Yaolsuv 4
Noeq kev noeq moel nail lovmav ilkhel kha-a nail ganl
1 Ilsaqleiqlav nail tsaol-aq juq iqsanl mail Yaoldaq laoljaol bhai ceiv gaq lai-u phao, Heeqphaq Miqyail Yaolsuv bhai niail hai ge bhiq-a nail ngaol:
2 "Ilsaqleiqlav nail jeq-e 12 jeq-e nail lavqkhoel khe teevq jeq-e khe teevq gaq tsel dov khi,
3 aqyu juq bhai niail hai ge bhiq yaoq: 'Yaoldaq laoljaol gaoltsi khe Philma juq-i mail thul phaol lao nail aqduq khe lovmav 12 heeq bal lavq khi yaq n n-gaol nul juq-i mail gaq naq naq nail aqduq bhai lovmav al juq ya bavq thaq-ai lal nail ngaol' dai, ge bhiq yaoq" dai, ge bhiq-a nail ngaol.
4 Al heel ngel-i mail, Yaolsuv neq, aivq-i mail Ilsaqleiqlav nail tsaol-aq juq nail lavqkhoel khe teevq jeq-e nail khe teevq gaq tsel dov-a nail tsaol-aq al 12 gaq bhai khul khi,
5 niail hai ge bhiq-a nail ngaol:"Nul juq nail Heeqphaq Miqyail nail daoqma saljial thunq nail sivtavq khe Yaoldaq laoljaol gaoltsi bha aol-ail yaoq. Ilsaqleiqlav nail jeq-e yaoq jeq-e yaoq-ao nee nail galduq teevq gaq bhai lovmav teevq heeq bavqpuv nee bal lavq yaoq.
6 Lovmav niil juq neq, Heeqphaq Miqyail-i mail nl-a nail ganl bhai tsaol-aq yaq juq bhi noeq moel nail salkhil pevq nail ngaol. Yaqhao nul juq nail yaq juq nul juq bhai, 'Lovmav niil juq neq nul juq nail haqbhoil, khul nail daoq ceevq bhao nail-aiq' dai, nal daiq lal-u phao,
7 nul juq niail hai ya ge kovq bhiq nail ngaol: 'Heeqphaq Miqyail nail daoqma saljial nail thunq Yaoldaq laoljaol bhai ceiv lai-u phao, ulcuvq il nail ceiv lai-a nail ganl nee tavq nail ngaol. Lovmav niil juq neq, niil niai khe khal pevq lal-a nail ganl bhai Ilsaqleiqlav nail tsaol-aq juq khaq mao gail bhi noeq moel nail haqbhoil pevq nail ngaol' dai, aqyu juq bhai ge kovq bhiq yaoq" dai, ge bhiq-a nail ngaol.
8 A bhai nee ngal-aq aqyu juq neq, Yaolsuv-i mail daoq bivq-a nail khe-ai, nl-a nail ngaol. Heeqphaq Miqyail Yaolsuv bhai ge bhiq-a nail khe-ai, aqyu juq gail Ilsaqleiqlav nail jeq-e teevq jeq-e bhai lovmav teevq heeq bavq-a nail nee ovqtavq, lovmav iqsanl mail 12 heeq Yaoldaq laoljaol nee bavq dol lavq khi aqyu juq-i mail gaq naq naq nail aqduq bhai bavq thaq gai-a nail ngaol.
9 Yaolsuv neq, Yaoldaq laoljaol gaoltsi bhai daoqma saljial nail thunq bavq khi philma juq-i mail thul phaol lao nail aqduq bhai lovmav 12 heeq gaoq bavq khi, gaoq kha thul-a nail ngaol. Lovmav al juq neq, jaol duq al duq bhai yaq n n-gaol kev dai jiav nail ngaol.
10 Yaolsuv nee mail teevq tiv Heeqphaq Miqyail-i mail daoq khal bivq-a nail iqsanl mail, tsaol-aq al juq nl gaq gil-u kev dai, daoqma saljial nail thunq banvq thaq nail philma juq neq, Yaoldaq laoljaol gaoltsi bhai thul phaol-a nail ngaol. Al hai ya nl nail galduq, Maolseiq-i mail iqsanl ge-ail ceevq-a nail ngaol. Tsaol-aq munl juq gail Yaoldaq laoljaol bhai lavqtsail mail ceiv lai-a nail ngaol.
11 Aqyu juq yaoq gaq yaoq-ao nee mail laoljaol teevq phao bal-nvq ceiv gaq gil lai-u phao, philma juq Heeqphaq Miqyail nail daoqma saljial nail thunq yaoq gaq yaoq-ao nee nail sivtavq nee bavq ceil lavq-a nail ngaol.
