Tsiq eeq 148
"Heeqphaq Miqyail bhai tsiq eeq yaoq" dai, nqtavq miltsaq bhai khul tsaoq nail ganl
1 Haq leiq lul yaq.
Nqtavq kovtavq bha jaol nail juq-ol
Heeqphaq Miqyail bhai tsiq eeq yaoq.
Daq moe bha jaol nail juq-ol
aivq bhai tsiq eeq yaoq.
2 Nqtavq gaqkhoel juq-ol
aivq bhai tsiq eeq yaoq.
Nqtavq kovtavq khe
genl dev nail munl munl ma juq-ol
aivq bhai tsiq eeq yaoq.
3 Nl ma bhala juq-ol
aivq bhai tsiq eeq yaoq.
Aq bhaq bhaq nail aqgil juq-ol
aivq bhai tsiq eeq yaoq.
4 Daq moe bha jiav nail
nqtavq kovtavq maqkhaiq
nqtavq kovtavq khe jiav nail
ulcuvq juq maqkhaiq
aivq bhai tsiq eeq yaoq.
5 Heeqphaq Miqyail neq
al juq bhai daoq bivq khi
bhi pevq dov lal-a nail ngel-i mail
aivq nail aqmil bhai tsiq eeq yaoq.
6 Aivq-i mail daoq bivq-ai thaq nail khe-ai
al juq iqsanl mail yovqgavq nail jaol duq bhai
yovqgavq ivq nail ngaol.
Aivq nail daoq bhai maq lel lal nia ail.
7 Heeqphaq Miqyail bhai tsiq eeq yaoq.
Miltsaq kovtavq bhai
doevq nail jaol nail phaq maqkhaiq
delgil maol ma juq maqkhaiq
iqyaq iqma aqnavq navq nail bhai
jaol nail juq maqkhaiq
8 nqjaiq tsaoq teivq khi ollov juq maqkhaiq
tsaiqbhaiq khi mail
jaoq thuq miq khoiq juq maqkhaiq
aivq nail daoq bhai nal daiq nail
lilmoel lil ma maqkhaiq
9 gaoqjaoq jaoq ma jaoq yaq
khal jiav nail juq maqkhaiq
aqheeq heeq lee nail aqbhaol khi mail
miqhuq aqbhaol juq maqkhaiq
10 haqtsoiq khe jaiqyaq khi mail
tsu kivq nail jaiqyaq juq maqkhaiq
soiq soiq-ail tsao nail jaiqyaq khi
bhail nia nail keivq-avq juq maqkhaiq
11 miltsaq kovtavq khe heeqphaq juq khi
milkhaoq yaq juq maqkhaiq
uv thaiq nail juq khi mail
miltsaq kovtavq khe
yalkhaq dal nail juq maqkhaiq
12 yaqyov-aq yaqnoil khi mail
yaqmai-aq yaqnoil juq maqkhaiq
joiqmaoq juq khi mail yaqnoil juq maqkhaiq
Heeqphaq Miqyail bhai tsiq eeq yaoq.
13 Al juq iqsanl mail
Heeqphaq Miqyail nail aqmil bhai
tsiq eeq yaoq dei-eiq.
Khul khi mail dai ngal-aq
aivq nail aqmil taivq-ail
eeq jaiq heel jaiq khi
seiqleiq khaoqsail iqsanl
nqtavq miltsaq nee maq tsil
eeq jaiq nail ngel-i mail ngaol.
14 Aivq neq, aivq nail tsaol-aq juq bhai
gaq bhi gaq lal-a nail ngaol.
Aivq bhai saljial ivq nail yaqkav juq pevq nail
aivq-i mail gaiq-a nail Ilsaqleiqlav tsaol-aq juq
aivq bhai bhi tsiq eeq nail dai khi
al hai nl bhiq a nail ngaol.
Haq leiq lul yaq.