Yaolsuv 2
Yaolsuv-i mail Yeiqlilkhol nail meenq bha bhi khoiq hel daiq ail-a nail ganl
1 A bhai nee ngal-aq Nunq nail yaqyov Yaolsuv neq, aqyu juq-i mail gaq naq naq nail Siltiv-n nail jaol duq nee mail, bhi khoiq hel daiq lai nail haqbhoil nvq gaq bhi lai khi daoq niail hai bivq-a nail ngaol: "Milkhaoq al juq bhai hel daiq khi Yeiqlilkhol meenq bhai neq, aqmeeq-ai tsao tsel daiq lai yaoq" dai, ge bhiq-a nail ngaol. Al heel ngel-i mail, aqyu nvq gaq Yeiqlilkhol nail meenq bha kev lai-u phao, Laqhal dai khul nail maimaqlal nail ilkhaol bhai teevq kivq iq thaiq lai-a nail ngaol.
2 Thail hai ngaol-aoq, Yeiqlilkhol meenq khe heeqphaq bhai, "Ilsaqleiqlav nail tsaol-aq teevq pav ga nav juq yanq-nl kiv ngadao juq nail milkhaoq bha khoiq hel daiq lee thaq nail niil" dai, ge bhiq lal-a nail ngaol.
3 A bhai nee ngal-aq, Yeiqlilkhol nail heeqphaq neq, Laqhal nail ilkhaol bha niail hai bhi ge bhiq lai-a nail ngaol: "Naoq nail ilkhaol khe lee-a nail al nvq gaq neq, milkhaoq iqsanl bhai khoiq hel daiq lee thaq nail juq pevq nail ngel-i mail, ngal jaol nail bha hel lavq yaoq" dai, bhi ge bhiq lai-a nail ngaol.
4 Thail hai ngaol-aoq, Laqhal neq aqyu nvq gaq bhai hevq-uvq gai khi niail hai ge kovq bhiq-a nail ngaol: "Ngaq nail ilkhaol bha tsaol-aq al nvq gaq lee-a nail neq, tsaq nail ngaol. Thail hai ngaol-aoq aqyu nvq gaq khaq bha nee lee thaq nail-aiq dai, maq heeq kivq.
5 Aqnav nav lai khi meenq nail lolgov gov ma pheeq thaiq nail aqyanq kev lal-u phao, dov ail-a nail ngaol. Khaq bha ail nail dai neq, maq heeq kivq-ail. Lavqtsail mail the haq neq the kheel-ai haq-al meeq nial"dai, ge bhiq-a nail ngaol.
6 Maldil neq, aivq al nvq gaq bhai ilkhaol khaolpoiva khe jiiv dov-ai thaq nail gov bavq thaq duq bhai hevq uvq gaq-ao nail ngaol.
7 Heeqphaq-i mail bhi lee-a nail tsaol-aq al juq neq meenq lavqniil bha ail dov-u phao, meenq khe lolgov gov ma phee thaiq-a nail ngaol. Aqyu juq neq gailkhaol teevq lao tsaoq, Yaoldaq laoljaol nee ceiv lai nia nail aqduq bha kev dai, khoiq hel daiq lee thaq nail juq bhai hal pov lai-a nail ngaol.
8 Thail hai ngaol-aoq, iqmoeq-u nee Laqhal neq, khoiq hel daiq lee-a nail al nvq gaq maq iq thaiq nail iqmoeq bhai, ilkhaol pultavq bhai dav lai khi,
9 niail hai ge bhiq lai-a nail ngaol: "Heeqphaq Miqyail neq milkhaoq niil khaoq nul juq bhai bivq lavq-ao nail ngaol dai, ngal heeq kivq nail ngaol. Nv juq iqsanl mail nul juq bhai gee sil nail ngaol. Al heel ngel-i mail, milkhaoq niil khaoq khe jaol nail tsaol-aq juq yaoq gaq yaoq-ao nee mail, nul juq bhaq da nee, gee sil nail sil lai-aiq nail ngaol.
10 Khul khi mail dai ngal-aq, nul juq Iljiltuv nail milkhaoq nee mail dov lal-u phao, Heeqphaq Miqyail neq, nul juq ceiv lai kivq dai iqyaq iqma aqnel bhai bhi gee lai khi, gailkhaol lav daol bhiq-a nail ganl bhai maqkhaiq, Yaoldaq laoljaol nail nlma dov khoeq phao uv thaiq nail Aqmaolliv nail heeqphaq nvq gaq pevq nail heeqphaq Silhonq dai khi heeqphaq Aolgav bhai nul juq khal hai lav cov bhiq-a nail ganl bhai maqkhaiq, nv juq ya gaiq-a nail ngaol.
11 Ganl al juq ya gaiq-u phao, nv juq nail neema gee sil khi, gaq ga juq gil lee-a nail ngaol. Nul juq bhai genl dev kovq tseq nail neema teevq gaq gail maq aol dai, pevq lal-a nail ngaol. Khul khi mail dai ngal-aq, nul juq nail Heeqphaq Miqyail neq, nqtavq khi miltsaq bhai uv thaiq nail Miqyail pevq nail ngaol.
