Yaolsuv 8
Aq-il nail meenq bhai genl dev gaq-a nail ganl
1 A bhai nee ngal-aq, Heeqphaq Miqyail, Yaolsuv bhai niail hai ge bhiq-a nail ngaol: "Thaq gee sil, gaq thaq bhaq. Naol genl dev yaq juq iqsanl mail hevq khi, Aq-il nail meenq bha genl dev nail galduq lai yaoq. Ngal, Aq-il nail heeqphaq nee teevq gaq khe-ai, meenq yaq juq bhai maqkhaiq, meenq bhai maqkhaiq, miltsaq juq bhai maqkhaiq, naoq nail aqlavq lavqkhoel bhai av bhiq naol.
2 Naoq-i mail Yeiqlilkhol nail meenq dai khi a bhai khe heeqphaq bhai lav cov bhiq-u khe-ai, Aq-il nail meenq dai khi aqyu juq nail heeqphaq bhai gail ya lav cov nail ngaol. Thail hai ngaol-aoq, niil thaq khe pov neq, nlmaoq yalkav juq dai khi jaiqyaq juq bhai nul juq oil thaq gai kivq nail ngaol. Meenq bhai haoqnaol phao nee aol lai khi mail dev nail galduq, khoiq dev dev nail genl dev yaq juq bhai lainq gai yaoq" dai, ge bhiq-a nail ngaol.
3 Al heel ngel-i mail, Yaolsuv neq genl dev yaq juq nee mail Aq-il nail meenq bha dev lai nail galduq lainq-a nail ngaol. Aivq nail genl dev yaq juq nail lavqkhoel khe, aqnia khal nia nail juq 30,000 gaq tsel dov khi nqkiv phao bhi lai-a nail ngaol.
4 Aivq daoq niail hai bivq-a nail ngaol: "Nul juq meenq nail haoqnaol phao, mao-ail maq eq nail aqduq bhai tsaoq-uvq khi mail jaol yaoq. Meenq bhai genl dev nail galduq lainq thaq gai yaoq.
5 Ngal dai khi jail nail genl dev yaq juq meenq aqjail bha kev lal khi, iqmoeq-u khe pov khe-ai, Aq-il nail tsaol-aq juq dov lee khi mail genl dev lee-u phao, nv juq neq, haoqnaol phao tsaoq kovq gil nail ngaol.
6 Aq-u phao, aqyu juq, nv juq meenq nee mail eqyal bha jal mul mul khi, bhi the kel leevq nail ngaol. Al ovqtavq, aqyu juq niail hai ge lal nail ngaol: 'Ilsaqleiqlav nail tsaol-aq juq iqmoeq-u khe pov khe-ai, tsaoq kovq-ao nail ngaol' dai, ge nail ngaol. Al heel ngel-i mail nv juq tsaoq thail thaiq-u phao,
7 nul juq neq, tsaoq uvq nail nee mail dov lee khi meenq bhai genl dev lai khi uv thaiq yaoq. Nul juq nail Heeqphaq Miqyail neq meenq thoil meenq nul juq nail aqlavq lavqkhoel bhai av lavq nail ngaol.
8 Nul juq meenq thoil meenq ya gaq-u phao, Heeqphaq Miqyail-i mail daoq bivq-ai thaq nail khe-ai, meenq bhai miqjaq-i mail ya kheq poiv gil nail ngaol. Ngaq-i mail daoq khal bivq-ai thaq nail khe-ai, nl yaoq" dai, ge bhiq-a nail ngaol.
9 Yaolsuv neq aqyu juq bhai iqmoeq bhi dov ail-a nail ngaol. Aq-u phao, aqyu juq iqsanl dov-ail khi, Aq-il nail meenq haoqnaol phao dai khi Bheiqtaqlav nail meenq gaiqlaq bhai tsaoq-uvq khi mail daonq-a nail ngaol. Yaolsuv neq, aq-u nqkiv jail nail genl dev yaq juq nee mail gaqnaq naq duq bhai jaol-a nail ngaol.
