Tsiq eeq 119
Heeqphaq Miqyail nail aolthaq kovqthaq
1 Heeqphaq Miqyail nail
aolthaq kovqthaq nail haoqnao tsao the khi
oeqbal thaq duq maq jiav dai
aqdoevq doevq nail juq neq
geeqlaoq eeq nail ngaol.
2 Aivq-i mail
cavq bhiq cov bhiq nail bhai tsao the khi
aivq bhai neema lavqkhoel nee
hal pov nail juq neq, geeqlaoq eeq nail ngaol.
3 Aqyu juq neq
laiq nail tsa nail maq nl mail
aivq nail gailkhaol bhai tsao the nail ngaol.
4 Heeqphaq Miqyail-ol, naol neq
naoq nail ya tsao the nail phaq
nv juq bhai bivq lavq khi
al juq bhai aqmeeq meeq dai tsao the kivq dai
ge ail ceevq lavq-a nail ngaol.
5 Ngal neq, naoq nail ya tsao the nail phaq bhai
neema kev dee dee nail lavqkhoel nee
tsao the movq ail nial.
6 Ngal al hai tsao the kivq haq neq
naoq-i mail bivq-ai thaq nail
aoldaoq kovqdaoq bhai
aqphoiq thaq bhao nail ngel-i mail
ya haq sil nail maq bhao ail.
7 Ngal neq
naoq-i mail aq tsaq aqdaol daol dai
yalkhaq dal nail phaq bhai saol oil khi
daol coev dai naoq bhai tsiq eeq nail ngaol.
8 Ngal neq
naoq nail ya tsao the nail phaq bhai
tsao the nail ngaol.
Ngaq bhai teevq thal-iq
thaq khaonq ha lavq.
9 Aqkovq maq jiav lal heeq thaq nail gaq
khal hai khi aq tsaq aqdaol nail lavqkhoel bhai
doevq nia nail dai, ge haq neq
naoq nail daoq bhai tsao the nail lavqkhoel nee
doevq nia jaol nia nail ngaol.
10 Ngal neq, naoq bhai
neema lavqkhoel bha kev dai
hal pov nail ngaol.
Ngaq bhai naoq-i mail bivq-ai thaq nail
aoldaoq kovqdaoq nee
thaq bhi pav ail lavq.
11 Naoq bhai maq ya nl laiq dai
ngaq nail neema lavqkhoel bhai
naoq nail daoq oil bhoel-ai thaq nail ngaol.
12 Heeqphaq Miqyail-ol
ngal naoq bhai geeqlaoq bivq nail ngaol.
Ngaq bhai naoq nail
ya tsao the nail phaq saol lavq yaoq.
13 Ngal neq
naoq nail moeqthaoq lavqkhoel nee
dov lee-a nail yalkhaq dal nail phaq bhai
khaq mao iqsanl, ge pov nail ngaol.
14 Ngal neq
phul heel ildaoq maoqgaiq juq bhai
gaiq-a nail nee maq tsil
naoq-i mail cavq lavq cov lavq nail phaq bhai
gaiq-a nail ngaol.
15 Naoq nail ya tsao the nail phaq bhai saol-nvq khi
naoq nail gailkhaol bhai khaq mao iqsanl
noeq daiq nail ngaol.
16 Naoq nail ya tsao the nail phaq bhai
ngal neekhaol sil khi
naoq nail daoq bhai iqsanl
nioil peivq nail maq bhao ail.
17 Naoq nail yaqkav pevq nail ngaq bhai
aqmeeq phaq nl lavq yaoq.
Al hai nl lavq khi pultavq ngal aqdoevq doevq khi
naoq nail daoq bhai tsao the kivq nail ngaol.
18 Naoq nail aolthaq kovqthaq lavqkhoel khe
noeq-u maq dov nail phaq bhai moel kivq dai
ngaq nail maivneev bhai phao lavq yaoq.
19 Ngal neq
miltsaq niil heeq nail kovtavq bhai
teevq yanq lal yanq taivq-ail ya doevq nail ngaol.
Naoq-i mail bivq-ai thaq nail aoldaoq kovqdaoq
ngaq bhai oil-uvq khi thaq bhi jiav lavq.
20 Ngal neq
naoq-i mail yalkhaq dal nail phaq bhai
khaq mao iqsanl
heeq kivq movq dee dee nail ngaol.
21 Naol neq
neema eeq movq heel movq nail juq bhai
khaq bhiq nail ngaol.
Aqyu juq neq
naoq-i mail bivq-ai thaq nail
aoldaoq kovqdaoq nee
tsao dol-aivq-a nail ngel-i mail
geeqlaoq aqdoil ya nail ngaol.
22 Ngal neq
naoq-i mail cavq lavq cov lavq nail bhai
tsao the nail ngel-i mail
aqyu juq-i
khal ge movq ail ge lal nail phaq bhai maqkhaiq
hel daiq theq lavq nail phaq bhai maqkhaiq
bhi jel-ail lavq yaoq.
23 Uv thaiq nail juq teevq gaq khe-ai
maoq bhaoq nl-u phao
ngaq nail ganl aqdoil phaq
ge thail thaiq nail ngaol.
Thail hai ngaol-aoq
naoq nail yaqkav pevq nail ngal neq
naoq nail aol bhai saol-nvq khi jaol nail ngaol.
