Yaolsuv 10
Aqmaolliv nail jeq-e genl dev sunq-a nail ganl
1 Yeiqlulsaqlaiq meenq nail heeqphaq Aqdaolnil Seiqdail neq, Yeiqlilkhol meenq bhai Yaolsuv genl dev gaq khi lav luq lav sail bhiq-a nail nee ovqtavq, a bhai khe heeq phaq-ai heivq bhiq-a nail khe-ai, Aq-il nail meenq iqsanl bhai genl dev gaq khi, aqyu juq nail heeqphaq bhai gail, heivq bhiq-a nail ganl bhai, ya gaiq-a nail ngaol. Al ovqtavq, Gilbhiqonq nail tsaol-aq juq gail Ilsaqleiqlav nail tsaol-aq juq nee nail saljial jaq tavq khi aqyu juq nail kov-uvq bhai jaol nail ganl bhai ya gaiq-a nail ngaol.
2 Aq-u phao, aivq dai khi aivq nail meenq yaq juq iqsanl mail gee sil dee dee-ai bhiq nail ngaol. Khul khi mail dai ngal-aq, Gilbhiqonq nail meenq neq, milkhaoq nail daoqthaoq pevq nail nee ovqtavq, heeqphaq nail jaol duq iqsanl pevq nail ngaol. Al ovqtavq, Aq-il nail meenq nee mail eeq jaiq khi a bhai khe jaol nail yaqyov-aq juq iqsanl mail, genl dev nail phao nia dee dee nail ngel-i mail ngaol.
3 Al heel ngel-i mail, Yeiqlulsaqlaiq meenq nail heeqphaq Aqdaolnil Seiqdail neq, Heiqbhonq nail heeqphaq Haolhanq, Yaqlaqmuq nail heeqphaq Pillanq, Laqkhilsav nail heeqphaq Yaqphiq-aq, Eiqgaqlonq nail heeqphaq Deiqbhillav, niil juq jaol nail bha gaqkhoel juq phaiq gai khi
4 niail hai bhi hal lai-a nail ngaol: "Gilbhiqonq nail tsaol-aq juq bhai genl dev nail haqbhoil, nv juq bhai tsao jao-ail lee lavq yaoq. Khul khi mail dai ngal-aq, aqyu juq neq, Yaolsuv dai khi Ilsaqleiqlav nail tsaol-aq juq nee mail saljial jaq tavq gaq-ao ngaol" dai, bhi hal lai-a nail ngaol.
5 Al heel ngel-i mail, Aqmaolliv nail heeqphaq ngaq gaq pevq nail Yeiqlulsaqlaiq meenq nail heeqphaq, Heiqbhonq nail heeqphaq, Yaqlaqmuq nail heeqphaq, Laqkhilsav nail heeqphaq, Eilgaqlonq nail heeqphaq niil juq jil lai khi, aqyu juq nail genl dev yaq munl munl ma juq nee mail dav lal khi, yovq gavq nail jaol juq yovq gavq oil-a nail nee ovqtavq, Gilbhiqonq nail meenq bhai genl dev lai-a nail ngaol.
6 Aq-u phao, Gilbhiqonq meenq bhai jaol nail tsaol-aq juq neq Gillavgaqlav nail gaq naq duq bhai jaol thail thaiq nail Yaolsuv jaol nail bha niail hai bhi ge bhiq lai-a nail ngaol: "Naoq nail yaqkav pevq nail nv juq bhai thaq khaonq ha lavq. Lavqtsail mail lee khi, nv juq bhai hevq kovq lee lavq yaoq. Gaoqjaoq juq nee mail Aqmaolliv nail heeqphaq juq, aqyu juq nail tsaol-aq juq bhai khul jil khi, nv juq bhai genl dev lal-aoq nail ngaol" dai, bhi ge bhiq lai-a nail ngaol.
7 Al heel ngel-i mail, Yaolsuv neq, aivq nail genl dev nail munl munl ma iqsanl mail hevq khi lai-a nail ngaol. Genl dev yaq juq nail lavqkhoel, genl dev nail phao khal nia nail juq iqsanl aol nail ngaol. Aq yu juq iqsanl Gillavgaqlav nee mail dov lai khi, Gilbhiqonq meenq bhai tsao tsao-ail lai bhiq-a nail ngaol.