10 Nqhao naq mav-ail Yaolsuv neq, jail nail genl dev yaq juq bhai khul jil-a nail nee ovqtavq, tsao tsel gaq gil khi pultavq, Ilsaqleiqlav nail aqivq juq nee mail teevq gaq khe-ai, iqmoeq moeq khi aqyu juq bhai Aq-il nail meenq bha hel laivq-a nail ngaol.
11 Aivq nee mail teevq gaq khe-ai lal-a nail genl dev yaq juq iqsanl mail neq Aq-il meenq nail sivtavq phao kev lal nail nee ovqtavq, pultavq phao saiqgov cov khi jaol-a nail ngaol. Aqyu juq-i mail gaqnaq naq nail aqduq dai khi meenq nail gaiqlaq bhai neq gavqlaovq laovq ma khaiq nail ngaol.
12 Aivq neq genl dev yaq 5,000 gaq galduq bhai meenq nail nlma ga khoeq phao Aq-il nail meenq dai khi Bheiqtaqlav nail meenq gaiqlaq bhai bhi tsaoq uvq-a nail ngaol.
13 Al heel ngel-i mail, genl dev yaq juq yovqgavq nail jaol duq bhai yovqgavq jaol tsaq gil-a nail ngaol. Saiqgov bhai jaol nail mao jaiq nail juq neq, meenq nail pultavq phao yovq gavq nail jaol duq bhai jaol lai khi, tsaoq-uvq nail juq neq, nlma ga khoeq phao yovq gavq nail jaol duq bhai, jaol lai-a nail ngaol. Aq-u nqkiv Yaolsuv neq, gavqlaovq laovq ma bha yavq kha ail-a nail ngaol.
14 Aq-il nail heeqphaq neq ganl al juq bhai ya moel-u phao, nqhao naq mav-ail, aivq nail meenq khe khal jaol nail yaqyov-aq juq nee lavqtsail mail Ilsaqleiqlav nail tsaol-aq bhai genl dev-ail nail dai khi, Yaoldaq laoljaol nail gavqlaovq phao ail-a nail ngaol. Thail hai ngaol-aoq, aivq neq meenq nail haoqnaol phao tsaoq uvq khi lainq-ai thaq nail juq jaol nail bhai maq heeq nia-ail.
15 Yaolsuv dai khi Ilsaqleiqlav nail tsaol-aq juq iqsanl mail neq, genl dev sunq-a nail tavq khi haqtsoiq phao tsaoq-a nail ngaol.
16 Aq-il nail heeqphaq neq meenq khe yaqyov-aq juq iqsanl mail khul khi Yaolsuv dai khi aivq nail tsaol-aq nail haoqnao bhi the-a nail ngel-i mail aqyu juq neq, meenq nee mail eq dee dee nail aqduq bha jalmul bhi mul kel-aivq-a nail ngaol.
17 Aq-il nail meenq dai khi Bheiqtaqlav nail meenq khe yaqyov-aq juq iqsanl mail neq Ilsaqleiqlav nail tsaol-aq nail haoqnao the gil-aivq-a nail ngel-i mail, meenq bhai lovq phail nail teevq gaq iqsanl mail maq jaol-ail.
18 Aq-u phao Heeqphaq Miqyail neq Yaolsuv bhai ge bhiq-a nail: "Naoq nail aqlavq khe aol nail geeqkhaoq bavq dil khi Aq-il nail meenq phao bavq maoq bhiq yaoq. Ngal meenq thoil meenq naoq nail aqlavq bhai av bhiq nail ngaol" dai, ge bhiq-a nail ngaol. Al heel ngel-i mail Yaolsuv iqsanl, aivq nail aqlavq khe aol nail geeqkhaoq bavq dil khi Aq-il nail meenq phao bavq maoq bhiq-a nail ngaol.