24 Naoq-i mail cavq lavq cov lavq nail phaq
ngaq nail neema bhai
lavqkhiq bhi tsail lal-a nail ngaol.
Al neq, ngaq bhai
gailkhaol cavq naq lavq-a nail phaq
iqsanl pevq nail ngaol.
25 Ngal noeq dee noeq deel khi aqsil khe-ai
khaqlail bhai ga thail thaiq nail ngaol.
Naoq nail daoq jiav nail khe-ai
aqdoevq bhi doevq lavq yaoq.
26 Ngaq nail ganl iqsanl bhai ge dov-u phao
naol neq, ngaq bhai ge kovq lavq a nail ngaol.
Ngaq bhai naoq nail ya tsao the nail phaq
saol lavq yaoq.
27 Naoq nail ya tsao the nail phaq nail gailkhaol bhai
gov heeq kivq dai
ngaq bhai tsao jao-ai lavq yaoq.
Ngal neq, naoq-i mail
nl-a nail noeq-u maq dov nail ganl bhai
saol-nvq nail ngaol.
28 Ngal noeq haq nail ngel-i mail
gaq teevq peivq ail maq aol dai
pevq ail-a nail ngaol.
Al heel ngel-i mail
naoq nail daoq jiav nail khe-ai
ngaq bhai gaq bivq lavq yaoq.
29 Ngal goiqbhaoq maq ya bhaoq dai
tsao jao-ai lavq yaoq.
Al ovqtavq, naoq-i mail
gaoq haq gaiq-a nail phaq bhai juq khi
ngaq bhai naoq nail aolthaq kovqthaq
saol lavq yaoq.
30 Ngal naoq bhai saljial ivq nail phaq-ai tsel khi
naoq-i mail yalkhaq dal nail phaq bhai iqsanl
neema tsaq nail ngaol.
31 Heeqphaq Miqyail-ol
ngal naoq-i mail cavq lavq cov lavq nail phaq bhai
nieivq thaiq-ai thaq nail ngaol.
Ngaq bhai thaq bhi haq sil lavq.
32 Naol neq, ngaq bhai
noeq heeq noeq dov nia nail phaq
gaoq bhi mao lal lavq-a nail ngel-i mail
ngal naoq-i mail bivq-ai thaq nail
aoldaoq kovqdaoq bhai
tsao the dav lavq nail ngaol.
33 Heeqphaq Miqyail-ol
naoq nail ya tsao the nail phaq nail gailkhaol
ngaq bhai cavq naq lavq yaoq.
Al juq bhai ngal
khaq mao iqsanl tsao the dal lavq nail ngaol.
34 Naoq nail aolthaq kovqthaq bhai
hel daiq phail kivq dai
gov heeq kivq nail phaq bivq lavq yaoq.
Al bhai ngal neema lavqkhoel bha kev dai
tsao the nail ngaol.
35 Ngal neq
naoq-i mail bivq-ai thaq nail
aoldaoq kovqdaoq bhai
neekhaol sil nail ngel-i
daoq al juq bhai tsao the kivq dai
ngaq bhai tsao jao-ai lavq yaoq.
36 Hul meeq meeq movq nail nee maq tsil
naoq-i mail cavq lavq cov lavq nail phaq bhai
tsao the kivq dai
ngaq nail neema bhai lav phal lavq yaoq.
37 Ganl maq tsoiq nail phaq bhai
hel daiq nail phaq nee eqyal bha eq ail lavq khi
naoq nail gailkhaol bhai
tsao kivq nail haqbhoil iqsanl
gaq bivq lavq yaoq.
38 Naoq-ai ev khi gee sil nail juq bhai
bivq-ai thaq nail daoqma saljial bhai
naoq nail yaqkav pevq nail ngaq-ai
nl bhee lavq yaoq.
39 Ngal gee sil nail phaq pevq nail
haq sil nail lavqkhoel nee
hevq kovq lavq yaoq.
Khul khi mail dai ngal-aq
naoq-i mail yalkhaq dal nail phaq neq
meeq dee dee nail ngaol.
40 Ngal neq, naoq nail ya tsao the nail phaq bhai
noeq moel dee dee ail nial.
Naoq nail tsaq nail daol nail phaq bhai juq khi
ngaq bhai aqdoevq bhi doevq lavq yaoq.
41 Heeqphaq Miqyail-ol
naoq-i mail gaoq haq goil gaiq a nail phaq
khi mail hevq kovq nail phaq
saljial jaq-ai thaq nail khe-ai
ngaq bhai bivq lavq yaoq.
42 Al hai bivq lavq haq neq
ngaq-ai khal ge movq ail ge lal nail juq bhai
gaoq ge kovq bhiq kivq nail ngaol.
Khul khi mail dai ngal-aq
ngal neq, naoq nail daoq bhai
neema thaq tsaol nail ngel-i mail ngaol.
43 Naoq nail maldil tsaq nail daoq
thaq oil dov lavq.
Khul khi mail dai ngal-aq
naoq nail yalkhaq dal nail phaq bhai
ngal noeq thunq nail teevq-eel ngaol.
44 Ngal neq, naoq nail aolthaq kovqthaq bhai
khaq mao iqsanl tsao the nail ngaol.
Nq maq maq luv hal yeel tsao the nail ngaol.