8 Aq-u phao, Heeqphaq Miqyail neq, Yaolsuv bhai, "Aqyu juq bhai thaq gee sil, ngal aqyu juq naoq nail aqlavq lavqkhoel bhai av bhiq naol. Teevq gaq iqsanl naoq nail sivtavq bhai maq thul phaol kivq-ail" dai, ge bhiq-a nail ngaol.
9 Yaolsuv neq, Gillavgaqlav nail aqduq nee mail Gilbhiqonq meenq bha teevq kivq kivq lao lal khi, Aqmaolliv nail tsaol-aq juq maq noeq maq dul-ail jaol-u phao, genl dev-a nail ngaol.
10 Heeqphaq Miqyail neq, aqyu juq bhai Ilsaqleiqlav nail tsaol-aq juq nail sivtavq nee bhi tsaoq deel-nq ail-a nail ngaol. Aq-u phao, Ilsaqleiqlav nail tsaol-aq juq neq, Gilbhiqonq nail meenq bhai genl dev lee-a nail juq bhai mao dai heivq khi, gaoqjaoq nvq gaiqlaq teevq lao tsaoq daol nail gailkhaol nee the the-ail Bheiqtaq Hoqlonq dai khul nail aqduq bhai the jel laivq-a nail nee ovqtavq, Aqseiqkhaq meenq dai khi Malkeiqdaq meenq bha kev dai, genl dev kel laivq-a nail ngaol.
11 Ilsaqleiqlav nail tsaol-aq juq-i mail the bhiq-a nail bhaqda nee, Aqmaolliv nail tsaol-aq juq neq, Bheiqtaq Hoqlonq aqduq nee mail, yavq kha lee khi, Aqseiqkhaq meenq bhai kev dai tsaol-aivq-u phao, gailkhaol teevq khaol khaol lao, nqtavq nee mail ollov heeq ma aqyu juq nail kovtavq bhai Heeqphaq Miqyail bhi ga lee-a nail ngaol. Ollov aqheeq-i mail ga heivq-a nail juq neq, Ilsaqleiqlav nail tsaol-aq juq nail thaoma-i mail genl dev heivq-a nail nee maq tsil mao jaiq nail ngaol.
12 Aqmaolliv nail tsaol-aq juq, Ilsaqleiqlav nail tsaol-aq nail aqlavq bhai Heeqphaq Miqyail av bhiq-u n-gaol, Yaolsuv neq, "Nlma-ol, Gilbhiqonq meenq nail kovtavq bhai naq lai yaoq. Bhala-ol, Aqyillonq gavqlaovq nail kovtavq bhai naq lai yaoq" dai, Ilsaqleiqlav nail tsaol-aq juq nail sivtavq nee Heeqphaq Miqyail bhai geeqlaoq hal khi ge bhiq-a nail ngaol.
13 Al heel ngel-i mail, Ilsaqleiqlav nail tsaol-aq juq aqyu juq bhai neejiav jiav nail juq bhai genl dev gaq khi maq nl kovq bhiq gaq-u kev dai, nlma dai khi bhala maq tsao dai, naq lai-a nail ngaol. Ganl thoil ganl neq, Yaqsaq nail haoqgavq phaldoiq bhai gevq bhoel-ai thaq nail ngaol. Teevq-n n lao nlma maq ga bhoel-ail dai, nqtavq gaoltsi bhai naq lai-a nail ngaol.
14 Heeqphaq Miqyail neq, tsaol-aq yaq teevq gaq-i mail ge nail daoq bhai, aq-u n-gaol nal daiq-a nail ngaol. Thail hai teevq thal iqsanl mail maq pevq lal daiq-al, yaqhao iqsanl mail maq pevq lal yaoq-aol. Heeqphaq Miqyail neq, Ilsaqleiqlav nail tsaol-aq phao mal dil jaol khi genl dev jao-ai bhiq-a nail ngaol.
