Yaolsuv 6
1 Ilsaqleiqlav nail tsaol-aq juq Yeiqlilkhol meenq lavqkhoel bha maq bhi aol lal nia nail galduq, meenq nail lolgov juq pheeq thaiq khi aqbhaol-i mail aqmeeq-ai tsaoq ceiv thaq gai-a nail ngaol. Teevq gaq iqsanl mail meenq nee mail ail dov lal dov nail maq ya-ail.
2 Heeqphaq Miqyail Yaolsuv bhai niail hai ge bhiq-a nail ngaol: "Ngal naoq bhai Yeiqlilkhol nail meenq nee mail teevq gaq khe-ai, meenq bhai uv thaiq nail heeqphaq dai khi aivq nail genl dev nail phao khe aqnia juq bhai, naoq nail aqlavq lavqkhoel bhai av bivq gaq-ao nail ngaol.
3 Naol dai khi naoq nail genl dev nail munl juq teevq n teevq pov, kovq n bhee dai, meenq bhai ya tsao jaoq nail ngaol.
4 Philma sivq gaq neq yaol nail nqbho teevq gaq bhai teevq laiq bavq khi daoqma saljial nail thunq sivtavq phao ya-ail nail ngaol. Sivq n bhee lal-u phao, nul juq iqsanl mail meenq bhai sivq jaoq ya tsao jaoq nail nee ovqtavq, philma al sivq gaq nqbho ya bhi jiiv nail ngaol.
5 A bhai nee ngal-aq, Philma juq neq, nqbho heelma ma dai ya jiiv nail ngaol. Nqbho jiiv nail aqthel al ya gaiq-u phao, genl dev nail munl munl ma juq iqsanl mail neq, aqthel aqkav kav dai ya gul nail ngaol. Al hai nl-u phao, meenq nail khainl juq ga peiv gil-ail nail nee ovqtavq, genl dev yaq juq iqsanl yovqgavq-i mail jaol nail aqduq yaoq dao yaoq-ao nee meenq lavqkhoel bhai khul deeq thaoq deeq teev lal nail maq jiav dai, aqmeeq-ai aol lai kivq nail ngaol" dai, ge bhiq-a nail ngaol.
6 A bhai nee ngal-aq, Nunq nail yaqyov Yaolsuv neq Philma juq bhai khul khi, "Heeqphaq Miqyail nail daoqma saljial nail thunq bavq yaoq. Nul juq nail lavqkhoel khe sivq gaq neq, nqbho bavq khi mail daoqma saljial nail thunq sivtavq phao lai yaoq" dai, ge bhiq-a nail ngaol.
7 Al ovqtavq, aivq nail tsaol-aq juq bhai daoq niail haiq bivq-a nail ngaol: "Dov-ai khi, meenq bhai tsao jaoq yaoq. Genl dev nail khe-n kha-ao banvq thaq nail juq neq, Heeqphaq Miqyail nail daoqma saljial nail thunq nail sivtavq phao nee bhi tsao yaoq" dai, ge bhiq-a nail ngaol.
8 Yaolsuv neq, tsaol-aq al juq bhai daoq bivq gaq-al nee ngal-aq, nqbho banvq thaq nail philma sivq gaq neq, Heeqphaq Miqyail nail daoqma saljial nail thunq sivtavq nee nqbho jiiv jiiv-ail, ail-a nail ngaol. Heeqphaq Miqyail nail daoqma saljial nail thunq neq, aqyu juq nail haoqnaol phao, bal-aivq-a nail ngaol.
9 Nqbho jiiv nail philma juq nail sivtavq phao neq, genl dev nail khenkha-ao banvq thaq nail juq ail khi, jail nail tsaol-aq munl munl ma juq neq, daoqma saljial nail thunq nail haoqnaol phao tsao the jaol nail ngaol. Al hai nl haq neq, nqbho nail aqthel khaqmao iqsanl, ya gaiq nail ngaol.
