Dov-ail 39
Philma juq nail aqgaq aqdoi guvq-a nail ganl
1 Meeq nail haol nail aqduq bhai ganl ya nl nail juq-i mail ya doi nail aqmeeq-ai guvq-ai thaq nail phailkhaoq juq bhai, aqyu juq neq, lenl nail kheeljoe, govnav lavmav nail kheeljoe, kheeljoe aqnel, niil juq-i mail guvq-a nail ngaol. Heeqphaq Miqyail Maolseiq bhai daoq bivq-a nail khe-ai, Aqlonq nail galduq iqsanl, meeq nail haol nail aqgaq aqdoi guvq-a nail ngaol.
Eipho dai khul nail pultavq phao doi dav nail phailkhaoq
2 Aqyu juq neq, Eipho dai khul nail pultavq phao doi dav nail phailkhaoq bhai heel dai khi lenl nail kheeljoe, govnav lavmav nail kheeljoe, kheeljoe aqnel dai khi yavq-ai thaq nail haqphal aqjeel niil juq oil khi guvq-a nail ngaol.
3 A bhai nee ngal-aq, heel bhilbhai dai teivq dov khi, kheeljoe khe-ai oev dov-a nail ngaol. Al ovqtavq, lavqmaoq aqmeeq-ai nl nia nail juq neq, heel nail kheeljoe al oil khi, lenl nail kheeljoe bhai maqkhaiq, govnav lavmav nail kheeljoe bhai maqkhaiq, kheeljoe aqnel bhai maqkhaiq, haqphal aqjeel nail lavqkhoel bhai maqkhaiq, guvq bhoel-a nail ngaol.
4 Eipho bhai sivtavq haoqnaol nvq laiq oil cavq nail haqbhoil, bavqpuv bhai tsaq nail neeqtsaq bhilbhai nvq deeq lav sav cov-a nail ngaol.
5 A bhai nee ngal-aq, Heeqphaq Miqyail Maolseiq bhai daoq khal bivq-a nail khe-ai, aqmeeq-ai yavq-ai thaq nail haqkhaoq bhai gail, Eipho dai khul nail pultavq phao khe doi nail phailkhaoq khe-ai, heel dai khi, lenl nail kheeljoe, govnav lavmav nail kheeljoe, kheeljoe aqnel dai khi yavq-ai thaq nail haqphal aqjeel-i mail yavq-a nail nee ovqtavq, Eipho nee mail teevq gaq khe-ai lav sav covq gil-a nail ngaol.
6 Aqyu juq neq, sainl aqnav nvq heeq oil-a nail nee ovqtavq, heel nail dailpav liq phao liq khoel bhai oil bhoel khi, Ilsaqleiqlav nail jeq-e 12 jeq-e nail aqmil sainl al nail kovtavq-ai junq bhai gevq bav nail khe-ai gevq bav-a nail ngaol.
7 Heeqphaq Miqyail Maolseiq bhai daoq bivq-a nail khe-ai, Ilsaqleiqlav nail jeq-e 12 jeq-e bhai bhi noeq thaq nail galduq, sainl al nvq heeq bhai, Eipho nail bavqpuv khe neeqtsaq bhilbhai nail pultavq bhai thel bav-a nail ngaol.
Neema bhai doi pheeq nail phaq guvq-a nail ganl
8 Aqyu juq neema bhai doi pheeq nail phaq guvq-u phao, Eipho dai khul nail pultavq phao doi dav nail phailkhaoq guvq-u khe-ai, heel, lenl nail kheeljoe, govnav lavmav nail kheeljoe, kheeljoe aqnel dai khi yavq-ai thaq nail haqphal aqjeel niil juq oil khi lavq mao nl nia nail juq-i mail bhi guvq-a nail ngaol.
9 Neema bhai doi pheeq nail phaq neq, haqphal nvq teiv teiv kovq khi davqnil heelma teevq thaol bhee dai, liq phao liq khoel bhi bhee-a nail ngaol.
10 Al ovqtavq, sainl liq hel dai, thel bav-a nail ngaol. Iqmoeq khal moeq khe hel bhai neq, aqnel nel heel heel nail sainl, aqheel heel nel nel nail sainl, aqniul niul nav nav nail sainl, niil juq guvq bav-a nail ngaol.
11 Nvq hel teevq hel bhai neq, aqheel heel niul niul nail sainl aqheel heel nail sainl, aqphul phul nail sainl, niil juq guvq bav-a nail ngaol.
12 Hail hel teevq hel bhai neq, aqnel bhai boivq boivq kheq nail sainl, phul leq deel sainl dai khi, aqnel bhai aqpheel kheq nail sainl niil juq guvq bav-a nail ngaol.
13 Liq hel teevq hel bhai neq, heel tsaiq deel sainl, sainl aqnav dai khi aqniul niul nav nav nail sainl niil juq guvq bav-a nail ngaol. A bhai nee ngal-aq sainl al juq iqsanl mail, heel nail dailpav liq phao liq khoel bhai guvq bav-a nail ngaol.
