Yaolsuv 3
Ilsaqleiqlav nail tsaol-aq juq Yaoldaq laoljaol ceiv lai-a nail ganl
1 Haoqnao n n-gaol nqhao navqmav-ail, Yaolsuv dai khi Ilsaqleiqlav nail tsaol-aq juq neq Siltiv-n nail gaq naq naq duq nee Yaoldaq laoljaol jiav nail phao dov-ail khi, laoljaol maq ceiv lai nail gaiqlaq, gaq naq naq-a nail ngaol.
2 Hail n bhee lal-u phao, genl dev nail aqivq jiovq nail juq neq, gaq naq naq nail aqduq doi dai ail khi,
3 daoq niail hai bivq-a nail ngaol: "Nul juq nail Heeqphaq Miqyail nail daoqma saljial thunq bhai maqkhaiq thunq al bhai Leiqbhil nail jeq-e pevq nail philma juq bavq khi lal nail bhai maqkhaiq, ya moel-u phao, nul juq neq, gaq naq naq duq nee thul khi aqyu juq nail haoqnao ya tsao thel laivq nail ngaol.
4 Nul juq gailkhaol niil khaol bhai teevq pov gail maq lai daiq haq nail bhaq da nee, aqyu juq neq, gailkhaol hevq daiq lavq nail ngaol. Thail hai ngaol-aoq, nul juq daoqma saljial nail thunq jiav nail aqjail bhai maq ya jaol-ail. Thunq nail haoqnaol phao 2000 cav galduq khaiq khi ya tsao the nail ngaol" dai, tsaol-aq al juq bhai ge bhiq-a nail ngaol.
5 A bhai nee ngal-aq, Yaolsuv iqsanl, tsaol-aq al juq bhai ge bhiq-a nail: "Niaohao Heeqphaq Miqyail neq nul juq bhai noeq-u maq dov nail phaq nl lavq nail ngel-i mail, nul juq yovqgavq bhai yovqgavq lav meeq lav haol yaoq" dai, ge bhiq-a nail ngaol.
6 Nqhao phao kev lal-u bhai, Yaolsuv neq, philma juq bhai, "Daoqma saljial nail thunq bavq khi tsaol-aq al juq nail sivtavq phao lai yaoq" dai, ge bhiq khi, aqyu juq gail thunq bavq khi tsaol-aq juq nail sivtavq phao lai-a nail ngaol.
7 Heeqphaq Miqyail neq, Yaolsuv bhai niail hai ge bhiq-a nail ngaol: "Ngal, Ilsaqleiqlav nail tsaol-aq juq nail sivtavq bhai yaq n n-gaol ngal naoq bhai thaq eeq thaq heel bhiq nail ngaol. Ngal Maolseiq nee mail teevq gaq khe-ai jaol-u khe-ai, naoq-ai nee mail teevq gaq khe-ai jaol nail ganl, aqyu juq ya heeq nia lal nail ngaol.
8 Daoqma saljial nail thunq bavq-nq thaq nail philma juq bhai, 'Yaoldaq laoljaol nail daolbhaq bhai kev ail-u phao, nul juq ulcuvq nail lavqkhoel bhai thul phaol yaoq' dai, al hai daoq ya bivq nail ngaol" dai, ge bhiq-a nail ngaol.
9 A bhai nee ngal-aq Yaolsuv neq Ilsaqleiqlav nail tsaol-aq al juq bhai niail hai gaoq ge bhiq-a nail ngaol: "Lal yaoq, nul juq Heeqphaq Miqyail-i mail ge nail bhai nal daiq lal yaoq.
10 Aqdoevq doevq nail Miqyail neq nul juq nail lavqkhoel bhai jaol khi Khaqnanq nail jeq-e, Hiltiv nail jeq-e, Hilwil nail jeq-e, Pheiqliqsil nail jeq-e, Gillavgaqsil nail jeq-e, Aqmaolliv nail jeq-e dai khi Yeiqbhulsil nail jeq-e juq bhai nul juq nail sivtavq nee mal dil the dov nail ganl bhai khal hai khi ya heeq kivq nail dai ngal-aq,
11 miltsaq niil teevq heeq heeq lao bhai uv thaiq nail Heeqphaq Miqyail nail daoqma saljial nail thunq neq, nul juq nail sivtavq nee Yaoldaq laoljaol bhai ceiv lai nail ngaol.
12 Niil aq-il Ilsaqleiqlav nail tsaol-aq 12 jeq-e nail lavqkhoel khe teevq jeq-e khe teevq gaq tsel dov yaoq.
13 Miltsaq niil teevq heeq heeq lao bhai uv thaiq nail Heeqphaq Miqyail nail daoqma saljial nail thunq bhai bavq-nq thaq nail Philma juq neq, Yaoldaq laoljaol khe ulcuvq bhai naoq-u phao, teevq pov taivq-ail laoljaol il kha leevq nail naq lai-a nail nee ovqtavq, teevq dao bhai taivq-ail il jil gil laivq khi ilphail khe-ai jiav lai nail ngaol" dai, ge bhiq-a nail ngaol.
14 Aq-u phao, aqyu juq gail, Yaoldaq laoljaol bhai ceiv lai nail galduq aqyu juq nail gaq naq naq duq nee mail dov lee khi daoqma saljial nail thunq bavq-nq thaq nail Philma juq gail, aqyu juq nail sivtavq nee mail lai-a nail ngaol.
15 Gov gaiq nail yanq pevq nail ngel-i mail, ulcuvq neq laoljaol deq laiq lal-u kev dai, il nail ngaol. Thail hai ngaol-aoq, philma juq Yaoldaq laoljaol daolbhaq bhai kev-ail khi aqyu juq nail aqkhil pavq-uvq ulcuvq bhai naoq thaiq gai aivq-u phao,
16 ulcuvq il khal lee nail naq lai khi, ulcuvq il-aivq nail aqduq jiav nail tsaq dai, eq nail phao jiav nail Saqlaqtanq nail meenq aqjail khe Aqdaq meenq bhai ilphail khe-ai il jil gil laivq-a nail ngaol. Cavqdevq dai iqsanl khul nail iqyaq iqma aqsil phao, il bhoel-aivq nail ulcuvq iqsanl mail naq lai khi, Ilsaqleiqlav nail tsaol-aq juq neq, Yeiqlilkhol meenq jiav nail aqjail phao ceiv gil lai-a nail ngaol.
17 Ilsaqleiqlav nail tsaol-aq al juq, yaoq gaq yaoq-ao nee miltsaq aqgee bhai maq khal ceiv gil lai-u kev dai Heeqphaq Miqyail nail daoqma saljial thunq bavq-nq thaq nail philma juq neq geelee del deel nail Yaoldaq laoljaol gaoltsi bhai thul phaol-nq thaq nail ngaol.