Yaolsuv 7
Aqkhanq nail oeqbal
1 Thail hai ngaol-aoq, Ilsaqleiqlav nail tsaol-aq juq neq Heeqphaq Miqyail-i mail, "Lav cov heeq phaq-ail tsaq nail nlmaoq yalkav bhai thaq oil" dai, ge nail daoq bhai maq nal daiq dai, Yuldav nail jeq-e lavqkhoel khe Seiqlav nail phaqyaq mayaq pevq nail Saqdil nail aqjievq, Kaqmil nail yaqyov Aqkhanq neq, oil-a nail ngaol. Al heel ngel-i mail Heeqphaq Miqyail neq, Ilsaqleiqlav nail tsaol-aq juq bhai neema phail nail ngaol.
2 Yanq al yanq bhai, Yaolsuv neq, Bheiqtaqlav meenq nail nlma dov khoeq phao khe Bheiqtaqwinq meenq aqjail bhai jiav nail Aq-il meenq bhai bhi ail nail haqbhoil, Yeiqlilkhol meenq nee mail tsaol-aq teevq juq bhai, "Meenq al meenq nail teevq jaoq teevq laol hel daiq-ail yaoq" dai, daoq bivq-a nail ngaol. Al heel ngel-i mail, aqyu juq, Aq-il meenq bha khoiq hel daiq ail-a nail ngaol.
3 Aqyu juq khoiq hel daiq lai gaq-u phao, kovq lee khi Yaolsuv bhai niail hai ge bhiq-a nail ngaol: "Aq-il meenq bhai ngadao juq iqsanl mail genl dev lai khi gaq doil doil nail maq loq-ail. Meenq thoil meenq neq meenq meenq ma maq ngel nail ngel-i mail, tsaol-aq 2000 gaq 3000 gaq bhi lai haq neq, gaq nail ngaol" dai, ge kovq bhiq-a nail ngaol.
4 Al heel ngel-i mail Ilsaqleiqlav nail tsaol-aq 3000 gaq galduq meenq bhai genl dev lai-a nail ngaol. Thail hai ngaol-aoq, Aq-il meenq yaq juq-i mail, genl bhi dev peiv bhi dev leiv khi, tsaoq pav gil-a nail ngaol.
5 A bhai nee ngal-aq, aqyu juq neq, meenq nail lolgov nee mail Seiqbhaqleiq dai khul nail aqduq bha kev dai Ilsaqleiqlav nail tsaol-aq juq bhai the-a nail ngaol. Aqyu juq bhai gaoqjaoq bhaqga bha yavq kha-ail nail bhai the kheel khi 36 gaq galduq, heivq bhiq-a nail ngaol. Al heel ngel-i mail, Ilsaqleiqlav nail tsaol-aq juq neq geesil nail lavqkhoel nee, gaq ga juq lee bhiq-a nail ngaol.
6 Yaolsuv dai khi Ilsaqleiqlav nail aqivq juq neq neema cov dee dee nail lavqkhoel aqyu juq nail phailkhaoq he pav khi Heeqphaq Miqyail nail daoqma saljial nail thunq sivtavq-ai yovgav yovqgavq nail uqhuq bhai khaqlail bheq dav khi teevq maol maol lao-ail, miltsaq bhai soiq iq thaiq-a nail nee ovqtavq, maivphaoq miltsaq bhai gaol beiv khi nqhao nqbhaq bhaq lal-u kev dai, jaol-a nail ngaol.
7 Yaolsuv ge nail: "Yawei dai khul nail ngaq nail Heeqphaq-ol, nv juq bhai khul khi mail Yaoldaq laoljaol bhi ceiv lal lavq-a nail-aiq. Aqmaolliv nail tsaol-aq juq nail aqlavq lavqkhoel bhai av bhiq khi, aqyu juq-i mail bhi lav luq bhi lav sail nail galduq laiq. Nv juq Yaoldaq laoljaol nail a phao lel khel bha jaol lao-aol kheel nul-nq neq, meeq jaiq nail ngaol.
8 Ngaq nail Heeqphaq-ol, Ilsaqleiqlav nail tsaol-aq juq, aqyu juq bhai neejiav jiav nail tsaol-aq juq nail sivtavq nee ya tsaoq-a nail ngel-i mail, ngal khal hai ge heeq.
9 Khaqnanq nail tsaol-aq juq dai khi al nail aqjail bhai jaol nail juq iqsanl mail neq, ganl niil ganl ya gaiq-u phao, nv juq bhai lovq jaoq khi mail teevq gaq iqsanl mail maq jail dai, heivq gil lavq nail ngaol. Al heel ngel-i mail, naol naoq nail eeq nail heel nail aqmil maq ya luq-ail dai khal hai khi nail-aiq" dai, ge bhiq-a nail ngaol.
