Yaolsuv 11
Pultavq phao khe heeqphaq juq genl dev sunq-a nail ganl
1 Haqsaoqlav nail heeqphaq Yaqbhinq neq, Ilsaqleiqlav nail tsaol-aq juq-i mail genl dev gaq thaq nail bhai ya gaiq-u phao, Maqdonq nail heeqphaq Yaolbhaq, Silmiqlonq nail heeqphaq dai khi Aqkhaqsal nail heeqphaq jaol nail bha daoq cavq bhi cavq gaiq lai-a nail ngaol.
2 Al ovqtavq, pultavq phao khe jiav nail gaoqjaoq bha jaol nail heeqphaq juq bhai maqkhaiq, Gaqliqlail ngaqkhaa nail pul-nvq phao jiav nail gavqlaovq teevq lao tsaoq bha jaol nail heeqphaq juq bhai maqkhaiq, nlma ga phao jiav nail gaoqjaoq bha jaol nail heeqphaq juq bhai maqkhaiq, nlma ga khoeq phao jiav nail Daollav meenq bhai jaol nail heeqphaq juq bhai maqkhaiq,
3 nlma dov khoeq, ga khoeq phao jaol nail Khaqnanq nail jeq-e juq bhai maqkhaiq, Aqmaolliv nail jeq-e juq bhai maq khaiq, Hiltiv nail jeq-e juq bhai maqkhaiq, Pheiqliqsil nail jeq-e juq bhai maqkhaiq, gaoqjaoq juq bha jaol nail Yeiqbhulsil nail jeq-e juq bhai maqkhaiq, Milsaqbhaq miltsaq Heiqlaqmonq nail gaoqjaoq daoqthaoq bhai jaol nail Hilwil nail jeq-e juq bhai maqkhaiq, cavq gaiq lai-a nail ngaol.
4 Aqyu juq neq, genl dev yaq juq iqsanl mail dai khi, moeqphaq juq maqkhaiq, moeqphaq lavlaoq juq maqkhaiq, hel lavq-a nail ngaol. Aqyu juq-i mail hevq lavq-a nail juq neq, iqyaq iqma daolbhaq khe tsalhail khe-ai, mao dee dee nail ngaol.
5 Heeqphaq al juq iqsanl mail jil lai khi Ilsaqleiqlav nail tsaol-aq juq bhai genl dev nail galduq, Meiqlonq nail ul cuvq eelbev aqjail bhai haqphal saiqgov covq khi gaqnaq naq-a nail ngaol.
6 Heeqphaq Miqyail neq, Yaolsuv bhai ge bhiq-a nail: "Aqyu juq bhai thaq gee sil. Niaohao aqyanq niil yanq kev lal-u phao, aqyu juq iqsanl mail, ngal Ilsaqleiqlav nail tsaol-aq juq nail aqlavq lavqkhoel bhai aqsil av bhiq nail ngaol. Naol neq, aqyu juq nail moeqphaq nail aqkhil kavmeivq oev ceiv khi moeqphaq lavlaoq juq bhai miqjaq ya kheq nail ngaol" dai, ge bhiq-a nail ngaol.
7 Al heel ngel-i mail, Yaolsuv dai khi aivq nail genl dev yaq juq neq, Meiqlonq nail ulcuvq eelbev nail jail-nq bhai jaol nail neejiav jiav nail juq bhai, thaiqphuq dai ail khi, genl dev-a nail ngaol.
8 Heeqphaq Miqyail neq, neejiav jiav nail al juq bhai Ilsaqleiqlav nail tsaol-aq juq nail aqlavq lavqkhoel-ai al bivq-a nail ngaol. Ilsaqleiqlav nail tsaol-aq juq neq, Sildoq meenq meenq ma bha kev dai maqkhaiq, Milsaqleiqphaoltaq Maqyinq meenq bhai kev dai maqkhaiq, nlma dov khoeq phao jiav nail Milsaqbhaq nail gavqlaovq bha kev dai maqkhaiq, aqyu bhai the khi, teevq gaq gail maq jail dai, heivq gil-a nail ngaol.
9 Yaolsuv neq Heeqphaq Miqyail-i mail ge bhiq-a nail khe-ai neejiav jiav nail al juq nail moeqphaq nail aqkhil kavmeivq bhai oev ceiv gil khi moeqphaq lavlaoq juq bhai miqjaq kheq soiq gil-a nail ngaol.
10 A bhai nee ngal-aq Yaolsuv neq, gaoq kovq lal khi, Haqsaoqlav nail meenq bhai genl dev khi, meenq al meenq khe heeqphaq bhai heivq-a nail ngaol. (Yeel al yeel bhai Haqsaoqlav nail meenq neq, milkhaoq al juq iqsanl nail daoqthaoq pevq nail ngaol.)
11 Ilsaqleiqlav nail tsaol-aq juq neq, a bhai khe meenq yaq juq iqsanl mail bhai teevq gaq gail maq bhi doevq dai, heivq gil khi, meenq bhai iqsanl, miqjaq kheq bhiq-a nail ngaol.
12 Yaolsuv neq, heeqphaq al juq dai khi aqyu juq-i mail uvthaiq nail meenq al juq iqsanl mail bhai, genl dev gaq khi, Heeqphaq Miqyail nail yaqkav Maolseiq-i mail daoq bivq-ai ceevq-a nail khe-ai, meenq yaq juq iqsanl mail, teevq gaq gail, maq jail dai heivq gil-a nail ngaol.
