Tsiq eeq 118
Gaq lai-a nail ngel-i mail tsiq eeq nail geeqlaoq hal daoq
1 Heeqphaq Miqyail neq
meeq nail ngel-i mail, aivq bhai tsiq eeq bhel.
Aivq-i mail gaoq haq goil gaiq-a nail phaq neq
nqmaq maqluv halyeel ivq nail ngaol.
2 Ilsaqleiqlav nail tsaol-aq juq iqsanl mail
niail hai gul yaoq:
"Aivq-i mail gaoq haq goil gaiq-a nail phaq neq
nqmaq maqluv halyeel ivq nail ngaol."
3 Aqlonq nail aqjievq liqdee juq
niail hai gul yaoq:
"Aivq-i mail gaoq haq goil gaiq-a nail phaq neq
nqmaq maqluv halyeel ivq nail ngaol."
4 Heeqphaq Miqyail bhai gee sil khi
ev nail juq iqsanl mail
niail hai gul yaoq:
"Aivq-i mail gaoq haq goil gaiq-a nail phaq neq
nqmaq maqluv halyeel ivq nail ngaol."
5 Ngal neq
haq dee aoq dee dee nail phaq kev lee-u phao
Heeqphaq Miqyail bhai gul-a nail ngaol.
Aivq iqsanl ngaq bhai ge kovq lavq khi
bhi jel-ail lavq-a nail ngaol.
6 Heeqphaq Miqyail neq
ngaq-ai nee teevq gaq khe-ai jaol nail ngel-i mail
gee sil duq maq jiav ail.
Tsaol-aq yaq juq ngaq bhai khul nl lal nia nail-aiq.
7 Ngaq bhai tsao jao-ai lavq nail gaq neq
Heeqphaq Miqyail pevq khi
ngaq bhai neejiav jiav nail juq sunq ail nail bhai
ngal ya moel nail ngaol.
8 Tsaol-aq yaq bhai juq nail nee maq tsil
Heeqphaq Miqyail bhai juq nail neq
meeq jaiq nail ngaol.
9 Hevq daiq nail aqivq juq bhai
juq nail nee maq tsil
Heeqphaq Miqyail bhai juq nail neq
meeq jaiq nail ngaol.
10 Ngaq nail teevq jaoq
neejiav jiav nail juq mao dai jaol khi ngaol-aoq
ngal neq, Heeqphaq Miqyail nail aqmil bhai juq khi
aqyu juq bhai lav cov gil bhiq-a nail ngaol.
11 Aqyu juq yaoq phao yaoq-ao nee
ngaq bhai jaol jaoq gil-ai thaq khi ngaol-aoq
ngal neq, Heeqphaq Miqyail nail aqmil bhai juq khi
aqyu juq bhai lav cov gil bhiq-a nail ngaol.
12 Aqyu juq neq
bhaiq tsil juq khe-ai ngal jaol nail bha
munl nee lee khi ngaol-aoq
aq goe goe yal bhai miqjaq-i mail poiv nail khe-ai
lavqtsail mail bhi poiv jaq gil nail ngaol.
Ngal neq
Heeqphaq Miqyail nail aqmil bhai juq khi
aqyu juq bhai lav cov gil bhiq-a nail ngaol.
13 Ngal neq
kav dee dee nail genl dev nail phaq bhai
ya daq khi suq nq ail nail khi mail ngaol-aoq
Heeqphaq Miqyail neq
ngaq bhai hevq kovq lavq nail ngaol.
14 Heeqphaq Miqyail neq
ngaq bhai gaq gaoq bhi kav lal lavq-a nail ngaol.
Aivq ngaq bhai hevq kovq lavq-a nail ngaol.
15 Heeqphaq Miqyail nail tsaol-aq juq neq
yovqgavq nail saiqgov lavqkhoel nee
lavqkhiq tsail nail daoqsel niail hai gul nail ngaol:
"Heeqphaq Miqyail neq
aivq nail lavqmal lavq-i mail
eeq dee dee nail ganl nl-a nail ngaol.
16 Heeqphaq Miqyail nail
bhaqaoq eeq nail lavqmal lavq bavq dil khi
eeq dee dee nail ganl nl-a nail ngaol" dai
gul-a nail ngaol.
17 Ngal maq ya sil dai, aqdoevq doevq-u phao
Heeqphaq Miqyail-i mail nl-a nail ganl juq bhai
ge gaiq bhiq nail ngaol.
18 Heeqphaq Miqyail neq
ngaq bhai aqkav kav dai
saol lavq khi ngaol-aoq
sil nail aqlavq lavqkhoel bhai maq av lavq al.
19 Ngaq nail haqbhoil
uqhuq thaoq nail ilkhaol il ma nail
lolgov phao-ai thaq yaoq.
Ngal aol lai khi
Heeqphaq Miqyail bhai tsiq eeq nail ngaol.
20 Lol gov al neq
Heeqphaq Miqyail nail lolgov pevq khi
tsaq nail daol nail tsaol-aq juq
ya aol lai nail ngaol.
21 Heeqphaq Miqyail-ol, naol neq
ngaq-i mail hal nail daoq bhai ge kovq lavq khi
ngaq bhai gaq lai nail phaq
bivq lavq-a nail ngel-i mail
ngal naoq bhai tsiq eeq nail ngaol.
22 Il khaol cov nail tsaol-aq-i mail
bavq ha-a nail lovmav al heeq
jioivq loiv daoqthaoq bhai kaovq-a nail
lovmav heeq ma pevq lal-a nail ngaol.
23 Ganl al neq
Heeqphaq Miqyail-i mail nl-a nail ganl pevq khi
ngadao juq nail sivtavq bhai
noeq-u maq dov nail phaq pevq nail ngaol.
24 Niil yanqgaol neq
Heeqphaq Miqyail-i mail
gaq lai nail aqn pevq khi
ngadao juq lavqkhiq tsail bhel.
25 Heeqphaq Miqyail-ol
nv juq bhai hevq kovq lavq yaoq.
Heeqphaq Miqyail-ol
nv juq bhai bhi bhao bhi ya lee lavq yaoq.
26 Heeqphaq Miqyail nail aqmil
kov-uvq nee lal nail juq neq
geeqlaoq eeq nail ngaol.
Nv juq neq
Heeqphaq Miqyail nail ilkhaol bhai jaol khi
aivq bhai geeqlaoq bivq nail ngaol.
27 Heeqphaq Miqyail neq, Miqyail pevq khi
nv juq bhai aqbhaq bhaq lavq-a nail ngaol.
Miqyail nail tsaol-aq juq-ol
laol bhiq nail phaq oil lal khi
laolduq nail uqkheel bhai
neeqtsaq-i mail phee thaiq-ai thaq yaoq.
28 Naol neq, ngaq nail Miqyail pevq khi
ngal naoq bhai tsiq eeq nail ngaol.
Naol neq, ngaq nail Miqyail pevq khi
ngal naoq bhai tsiq eeq tsiq heel nail ngaol.
29 Heeqphaq Miqyail neq
meeq nail ngel-i mail, aivq bhai tsiq eeq bhel.
Aivq-i mail gaoq haq goil gaiq-a nail phaq neq
nqmaq maqluv halyeel ivq nail ngaol.