10 Thail hai ngaol-aoq, Yaolsuv tsaol-aq munl munl ma juq bhai daoq niail hai bivq-a nail ngaol: "Thaq gul. Aqthel thaq dov. Daoq teevq daoq iqsanl thaq ge. Ngaq-i mail 'Gul yaoq' dai ge nail aq-n kev lal khi pultavq taivq-ail, gul yaoq" dai, ge bhiq-a nail ngaol.
11 A bhai nee ngal-aq, Yaolsuv-i mail Heeqphaq Miqyail nail daoqma saljial nail thunq bhai bhi bavq khi meenq bhai iqmoeq khal moeq khe pov bhi tsao jaoq-a nail ngaol. Tsao jaoq gaq-u phao, aqyu juq nail gaqnaq naq duq bhai, kovq lai khi yavq lai-a nail ngaol.
12 Haoqnao n n-gaol, nqhao naq mav-ail Yaolsuv thul khi Philma juq iqsanl Heeqphaq Miqyail nail daoqma saljial nail thunq bavq-a nail ngaol.
13 Aqyu juq lai thail thaiq-u phao, iqmoeq khal moeq neq, genl dev nail khenkha-ao banvq thaq nail juq. Al nail haoqnaol phao neq, nqbho banvq thaq nail philma sivq gaq. Al nail haoqnaol phao neq, Heeqphaq Miqyail nail daoqma saljial nail thunq banvq thaq nail philma juq dai khi haoqnao nao saq phao neq, jail nail tsaol-aq munl juq lai-a nail ngaol. Aqyu juq lai thail thaiq-u phao, philma juq neq, nqbho jiiv thail thaiq nail ngaol.
14 Nvq n teevq n n-gaol gail aqyu juq neq meenq bhai teevq jaoq gaoq tsao jaoq khi aqyu juq nail gaqnaq naq nail aqduq bha gaoq kovq lee-a nail ngaol. Aqyu juq al hai kovq n bhee dai meenq bhai tsao jaoq-a nail ngaol.
15 Sivq n n-gaol nqhao phao nlma maq dov lal nail iqmoeq bhai thul khi, iqmoeq-u phao khe tsao jaoq-a nail khe-ai, meenq bhai sivq jaoq tsao jaoq-a nail ngaol. Aq-u n-gaol bhai taivq-ail meenq bhai sivq pov bhee dai tsao jaoq-a nail ngaol.
16 Meenq bhai sivq jaoq teevq jaoq tsao jaoq thail thaiq-u phao, philma juq neq, nqbho jiiv-aiq nail khi-u phao, Yaolsuv neq, tsaol-aq munl munl ma juq bhai daoq niail hai bivq-a nail ngaol: "Gul yaoq. Heeqphaq Miqyail neq, nul juq bhai meenq niil meenq bivq lavq-ao nail ngaol.
17 Meenq dai khi meenq nail lavqkhoel khe khal jaol khal jiav nail iqsanl mail Heeqphaq Miqyail bhai danq bhiq laol bhiq nail haqbhoil, iqsanl mail ya lav cov gil nail ngaol. Maimaqlal Laqhal neq, ngadao juq-i mail khoel gai aivq-a nail al nvq gaq bhai hevq uvq bhiq thaq nail ngel-i mail, aivq dai khi aivq nee mail teevq gaq khe-ai ilkhaol lavqkhoel bhai jaol nail juq taivq-ail ya bhi jel-ail nail ngaol.
18 Thail hai ngaol-aoq, yaol phaol khi, ya lav cov gil nail lavqkhoel khe khul teevq phaq iqsanl mail maq ya oil-ail. Oil haq neq Ilsaqleiqlav nail tsaol-aq juq-i mail gaq naq naq nail aqduq bhai suq saq nail phaq dai khi luq-ail seil-ail nail phaq kev lee nail ngaol.
19 Phul, heel, giqheel dai khi hail-i mail lav sav thaq nail nlmaoq yalkav juq khal jiav nail neq, Heeqphaq Miqyail nail haqbhoil meeq nail haol nail phaq pevq nail ngel-i mail, aivq nail ildaoq maoqgaiq oil thaq nail aqduq bhai ya oil thaq-ai lai nail ngaol" dai, daoq bivq-a nail ngaol.