45 Ngal neq
naoq nail ya tsao the nail phaq bhai
hal pov nail ngel-i mail
khul lav tsoiq lal nail maq jiav dai
ail lal jaol kivq nail ngaol.
46 Ngal neq, naoq nail salkhil bhai
heeqphaq juq nail sivtavq-ai maq haq sil dai
ge daiq bhiq nail ngaol.
47 Ngal neq
naoq-i mail bivq-ai thaq nail
aoldaoq kovqdaoq bhai
gaiq-a nail ngel-i mail
al bhai tsao the khi neekhaol sil nail ngaol.
48 Ngal neq, naoq-i mail bivq-ai thaq nail
aoldaoq kovqdaoq bhai gaiq-a khi
aqlavq bavq dil nail nee ovqtavq
naoq nail ya tsao the nail phaq bhai
saol-nvq pov nail ngaol.
49 Naoq nail yaqkav pevq nail ngaq-ai nee
saljial jaq-ai thaq nail bhai noeq kev lavq yaoq.
Saljial al neq
ngaq nail noeq thunq duq pevq nail ngaol.
50 Naoq nail daoqma saljial neq
ngaq bhai aqdoevq bhi doevq lavq nail ngaol.
Haq nail aoq nail phaq kev lee-u phao
ngal al bhai noeq kev khi
nee sal ya lal nail ngaol.
51 Eeq movq heel movq nail juq neq
ngaq bhai khal ge movq ail ge lal khi ngaol-aoq
ngal neq, naoq nail aolthaq kovqthaq bhai
maq khaonq ha ail.
52 Aq-u phao
naoq-i mail yalkhaq dal-a nail phaq bhai
ngal noeq kev noeq moel-a nail ngaol.
Heeqphaq Miqyail-ol
al neq, ngaq nail neema bhai
nee sal bhi ya nail phaq pevq nail ngaol.
53 Naoq nail aolthaq kovqthaq bhai
haqeiv nail tsaol-aq juq
khaonq ha nail bhai ya moel-u phao
ngaq bhai neema phail dee dee lal-a nail ngaol.
54 Ngal miltsaq niil nail kovtavq bhai
teevq yanq aqdoevq doevq-u phao
naoq nail ya tsao the nail phaq nail ganl bhai
daoqsel gevq dov khi gul nail ngaol.
55 Heeqphaq Miqyail-ol
nqkiv lima phao
ngal naoq nail aqmil bhai noeq thaq khi
naoq nail aolthaq kovqthaq bhai saol-nvq nail ngaol.
56 Naoq-i mail ya tsao the nail phaq bhai
hel daiq phail nail phaq neq
ngaq-i mail khaq mao iqsanl
nl nail phaq pevq nail ngaol.
57 Heeqphaq Miqyail-ol
naol neq ngaq nail haqbhoil pevq nail ngaol.
Ngal naoq nail daoq bhai nal daiq naol dai
saljial jaq nail ngaol.
58 Ngaq nail neema lavqkhoel nee
naoq nail maivphaoq bhai hal pov nail ngaol.
Naoq-i mail saljial jaq-a nail khe-ai
ngaq bhai gaoq haq gaiq-a lavq yaoq.
59 Ngal neq
yovqgavq nail gailkhaol bhai saol-nvq pov khi
naoq-i mail cavq lavq cov lavq nail bhai
gaoq tsao the nail ngaol.
60 Ngal neq
naoq-i mail bivq-ai thaq nail
aoldaoq kovqdaoq bhai
lavqtsail mail tsao the nail ngaol.
61 Haq eiv nail tsaol-aq juq
ngaq bhai neeqtsaq phee thaiq lal khi ngaol-aoq
ngal neq, naoq nail aolthaq kovqthaq bhai
maq nioil peivq ail.
62 Ngal neq, hul iq tsil ma thul lee khi
naoq-i mail aq tsaq aqdaol daol dai
yalkhaq dal nail phaq bhai tsiq eeq nail ngaol.
63 Ngal neq, naoq bhai
ev khi gee sil nail juq iqsanl nee maqkhaiq
naoq nail ya tsao the nail phaq bhai
tsao the nail juq iqsanl nee maqkhaiq
aqtsaoq pevq nail ngaol.
64 Heeqphaq Miqyail-ol, miltsaq neq
naoq-i mail gaoq haq goil gaiq-a nail phaq nee
bhee lovq nail ngaol.
Ngaq bhai naoq nail
ya tsao the nail phaq cavq lavq cov lavq yaoq.
65 Heeqphaq Miqyail-ol, naol neq
saljial jaq-a nail khe-ai
naoq nail yaqkav pevq nail ngaq bhai
aqmeeq phaq nl lavq-a nail ngaol.
66 Ngal neq, naoq-i mail bivq-ai thaq nail
aoldaoq kovqdaoq bhai
neema thaq tsaol nail ngel-i mail
ngaq bhai
aqmeeq-ai yal khal dal kivq nail phaq khi
noeq heeq noeq dov kivq nail phaq bivq lavq yaoq.
67 Naol ngaq bhai
yalkhaq maq dal-u nee mail
ngal gail bheeq bheeq
ail thaq nail jiav khi ngaol-aoq
niil aq-il, naoq nail daoq
khal jiav nail khe-ai, nl nail ngaol.
68 Naol neq, meeq dee dee khi
naoq-i mail nl nail phaq iqsanl
aqmeeq ngaol.