12-13 Al heel ngel-i mail, ngal nul juq bhai saljial ivq-a nail khe-ai, ngaq nail phaq yaq ma yaq bhai iqsanl, saljial ivq naol dai, Heeqphaq Miqyail bhai juq khi khanq lavq yaoq. Al ovqtavq, ngaq nail aqbhu aqma, aqivq jaqbheq juq dai khi aqyu juq nail phaq yaq ma yaq juq bhai bhi sil nail phaq nee mail bhi jel-ail naol dai iqsanl, salkhil pevq nail haqbhoil ngaq bhai teevq laiq laiq bivq thaq-ail ceevq lavq yaoq" dai, hal-a nail ngaol.
14 Aq-u phao aqyu nvq gaq ge kovq bhiq-a nail: "Nv nvq gaq, saljial maq ivq haq neq, Heeqphaq Miqyail neq, nv nvq gaq bhai heivq lavq dei-eiq. Nv nvq gaq niai jaol nail ganl bhai naol yu teevq gaq bhai maq ge bhiq haq neq, Heeqphaq Miqyail milkhaoq niil khaoq nv juq bhai bivq lavq-u phao, nv juq neq nul juq bhai tsao jao-ai bhiq naol dai, saljial jaq-ai thaq nail daoq, ivq naol" dai, ge kovq bhiq-a nail ngaol.
15 Laqhal neq, meenq nail khainl kaovq-ai thaq nail nee cov bav-ai thaq nail ilkhaol bhai jaol nail ngel-i mail, aqyu nvq gaq bhai neeqtsaq-i mail bhi ju khal-aivq-a nail ngaol.
16 Thailhai ngaol-aoq, aqyu nvq gaq maq yavq kha-ail nail iqmoeq nee, aivq neq, "Heeqphaq-i mail bhi lee-a nail juq maq hal pov moel nia dai, gaoqjaoq phao tsaoq dal laiq khi hail n bhee dai tsaoq-uvq lai yaoq. Nul juq bhai hal pov nail juq kovq-ail khi mail pultavq, nul juq gailkhaol dov lai yaoq" dai, ge bhiq-a nail ngaol.
17 Aq-u phao aqyu nvq gaq ge nail: "Nv juq-i mail naoq bhai bivq-a nail saljial ivq nail galduq niail hai ya nl nail ngaol:
18 Nv juq, nul juq nail milkhaoq bhai lee-u phao, nv juq bhai bhi dov lee lavq-a nail lolgov gov yaq nee mail neeqtsaq aqnel phee thaiq khi he kha thaq gai yaoq. Al ovqtavq, naoq nail aqbhu aqma, aqivq jaqbheq juq dai khi phaq yaq ma yaq juq iqsanl mail khul jil gil khi, naoq nail ilkhaol lavqkhoel bhai bhi jaol gil yaoq.
19 Naoq nail ilkhaol lavqkhoel khe jaol nail teevq gaq ga nav gailkhaol bha dov lee khi heivq nail bhai ya daq haq neq, nv juq nee mail maq tavq-ail. Thail hai ngaol-aoq, naoq nail ilkhaol lavqkhoel khe jaol nail teevq gaq gaq nav heivq nail bhai ya daq haq neq, aivq nail galduq nv juq daq nail ngaol.
20 Al ovqtavq, nv juq nail ganl teevq gaq ga nav bhai ge bhiq haq neq, naoq-i mail nv juq bhai bhi jaq lavq-a nail saljial nee jel-ail nail ngaol" dai, Laqhal bhai ge bhiq-a nail ngaol.
21 Laqhal neq, aqyu nvq gaq-i mail ge nail khe-ai, tsao the naol dai, ge bhiq khi aqyu nvq gaq bhai bhi dov ail-a nail ngaol. Aqyu nvq gaq dov-ail gaq-al nee ngal-aq, lolgov gov yaq bhai neeqtsaq aqnel phee thaiq gai-a nail ngaol.
22 Khoiq hel daiq lee-a nail al nvq gaq gail, gaoqjaoq bha dav lai khi tsaoq-uvq lai-a nail ngaol. Heeqphaq-i mail khoel bhiq khi bhi lai-a nail juq gail, hail n hal pov khi maq moel-a nail ngel-i mail, Yeiqlilkhol nail meenq bha kovq lee-a nail ngaol.
23 A bhai nee ngal-aq, aqyu nvq gaq gail gaoqjaoq nee mail ail kha-a nail nee ovqtavq, Yaoldaq laoljaol ceiv lai khi Nunq nail yaqyov Yaolsuv jaol nail bha kovq lai-a nail ngaol. Aqyu nvq gaq bhai khal pevq lal-a nail ganl iqsanl mail Yaolsuv bhai ge bhiq gil-a nail ngaol.
24 Aqyu nvq gaq ge nail: "Heeqphaq Miqyail neq ngadao juq bhai milkhaoq al khaoq mal dil bivq lavq-ao nail ngaol. Aqyu juq nail milkhaoq yaq juq iqsanl mail, ngadao juq bhai gee sil gil-ai bhiq nail ngaol" dai, ge bhiq-a nail ngaol.