Dov-ail 40
Uqhuq thaoq nail haqphal saiqgov cov gaq-a nail ganl
1 Heeqphaq Miqyail neq, Maolseiq bhai niail hai ge bhiq-a nail ngaol:
2 "Bhala iqmoeq khal moeq khe heeq iqmoeq khal moeq-u n-gaol neq, Miqyail moel tavq lee nail aqduq dai iqsanl khul nail uqhuq thaoq nail haqphal saiqgov cov yaoq.
3 Uqhuq thaoq nail haqphal saiqgov nail lavqkhoel bhai neq, daoqma saljial nail thunq bavq bhoel gai khi thunq nail sivtavq bhai neq, haqphal thao tsoiq gai yaoq.
4 Al ovqtavq, kovqkhail iqsanl bavq bhoel khi a bhai nee tavq nail yalkav juq kovqkhail bhai oil dav thaq gai yaoq. Phalmanq tovq dav duq gail oil bhoel laivq khi phalmanq ya tovq bhaol gai nail ngaol.
5 Huqbhiq nil nail phaq tovq khi danq bhiq nail heel nail laolduq bhai neq, daoqma saljial nail thunq sivtavq bhai bavq thaq gai khi, haqphal saiqgov nail govkhoiq bhai neq, haqphal he tsoiq gai yaoq.
6 Miqjaq kheq poiv khi laol bhiq nail laolduq neq, Miqyail moel tavq lee nail aqduq dai iqsanl khul nail haqphal saiqgov nail govkhoiq aqjail bhai bhi jiav yaoq.
7 Giqheel nail thailphail phail ma neq, haqphal saiqgov dai khi laolduq nail gaiqlaq bhai bhi jiav khi ulcuvq hoel bhee gai yaoq.
8 Haqphal saiqgov nail teevq jaoq neq, khainl lav sav khi, govkhoiq bhai neq, haqphal he tsoiq gai yaoq.
9 Hoel dav bhiq nail aqtseel oil khi, uqhuq thaoq nail haqphal saiqgov dai khi haqphal saiqgov nail lavqkhoel khe khal jiav nail iqsanl mail bhai hoel dav nail lavqkhoel nee, aqmeeq aqhaol haol dai lav haol bhiq yaoq.
10 Al ovqtavq, miqjaq kheq poiv khi laol bhiq nail laolduq nee tavq nail yalkav juq iqsanl mail bhai gail, aqtseel hoel dav bhiq yaoq. Al hai hoel dav bhiq haq neq, laolduq iqsanl meeq dee haol dee dee lal nail ngaol.
11 Thail hai dul dai thailphail phail ma dai khi tsiq dav duq bhai gail, aqtseel hoel dav nail lavqkhoel nee, aqmeeq aqhaol dai lav haol yaoq.
12 Aqlonq dai khi aivq nail yaqyov juq bhai gail haqphal saiqgov nail govkhoiq bhai hel lavq khi aqyu juq nail aqmaol bhai ulcuvq-i mail hoel haol bhiq yaoq.
13 Aqlonq bhai meeq nail haol nail aqgaq aqdoi bhi doi khi uqhuq bhai aqtseel hoel dav bhiq nail lavqkhoel nee, ngaq nail galduq philma nail ganl bhi nl dai, aqmeeq aqhaol haol dai lav haol bhiq yaoq.
14 Aivq nail yaqyov juq bhai gail hel lavq khi mail, lavqkhoel phao doi bhoel nail yavq-ai thaq nail phailkhaoq heelma bhi doi yaoq.
15 Al ovqtavq, aqyu juq ngaq nail haqbhoil, philma nail ganl bhi nl nail galduq, aivq nail aqbhu nail uqhuq bhai aqtseel hoel dav bhiq-a nail khe-ai, hoel dav bhiq yaoq. Aqyu juq nail uqhuq bhai aqtseel hoel dav bhiq nail al neq, aqyu juq nail jeq-e teevq yeel nee teevq yeel philma ya jiovq nail galduq ngaol" dai, ge bhiq-a nail ngaol.
16 Maolseiq neq, Heeqphaq Miqyail-i mail daoq khal bivq-a nail khe-ai, nl gil-a nail ngaol.
17 Al heel ngel-i mail, nvq kovq teevq kovq khea, iqmoeq khal moeq khe heeq, iqmoeq khal moeq-u n-gaol bhai uqhuq thaoq nail haqphal saiqgov cov-a nail ngaol.
18 Maolseiq neq, haqphal saiqgov cov-u phao, tsiq tsaoq nail saiqnaov juq bhai aivq nail aqduq bhai aivq bhi jiav-a nail ngaol. A bhai nee ngal-aq neq, thao jaoq nail dailpav juq bhai bavq thul-a nail nee ovqtavq, dailpav bhai tsaoq ceiv nail aqbhaol tsaoq bhoel khi, ilkhel kha thul-a nail ngaol.
19 A bhai nee ngal-aq, Heeqphaq Miqyail aivq bhai daoq bivq-a nail khe-ai, haqphal saiqgov nail pultavq bhai he pheeq khi, haoq nao pultavq bhai teevq taiv-nvq, gaoq he pheeq-a nail ngaol.
