Yaolsuv 9
Gilbhiqonq nail meenq yaq juq Yaolsuv bhai goiqbhaoq bhaoq bhiq-a nail ganl
1 Yaoldaq laoljaol nl ma ga khoeq phao jiav nail gaoqjaoq juq bhai maqkhaiq, gavqlaovq juq bhai maqkhaiq Leiqbhaqnonq gaoqjaoq bha kev dai maqkhaiq, Meildiqtiqlav iqyaq iqma nail daolbhaq bhai kev dai maqkhaiq jaol khi uv thaiq nail heeqphaq juq neq, yaoq gaq yaoq-ao nee, Ilsaqleiqlav nail tsaol-aq juq-i mail genl dev gaq-a nail ganl juq bhai, ya gaiq gil-a nail ngaol. Heeqphaq al juq neq, Hiltiv nail jeq-e, Aqmaolliv nail jeq-e, Khaqnanq nail jeq-e, Pheiqliqsil nail jeq-e, Hilwil nail jeq-e dai khi Yeiqbhulsil nail jeq-e juq nail heeqphaq juq ngaol.
2 Aqyu juq neq, Yaolsuv dai khi Ilsaqleiqlav nail tsaol-aq juq bhai teevq gaq khe-ai jil lai khi genl dev nail galduq neema teevq dao bhai tsaq nail ngaol.
3 Thail hai ngaol-aoq, Hilwil nail jeq-e pevq nail Gilbhiqonq nail meenq yaq juq neq, Yeiqlilkhol dai khi Aq-il nail meenq bhai Yaolsuv khal hai genl dev khi, gaq lai-a nail bhai ya gaiq-u phao,
4 goiqbhaoq bhaoq jel nail galduq, Yaolsuv jaol nail bha tsaol-aq phaiq gai-a nail ngaol. A bhai nee ngal-aq, aqyu juq neq, jinqdaq-iq aqlil khi phal tsaol dov-ai thaq nail aqheeq tsilju nail eelpheeq juq, moeqphaq laljieiv bhai kavq dav-a nail ngaol.
5 Aqyu juq neq, aqgaq aqdoi aqpav doi khi saiqnaov phal tsaol dov-ai thaq nail aqkhail tsaoq-a nail ngaol. Al ovqtavq, bhaqmee dav lai thaq nail khaqmul aqgee juq iqsanl, oil-a nail ngaol.
6 A bhai nee ngal-aq, aqyu juq neq, Gillavgaqlav nail gaq naq naq duq bhai jaol thail thaiq nail Yaolsuv jaol nail bha lee khi, Yaolsuv dai khi Ilsaqleiqlav nail tsaol-aq juq bhai, "Nv juq neq, eq dee dee nail milkhaoq nee lal-a nail, ngel-i mail, nv juq nee daoqma saljial jaq tavq lavq yaoq" dai, ge bhiq-a nail ngaol.
7 Aq-u phao, Ilsaqleiqlav nail tsaol-aq juq Hilwil nail tsaol-aq al juq bhai, "Nul juq neq, nv juq nail aqjail aqthao bhai jaol nail juq gail, pevq nia nail ngaol. Thail hai ngel haq neq, nv juq neq, daoqma saljial maq jaq tavq kivq-ail" dai, ge bhiq-a nail ngaol.
8 Aqyu juq, "Nv juq, nul juq nail yaqkav jiovq nail ngaol" dai, Yaolsuv bhai ge bhiq khi ngaol-aoq, Yaolsuv neq, "Nuljuq neq, khaqsil juq pevq nail-aiq. Khaq bha nee mail lal-a nail-aiq" dai, nal daiq bhiq-a nail ngaol.
