Yaolsuv 5
1 Yaoldaq laoljaol nail nlma ga khoeq phao uv thaiq nail Aqmaolliv nail heeqphaq juq dai khi iqyaq iqma teevq lao tsao khe uv thaiq nail Khaqnanq nail heeqphaq juq neq, Ilsaqleiqlav nail tsaol-aq juq Yaoldaq laoljaol bhai ceiv lee-u phao, Heeqphaq Miqyail laoljaol nail ulcuvq bhi gee lai thaq nail bhai, ya gaiq-a nail ngaol. Al heel ngel-i mail, aqyu juq neq, Ilsaqleiqlav nail tsaol-aq juq bhai gee sil nail lavqkhoel nee gaq ga juq gil khi, maq thaoq phuq tseq-ail.
Gillavgaqlav nail aqduq bhai bavkov uqjaq oev-a nail ganl
2 Yanq al yanq bhai, Heeqphaq Miqyail neq, Yaolsuv bhai, "Lovmav jiailbav juq lav sav khi bavkov uqjaq maq oev haq nail Ilsaqleiqlav nail tsaol-aq juq bhai oev bhiq yaoq" dai, daoq bivq-a nail ngaol.
3 Al heel ngel-i mail, Yaolsuv neq, Giqbheiqaqthaq Haqlaqloqthaqa dai khul nail gaoqjaoq bha lovmav jiailbav lav sav khi Ilsaqleiqlav nail tsaol-aq juq bhai bavkov uqjaq oev bhiq-a nail ngaol.
4 Khul khi mail al hai bavkov uqjaq gaoq ya oev nail dai, ge haq neq, Iljiltuv nail milkhaoq nee mail dov lal-a nail genl dev nia lal dai aqkovq jiav lal thaq nail yaqyov-aq juq iqsanl mail haqtsoiq bha sil gil-a nail ngaol.
5 Iljiltuv nail milkhaoq nee mail dov lal-a nail al juq iqsanl mail bavkov uqjaq oev gaq gil-ai thaq nail juq pevq nail ngaol. Thail hai ngaol-aoq, gailphail lail ma haqtsoiq haqyal khe bhao-a nail al juq neq, teevq gaq gail bavkov uqjaq maq ya oev haq-al.
6 Iljiltuv nail milkhaoq nee mail dov lal-a nail genl dev nia lal dai aqkovq jiav lal thaq nail yaqyov-aq juq neq, Heeqphaq Miqyail nail daoq maq nal daiq dai, jaol-a nail ngel-i mail, aqyu juq maq sil-u kev dai, Ilsaqleiqlav nail tsaol-aq juq haqtsoiq haqyal bha 40 kovq ya tsao-a nail ngaol. Khul khi mail dai ngal-aq, aqyu juq neq, Heeqphaq Miqyail-i mail aqyu juq nail aqphiq aqbhal juq bhai saljial jaq-ai thaq nail niaoqnel aqtsil khi mail bhaiqtsil bhaiqeel il nail milkhaoq bhai maq ya moel-ail dai, Miqyail aivq khanq-ai thaq nail ngaol.
7 Al heel ngel-i mail Yaolsuv neq, aqyu juq aqbhu pevq nail juq nail do dal nl nia dai, Miqyail-i mail bhi eeq lal-a nail yaqyov juq bhai bavkov uqjaq oev bhiq-a nail ngaol. Khul khi mail dai ngal-aq, aqyu juq neq, gailkhaol dov thail thaiq-u phao, bavkov uqjaq maq ya oev dan haq-al.
8 Ilsaqleiqlav nail tsaol-aq juq iqsanl mail, bavkov uqjaq oev gaq gil gaq-u phao, mal yal maq meeq lai-u kev dai, gaq naq naq nail aqduq bhai jaol-a nail ngaol.
9 A bhai nee ngal-aq, Heeqphaq Miqyail neq, Yaolsuv bhai, "Iljiltuv nail milkhaoq bha nul juq-i mail yaqkav ya jiovq-a nail haq sil heeq phaq-ail tsaq nail ganl bhai ngal yaq n n-gaol oil ha-aoq nail ngaol" dai, ge bhiq-a nail ngaol. Al heel ngel-i mail, jaol duq al duq bhai yaq n n-gaol kev dai Gillavgaqlavb dai, khul nail ngaol.
10 Ilsaqleiqlav nail tsaol-aq juq neq, Yeiqlilkhol nail meenq aqjail bhai jiav nail Gillavgaqlav nail aqduq al duq bhai gaq naq naq-u phao, iqmoeq khal moeq khe bhala 14 n-gaol nqkiv phao, Yeiqlilkhol meenq sivtavq khe daikhaoq aqsal bhai Bhaqsaqkhaq aqbhee lav sav-a nail ngaol.
11 Bhaqsaqkhaq nail aqbhee gaq lai khi haoqnao n n-gaol aqyu juq neq, aqyu juq-i mail jaol nail milkhaoq khe jiav nail gov-i mail lav sav-ai thaq nail govtsail povtav dai khi, deqtsiq maq aol nail khaqmul jaq-a nail ngaol.
12 Aqyu juq-i mail aqduq al duq bhai jaq-u n-gaol nee mail daq-n khi Maqnav khaqmul nqtavq nee mail maq ga lee dai, peivq ail-a nail ngel-i mail, maq ya jaq-ail ceiv lai-a nail ngaol. Aq-u n-gaol nee mail daq-n khi Khaqnanq milkhaoq khe jiav nail aqheeq allu dai khi jaq jaq daol daol juq ya jaq-a nail ngaol.
Ilsaqleiqlav nail tsaol-aq juq Yeiqlilkhol meenq bhai genl dev gaq-a nail ganl
13 Yaolsuv, Yeiqlilkhol nail meenq aqjail bhai kev lal-u phao, aivq nail sivtavq bhai thaoma bavq khi mail thul phaol nail tsaol-aq teevq gaq bhai ya moel-a nail ngaol. Yaolsuv aivq jaol nail bha jiiv bal laivq khi ge nail: "Naol neq nv juq nail aqtsaoq laiq. Maq ngel haq neq, nv juq bhai neejiav jiav nail tsaol-aq laiq" dai, nal daiq bhiq-a nail ngaol.
14 Tsaol-aq al gaq ge nail: "Nvq phaq nvq phaq-ail maq ngel-ail. Ngal neq Heeqphaq Miqyail nail genl dev nail juq nail kovtavq bhai bhaqaoq eeq nail gaq pevq khi niil aq-il ngal lee nail ngaol" dai, ge kovq bhiq-a nail ngaol. Aq-u phao, Yaolsuv neq, teevq maol maol lao-ail soiq iq thaiq khi ev nail lavqkhoel nee, aivq nail maivphaoq miltsaq bhai gaol beiv khi ge nail: "Ngaq nail Heeqphaq nail yaqkav pevq nail ngaq bhai khul ge bhiq movq nail-aiq" dai, ge bhiq-a nail ngaol.
15 Heeqphaq Miqyail nail genl dev aqivq al gaq ge nail: "Naoq nail saiqnaov loev yaoq. Khul khi mail dai ngal-aq, naoq-i mail naoq thaiq-nq thaq nail miltsaq neq meeq nail haol nail miltsaq ngaol" dai, ge bhiq-a nail ngaol. Aq-u phao, Yaolsuv iqsanl nl-a nail ngaol.