Ngaq bhai naoq nail ya tsao the nail phaq
cavq lavq cov lavq yaoq.
69 Eeq movq heel movq nail juq neq
ngaq nail ganl bhai goiqbhaoq bhaoq khi ngaol-aoq
ngal neq, naoq nail ya tsao the nail phaq bhai
neema lavqkhoel bha kev dai
hel daiq phail nail ngaol.
70 Aqyu juq nail neema neq
aqgaol gaol khi
khul maq noeq heeq nia khi ngaol-aoq
ngal neq, naoq nail aolthaq kovqthaq bhai
neekhaol sil nail ngaol.
71 Naoq-i mail yalkhaq dal nail phaq bhai
ya daq-a nail neq
ngaq nail haqbhoil meeq nail ngaol.
Khul khi mail dai ngal-aq
al hai ya daq-a nail bhaq da nee
ngal naoq nail ya tsao the nail phaq bhai
gov heeq kivq jaiq lal-a nail ngaol.
72 Naoq-i mail bivq lavq-a nail aolthaq kovqthaq neq
ngaq nail haqbhoil
phul heel mao dai nee maq tsil
aqphoiq bhao jaiq nail ngaol.
73 Naoq nail aqlavq-i mail
ngaq bhai teivq lavq khi
naoq-i mail bivq-ai thaq nail
aoldaoq kovqdaoq bhai gov heeq kivq dai
ngaq bhai neenoeq neekha bivq lavq yaoq.
74 Ngal neq
naoq nail daoq bhai noeq thunq nail ngel-i mail
naoq bhai geeq sil khi ev nail juq neq
ngaq bhai moel-u phao
lavqkhiq tsail nail ngaol.
75 Heeqphaq Miqyail-ol
naol saljial ivq nail lavqkhoel nee
ngaq bhai yalkhaq dal lavq-a nail nee ovqtavq
naoq-i mail yalkhaq dal nail phaq iqsanl mail
tsaq nail daol nail phaq pevq nail ngaol dai
ngal heeq kivq nail ngaol.
76 Saljial jaq-ai thaq nail khe-ai
naoq-i mail gaoq haq goil gaiq-a nail phaq neq
naoq nail yaqkav pevq nail ngaq bhai
neema nee sal bhi ya lavq dei-eiq.
77 Ngal neq, naoq nail aolthaq kovqthaq bhai
neekhaol sil nail ngel-i mail
ngaq bhai gaoq haq lavq yaoq.
Al hai nl lavq haq neq
ngal aqdoevq ya doevq nail ngaol.
78 Eeq movq heel movq nail juq neq
khul nail ganl maq jiav nail bhai
oeqbal thaq lavq nail bhaq da nee
haq sil nail phaq bhai ya daq dei-eiq.
Ngal neq, naoq nail ya tsao the nail phaq bhai saol-nvq nail ngaol.
79 Naoq bhai gee sil khi ev nail juq maqkhaiq
naoq-i mail cavq bhiq cov bhiq nail bhai
heeq nia nail juq maqkhaiq
ngal jaol nail bha lal dei-eiq.
80 Ngaq nail nee ma-ol
Miqyail nail ya tsao the nail phaq bhai
teevq bhee teevq lovq tsao the dei-eiq.
Al hai nl haq neq
haq sil nail phaq nee ya jel-ail nail ngaol.
81 Heeqphaq Miqyail-ol
ngal neq, naoq-i mail
hevq kovq lavq nail phaq bhai daonq-a nail
gaq iqsanl gil kha lee aoq nial.
Thail hai ngaol-aoq
ngal naoq nail daoq bhai noeq thunq nail ngaol.
82 Naoq-i mail
saljial jaq-ai thaq nail phaq bhee lal nail bhai
noeq thunq nail ngel-i mail
ngaq nail maivneev gaon dee dee lal-aoq nial.
"Ngaq bhai nee sal ovq nail phaq
khaq mao bivq lavq nail-aiq" dai
nal daiq-a nail ngaol.
83 Ngal neq
haq kov eelpheeq haq khuq khuq lai-a nail khe-ai
khul nail ganl maq tsoiq ao nial.
Thail hai ngaol-aoq
naoq nail ya tsao the nail phaq bhai
maq nioil peivq ail.
84 Ngal naoq bhai khaq mao kev dai
ya daonq-ai haq nail-aiq.
Ngaq bhai khoeq lavq jiovq lavq-a nail juq bhai
khaq mao yalkhaq dal bhiq nail dai khi.
85 Naoq nail aolthaq kovqthaq bhai
maq tsao the nail
eeq movq heel movq nail juq neq
ngaq bhai lavq phee khail nail dai khi
khaq duq duq thail thaiq nail ngaol.
86 Naoq-i mail bivq-ai thaq nail aoldaoq kovqdaoq
khal jiav nail iqsanl mail
neema thaq tsaol kivq nail phaq pevq nail ngaol.
Tsaol-aq yaq juq
khul nail ganl maq jiav nail bhai
ngaq-ai khoeq lal jiovq lal nail ngaol.
Ngaq bhai tsao jao-ai lavq yaoq.
87 Aqyu juq ngaq bhai heivq nail dai lai jai khi
pevq lai nail kev lal khi ngaol-aoq
ngal neq, naoq nail ya tsao the nail phaq bhai
maq khaonq ha ail.