9 Aq-u phao, aqyu juq ge nail: "Naoq nail yaqkav pevq nail nv juq neq, naoq nail Heeqphaq Miqyail nail aqmil bhai ya gaiq khi eq nail milkhaoq nee mail lal-a nail ngaol. Iljiltuv nail milkhaoq bhai nl bhiq-a nail ganl bhai maqkhaiq,
10 Yaoldaq laoljaol nail nlma dov khoeq phao uv thaiq nail Aqmaolliv nail heeqphaq nvq gaq pevq nail Heiqsaqbhonq nail heeqphaq Silhonq dai khi Aqsaqtaqlol nail meenq bhai uv thaiq nail Bhaqsanq nail heeqphaq Aolgav bhai, khal hai nl bhiq-a nail ganl juq bhai maqkhaiq, nv juq ya gaiq-a nail ngaol.
11 Al heel ngel-i mail, nv juq nail aqivq aqtsu juq dai khi, nv juq nail tsaol-aq juq neq, gailphail lail ma bhai jaq nail galduq, khaqmul oil khi, naoq-ai nee mail moel tavq nail galduq, bhi lal lavq-a nail ngaol. Al ovqtavq, 'Nv juq neq,, naoq nail yaqkav pevq nail ngel-i mail, nv juq nee, daoqma saljial jaq lavq yaoq' dai, bhi hal lal lavq-a nail ngaol.
12 Nv juq nail ilkhaol nee niaq-a lal nail haqbhoil gailkhaol dov lal-u n-gaol neq, khaqmul niil juq, aqloil ngel lao nail ngaol. Niil aq-il khaqmul niil juq bhai hel daiq, aqgee gee lai khi bhaqmee dav lai-aoq nail ngaol.
13 Aqheeq tsilju nail ullul laoq bhoel-u phao, eelpheeq niil juq neq, aqsivq ngel lao-ao nail ngaol. Niil aq-il hel daiq, aqpav pav-ail aoq nail ngaol. Eqyal al jaiq-ail yal nail nee ya lal-a nail ngel-i mail, nv juq nail phailkhaoq dai khi saiqnaov juq bhai hel daiq, aqkhail khail lai-aoq nail ngaol" dai, Yaolsuv bhai ge bhiq-a nail ngaol.
14 Ilsaqleiqlav nail tsaol-aq juq neq, Heeqphaq Miqyail bhai maq nal daiq mail, aqyu juq nail jaq jaq daol daol bhai hav bhoel-a nail nee ovqtavq,
15 Yaolsuv aqyu juq nee mail iqsanl aqtsaoq tsaoq tavq khi maq heivq bhiq-ail dai, daoqma saljial jaq tavq-a nail ngaol. Ilsaqleiqlav nail aqivq jiovq nail juq gail, daoqma saljial jaq tavq-a nail bhi ivq nail galduq khanq-a nail ngaol.
16 Ilsaqleiqlav nail tsaol-aq juq neq, daoqma saljial jaq tavq gaq khi mail hail n bhee lal-u phao, tsaol-aq al juq neq, aqyu juq nail aqjail aqthao jaol nail tsaol-aq ngel lao thaq nail bhai, ya gaiq-a nail ngaol.
17 A bhai nee ngal-aq, Ilsaqleiqlav nail tsaol-aq juq neq, gailkhaol gaoq dov lai khi hail n bhee lal-u phao, tsaol-aq al juq-i mail jaol nail meenq pevq nail Gilbhiqonq nail meenq, Kheiqphillaq nail meenq, Bheiqloqtav meenq dai khi Khiqlil-avq Yeil-aqlinq meenq juq bhai kev lai-a nail ngaol.
18 Thail hai ngaol-aoq, Ilsaqleiqlav nail aqivq jiovq nail juq neq, Heeqphaq Miqyail nail aqmil bhai juq khi khanq-ai thaq nail ngel-i mail, aqyu juq bhai genl maq dev nia-ail. Al heel ngel-i mail, Ilsaqleiqlav nail tsaol-aq juq neq, aqivq jiovq nail juq bhai daoq gov dov lal-a nail ngaol.