19 Yaolsuv al hai nl-u phao, tsaoq-uvq khi jaol nail juq neq, lavqtsail mail thul khi meenq bha tsaoq bhoel-aivq-a nail nee ovqtavq, genl dev gaq khi meenq bhai miqjaq-i mail kheq soiq gil-a nail ngaol.
20 Aq-il nail tsaol-aq juq-i maivphaoq tsiq phao khi hel daiq-u phao neq, meenq nee mail nqtavq bha miqkhoiq dav nail bhai ya moel-a nail ngaol. Aq-u phao, haqtsoiq phao tsaoq dol leevq-a nail Ilsaqleiqlav nail tsaol-aq juq neq, gaoq tsaoq kol lavq khi, Aq-il nail tsaol-aq juq nee mail genl dev-a nail ngaol. Al heel ngel-i mail, Aq-il nail tsaol-aq juq khaq bha tsaoq dov nail maq jiav-ail.
21 Yaolsuv dai khi Ilsaqleiqlav nail tsaol-aq juq neq, bhi tsaoq uvq-ail ceevq-a nail juq-i mail meenq dev ya thaq nail bhai maqkhaiq, meenq nail moiqkhoiq doil nail bhai maqkhaiq, ya moel-u phao, gaoq kovq lai khi Aq-il nail tsaol-aq juq bhai dev lai-a nail ngaol.
22 Tsaoq-uvq-a nail juq iqsanl, meenq nee mail dov lee khi genl dev-a nail ngel-i mail, Ilsaqleiqlav nail tsaol-aq juq neq, Aq-il nail tsaol-aq juq bhai haq thaiq khe-ai thaiq khi, teevq gaq gail maq jail dai dev heivq gil-a nail ngaol.
23 Thail hai ngaol-aoq, Aq-il nail heeqphaq bhai neq aqdoevq nieivq miv khi Yaolsuv jaol nail bha hel laivq-a nail ngaol.
24 Ilsaqleiqlav nail tsaol-aq juq neq daikhaoq bha thel lee-a nail Aq-il nail tsaol-aq juq bhai dev heivq gil gaq-al nee ngal-aq, meenq bha gaoq aol lai khi khal jaol nail iqsanl mail bhai thaoma-i mail heivq gil-a nail ngaol.
25 Aq-u n-gaol Aq-il nail meenq khe jaol nail tsaol-aq juq sil gil-a nail ngaol. Yaqyov-aq yaqmai-aq iqsanl mail ge-u phao, 12,000 gaq bhee nail ngaol.
26 Meenq yaq juq teevq gaq gail maq jaol dai, dev heivq gil-u phao kev dai, Yaolsuv neq, aivq nail geeqkhaoq maq bavq kha dai bavq maoq gai-a nail ngaol.
27 Heeqphaq Miqyail Yaolsuv bhai daoq bivq-a nail khe-ai, Ilsaqleiqlav nail tsaol-aq juq neq, Aqil meenq khe jaiqyaq juq dai khi nlmaoq yalkav juq bhai neq, aqyu juq nail galduq oil-a nail ngaol.
28 Yaolsuv neq Aq-il nail meenq bhai nqmaq maqluv halyeel poiv cov khi he bhoi bhiq-a nail ngel-i mail, yaq n n-gaol kev dai khaonq ha-ai thaq khi, al hai jiav nail ngaol.
29 Aq-il nail heeqphaq bhai gail aqbhaol bhai khu tseq bhiq khi, nlma ga ail-u kev dai, bhi ga tseq-a nail ngaol. Nl ma ga ail-u phao, aivq nail aqmaol pheel kha khi meenq nail lolgov gov ma bha bhi he thaq gai nail galduq, Yaolsuv daoq bivq-a nail ngaol. A bhai nee ngal-aq, aivq nail maoldoiq kovtavq bhai lovmav juq mao dai bavq dav bhiq-a nail ngaol. Lovmav bhaoq bhoi al, yaq n n-gaol kev dai, ya moel-ai haq nail ngaol.