88 Ngal naoq nail moeqthaoq nee
dov lee-a nail salkhil bhai nal daiq kivq dai
naoq-i mail
gaoq haq goil gaiq-a nail phaq bhai juq khi
ngaq bhai tsao jao-ai lavq yaoq.
89 Heeqphaq Miqyail-ol, naoq nail daoq neq
nqtavq kovtavq khe-ai
nqmaq maqluv halyeel ivq nail ngaol.
90 Naoq-i mail saljial ivq nail phaq neq
teevq yeel nee teevq yeel ivq nail ngaol.
Miltsaq iqsanl, naoq-i mail
jaol duq khal bivq-ai thaq nail khe-ai
ivq nail ngaol.
91 Khal jaol khal jiav nail phaq neq
naoq nail yaqkav pevq khi
naoq-i mail daoq khal bivq-ai thaq nail khe-ai
yanqgaol kev dai, ivq nail ngaol.
92 Mal dil naoq nail aolthaq kovqthaq neq
ngaq nail haqbhoil
lavqkhiq tsail duq maq pevq lao-aol kheel nul-uq
ngal neq haq nail aoq nail phaq
ya daq-a nail bhaq da nee
sil jel-aoq nail ngaol.
93 Naoq-i mail ya tsao the nail phaq bhaq da nee
ngal aqdoevq doevq kivq-a nail ngel-i mail
al bhai teevq thal-iq maq nioil peivq ail.
94 Naol neq, ngaq bhai
uv thaiq nail gaq pevq nail ngaol.
Al heel ngel-i mail, hevq kovq lavq yaoq.
Ngal neq, naoq nail ya tsao the nail phaq bhai
lai jai khi hal pov nail ngaol.
95 Haq eiv nail juq neq
ngaq bhai heivq nail dai khi
hel daiq cov-ai thaq khi ngaol-aoq
ngal neq, naoq nail salkhil bhai
saol-nvq saol-nvq ail jaol nail ngaol.
96 Naoq-i mail bivq-ai thaq nail
aoldaoq kovqdaoq nee jaiq lai haq neq
khul teevq phaq iqsanl
maq bhee lovq nail ganl bhai
ngal heeq kivq nail ngaol.
97 Ngal neq, naoq nail aolthaq kovqthaq bhai
al jaiq-ail gaiq-a khi ganl al juq bhai
teevq n n lao saol-nvq pov nail ngaol.
98 Naoq-i mail bivq-ai thaq nail
aoldaoq kovqdaoq neq
ngaq-ai nee mail teevq gaq khe-ai
khaq mao iqsanl jiav khi
daoq al bhaq da nee
ngaq bhai neejiav jiav lal nail juq nee maq tsil
neenoeq neekha aol jaiq nail ngaol.
99 Ngal neq
naoq nail salkhil juq bhai
saol-nvq nail ngel-i mail
ngaq nail saq laq juq nee maq tsil
heeq kivq jaiq kivq-a nail ngaol.
100 Naoq-i mail ya tsao the nail phaq bhai
tsao the-a nail ngel-i mail
aqkovq jiav jaiq nail juq nee maq tsil
noeq heeq noeq dov jaiq kivq nail ngaol.
101 Ngal neq
naoq nail daoq bhai tsao the kivq dai
maq meeq nail gailkhaol iqsanl bhai
yaol phaol nail ngaol.
102 Ngaq bhai cavq lavq cov lavq-a nail gaq neq
naol pevq nail ngel-i mail
naoq-i mail yalkhaq dal nail phaq bhai
maq khaonq ha ail.
103 Naoq-i mail
cavq lavq cov lavq-a nail daoq juq neq
aqtsil kha dai tsil nail ngel-aiq.
Bhaiqtsil bhaiqeel nee maq tsil
tsil jaiq nail ngaol.
104 Ngal neq
naoq nail ya tsao the nail phaq nail lavqkhoel bhai
noeq heeq noeq dov kivq nail phaq
ya-a nail ngel-i mail
goiqbhaoq bhaoq nail gailkhaol iqsanl bhai
bhe nail ngaol.
105 Naoq nail daoq neq
ngaq nail aqkhil sivtavq bhai phalmanq pevq khi
ngal-i mail ya ail nail gailkhaol bhai
aqbhaq pevq nail ngaol.
106 Naoq-i mail aq tsaq aqdaol daol dai
dal ceiv lavq-a nail haoqnao tsao the nail ngaol dai
ngaq-i khanq ceiv-ai thaq nail khe-ai, nl naol.
107 Heeqphaq Miqyail-ol
ngal haq dee aoq dee dee nail bhai
ya daq thail thaiq nail ngaol.
Saljial jaq-ai thaq nail khe-ai
ngaq bhai aqdoevq bhi doevq lavq yaoq.
108 Heeqphaq Miqyail-ol
ngaq-i mail tsiq eeq khi
geeqlaoq hal-a nail daoq bhai
nal daiq lavq nail lavqkhoel nee
naoq-i mail yalkhaq dal nail phaq
ngaq bhai cavq lavq cov lavq yaoq.
109 Ngal neq, yaoq n yaoq n nee
sil nail phaq nee ya thaoq phuq nail ngaol.
Thail hai ngaol-aoq
naoq nail aolthaq kovqthaq bhai
ngal maq nioil peivq ail.
