Dov-ail 38
Miqjaq kheq poiv khi laol bhiq nail laolduq lav sav-a nail ganl
1 A bhai nee ngal-aq, Bheiqsaqleiqlav neq, miqjaq kheq poiv khi laol bhiq nail laolduq bhai aqkaqsal aqbhaol-i mail lav sav-a nail ngaol. Laolduq al laiq neq, liq phao liq khoel bhee khi, heelma phao iqsanl, eeq nail phao iqsanl, ngaq cav bhee nail nee ovqtavq, daqmoe phao neq, hail cav bhi bhee-a nail ngaol.
2 Lavqtsoel liq phao liq phao-ail, uqkheel khe-ai dul nail bhiltsoel liq laiq lav sav dov khi laolduq nee teevq gaq khe-ai lav sav covq-a nail ngaol. Al ovqtavq, laolduq teevq laiq laiq lao-ail, giqheel-i mail leivq-a nail ngaol.
3 Laolduq nee mail tavq nail yalkav juq pevq nail khaqlail khuq bhoel nail iqlaoq juq, khaqlail khaoq dov nail daillav juq, thailphail juq, haqjoil coev tsaoq nail khulu juq, miqjaq miqjiiv tsi bhoel nail iqlaoq juq, niil juq bhai, giqheel-i mail lav sav-a nail ngaol.
4 Giqheel nail pheeqjaiq bhai neq, laolduq nail ildaoq phao teevq khe le-nq bhai lav sav covq-a nail ngaol.
5 Giqheel nail pheeqjaiq liq phao liq khoel bhai neq, bavq nail bavqkhaoq soiq bhoel nail galduq lavqceiv liq khaoq lav sav-a nail ngaol.
6 Bavqkhaoq neq, aqkaqsal nail aqbhaol-i mail lav sav khi giqheel leivq-a nail ngaol.
7 Bavqkhaoq neq, laolduq nail nvq phao nvq bal-nvq bhai jiav nail lavqceiv bhai tsaoq bhoel-a nail ngaol. Laolduq bhai, khaolbhaoq dov lal dai, dailpav-i mail lav sav-a nail ngaol.
Giqheel nail thailphail phail ma
8 A bhai nee ngal-aq, Bheiqsaqleiqlav neq, haqphal saiqgov nail govkhoiq bhai ganl nl nail yaqmai-aq juq nail giqheel phaoqdaiq-i mail, aqlavq tsiq nail galduq, giqheel nail thailphail phail ma dai khi giqheel tsiq dav duq lav sav-a nail ngaol.
Haqphal saiqgov nail khainl cov-a nail ganl
9 Aivq neq, uqhuq thaoq nail haqphal saiqgov nail khainl lav sav-u phao, lavqmal phao 100 cav bhi bhee khi, yavq-ai thaq nail haqphal aqjeel juq-i mail iqsanl, he jaoq-a nail ngaol.
10 Haqphal juq he jaoq nail galduq, ilkhel 20 khel dai khi ilkhel tsiq tsaoq nail saiqnaov 20 tsaoq bhai giqheel-i mail maqkhaiq, khulu juq dai khi pultavq phao tsaoq ceiv nail phaq bhai neq, phul-i mail maqkhaiq, lav sav-a nail ngaol.
11 Lavqtsel phao khe khainl iqsanl, lavqmal phao khe-ai, heelma phao 100 cav bhi bhee-a nail ngaol. Al ovqtavq, ilkhel 20 khel dai khi, ilkhel tsiq tsaoq nail saiqnaov 20 tsaoq bhai neq, giqheel-i maqkhaiq, pultavq phao tsaoq ceiv nail phaq dai khi khulu bhai neq, phul-i mail maqkhaiq, lav sav-a nail ngaol.
12 Haqphal saiqgov nail khainl haoqnaol phao khe eeq nail phao neq 50 cav bhi bhee khi ilkhel 10 khel, ilkhel tsiq tsaoq nail saiqnaov 10 tsaoq bhee dai, lav sav-a nail ngaol. Al ovqtavq, khulu dai khi, pultavq phao tsaoq ceiv nail phaq bhai neq, phul-i mail lav sav-a nail ngaol.
13 Haqphal saiqgov nail khainl sivtavq phao jiav khi nl ma dov khoeq phao neq, eeq nail phao 50 cav bhi bhee-a nail ngaol.
14 Haqphal saiqgov nail khainl lavqkhoel bhai aol lai nail govkhoiq nail lavqmal phao neq, 15 cav bhee nail haqphal juq dai khi, ilkhel hail khel maqkhaiq, ilkhel tsiq tsaoq nail saiqnaov hail tsaoq maqkhaiq, bhi jiav-a nail ngaol.
15 Khainl nail govkhoiq lavqtsel phao gail 15 cav bhi bhee khi, ilkhel hail khel maq khaiq, ilkhel tsiq tsaoq nail saiqnaov hail tsaoq maqkhaiq, bhi jiav-a nail ngaol.
16 Haqphal saiqgov nail khainl bhai he jaoq-ai thaq nail haqphal juq iqsanl mail neq, yavq-ai thaq nail haqphal aqjeel-i mail lav sav gil-a nail ngaol.
17 Ilkhel tsiq tsaoq nail saiqnaov neq, giqheel-i mail lav sav-a nail nee ovqtavq, khulu juq dai khi pultavq phao tsaoq ceiv nail phaq bhai neq, phul-i mail lav sav-a nail ngaol. Ilkhel pultavq bhai neq, phul phul leivq leivq bhiq-a nail ngaol. Al heel ngel-i mail, khainl khe ilkhel juq nail pultavq phao tsaoq ceiv nail phaq iqsanl mail, phul-i mail lav sav gil-a nail ngaol.