14 Sainl teevq heeq bhai neq, Ilsaqleiqlav nail jeq-e nail aqmil teevq mil gevq bav thaq nail ngel-i mail, sainl 12 heeq bhai Ilsaqleiqlav nail jeq-e nail aqmil 12 mil junq deeq-ai thaq nail khe-ai, gevq bav-a nail ngaol.
15 Aqyu juq neq, neema bhai doi pheeq nail phaq nail galduq heel aqhaol nail neeqtsaq-i mail iv-a nail ngaol.
16 A bhai nee ngal-aq, heel nail dailpav nvq pav maqkhaiq, heel nail lavqceiv nvq khaoq maqkhaiq, lav sav khi heel nail lavqceiv al nvq khaoq bhai neq, neema bhai doi pheeq nail phaq nail pultavq khal tavq khe nvq laiq nail naltsoel bhai thel bav-a nail ngaol.
17 Heel-i mail iv-ai thaq nail neeqtsaq al nvq deeq neq, neema bhai doi pheeq nail phaq nail nal tsoel bhai jiav nail lavqceiv bhai thel bav-a nail ngaol.
18 Jail nail aqjaq nvq deeq neq, Eipho dai khul nail pultavq phao doi dav nail phailkhaoq kovtavq khe jiav nail neeqtsaq bhilbhai nail heel dailpav liq phao liq khoel bhai phee thaiq-a nail ngaol.
19 A bhai nee ngal-aq, heel nail lavqceiv nvq khaoq lav sav khi neema bhai doi pheeq nail phaq nail ildaoq khal daoq haoqnaol phao khe naltsoel nvq laiq bhai, Eipho nail aqjail bhai lav sav covq gai-a nail ngaol.
20 Heel nail lavqceiv nvq khaoq gaoq lav sav khi, Eipho nail sivtavq phao iqsanl niavq bav gai-a nail ngaol. Lavqceiv al nvq khaoq neq, haqkhaoq nail pultavq, bavqpuv khe neeqtsaq bhilbhai nail pul-nvq, Eipho nail aqjaq aqjail bhai lav sav tsaq-a nail ngaol.
21 Al ovqtavq, neema bhai doi pheeq nail phaq khe lavqceiv al juq neq, Eipho khe lavqceiv juq nee mail, lenl nail neeqtsaq-i mail, phee thaiq-a nail ngaol. Al hai phee thaiq-a nail ngel-i mail, neema bhai doi pheeq-ai thaq nail phaq maq ga kha-ail dai, haqkhaoq nail pultavq bhai bhi jiav-a nail ngaol. Heeqphaq Miqyail Maolseiq bhai daoq khal bivq-a nail khe-ai, nl gil-a nail ngaol.
Jail nail philma nail aqgaq aqdoi juq bhai guvq-a nail ganl
22 Aqyu juq neq, Eipho dai khul nail pultavq phao doi dav nail phailkhaoq nail lavqkhoel phao, ya doi bhoel nail phailkhaoq heelma bhai aqmeeq-ai yavq nia nail juq bhai, yavq-ai thaq nail lenl nail haqphal teevq keiv-i mail bhi guvq-a nail ngaol.
23 Al ovqtavq, uqhuq bhai he tsaoq nail galduq gaoltsi bhai khaolbhaoq bhi daol-a nail ngaol. Khaolbhaoq al maq bhi pav ail nail galduq iqsanl, jail-nq teevq jaoq bhai neq, yavq-ai thaq nail haqphal-i mail aqjaq laiq gai-a nail ngaol.
24 Lenl nail phailkhaoq al keiv nail phaildaoq teevq jaoq jaoq lao bhai neq, lenl nail kheeljoe, govnav lavmav nail kheeljoe, kheeljoe aqnel, yavq-ai thaq nail haqphal aqjeel, niil juq-i mail aqheeq khe-ai guvq-ai thaq nail phaq lav sav covq gai-a nail ngaol.
25 Al ovqtavq, aqyu juq heel aqhaol-i mail tsullul iqsanl lav sav khi, phailkhaoq phail daoq bhai gaoq lav sav covq-a nail ngaol. Al heel ngel-i mail, al nvq phaq teevq heeq nail gaiqlaq teevq heeq, teevq jaoq bhi jiav-a nail ngaol.
26 Heeqphaq Miqyail Maolseiq bhai daoq bivq-a nail khe-ai, Aqlonq Heeqphaq Miqyail nail sivtavq bha ganl nl lal-u phao, ya doi nail phailkhaoq neq, phaildaoq bhai aqheeq khe-ai dul nail phaq dai khi, heel nail tsullul al nvq phaq teevq heeq nail gaiqlaq teevq phaq guvq bav-ai thaq nail lenl nail phailkhaoq heelma al keiv pevq nail ngaol.