110 Haq eiv nail tsaol-aq juq neq
ngaq nail haqbhoil
lavq phee khail-ai thaq nail ngaol.
Thail hai ngaol-aoq, ngal neq
naoq nail ya tsao the nail phaq nee maq pav ail.
111 Naoq-i mail
cavq lavq cov lavq nail phaq neq
ngaq nail haqbhoil
nqmaq maqluv halyeel jaiq bhoil pevq khi
ngaq bhai lavqkhiq bhi tsail lal nail ngaol.
112 Ngal neq, sil-u kev dai
naoq nail ya tsao the nail phaq bhai tsao the nail
neema kev nail ngaol.
113 Ngal neq
naoq bhai saljial maq ivq nail juq bhai bhe khi
naoq nail aolthaq kovqthaq bhai neq
gaiq-a nail ngaol.
114 Naol neq, ngaq nail haqbhoil
juq duq khi mail
doeq daq duq pevq nail ngaol.
Al ovqtavq, ngal naoq nail daoq bhai
noeq thunq khi jaol nail ngaol.
115 Haq eiv nail phaq nl nail juq-ol
ngal jaol nail nee dov ail yaoq.
Ngal neq, ngaq nail Miqyail-i mail
bivq-ai thaq nail aoldaoq kovqdaoq bhai
tsao the nail ngaol.
116 Naol saljial jaq-a nail khe-ai
ngaq bhai gaq bivq lavq yaoq.
Al hai bivq lavq haq neq
ngal aqdoevq ya doevq nail ngaol.
Ngaq-i mail noeq thunq-ai thaq nail phaq bhai
neema thaq bhi cov lavq.
117 Haq nail aoq nail phaq nee jel-ail kivq dai
ngaq bhai he thul lavq yaoq.
Ngal naoq nail ya tsao the nail phaq bhai
khaq mao iqsanl hel daiq cov-ai thaq nail ngaol.
118 Naol neq
naoq nail ya tsao the nail phaq nee
tsao pal-aivq nail juq bhai
khaonq ha bhiq nail ngaol.
Aqyu juq-i mail goiqbhaoq bhaoq khi
laiq ail thaq nail ganl juq iqsanl mail
aqnieivq bhi pevq gil ail nail ngaol.
119 Haq eiv nail tsaol-aq juq neq
naoq nail sivtavq bhai
pavq leivq pavq khuq khe-ai dul nail ngaol.
Thail hai ngaol-aoq, ngal neq
naoq-i mail cavq lavq cov lavq nail phaq bhai
gaiq-a nail ngaol.
120 Naoq bhai gee sil nail ngel-i mail
ngal aqjuq juq gil lal khi
naoq-i mail yalkhaq dal nail phaq bhai
tsaoq deel-nq ail-a nail ngaol.
121 Ngal neq
tsaq nail daol nail phaq nl nail ngel-i mail
ngaq bhai neejiav jiav nail juq nail
aqlavq lavqkhoel bhai thaq khaonq ha lavq.
122 Naoq nail yaqkav pevq nail ngaq bhai
tsao jao-ai bhiq naol dai, saljial jaq lavq yaoq.
Eeq movq heel movq nail juq
ngaq bhai thaq bhi khoeq thaq bhi jiovq lavq.
123 Naoq-i mail hevq kovq lavq nail phaq khi
naoq-i mail saljial jaq-ai thaq nail
tsaq nail daol nail daoq bhai
daonq-a nail ngaq nail maivneev gaon lal-aoq nial.
124 Naoq-i mail
gaoq haq goil gaiq-a nail phaq-i mail
ngaq bhai hel daiq phail lavq khi
naoq nail ya tsao the nail phaq-i mail
ngaq bhai cavq lavq cov lavq yaoq.
125 Ngal neq
naoq nail yaqkav pevq nail khe-ai
naoq-i mail cavq lavq cov lavq-a nail phaq bhai
gov heeq kivq dai
ngaq bhai neenoeq neekha bivq lavq yaoq.
126 Heeqphaq Miqyail-ol
tsaol-aq yaq juq neq
naoq nail aolthaq kovqthaq bhai
khaonq ha-a nail ngel-i mail
naol nl kovq bhiq nail aqyanq
niil aq-il tsaq lal-aoq nail ngaol.
127 Ngal neq
naoq nail aolthaq kovqthaq bhai
haol taiv deel heel nee maq tsil gaiq-a nail ngaol.
128 Ngaq nail haqbhoil
naoq nail ya tsao the nail phaq iqsanl mail tsaq khi
maq tsaq maq daol nail gailkhaol iqsanl bhai
ngal bhe nail ngaol.
129 Naoq nail salkhil neq
noeq-u maq dov nail phaq pevq nail ngel-i mail
ngal al bhai tsao the nail ngaol.
130 Naoq nail daoq
phao daiq lavq-a nail phaq neq
aqbhaq khe-ai pevq khi
neenoeq neekha maq aol nail juq bhai
bhi aol lal nia nail ngaol.
131 Ngal neq
naoq-i mail bivq-ai thaq nail
aoldaoq kovqdaoq bhai
moevq nail ngel-i mail
aqhaq maq gaol di kivq dai jaol nail ngaol.
132 Naoq nail aqmil bhai gaiq-a nail juq-ai
naol gaiq-a nail khe-ai
ngal jaol nail phao tsiq phaol khi
gaoq haq gaiq-a lavq yaoq.