18 Haqphal saiqgov khe khainl nail govkhoiq bhai he jaoq gai nail haqphal bhai neq, lenl nail kheeljoe, govnav lavmav nail kheeljoe, kheeljoe aqnel dai khi yavq-ai thaq nail haqphal aqjeel juq-i mail lav sav khi, aqlavq-i mail aqgevq guvq bav-a nail ngaol. Haqphal saiqgov nail khainl bhai he jaoq-ai thaq nail haqphal juq khe-ai, govkhoiq khe haqphal gail, eeq nail phao 20 cav bhee khi, daqmoe phao neq, ngaq cav bhi bhee-a nail ngaol.
19 Al ovqtavq, govkhoiq khe haqphal al nail haqbhoil, giqheel nail ilkhel liq khel dai khi tsiq tsaoq nail saiqnaov liq tsaoq bhi jiav-a nail ngaol. Khulu juq dai khi pultavq phao tsaoq ceiv nail phaq bhai neq, phul-i mail lav sav-a nail nee ovqtavq, ilkhel nail pultavq bhai neq, phul phul leivq leivq bhiq-a nail ngaol
20 Haqphal saiqgov dai khi khainl nail haqbhoil khal jiav nail heeqthaiq juq neq, giqheel-i mail lav sav gil-a nail ngaol.
Uqhuq thaoq nail haqphal saiqgov nail galduq yalkav juq
21 Yalkav niil juq neq, Miqyail nail daoqma saljial thunq nail jaol duq pevq nail uqhuq thaoq nail haqphal saiqgov bhai yuq nail juq pevq nail ngaol. Maolseiq-i mail, Leiqbhil nail jeq-e juq bhai al nail ganl bhi gevq-a nail ngaol. Al hai gevq-u phao, Aqlonq nail yaqyov Ilthaqmaqlav bhai bhi hel daiq phail-a nail ngaol.
22 Yuldav nail jeq-e Hullav nail aqjievq, Ulliv nail yaqyov Bheiqsaqleiqlav neq, Heeqphaq Miqyail-i mail Maolseiq bhai daoq khal bivq-a nail khe-ai, iqsanl mail nl-a nail ngaol.
23 Aivq bhai tsao jao-ai bhiq nail gaq pevq nail Danq nail jeq-e lavqkhoel khe Aqhilsaqmal nail yaqyov Aqhaolliqbhal neq, maolkhoel gevq dov nia nail phao maqkhaiq, lavq mao aqmeeq-ai nia nail phao maqkhaiq, lenl nail kheeljoe, govnav lavmav nail kheeljoe, kheeljoe aqnel dai khi haqphal aqjeel juq bhai yavq nia nail phao maqkhaiq, nl nia nail gaq pevq nail ngaol.
24 Uqhuq thaoq nail haqphal saiqgov nail galduq gaol jai khi danq lal thaq nail heel iqsanl mail neq, uqhuq thaoq nail haqphal saiqgov lavqkhoel bhai dal ceiv-ai thaq nail khe-ai, hav daiq-u phao, 1000 kiqloq galduq bhee nail ngaol.
25 Ilsaqleiqlav nail tsaol-aq juq iqsanl nail lavqkhoel khe ya-a nail phul neq, haqphal saiqgov lavqkhoel bhai dal ceiv-ai thaq nail khe-ai, hav daiq-u phao, 3430 kiqloq dai bhee nail ngaol.
26 Phul al neq, aqmil gov-u khe Ilsaqleiqlav nail yaqyov-aq teevq gaq-i mail ya bivq nail phul teevq bavq nail khe teevq khe le-nq al juq pevq nail ngaol. Aqkovq 20 kovq nee pultavq aqmil gov-u phao, aol nail yaqyov-aq juq neq, 603550 gaq ngaol.
27 3400 kiqloq bhee nail phul al neq, meeq nail haol nail aqduq dai khi meeq dee haol dee dee nail aqduq nvq gaiq lavq bhai thao pav-ai thaq haqphal juq he jaoq-u phao, ilkhel dai khi tsiq tsaoq nail saiqnaov 100 tsaoq nail haqbhoil pevq nail ngaol. Saiqnaov yaoq tsaoq yaoq-ao nee mail neq, phul 34 kiqloq yuq-a nail ngaol.
28 Khulu juq nail haqbhoil maqkhaiq, pultavq phao tsaoq ceiv nail juq nail haqbhoil maqkhaiq, ilkhel nail pultavq phao leivq nail haqbhoil maqkhaiq, phul 20 kiqloq yuq-a nail ngaol.
29 Tsaol-aq al juq-i mail gaol jai khi danq lal thaq nail giqheel juq neq, iqsanl mail 2397 kiqloq bhee nail ngaol.
30 Giqheel al neq, uqhuq thaoq nail haqphal saiqgov nail govkhoiq nail daoqthaoq phao khe saiqnaov nail galduq maqkhaiq, laolduq nail galduq maqkhaiq, laolduq nee tavq nail pheeqjaiq dai khi yalkav juq iqsanl nail galduq maqkhaiq,
31 haqphal saiqgov nail khainl dai khi al nail govkhoiq teevq jaoq jiav nail ilkhel tsiq tsaoq nail saiqnaov nail galduq maqkhaiq, haqphal saiqgov dai khi khainl nail heeqthaiq juq nail galduq maqkhaiq, yuq-a nail ngaol.