15 A bhai nee ngal-aq, Yaolsuv dai khi Ilsaqleiqlav nail tsaol-aq juq neq, gaqnaq naq nail aqduq pevq nail Gillavgaqlav bha kovq ail-a nail ngaol.
Aqmaolliv nail heeqphaq ngaq gaq bhai Yaolsuv heivq-a nail ganl
16 Aqmaolliv nail heeqphaq ngaq gaq neq, tsaoq jel khi Malkeiqdaq meenq aqjail bhai jiav nail lovphail khaoqbhaoq bhai tsaoq-uvq khi jaol lai thaq nail ngaol.
17 Heeqphaq al ngaq gaq lovphail khaoqbhaoq bhai tsaoq-uvq khi jaol nail ganl Yaolsuv bhai yu ge gaiq lal-u phao,
18 aivq ge nail: "Lovphail khaoqbhaoq moeqkhoeq bhai lovmav heeq ma-i mail laiq tsoiq khi hel daiq phail nail juq gail, bhi lovq yaoq.
19 Thail hai ngaol-aoq, nuljuq neq, thaq naq. Neejiav jiav nail juq nail haoqnao the khi haoqnaol phao nee genl dev yaoq. Aqyu juq bhai meenq lavqkhoel-ai thaq bhi aol-ail. Nul juq nail Heeqphaq Miqyail neq, aqyu juq bhai nul juq nail aqlavq lavqkhoel-ai av gaq lavq-ao nail ngaol" dai, Ilsaqleiqlav nail tsaol-aq juq bhai ge bhiq-a nail ngaol.
20 Yaolsuv dai khi Ilsaqleiqlav nail tsaol-aq juq neq, neejiav jiav nail juq bhai gaq lai gil khi, deeq heivq-a nail ngaol. Meenq nail khainl bhai mee nia gaq maq tsaoq kel laivq-al.
21 A bhai nee ngal-aq, Ilsaqleiqlav nail tsaol-aq juq iqsanl mail, Malkeiqdaq meenq aqjail Yaolsuv jaol nail aqyu juq nail gaqnaq naq duq bhai aqmeeq-ai, kovq kev gil lal-a nail ngaol. Aq-u n-gaol nee daq-n khi, tsaol-aq teevq gaq iqsanl, Ilsaqleiqlav nail tsaol-aq juq bhai moeqthaoq gaol pav khi, maq ge tseq-ail.
22 A bhai nee ngal-aq, Yaolsuv neq "Lovphail khaoqbhaoq laiq phao khi heeqphaq ngaq gaq bhai, ngal jaol nail bha hel leevq yaoq" dai, daoq bivq-a nail ngaol.
23 Aqyu juq gail, Yeiqlulsaqlaiq nail heeqphaq, Heiqbhonq nail heeqphaq, Yaqlaqmuq nail heeqphaq, Laqkhilsav nail heeqphaq dai khi Eilgaqlonq nail heeqphaq, heeqphaq al ngaq gaq bhai lovphail khaoqbhaoq nee mail hevq dol leevq khi,
24 Yaolsuv jaol nail bha hel laivq bhiq-a nail ngaol. Aq-u phao Yaolsuv neq, Ilsaqleiqlav nail tsaol-aq juq iqsanl mail dai khi aivq nee mail genl khal dev thaq nail aqivq juq bhai aivq jaol nail bha khul lavq khi, aqyu juq bhai, "Dov lal khi, Heeqphaq thoil juq nail leelkhaol bhai aqkhil-i mail naoq yaoq" dai, ge bhiq-a nail ngaol. Aqyu juq iqsanl, sivtavq phao dov lal khi, heeqphaq al ngaq gaq nail leelkhaol bhai aqkhil-i mail naoq thaiq bhiq-a nail ngaol.
25 Yaolsuv neq, aivq nail tsaol-aq juq bhai gaoq ge bhiq-a nail: "Thaq gee sil. Neema thaq cov. Gaq hal dov khi nl tseq hal tseq nail neema aol yaoq. Khul khi mail dai ngal-aq, Heeqphaq Miqyail neq, nul juq-i mail genl dev nail neejiav jiav nail juq iqsanl bhai, al hai nl bhiq nail ngaol" dai, ge bhiq-a nail ngaol.