133 Saljial jaq-ai thaq nail khe-ai
ngal maq ya ga tsuq ail dai
hevq daiq lavq yaoq.
Oeqbal ngaq bhai thaq bhi uv thaiq lavq.
134 Ngal naoq nail ya tsao the nail phaq bhai
hel daiq phail kivq dai
ngaq bhai khoeq lal jiovq lal nail juq nail
aqlavq lavqkhoel nee bhi jel-ail lavq yaoq.
135 Naoq nail maivphaoq khe aqbhaq
naoq nail yaqkav pevq nail ngaq bhai
bhi bhaq lavq khi
naoq nail ya tsao the nail phaq
ngaq bhai cavq lavq cov lavq yaoq.
136 Tsaol-aq yaq juq
naoq nail aolthaq kovqthaq nail haoqnao
maq tsao the nail ngel-i mail
ngaq nail maivbhil laoljaol khe-ai
il dol leevq ail nial.
137 Heeqphaq Miqyail-ol
naol neq, tsaq nail daol nail gaq pevq nail ngaol.
naoq-i mail yalkhaq dal nail phaq iqsanl
tsaq nail ngaol.
138 Naoq nail salkhil neq
aq tsaq aqdaol daol khi
saljial ivq nail ngaol.
139 Ngaq bhai neejiav jiav nail juq
naoq nail daoq bhai maq nal daiq nail ngel-i mail
ngaq bhai neema phail dee dee lal nail ngaol.
140 Naoq nail daoqma saljial neq
laonq daiq nail phaq bhai gaq lai-a nail ngel-i mail
ngal neema thaq tsaol kivq khi
al bhai gaiq-a nail ngaol.
141 Ngal neq, yu-i mail hel daiq theq khi
khul maq tsoiq nail gaq khe-ai pevq khi ngaol-aoq
naoq nail ya tsao the nail phaq bhai
maq nioil peivq ail.
142 Naoq nail tsaq nail daol nail phaq neq
nqmaq maqluv halyeel ivq khi
naoq nail aolthaq kovqthaq iqsanl
khaq mao-ail tsaq nail ngaol.
143 Ngal haq aoq khi
neema cov nail phaq ya daq khi ngaol-aoq
naoq-i mail bivq-ai thaq nail
aoldaoq kovqdaoq neq
ngaq nail neema bhai
lavqkhiq bhi tsail lal-a nail ngaol.
144 Naoq nail salkhil neq
khaq mao iqsanl tsaq nail daol nail ngaol.
Ngaq bhai gov heeq kivq nail phaq bivq lavq yaoq.
Al hai bivq lavq haq neq
ngal aqdoevq ya doevq nail ngaol.
145 Ngal neq, neema lavqkhoel nee
naoq bhai gul nail ngaol.
Heeqphaq Miqyail-ol
ngaq bhai ge kovq lavq yaoq.
Ngal naoq nail ya tsao the nail phaq bhai
tsao the nail ngaol.
146 Ngal naoq bhai gul nail ngaol.
Ngaq bhai hevq kovq lavq yaoq.
Ngal naoq-i mail cavq lavq cov lavq nail phaq bhai
tsao the nail ngaol.
147 "Tsao jao-ai lavq yaoq" dai
ngal nlma maq dov lal-u nee mail
naoq bhai gul khi
naoq nail daoq bhai noeq thunq nail ngaol.
148 Ngal nqkiv phao maq iq thaiq dai
naoq nail saljial bhai saol-nvq pov nail ngaol.
149 Heeqphaq Miqyail-ol, naoq-i mail
gaoq haq goil gaiq-a nail phaq bhai juq khi
ngaq-i mail hal nail aqthel bhai nal daiq lavq yaoq.
Al ovqtavq
naoq-i mail tsaq nail daol nail phaq bhai juq khi
ngaq bhai aqdoevq bhi doevq lavq yaoq.
150 Ngaq bhai khoeq lal jiovq lal nail haqeiv nail juq
aqjail bhai lee thail thaiq nail ngaol.
Aqyu juq neq
naoq nail aolthaq kovqthaq nee
eq ail-a nail juq pevq nail ngaol.
151 Thail hai ngaol-aoq
Heeqphaq Miqyail-ol, naol neq
ngaq nail aqjail bhai jaol nail ngaol.
Naoq-i mail bivq-ai thaq nail
aoldaoq kovqdaoq iqsanl mail
tsaq nail ngaol.
152 Naoq-i mail cavq lavq cov lavq nail phaq neq
nqmaq maqluv halyeel ivq nail ngaol dai
ngal yaqnoil ail jiav-u nee mail
heeq kivq nail ngaol.
153 Ngal naoq nail aolthaq kovqthaq bhai
maq nioil peivq ail.
Al hai dul dai
ngal haq nail aoq nail bhai hel daiq moel khi
bhi jel-ail lavq yaoq.
154 Ngaq nail ganl bhai hel daiq phail khi
ngaq bhai ul kovq lavq yaoq.
Naoq-i mail saljial jaq-ai thaq nail khe-ai
ngaq bhai aqdoevq bhi doevq lavq yaoq.
155 Haq eiv nail tsaol-aq juq neq
naoq nail ya tsao the nail phaq bhai
maq tsao the nail ngel-i mail
hevq kovq nail phaq nee eqyal eq ail-a nail ngaol.
