nail heel aqhaol-i mail lav sav-a nail ngaol. Lav sav-u phao, phalmanq aqkhaoq maqkhaiq, aqkhil maqkhaiq, aqeiv khe-ai dul nail maiqgaoq maqkhaiq, iqsanl mail teevq dao bhai taivq-ail lav sav cov gil-a nail ngaol. Al ovqtavq, aqeiv al neq, daqtsuq daqphai dai iqsanl bhi jiav-a nail ngaol.
18 Phalmanq aqkhaoq bhai, lavqmeiv kovq meiv lav sav covq khi, teevq phao hail meiv dai, bhi dov-a nail ngaol.
19 Lavqmeiv al kovq meiv bhai neq, teevq meiv bhai bhaqtanq aqeiv khe-ai dul nail maiqgaoq hail gaoq dai khi, aqeiv daqtsuq daqphai bhi aol-a nail ngaol.
20 Phalmanq aqkhaoq bhai, bhaqtanq aqeiv khe-ai dul nail maiqgaoq liq gaoq lav sav covq gai-a nail ngaol. Aqeiv al neq, daqtsuq daqphai ngaol.
21 Phalmanq aqkhaoq nee cavq nail lavqmeiv kovq meiv covq-a nail ngaol. Lavqmeiv al yaoq meiv yaoq-ao nee nail daoqthaoq bhai neq, bhaqtanq nail aqeiv teevq eiv, lav sav covq-a nail ngaol.
22 Bhaqtanq aqeiv, lavqmeiv juq dai khi phalmanq aqkhaoq neq, khal dov-ai thaq nail heel aqhaol-i mail lav sav khi, teevq dao bhai lav sav covq gil-a nail ngaol.
23 Aivq neq, phalmanq tovq dav duq nail galduq phalmanq sivq heeq, civmeiv dai khi miqjaq lailmevq civ dav duq bhai, haol nail heel-i mail lav sav-a nail ngaol.
24 Aivq neq, tsiq dav duq dai khi tsiq dav duq nee mail tavq nail yalkav juq bhai haol nail heel 34 kiqloq-i mail lav sav-a nail ngaol.
Huqbhiq nil nail phaq tovq khi danq bhiq nail laolduq lav sav nail ganl
25 A bhai nee ngal-aq, Bheiqsaqleiqlav neq, huqbhiq nil nail phaq tovq khi danq bhiq nail laolduq bhai aqkaqsal nail aqbhaol-i mail lav sav-a nail ngaol. Laolduq al laiq neq, liq phao liq khoel lav sav khi heelma phao iqsanl, eeq nail phao iqsanl, teevq cav bhi bhee-a nail nee ovq tavq, daqmoe phao neq, nvq cav bhi bhee-a nail ngaol. Laolduq nail lavqtsoel liq laiq bhai neq, teevq gaq khe-ai, uqkheel khe-ai dul nail bhiltsoel liq laiq lav sav covq-a nail ngaol.
26 Laolduq nail sivtavq phao maqkhaiq, teevq jaoq teevq laol liq phao liq khoel maqkhaiq, uqkheel khe-ai dul nail bhiltsoel juq bhai maqkhaiq, haol nail heel leivq-a nail nee ovqtavq, pultavq phao khe aqjaq teevq jaoq bhai iqsanl, heel-i mail aqgevq gaoq gevq dav bhiq-a nail ngaol.
27 Laolduq nail jail-nq, aqgevq nail pul-nvq phao, nvq phao nvq phao-ail bhai neq, bavq nail bavqkhaoq tsaoq bhoel nail galduq, heel nail lavqceiv nvq gu lav sav covq gai-a nail ngaol.
28 Bavqkhaoq bhai neq, aqkaqsal nail aqbhaol-i mail lav sav khi heel leivq gai-a nail ngaol.
29 Al ovqtavq, uqhuq bhai meeq nail haol nail hoel dav bhiq nail aqtseel dai khi haol taiv deel huqbhiq nil nail phaq iqsanl, aqmeeq-ai lav sav nia nail juq-i mail bhi lav sav-a nail ngaol.