19 Thail hai ngaol-aoq, aqyu juq niail hai ge kovq bhiq-a nail ngaol: "Nv juq neq, Ilsaqleiqlav nail Heeqphaq Miqyail nail aqmil bhai juq khi khanq gaq-ao nail ngel-i mail, niil aq-il aqyu juq bhai aqlavq iqsanl maq thoiq tsi lai kivq-ail.
20 Al heel ngel-i mail, nv juq aqyu juq bhai niail hai nl bhiq nail ngaol. Aqyu juq bhai maq heivq dai, bhi jel-ail nail ngaol. Khul khi mail dai ngal-aq, nv juq saljial maq ivq haq neq, Heeqphaq Miqyail nv juq bhai nl kovq lavq nail ngaol.
21 Aqyu juq bhai aqdoevq bhi doevq bhel. Thail hai ngaol-aoq, aqyu juq bhai ngadao juq nail haqbhoil ulcuvq bavq nail ganl dai khi, miqjaq keivq nail ganl ya bhi nl nail ngaol" dai, ge khi, aqyu juq-i mail khanq-a nail bhai saljial ivq dal laivq-a nail ngaol.
22 Yaolsuv neq, Gilbhiqonq meenq yaq juq bhai khul khi, ge bhiq-a nail: "Nuljuq neq, nv juq nail aqjail bhai jaol-ai thaq khi, khul khi mail, eqyal bha jaol nail nee lal-a nail dai, goiqbhaoq bhaoq lavq-a nail dai, ge bhiq-a nail ngaol.
23 Thail hai goiqbhaoq bhaoq-a nail bhaq da nee, nuljuq geeqlaoq aqdoil ya dei-eiq. Niai nee pultavq, nul juq neq, ngaq nail Miqyail nail ilkhaol nail haqbhoil, ulcuvq bavq nail ganl dai khi miqjaq keivq nail ganl bhai khaq mao gail yaqkav jiovq jiovq-ail ya nl nail ngaol" dai, ge bhiq-a nail ngaol.
24 Aq-u phao, aqyu juq ge nail: "Nuljuq nail Miqyail pevq nail Heeqphaq Miqyail neq, milkhaoq niil teevq khaoq khaoq lao, nul juq bhai bivq nail bhai maqkhaiq, milkhaoq yaq juq iqsanl mail bhai, ya heivq gil nail bhai maqkhaiq, aivq nail yaqkav pevq nail Maolseiq bhai daoq bivq-a nail ganl, naoq nail yaqkav pevq nail nv juq aqduq aqtsil tsil dai, ya gaiq khal lee khi, nul juq bhaq da nee sil lee nail bhai geesil lal nail ngel-i mail, thail hai nl-a nail ngaol.
25 Niil aq-il nv juq neq, naoq nail aqlavq lavqkhoel bhai kev lal-aoq nail ngel-i mail, naol nl heeq phaq-ail tsaq naol dai, noeq nail khe-ai nl lavq yaoq" dai, ge bhiq-a nail ngaol.
26 Al heel ngel-i mail, Yaolsuv neq, Ilsaqleiqlav nail tsaol-aq juq nail aqlavq nee ya sil nail bhai, aqyu juq-ai hevq jel bhiq-a nail ngaol.
27 Aq-u n-gaol nee daq-n khi, aqyu juq bhai yaqkav bhi jiovq-a nail nee ovqtavq, Ilsaqleiqlav nail tsaol-aq dai khi Heeqphaq Miqyail nail laolduq nail galduq ulcuvq bavq nail ganl dai khi miqjaq keivq nail ganl bhi nl-a nail ngaol. Al heel ngel-i mail yaq n n-gaol kev dai, aqyu juq neq, Heeqphaq Miqyail-i mail khal tsel dov-a nail uqhuq thaoq nail aqduq bhai, ulcuvq bavq kheel bhiq nail ganl dai khi miqjaq keivq kheel bhiq nail ganl ya nl-a nail ngaol.