10 Aq-u phao, Heeqphaq Miqyail Yaolsuv bhai ge bhiq-a nail: "Thul yaoq. Khul khi mail miltsaq bhai soiq iq thaiq khi jaol nail-aiq.
11 Ilsaqleiqlav nail tsaol-aq juq oeqbal nl laiq-ao nail ngaol. Aqyu juq neq, ngaq-i mail bivq-ai thaq nail daoqma saljial bhai maq nal daiq dai, lav cov heeq phaq-ail tsaq nail nlmaoq yalkav bhai oil tsail thaq gai-a nail ngaol. Nl maoq yalkav al juq khoiq khi goiqbhaoq bhaoq-a nail lavqkhoel nee aqyu juq nail ildaoq maoqgaiq nee mail teevq gaq khe-ai, oil tsail gai-a nail ngaol.
12 Al heel ngel-i mail, Ilsaqleiqlav nail tsaol-aq juq neq aqyu juq bhai neejiav jiav nail juq bhai genl maq dev gaq nia-al. Aqyu juq neq, luq-ail seil-ail heeq phaq-ail tsaq nail tsaol-aq pevq nail ngel-i mail, aqyu juq ya tsaoq peiv, ya tsaoq leiv gil-a nail ngaol. Nul juq bhai maq ya oil-ail dai, ge-ai thaq nail nul juq nail lavqkhoel khe, nlmaoq yalkav bhai maq lav cov gil haq neq, ngal nul juq nee mail teevq gaq khe-ai, maq jaol-ail.
13 Thul yaoq. Aqyu juq bhai bhi lav meeq bhi lav haol khi niaohao, ngaq nail sivtavq bhai bhi aol lal nail galduq bhi lainq dan yaoq. Khul khi mail dai ngal-aq, Ilsaqleiqlav nail Heeqphaq Miqyail pevq nail ngal, daoq niail hai bivq thail thaiq nail ngaol: 'Ilsaqleiqlav nail tsaol-aq juq-ol, lav cov heeq phaq-ail tsaq nail nlmaoq yalkav teevq pav ga nav nul juq nail lavqkhoel bhai jiav-il. Nul juq nail lavqkhoel khe nl maoq yalkav al bhai nul juq maq khal lav cov-u kev dai, nul juq bhai neejiav jiav nail juq bhai maq gaq lai kivq-ail.
14 Al heel ngel-i mail, niaohao nqhao phao neq, yaoq gaq yaoq-ao nee, yovqgavq nail jeq-e yovqgavq ya lal gil nail ngaol. Heeqphaq Miqyail-i mail tsel dov-a nail jeq-e neq, teevq jeq-e gil haq teevq jeq-e sivtavq phao ya dov lal nail ngaol. Heeqphaq Miqyail-i mail tsel dov-a nail jeq-e iqsanl, ildaoq teevq daoq gil haq teevq daoq, sivtavq phao ya dov lal nail ngaol. Heeqphaq Miqyail-i mail tsel dov-a nail ildaoq iqsanl, yaqyov-aq teevq gaq gil haq teevq gaq, sivtavq phao ya dov lal nail ngaol.
15 Lav cov heeq phaq-ail tsaq nail nlmaoq yalkav bhai khoiq thaq nail dai, dov lal-u phao, tsaol-aq al gaq bhai aivq nee mail teevq gaq khe-ai, aivq nail phaq yaq ma yaq juq bhai maqkhaiq, aivq khe khal jiav nail nlmaoq yalkav juq bhai maqkhaiq, miqjaq-i mail ya kheq ha gil nail ngaol. Khul khi mail dai ngal-aq, aivq neq, ngaq nail daoqma saljial bhai lav cov khi Ilsaqleiqlav nail tsaol-aq juq bhai lav haqsil bhiq-a nail ngel-i mail ngaol'" dai, ge bhiq-a nail ngaol.
16 Haoqnao n n-gaol nqhao naq mav-ail, Yaolsuv neq, Ilsaqleiqlav nail tsaol jeq-e teevq jeq-e gil haq teevq jeq-e sivtavq phao bhi dov lal khi tsel-u phao, Yuldav nail jeq-e bhai tsaq lai bhiq-a nail ngaol.
17 Yuldav nail jeq-e lavqkhoel khe jeq-e juq bhai sivtavq bha bhi dov lal khi tsel-u phao, Seiqlaqhil nail jeq-e bhai tsaq lai-a nail ngaol. Seiqlaqhil nail jeq-e bhai sivtavq bha bhi dov lal khi tsel-u phao, Saqdil nail ildaoq bhai tsaq lai bhiq-a nail ngaol.