27 Aqyu juq neq, Aqlonq dai khi aivq nail yaqyov juq nail galduq lavqkhoel phao khe doi bhoel nail yavq-ai thaq nail phailkhaoq heelma,
28 uqtsaoq, uqjeeq heelma dai khi lavqkhoel phao gaq bhoel nail khiltsaoq, niil juq iqsanl mail, yavq-ai thaq nail haqphal aqjeel-i mail lav sav-a nail ngaol.
29 Heeqphaq Miqyail Maolseiq bhai daoq bivq-a nail khe-ai, lenl nail kheeljoe, govnav lavmav nail kheeljoe, kheeljoe aqnel, yavq-ai thaq nail haqphal aqjeel niil juq oil khi, aqlavq-i mail aqgevq guvq dov-a nail nee ovqtavq, haqkhaoq lav sav-a nail ngaol.
30 Aqyu juq neq, heel aqhaol nail dailpav lav sav-a nail ngaol. A bhai neq, junq deeq-ai thaq nail khe-ai, "Heeqphaq Miqyail nail meeq nail haol nail gaq" dai, gevq bav-ai thaq nail ngaol.
31 A bhai nee ngal-aq, Heeqphaq Miqyail Maolseiq bhai daoq bivq-a nail khe-ai, heel nail dailpav al, uqjeeq nail sivtavq-ai lenl nail neeqtsaq-i mail phee thaiq-ai thaq nail ngaol.
Maolseiq ganl nl thaq nail bhai tsao tsel-a nail ganl
32 Haoqnao nao saq neq, Miqyail moel tavq lee nail aqduq dai iqsanl khul nail, uqhuq thaoq nail haqphal saiqgov cov nail ganl gaq lai-a nail ngaol. Heeqphaq Miqyail-i mail Maolseiq bhai daoq khal bivq-a nail khe-ai Ilsaqleiqlav nail tsaol-aq juq nl gil-a nail ngaol.
33 Aqyu juq yaoq phaq yaoq nee mail oil covq gaq gil khi, Maolseiq jaol nail bha bivq lal-a nail ngaol. Oil covq-a nail al juq neq, haqphal saiqgov dai khi haqphal saiqgov nee tavq nail yalkav juq iqsanl mail, khulu juq, thao-ai thaq nail dailpav juq, dailpav bhai tsaoq ceiv nail aqbhaol juq, ilkhel juq dai khi ilkhel tsiq tsaoq nail saiqnaov juq,
34 yaol yaol bhuq nail bavkov aqnel leivq-ai thaq nail cov pheeq nail phaq, civqmeiv nail bavkov aqjeel-i mail lav sav-ai thaq nail cov pheeq nail phaq, daoqma saljial nail thunq bhai he pheeq-ai thaq nail haqphal,
35 daoqma saljial nail thunq, 'Oeqbal pheeq thaiq nail' dai, khul nail thunq nail khaoqpheeq dai khi bavqkhaoq juq,
36 kovqkhail dai khi kovqkhail nee tavq nail yalkav juq iqsanl mail, Miqyail nail sivtavq bhai khaq mao iqsanl bhi jiav dai, aivq bhai danq nail khaqmul juq,
37 heel aqhaol nail phalmanq tovq dav duq dai khi phalmanq juq, al nee tavq nail yalkav juq iqsanl mail dai khi, phalmanq juq nail galduq saqloq aqtseel juq,
38 heel nail laolduq, uqhuq bhai hoel dav bhiq nail aqtseel, huqbhiq nil nail phaq dai khi haqphal saiqgov nail govkhoiq khe haqphal,
39 giqheel nail laolduq, al nee tavq nail giqheel nail pheeqjaiq, laolduq bavq nail bavqkhaoq, laolduq nee tavq nail yalkav juq iqsanl mail dai khi, giqheel nail thailphail phail ma dai khi tsiq dav duq,
40 uqhuq thaoq nail haqphal saiqgov nail khainl bhai he jaoq nail galduq haqphal juq, ilkhel juq dai khi ilkhel tsiq tsaoq nail saiqnaov juq, khainl nail govkhoiq khe haqphal, neeqtsaq juq, heeqthaiq juq, uqhuq thaoq nail haqphal saiqgov nail lavqkhoel phao khe yuq nail yalkav juq iqsanl mail,
41 Aqlonq dai khi aivq nail yaqyov juq-i mail meeq nail haol nail aqduq bhai Philma nail ganl nl-u phao, doi nail aqmeeq-ai guvq-ai thaq nail meeq nail haol nail aqgaq aqdoi, niil juq pevq nail ngaol.
42 Ilsaqleiqlav nail tsaol-aq juq neq, Heeqphaq Miqyail-i mail Maolseiq bhai daoq bivq-a nail khe-ai nl gaq gil-a nail ngaol.
43 Maolseiq neq, aqyu juq-i mail khal nl gaq-ai thaq nail bhai tsao tsel daiq-u phao, Heeqphaq Miqyail-i mail daoq khal bivq-a nail khe-ai, nl thaq nail bhai ya moel-a nail ngaol. Al heel ngel-i mail Maolseiq neq, aqyu juq bhai geeqlaoq bivq-a nail ngaol.