12 Lulbheiq nail jeq-e, Gavq nail jeq-e, Maqnaqseiq nail jeq-e teevq pav neq, Maolseiq-i mail ge bhiq-a nail khe-ai, Ilsaqleiqlav nail tsaol-aq juq nail sivtavq phao genl dev nail khenkha-ao bavq khi ceiv lai-a nail ngaol.
13 Aqyu juq neq 40,000 gaq thoi dai bhee khi, genl dev nail galduq Heeqphaq Miqyail nail sivtavq nee laoljaol bhai ceiv lai-a nail nee ovqtavq, Yeiqlilkhol nail meenq aqjail bhai jiav nail daikhaoq bhai kev lai-a nail ngaol.
14 Aq-u n-gaol Heeqphaq Miqyail neq Yaolsuv bhai Ilsaqleiqlav nail tsaol-aq juq sivtavq nee tsiq thul bhiq-a nail ngel-i mail, aqyu juq Maolseiq bhai ev dee dee-u khe-ai, Yaolsuv bhai gail, aivq aqdoevq khal doevq-u phao kev dai, ev dee dee bhiq-a nail ngaol.
15 Heeqphaq Miqyail neq, Philma juq Yaoldaq laoljaol nee maq dov lal-u phao, Yaolsuv bhai niail hai ge bhiq-a nail ngaol:
16 "Daoqma saljial nail thunq bavq khi Yaoldaq laoljaol nee dov lal yaoq dai, philma juq bhai daoq bivq yaoq" dai, ge bhiq-a nail ngaol.
17 A bhai nee ngal-aq, Yaolsuv gail, philma juq bhai, "Yaoldaq laoljaol nee dov lal yaoq" dai, daoq bivq-a nail ngaol.
18 Aq-u phao, philma juq neq, Heeqphaq Miqyail nail daoqma saljial thunq bavq khi, laoljaol nee mail dov lal-a nail ngaol. Aqyu juq laoljaol daolbhaq bhai ceiv gaq lai teevq thaiq, laoljaol khe ulcuvq gaoq il kovq lee khi, laoljaol deq laiq lal-u kev dai, il nail ngaol.
19 Ilsaqleiqlav nail tsaol-aq juq iqmoeq ilmoeq khe bhala 10 n n-gaol bhai Yaoldaq laoljaol ceiv lai khi, Yeiqlilkhol meenq nail nlma dov khoiq phao jiav nail Gillavgaqlav dai khul nail aqduq bhai haqphal saiqgov cov khi naq-a nail ngaol.
20 Yaolsuv neq, Yaoldaq laoljaol khe bavq dol lavq-a nail lovmav 12 heeq al Gillavgaqlav nail aqduq bhai kha thul-a nail ngaol.
21 A bhai nee ngal-aq, Yaolsuv neq, Ilsaqleiqlav nail tsaol-aq juq bhai niail hai ge bhiq-a nail ngaol: 'Yaqhao khe doevq lee nail yaq juq, 'Lovmav niil khul dai, daoq ceevq bhao nail-aiq' dai, nul juq bhai nal daiq lal haq neq,
22 nul juq niail hai ge kovq khi cavq bhiq cov bhiq yaoq: 'Ilsaqleiqlav nail tsaol-aq juq Yaoldaq laoljaol niil niai ceiv lal-u phao, miltsaq aqgee bhai naoq thaiq khi mail ceiv lal-a nail ganl al ganl bhi noeq thaq nail haqbhoil pevq nail ngaol' dai, ge bhiq yaoq.
23 Khul khi mail dai ngal-aq, nul juq nail Heeqphaq Miqyail neq, nv juq nail sivtavq nee, ceiv lai nia dai, aq-u khe iqyaq iqma aqnel nail ulcuvq bhi gee lai daiq-a nail khe-ai, niil aq-il iqsanl, ngadao juq ceiv lai kivq dai, Yaoldaq laoljaol nail ulcuvq bhai bhi gee lai-a nail ngaol.
24 Al hai nl-a nail neq, yu nail jeq-e jaq-a juq iqsanl mail, Heeqphaq Miqyail nail aqlavq, bhaqaoq eeq nail bhai bhi heeq nia lal dai maqkhaiq, nuljuq nail Heeqphaq Miqyail bhai nuljuq khaqmao iqsanl gee sil khi ev nia dai maqkhaiq, nl-a nail phaq pevq nail ngaol" dai, ge bhiq-a nail ngaol.