26 A bhai nee ngal-aq, Yaolsuv neq, heeqphaq ngaq gaq bhai heivq khi, aqbhaol ngaq bhaol bhai khu tseq-a nail nee ovqtavq, kivqhail lailma phao kev dai, bhi gaq tseq-a nail ngaol.
27 Nlma ga-ail nail kev lal-u phao, Yaolsuv neq, aqmaol al bhai aqbhaol nee mail bhi pheel kha khi, aqyu juq-i mail tsaoq uvq-a nail lovphail khaoqbhaoq bha bhi liv bhoel lai nail galduq, daoq bivq-a nail ngaol. A bhai nee ngal-aq, lovphail khaoqbhaoq moeqkhoeq bhai lovmav juq-i mail bhi ngaoq pheeq khi yaq n n-gaol kev dai, lovmav al juq bhai ya moel-ai haq nail ngaol.
Pul-nvq phao khe jiav nail meenq juq Yaolsuv gaq lai-a nail ganl
28 Aq-u n-gaol, Yaolsuv dai khi Ilsaqleiqlav nail tsaol-aq juq neq Malkeiqdaq meenq bhai genl dev gaq khi aqyu juq nail heeqphaq bhai iqsanl heivq-a nail ngaol. Meenq yaq juq gail teevq gaq-iq maq jail dai, iqsanl mail heivq gil-a nail ngaol. Yeiqlilkhol nail heeqphaq heivq-a nail khe-ai Malkeiqdaq nail heeqphaq bhai gail heivq bhiq-a nail ngaol.
29 A bhai nee ngal-aq, Yaolsuv dai khi Ilsaqleiqlav nail tsaol-aq juq neq, Malkeiqdaq meenq nee mail dov-ail khi, Lilbhaqnaq meenq bha genl gaoq dev lai-a nail ngaol.
30 Heeqphaq Miqyail neq, meenq al meenq dai khi a bhai khe heeqphaq iqsanl Ilsaqleiqlav nail tsaol-aq juq nail aqlavq lavqkhoel bhai av bhiq-a nail ngaol. Aqyu juq neq meenq yaq juq iqsanl mail teevq gaq gail maq jail dai, heivq gil-a nail ngaol. Yeiqlilkhol nail heeqphaq heivq-a nail khe-ai, Lilbhaqnaq nail heeqphaq bhai gail heivq bhiq-a nail ngaol.
31 A bhai nee ngal-aq, Yaolsuv dai khi Ilsaqleiqlav nail tsaol-aq neq, Lilbhaqnaq nail meenq nee mail dov-ail khi Laqkhilsav nail meenq teevq jaoq jaol jaoq-a nail nee ovqtavq, genl dev lai-a nail ngaol.
32 Heeqphaq Miqyail neq genl dev nail nvq n teevq n bhai Laqkhilsav nail meenq Ilsaqleiqlav nail tsaol-aq juq nail aqlavq bhai av bhiq-a nail ngaol. Aqyu juq neq, Lilbhaqnaq nail meenq yaq juq bhai nl bhiq-u khe-ai, Laqkhilsav nail meenq yaq juq bhai teevq gaq gail maq jail dai, heivq gil-a nail ngaol.
33 Geiqsaqlav nail heeqphaq Haollanq neq Laqkhilsav nail meenq phao jaol khi genl dev jao-ai bhiq khi mail ngaol-aoq, Yaolsuv neq, aivq dai khi, aivq nail genl dev yaq juq bhai genl dev khi gaq lai-a nail nee ovqtavq, teevq gaq gail maq jail dai, heivq gil-a nail ngaol.
34 A bhai nee ngal-aq, Yaolsuv dai khi Ilsaqleiqlav nail tsaol-aq juq neq, Laqkhilsav nail meenq nee mail dov-ail khi, Eilgaqlonq meenq bha genl gaoq dev lai-a nail ngaol.