13 Thail hai ngaol-aoq, Ilsaqleiqlav nail tsaol-aq juq neq, Haqsaoqlav meenq maq ngel nail neq, gaoqjaoq bha jiav nail meenq juq bhai miqjaq maq kheq-al. Yaolsuv neq, Haqsaoqlav nail meenq teevq meenq taivq-ail miqjaq-i kheq-a nail ngaol.
14 Ilsaqleiqlav nail tsaol-aq juq neq, meenq al juq khe nlmaoq yalkav juq dai khi, jaiqyaq juq bhai aqyu juq nail haqbhoil dai khi, oil-a nail ngaol. Thail hai ngaol-aoq, meenq yaq juq bhai neq, teevq gaq gail maq jail dai, heivq gil-a nail ngaol.
15 Heeqphaq Miqyail neq, aivq nail yaqkav Maolseiq bhai daoq bivq-a nail khe-ai, Maolseiq neq, Yaolsuv bhai teevq tiv gaoq ge bhiq-ail ceevq-a nail ngaol. Yaolsuv gail, al hai nl-a nail ngaol. Heeqphaq Miqyail-i mail Maolseiq bhai daoq khal bivq-a nail iqsanl bhai, Yaolsuv neq, maq bhi jail dai, tsao the khi nl gil-a nail ngaol.
Yaolsuv-i mail genl dev ya-a nail miltsaq juq
16 Al hai khi Yaolsuv neq, miltsaq niil juq iqsanl bhai genl dev ya gil-a nail ngaol. Aivq-i mail genl dev ya-a nail juq neq, gaoqjaoq juq maqkhaiq, Nilgeiq nail miltsaq iqsanl maqkhaiq, Gaolsinq nail miltsaq iqsanl maqkhaiq, a bhai nee nlma ga khoeq phao khe jiav nail daikhaoq aqsal juq maqkhaiq, Yaoldaq laoljaol nail gavqlaovq lao tsao maqkhaiq, Ilsaqleiqlav nail gaoqjaoq gavqlaovq doi dai maqkhaiq,
17 Haqlal gaoqjaoq nee mail dav lai khi, Sol-iq nail gaoqjaoq bha kev dai maqkhaiq, Heiqlaqmonq nail gaoqjaoq pul-nvq phao jiav khi Leiqbhaqnonq nail gavqlaovq phao jiav nail Bhaqlal Kavqdaq nail meenq bha kev dai maqkhaiq, Yaolsuv neq, miltsaq al juq bhai jaol nail heeqphaq juq iqsanl bhai nieivq miv khi heivq gil-a nail ngaol.
18 Heeqphaq al juq bhai aqyanq heelma ma dai genl ya dev-a nail ngaol.
19 Ilsaqleiqlav nail tsaol-aq juq nee mail saljial jaq tavq nail meenq yaoq meenq yaoq maq jiav-ail. Gilbhiqonq nail meenq bhai jaol nail Hilwil nail jeq-e nee taivq-ail saljial jaq tavq-a nail ngaol. Jail nail meenq juq bhai genl dev gaq-a nail ngaol.
20 Khul khi mail dai ngal-aq, Heeqphaq Miqyail-i mail aqyu juq bhai neema aqgaol bhi gaol khi, Ilsaqleiqlav nail tsaol-aq juq bhai genl bhi dev-a nail ngaol. Al neq, Heeqphaq Miqyail Molseiq bhai daoq khal bivq-ai thaq nail khe-ai, aqyu juq bhai gaoq haq gaiq-a nail neema maq aol dai, lav cov heeq phaq-ail tsaq nail khe-ai, lav luq lav seil gil bhiq nail dai khi mail ngaol.
21 Yanq al yanq bhai Yaolsuv neq, Heiqbhonq nail meenq, Deiqbhillav nail meenq, Aqnav nail meenq, pul-nvq phao jiav nail Yuldav nail gaoqjaoq, pultavq phao jiav nail Ilsaqleiqlav nail gaoqjaoq niil juq bhai jaol nail Aqnaqkav nail jeq-e jaol nail bha genl dev lai-a nail ngaol. Yaolsuv neq, Aqnaqkav nail jeq-e juq bhai teevq gaq gail maq jail dai, heivq khi meenq juq bhai lav luq lav sail gil bhiq-a nail ngaol.
22 Al heel ngel-i mail, Ilsaqleiqlav nail milkhaoq bhai Aqnaqkav nail jeq-e dai teevq gaq gail maq jaol-ail ceevq-al. Gaqsaq nail meenq, Gaqtav meenq dai khi Aqsaqdoq meenq niil juq bhai taivq-ail, jaol-ail ceevq-a nail ngaol.
23 Heeqphaq Miqyail neq, Maolseiq nee teevq tiv ge bhiq-a nail khe-ai, Yaolsuv neq, milkhaoq iqsanl bhai genl dev gaq-a nail ngaol. Aivq neq, Ilsaqleiqlav nail tsaol jeq-e bhai aqyu juq-i mail ya-a nail miltsaq jaiqbhoil bhoil pav bhiq-a nail ngaol. A bhai nee ngal-aq, milkhaoq teevq khaoq khaoq lao genl dev nail maq jiav dai, aqsal sal lal-a nail ngaol.