156 Thail hai ngaol-aoq
Heeqphaq Miqyail-ol
naoq-i mail gaoq haq goil gaiq-a nail phaq neq
eeq dee dee nail ngel-i mail
ngaq bhai aqdoevq bhi doevq lavq yaoq.
157 Ngaq bhai neejiav jiav nail juq khi mail
khoeq lal jiovq lal nail juq mao dai jaol nail ngaol.
Thail hai ngaol-aoq
ngal naoq nail salkhil bhai
nieivq thaiq-ai thaq nail ngaol.
158 Saljial maq ivq nail juq bhai
ngal ya moel-u phao, bhe lal ail nial.
Khul khi mail dai ngal-aq
aqyu juq naoq nail daoq bhai
maq nal daiq dai jaol nail ngaol.
159 Heeqphaq Miqyail-ol
ngal naoq nail ya tsao the nail phaq bhai
kha dai gaiq-a nail ngel ail dai
hel daiq lavq yaoq.
Naoq-i mail gaoq haq goil gaiq-a nail phaq
maq phal lal nail ngel-i mail
ngaq bhai aqdoevq bhi doevq lavq yaoq.
160 Naoq nail daoq juq neq
iqsanl mail tsaq khi
aq tsaq aqdaol daol dai
yalkhaq dal nail phaq iqsanl mail
nqmaq maqluv halyeel ivq nail ngaol.
161 Uv thaiq nail juq
khul nail ganl maq jiav nail bhai
ngaq bhai khoeq lal jiovq lal nail ngaol.
Thail hai ngaol-aoq
ngal naoq nail daoq bhai
ev nail lavqkhoel nee nal daiq nail ngaol.
162 Phul duq heel duq moel a nail juq
lavqkhiq tsail nail khe-ai
ngal naoq nail daoq bhaq da nee
lavqkhiq tsail nail ngaol.
163 Ngal neq
goiqbhaoq bhaoq nail phaq iqsanl bhai
bhe khi giq sil nail ngaol.
Thail hai ngaol-aoq
naoq nail aolthaq kovqthaq bhai neq
gaiq-a nail ngaol.
164 Ngal neq
naol aq tsaq aqdaol daol dai
yalkhaq dal-a nail bhaq da nee
teevq n sivq pov naoq bhai tsiq eeq nail ngaol.
165 Naoq nail aolthaq kovqthaq bhai
gaiq-a nail juq neq
eeq dee dee nail nee sal ovq nail phaq ya nail ngaol.
Khul teevq phaq iqsanl, aqyu juq bhai
phaq thiq maq bhi thiq lai nia ail.
166 Heeqphaq Miqyail-ol
naol hevq kovq lee nail bhai
noeq thunq nail lavqkhoel
naoq-i mail bivq-ai thaq nail
aoldaoq kovqdaoq bhai
ngal nal daiq nail ngaol.
167 Ngal naoq-i mail
cavq lavq cov lavq nail bhai nal daiq khi
gaiq-a dee dee nail ngaol.
168 Ngal naoq nail ya tsao the nail phaq khi
salkhil bhai nal daiq nail ngaol.
Ngaq-i mail nl-a nail ganl juq iqsanl bhai
naol heeq nia nail ngaol.
169 Heeqphaq Miqyail-ol
ngal gul nail bhai nal daiq lavq yaoq dei-eiq.
Saljial jaq-ai thaq nail khe-ai
ngaq bhai gov heeq kivq nail phaq bivq lavq yaoq.
170 Ngaq-i mail hal nail
geeqlaoq hal daoq bhai nal daiq khi
saljial jaq-ai thaq nail khe-ai
hevq dov lavq yaoq.
171 Naoq-i mail ya tsao the nail phaq ngaq bhai
cavq lavq cov lavq-a nail ngel-i mail
ngaq nail moeqthaoq naoq bhai tsiq eeq nail ngaol.
172 Naoq-i mail bivq-ai thaq nail
aoldaoq kovqdaoq iqsanl
tsaq nail ngel-i mail
ngaq nail moeqthaoq
naoq nail daoq juq bhai
daoqsel gul khi tsiq eeq nail ngaol.
173 Ngal naoq nail ya tsao the nail phaq bhai
gaiq-a nail ngel-i mail
naoq nail aqlavq nee
ngaq bhai tsao jao-ai lavq yaoq.
174 Heeqphaq Miqyail-ol
ngal neq, naoq-i mail
hevq kovq lavq nail bhai noeq thunq khi
naoq nail aolthaq kovqthaq neq
ngaq bhai lavqkhiq bhi tsail lal nail ngaol.
175 Naoq bhai tsiq eeq kivq dai
ngaq bhai aqdoevq bhi doevq lavq yaoq.
Naoq-i mail yalkhaq dal nail phaq
ngaq bhai tsao jao-ai lavq yaoq dei-eiq.
176 Ngal neq
peivq ail-a nail yaol khe-ai
gailkhaol gail bheeq bheeq ail-a nail ngaol.
Al heel ngel-i mail, yavq kha lee khi
naoq nail yaqkav pevq nail ngaq bhai
hal pov lee yaoq.
Khul khi mail dai ngal-aq, ngal neq
naoq-i mail bivq-ai thaq nail
aoldaoq kovqdaoq bhai
maq nioil peivq ail.