20 Aivq neq, aoldaoq kovqdaoq gevq-ai thaq nail dailpav bhai daoqma saljial nail thunq nail lavqkhoel bha bavq bhoel-a nail ngaol. Thunq nail lavqceiv bhai neq, bavqkhaoq tsaoq bhoel khi 'Oeqbal pheeq thaiq nail' dai, khul nail thunq nail khaoqpheeq bhai, bavq dav-a nail ngaol.
21 A bhai nee ngal-aq, aivq neq, Heeqphaq Miqyail-i mail daoq khal bivq-a nail khe-ai, thunq bhai uqhuq thaoq nail haqphal saiqgov nail lavqkhoel bha bavq bhoel laivq khi haqphal thao pav gai-a nail ngaol.
22-23 Aivq neq, Heeqphaq Miqyail-i mail daoq khal bivq-a nail khe-ai, kovqkhail bhai neq, haqphal saiqgov nail lavqkhoel lavqtsel phao, haqphal nail lavqniil phao tsiq thaq gai khi, Heeqphaq Miqyail nail sivtavq khe kovqkhail kovtavq bhai khaqmul oil dav gai-a nail ngaol.
24 Al ovqtavq, phalmanq tovq dav duq bhai uqhuq thaoq nail haqphal saiqgov nail lavqkhoel lavqmal phao kovqkhail nail teevq phao bal-nvq phao tsiq thaq gai-a nail ngaol.
25 A bhai nee ngal-aq, Heeqphaq Miqyail-i mail daoq khal bivq-a nail khe-ai, Heeqphaq Miqyail nail sivtavq khe jiav nail phalmanq bhai miqjaq kheq bhaol-a nail ngaol.
26-27 Heeqphaq Miqyail-i mail daoq khal bivq-a nail khe-ai, heel nail laolduq bhai gail, haqphal saiqgov nail lavqkhoel phao haqphal nail sivtavq bhai bhi bavq thaq gai-a nail nee ovqtavq, laolduq kovtavq bhai iqsanl, huqbhiq nil nail phaq tovq khi danq bhiq-a nail ngaol.
28 Aivq neq, haqphal saiqgov nail govkhoiq bhai haqphal he pheeq gaq-al nee ngal-aq,
29 'Heeqphaq Miqyail moel tavq lee nail aqduq' dai, iqsanl khul nail haqphal saiqgov nail govkhoiq aqjail bhai miqjaq kheq poiv khi laol bhiq nail laolduq bhi jiav-a nail ngaol. Heeqphaq Miqyail-i mail daoq bivq-a nail khe-ai, aivq neq, miqjaq kheq poiv khi laol bhiq nail phaq bhai maqkhaiq, gov tsail tsail neev-i mail laol bhiq nail phaq bhai maqkhaiq, laolduq al duq bhai laol bhiq-a nail ngaol.
30 Thailphail phail ma bhai neq, haqphal saiqgov dai khi laolduq nail gaiqlaq bhai bavq thaq khi, tsiq nail haqbhoil, ulcuvq hoel bhoel bhiq-a nail ngaol.
31 Maolseiq, Aqlonq dai khi aivq nail yaqyov juq neq, ulcuvq al-i mail aqyu juq nail aqkhil dai khi aqlavq tsiq nail ngaol.
32 Heeqphaq Miqyail-i mail daoq khal bivq-a nail khe-ai, aqyu juq laolduq dai khi haqphal saiqgov bha khal lal-u phao neq, al hai tsiq haol-a nail ngaol.
33 A bhai nee ngal-aq Maolseiq neq, haqphal saiqgov dai khi laolduq nail teevq jaoq khainl lav sav khi govkhoiq bhai neq, haqphal he pheeq-a nail ngaol. Al heel ngel-i mail Maolseiq neq, ganl khal jiav nail nl gaq gil-a nail ngaol.
Heeqphaq Miqyail nail seiqleiq khaoqsail uqhuq thaoq nail haqphal saiqgov lavqkhoel bhai bhee lee-a nail ganl
34 A bhai nee ngal-aq, 'Heeqphaq Miqyail moel tavq lee nail aqduq' dai, iqsanl khul nail uqhuq thaoq nail haqphal saiqgov nail pultavq bhai nqdil uv thaiq lee khi Heeqphaq Miqyail nail seiqleiq khaoqsail neq, haqphal saiqgov nail lavqkhoel bhai bhee lee-a nail ngaol.
35 Nqdil al hai uv thaiq lee khi Heeqphaq Miqyail nail seiqleiq khaoqsail bhee nail ngel-i mail, Maolseiq neq, haqphal saiqgov nail lavqkhoel bha maq aol lai nia-ail.
36 Ilsaqleiqlav nail tsaol-aq juq gailkhaol dov-u phao, yaoq pov yaoq-ao nee, uqhuq thaoq nail haqphal saiqgov nail pultavq khe nqdil ilkhel dav lai khi mail pultavq, dov ail-a nail ngaol.
37 Haqphal saiqgov bhai nqdil ilkhel uv thaiq-u phao kev dai, aqyu juq gailkhaol maq dov-ail.
38 Ilsaqleiqlav nail tsaol-aq juq-i mail gailkhaol dov nail teevq khaol khaol lao haqphal saiqgov nail pultavq bhai n-gaol phao neq, nqdil ilkhel uv thaiq-ai thaq nail bhai maqkhaiq nqkiv phao neq, nqdil lavqkhoel miqjaq bhaol nail bhai maqkhaiq aqyu juq ya moel gil-a nail ngaol.