20 A bhai nee ngal-aq, philma juq nqbho jiiv khi tsaol-aq munl munl ma juq, gul dee dee-u phao, meenq nail khainl ga peiv ail-a nail ngaol. Aq-u phao, aqyu juq neq, meenq lavqkhoel bha khul deeq thaoq deeq teev lal nail maq jiav dai, aqmeeq-ai aol lai khi, genl dev gaq-a nail ngaol.
21 Aqyu juq neq, meenq lavqkhoel khe khal jaol nail yaqyov-aq dai khi yaqmai-aq juq bhai maqkhaiq, yaqnoil dai khi joiqmaoq juq bhai maqkhaiq, yaol, niaoqnel dai khi moeqphaq laljieiv juq bhai maqkhaiq, Heeqphaq Miqyail bhai danq bhiq laol bhiq nail haqbhoil thaoma-i mail heivq gil-a nail ngaol.
22 A bhai nee ngal-aq, Yaolsuv neq, milkhaoq al khaoq bhai bhi khoiq hel daiq lee-a nail nvq gaq bhai ge bhiq-a nail: "Nul nvq gaq-i mail saljial jaq-ai thaq nail khe-ai, maimaqlal nail ilkhaol bha lai khi, aivq nail ilkhaol lavqkhoel khe khal jaol khal jiav nail iqsanl mail bhai hevq dov oil dov gil leevq yaoq" dai, khoel bhiq-a nail ngaol.
23 Al heel ngel-i mail, aqyu juq neq, Laqhal dai khi aivq nail aqbhu aqma aqivq jaqbheq juq maqkhaiq, aivq nail ilkhaol lavqkhoel khe khal jaol khal jiav nail iqsanl mail bhai maqkhaiq, hevq dov oil dov gil leevq-a nail ngaol. Aivq nail tsaol-aq juq gail maq jail dai iqsanl mail, Ilsaqleiqlav nail tsaol-aq juq-i mail gaq naq naq nail aqduq aqjail phao bhi jaol-a nail ngaol.
24 A bhai nee ngal-aq aqyu juq neq meenq dai khi meenq lavqkhoel khe khal jiav nail iqsanl mail miqjaq-i mail kheq ha gil-a nail ngaol. Thail hai ngaol-aoq al nail lavqkhoel khe phul, heel, giqheel dai khi hail-i mail lav sav-ai thaq nail phaq bhai neq, Heeqphaq Miqyail nail ilkhaol lavqkhoel khe jiav nail nlmaoq yalkav bav thaq duq bhai, bavq bhoel gai lai-a nail ngaol.
25 Maimaqlal pevq nail Laqhal al gaq neq, Yeiqlilkhol meenq nail ganl Yaolsuv-i mail bhi khoiq hel daiq ail-a nail nvq gaq bhai hevq uvq bhiq-a nail ngel-i mail, Yaolsuv neq, aivq-i mail khal jiav nail phaq iqsanl dai khi aivq nail aqbhul nail phaq yaq ma yaq juq iqsanl bhai bhi jel ail-a nail ngaol. Aivq nee mail yavq kha lee thaq nail juq neq, yaq n n-gaol kev dai Ilsaqleiqlav nail tsaol-aq juq nee mail teevq gaq khe-ai jaol nail ngaol.
26 Aq-u n-gaol, Yaolsuv ge nail: "Yeiqlilkhol nail meenq bhai gaoq cov kovq nail gaq neq, Heeqphaq Miqyail-i mail ivqkhail yavq nail bhai ya daq dei-eiq. Meenq cov nail galduq daoqthaoq thaoq nail gaq neq, uqbhao aqivq sil dei-eiq. Meenq nail lolgov lav sav nail gaq neq, yaqyov jaqbheq yaqsaq gaq sil dei-eiq" dai, ivqkhail yavq-a nail ngaol.
27 Heeqphaq Miqyail neq Yaolsuv nee mail teevq gaq khe-ai jaol nail ngel-i mail, milkhaoq teevq khaoq khaoq lao aivq nail aqmil gaiq doi ail-a nail ngaol.