Ilbhaqlav nail gaoqjaoq bhai Heeqphaq Miqyail nail daoqma saljial gaoq ge pov-a nail ganl
30-31 Heeqphaq Miqyail nail yaqkav pevq nail Maolseiq nail aolthaq kovqthaq lavqkhoel bhai, "Teevq thal-iq maq deeq pav daiq, hail-i mail iqsanl maq tavq daiq-a nail lovmav juq nee mail laolduq ya lav sav nail ngaol" dai, Ilsaqleiqlav nail tsaol-aq juq bhai daoq bivq-ai thaq nail khe-ai, Yaolsuv neq, Ilbhaqlav nail gaoqjaoq bhai Ilsaqleiqlav nail Heeqphaq Miqyail bhai laol bhiq nail haqbhoil laolduq lav sav-a nail ngaol. Lav sav gaq-u phao, aqyu juq neq, laolduq al duq nail kovtavq bhai miqjaq kheq poiv nail laol bhiq nail phaq dai khi, aqtsaoq tsaoq tavq nail laol bhiq nail phaq Heeqphaq Miqyail bhai laol bhiq-a nail ngaol.
32 Jaolduq al dao bhai, Yaolsuv neq Maolseiq-i mail gevq-ail ceevq-a nail aolthaq kovqthaq bhai, Ilsaqleiqlav nail tsaol-aq juq nail sivtavq nee mail, lovmav al juq bhai gaoq gevq dov-a nail ngaol.
33 Ilsaqleiqlav nail tsaol-aq juq nail lavqkhoel khe, genl dev nail aqivq juq, yovkav juq dai khi yalkhaq dal nail juq neq, Leiqbhil nail jeq-e pevq nail Philma juq-i mail bavq nail Heeqphaq Miqyail nail daoqma saljial thunq nail teevq phao teevq bal-nvq thul phaol-a nail ngaol. Aqyu juq nail lavqkhoel khe doevq lee-u nee mail Ilsaqleiqlav nail tsaol-aq pevq nail juq dai khi aqyu juq nee mail teevq gaq khe-ai jaol nail yu nail jeq-e jaq-a juq iqsanl aol nail ngaol. Aqyu juq iqsanl mail, Geiqliqsinq nail gaoqjaoq sivtavq phao teevq gaol pav dai khi Iqbhaqlav nail gaoqjaoq sivtavq phao teevq gaol pav dai, jaol-a nail ngaol. Khul khi mail dai ngal-aq, Heeqphaq Miqyail nail yaqkav Maolseiq-i mail Ilsaqleiqlav nail tsaol-aq juq bhai geeqlaoq bivq nail dai khi, al hai iqmoeq ilmoeq ya nl nail ngaol dai, daoq bivq-ail ceevq-a nail phaq pevq nail ngaol.
34 A bhai nee ngal-aq Yaolsuv neq, aolthaq kovqtavq nail haoqgavq iqsanl bhai khi al nail lavqkhoel khe aol nail geeqlaoq eeq nail daoq juq maqkhaiq, geeqlaoq aqdoil nail daoq juq maqkhaiq, iqsanl mail ge daiq bhiq-a nail ngaol.
35 Yaolsuv neq, Ilsaqleiqlav nail tsaol-aq juq iqsanl nail sivtavq bhai, Maolseiq-i mail bivq-ail ceevq-a nail aolthaq kovqtavq teevq daoq iqsanl mail maq jail dai, ge daiq bhiq-a nail ngaol. Aivq-i mail ge daiq bhiq-a nail tsaol-aq juq neq, yaqmai-aq juq, yaqnoil juq dai khi aqyu juq nee mail teevq gaq khe-ai jaol nail yu nail jeq-e jaq-a juq iqsanl mail aol nail ngaol.