18 Saqdil nail ildaoq lavqkhoel khe bhi dov lal khi, teevq gaq teevq gaq-ai gaoq tsel-u phao, Aqkhanq bhai tsaq lai bhiq-a nail ngaol. Aivq neq, Yuldav nail jeq-e lavqkhoel khe Seiqlav nail ildaoq pevq nail Saqdil nail aqjievq, Kaqmil nail yaqyov pevq nail ngaol.
19 Yaolsuv aivq bhai ge bhiq-a nail: "Ngaq nail yaqyov-ol, Ilsaqleiqlav nail Heeqphaq Miqyail nail sivtavq bhai ev nail lavqkhoel nee, aqtsaq phaq ge dov yaoq. Naoq-i mail nl-a nail ganl bhai maq oil-uvq dai, ngaq bhai ge lavq yaoq" dai, ge bhiq-a nail ngaol.
20 Aq-u phao Aqkhanq ge nail: "Ngel naol. Ngal neq, Ilsaqleiqlav nail Heeqphaq Miqyail bhai nl laiq-ao nail ngaol. Ngaq-i mail nl-a nail ganl neq, niail hai ngaol.
21 Genl dev ya-a nail lav cov heeq phaq-ail tsaq nail nlmaoq yalkav nail lavqkhoel bhai neq, meeq dee dee nail Bhaqbhulloq meenq khe phailkhaoq heelma, phul nvq kiqlo dai khi teevq kiqloq maq bhee nail heel dail pav teevq pav bhai moel khi maiv jeel jeel lal-a nail ngel-i mail, oil-a nail ngaol. Al heel ngel-i mail, ngaq nail saiqgov bhai phul neq daoqthaoq thaoqsaq bha oil bhoel khi yalkav al juq iqsanl mail duq pheeq-ai thaq nail ngaol" dai, ge bhiq-a nail ngaol.
22 A bhai nee ngal-aq, Yaolsuv neq, tsaol-aq juq bhai khoel gai-aivq khi Aqkhanq nail saiqgov bha bhi hel daiq lai-a nail ngaol. Saiqgov lavqkhoel bhai, Aqkhanq-i mail ge nail khe-ai, oil-uvq-ai thaq nail nlmaoq yalkav juq iqsanl mail moel khi daoqthaoq thaoqsaq bhai phul iqsanl, moel-a nail ngaol.
23 Aqyu juq nlmaoq yalkav al bhai oil khi, Yaolsuv dai khi Ilsaqleiqlav nail tsaol-aq juq jaol nail bha oil-aivq khi Heeqphaq Miqyail nail sivtavq bhai oil thaq gai-a nail ngaol.
24 Yaolsuv dai khi Ilsaqleiqlav nail tsaol-aq juq neq, Seiqlav nail yaqyov Aqkhanq nee mail teevq gaq khe-ai phul, heel, phailkhaoq heelma maqkhaiq, aivq nail yaqmiq yaqyov juq, yaol, niaoqnel, moeqphaq laljieiv, saiqgov dai khi aivq nail nlmaoq yalkav khal jiav nail iqsanl mail maqkhaiq oil gil khi, Aqkhoq dai khul nail gavqlaovq bha hel laivq-a nail ngaol.
25 Yaolsuv neq, Aqkhanq bhai, "Naol khul khi mail nv juq bhai lav cov nail phaq bhi kev lee-a nail-aiq. Niil aq-il, Heeqphaq Miqyail neq naoq bhai lav cov lee-aiq nail ngaol" dai, ge bhiq-a nail ngaol. A bhai nee ngal-aq Ilsaqleiqlav nail tsaol-aq juq neq Aqkhanq bhai lovmav-i mail liv heivq-a nail ngaol. Aivq nail phaqyaq mayaq juq bhai gail liv heivq khi nlmaoq yalkav khal jiav nail iqsanl nee mail teevq gaq khe-ai miqjaq-i mail khe poiv gil bhiq-a nail ngaol.
26 Aivq nail aqmaol kovtavq bhai neq, lovmav bhaoq bhoi bhoi ma bhoi bhiq-a nail ngaol. Lovmav bhaoq bhoi al neq yaq n n-gaol kev dai, jiav nail ngaol. Ganl niil ganl bhai daoqthaoq thaoq khi jaol duq al duq bhai neq Aqkhoq nail gavqlaovqa dai, yanq n n-gaol kev dai khul nail ngaol. Alhai nl-a nail bhaqda nee, Heeqphaq Miqyail-i mail neema phail nail phaq sivq lai-a nail ngaol.