35 Aqyu juq aq-u n-gaol, meenq al meenq bhai genl dev gaq khi, Laqkhilsav nail meenq bhai nl bhiq-a nail khe-ai, Eilgaqlonq meenq bhai lav luq lav sail bhiq khi thaoma-i mail teevq gaq gail maq jail dai, heivq gil-a nail ngaol.
36 A bhai nee ngal-aq, Yaolsuv dai khi Ilsaqleiqlav nail tsaol-aq juq neq, Eilgaqlonq meenq nee mail dov-ail khi, Heiqbhonq meenq bha genl gaoq dev lai-a nail ngaol.
37 Aqyu juq neq, Heiqbhonq meenq khe heeqphaq dai khi meenq yaq juq iqsanl mail bhai maqkhaiq, meenq nail aqjail bhai jiav nail julgu khe jaol nail tsaol-aq juq bhai maqkhaiq, heivq gil-a nail ngaol. Aqyu juq neq, Eilgaqlonq meenq bhai lav luq lav sail gil bhiq-u khe-ai, Heiqbhonq meenq bhai gail lav luq lav sail gil bhiq-a nail ngaol. Tsaol-aq teevq gaq gail aqdoevq maq bhi jaol-al.
38 A bhai nee ngal-aq, Yaolsuv dai khi Ilsaqleiqlav nail tsaol-aq juq neq, Deiqbhillav meenq bha yavq kha lee khi, meenq al meenq bhai genl gaoq dev-a nail ngaol.
39 Aqyu juq neq, meenq khe heeqphaq nee mail teevq gaq khe-ai, meenq bhai maqkhaiq, aqjail aqthao khe jiav nail julgu juq bhai maqkhaiq, genl dev gaq khi lav luq lav sail bhiq-a nail nee ovqtavq, meenq khe khal jaol nail meenq yaq juq iqsanl mail teevq gaq gail maq jail dai, heivq gil-a nail ngaol. Aqyu juq neq Heiqbhonq nail meenq, Lilbhaqnaq nail meenq dai khi, meenq al juq khe heeqphaq juq bhai nl bhiq-u khe-ai, Deiqbhillav nail meenq dai khi a bhai khe heeqphaq bhai gail nl bhiq-a nail ngaol.
40 Al hai khi, Yaolsuv neq, pul-nvq phao khe jiav nail meenq juq bhai gaq lai gil-a nail ngaol. Gaoqjaoq juq bha kev dai maqkhaiq, Nilgeiq miltsaq bhai maqkhaiq, nlma ga khoeq phao khe jiav nail gaoqjaoq bhaqga juq bha kev dai maq khaiq, daikhaoq aqsal doi dai maqkhaiq, a bhai khe heeqphaq juq iqsanl bhai maqkhaiq, teevq gaq iqsanl maq bhi jail lai dai, aqhaq khal gaol nail phaq iqsanl bhai Yaolsuv-i mail lav luq lav seil gil bhiq-a nail ngaol. Aivq-i mail khal nl-a nail phaq iqsanl mail Ilsaqleiqlav nail Heeqphaq Miqyail mail daoq bivq-a nail phaq pevq nail ngaol.
41 Yaolsuv neq Kaqdeiqsaq Bhaqneiq-aq meenq nee mail Gaqsaq meenq bha kev dai maqkhaiq, Gaolsinq milkhaoq nee mail Gilbhiqonq meenq bha kev dai maqkhaiq, genl dev gaq-a nail ngaol.
42 Ilsaqleiqlav nail Heeqphaq Miqyail neq Ilsaqleiqlav nail tsaol-aq juq phao jaol khi genl dev jao-ai bhiq nail ngel-i mail, Yaolsuv neq, heeqphaq al juq iqsanl dai khi aqyu juq nail milkhaoq juq bhai teevq pov nee, genl dev gaq-a nail ngaol.
43 A bhai nee ngal-aq, Yaolsuv dai khi Ilsaqleiqlav nail tsaol-aq juq iqsanl mail, Gillavgaqlav nail aqduq bhai jiav nail gaqnaq naq duq bha kovq gil lee-a nail ngaol.