Tsiq eeq 109
Haq nail aoq nail phaq bhai ya daq-a nail teevq gaq nail geeqlaoq hal daoq
1 Miqyail-ol
ngal naoq bhai tsiq eeq nail ngaol.
Aq tsi tsu dai, thaq jaol lavq.
2 Haq eiv nail tsaol-aq juq khi
goiqbhaoq bhaoq nail tsaol-aq juq neq
ngaq bhai khal ge movq ail ge lal nail ngaol.
Aqyu juq neq, ngaq nail ganl bhai
goiqbhaoq bhaoq nail daoq ge nail ngaol.
3 Aqyu juq neq
ngaq nail ganl haqeiv nail phaq ge khi
khul nail ganl maq jiav nail bhai
daoq doil ge thail thaiq nail ngaol.
4 Ngal aqyu juq nail haqbhoil
gaiq-a nail phaq nl bhiq khi
geeqlaoq hal tsao bhiq khi ngaol-aoq
aqyu juq ngaq bhai daoq doil ge lal nail ngaol.
5 Aqyu juq neq
ngaq-i mail nl nail aqmeeq phaq bhai
aqdoil phaq bivq kovq lavq khi
gaiq-a nail phaq bhai bhe nail phaq
gaoq bivq kovq lavq-a nail ngaol.
6 Ngaq bhai neejiav jiav nail gaq bhai
yalkhaq dal bhiq nail gaq tsel dov lavq yaoq.
Al ovqtavq
aivq bhai neejiav jiav nail teevq gaq
aivq bhai oeqbal bhi thaq yaoq.
7 Aivq bhai aqmeeq-ai tsao tsel khi
oeqbal bhi dov lal yaoq.
Aivq-i mail geeqlaoq hal nail phaq iqsanl
oeqbal nl nail phaq bhi pevq ail yaoq.
8 Aivq nail doevqyeel
lavqtsail mail ya gil lai khi
aivq nail jaol duq iqsanl
yu teevq gaq bhai bivq dei-eiq.
9 Aivq nail yaqmiq yaqyov juq
aqbhu maq jaol nail yaq bhi pevq ail khi
aivq nail khaqma iqsanl
miqtsiq miqma bhi pevq ail dei-eiq.
10 Aivq nail yaqmiq yaqyov juq neq
ilkhaol maq bhao dai aoq yav hal yaq pevq ail khi
yovqgavq-i mail jaol nail ilkhaol aq peiv aq leiv nee
bhi the dov dei-eiq.
11 Aivq-i mail gail jiov bavq nail juq neq
aivq nail phul heel ildaoq maoqgaiq iqsanl mail
tsai dov gil bhiq khi, daq-i juq neq
aivq-i mail khal nl dov-ai thaq nail iqsanl
oil gil bhiq dei-eiq.
12 Teevq thal-iq aivq bhai gaoq haq nail gaq khi
aqbhu maq bhao nail aivq nail yaq juq bhai
hel daiq phail bhiq nail gaq thaq bhi jaol dei-eiq.
13 Aivq nail jeq-e peivq ail boev ail dei-eiq.
Aivq nail aqmil iqsanl
aivq nee mail yavq kha lee thaq nail yaq juq bhai
kev lee-u phao neq
peivq ail boev ail dei-eiq.
14 Aivq nail aqbhal juq-i mail
nl-a nail haqeiv nail ganl juq bhai
Heeqphaq Miqyail noeq kev noeq moel dei-eiq.
Aivq nail aqma nail oeqbal bhai iqsanl
thaq phaiq bhiq dei-eiq.
15 Heeqphaq Miqyail oeqbal al juq bhai
khaq mao iqsanl noeq kev
noeq moel bhiq yaoq dei-eiq.
Aivq nail aqmil miltsaq nee
bhi peivq ceiv ceiv ail dei-eiq.
16 Khul khi mail dai ngal-aq, aivq neq
teevq thal-iq gaoq haq gaiq-a nail neema
maq aol lal bhiq ail.
Haq nail aoq nail juq, neema cov nail juq
gaq hal duq maq jiav nail juq bhai
khoeq heivq bhiq nail ngaol.
17 Aivq neq
ivqkhail yavq nail bhai ya lai nail khe-ai
aivq nail aqmaol iqsanl
ivqkhail yavq nail bhai ya daq dei-eiq.
Aivq yu bhai
geeqlaoq bivq nail neema maq aol nail khe-ai
teevq gaq iqsanl aivq bhai
geeqlaoq thaq bivq dei-eiq.
18 Iq khail yavq nail phaq neq
aqgaq aqdoi doi nail khe-ai
aivq doi-nq thaq nail ngaol.
Aivq-i nail ivqkhail yavq nail phaq neq
ulcuvq khe-ai
aivq nail aqmaol lavqkhoel bhai maqkhaiq
aqtseel khe-ai
aivq nail haqeeq lavqkhoel bhai maqkhaiq
il bhoel-aivq bhiq-a nail ngaol.
19 Al hai ivqkhail yavq nail phaq
aqgaq aqdoi khe-ai
aivq bhai doi tsoiq khi
jiovqpavq khe-ai, khaq mao iqsanl
aivq bhai pavq thaiq-ai thaq dei-eiq.
20 Heeqphaq Miqyail-ol
ngaq nail ganl aqdoil ge nail
ngaq bhai neejiav jiav nail juq bhai
al hai nl kovq bhiq yaoq.
21 Thail hai ngaol-aoq
ngaq nail Heeqphaq Miqyail-ol
naoq nail aqmil bhai juq khi
ngaq bhai tsao jao-ai lavq yaoq.
Naoq-i mail
gaoq haq goil gaiq-a nia nail phaq bhai juq khi
ngaq bhai hevq kovq lavq yaoq.
22 Khul khi mail dai ngal-aq, ngal neq
haq nail aoq nail gaq hal duq
maq jiav nail tsaol-aq ngaol.
Neema bhai iqsanl nal nail ngaol.
23 Ngal neq, kivqhail lail ma khe aq haiq khe-ai
peivq ail nail kev lal-aoq nail ngaol.
Noelbhoel juq khe-ai
lilmoel-i mail bhoe jal-aivq lavq aiq nial.
24 Maq ya jaq nail ngel-i mail
ngaq nail peevqceevq aqjuq juq lal-aoq nail ngaol.
Ngaq nail aqmaol iqsanl
haqeeq khi mail bavkov taivq-ail covq nail ngaol.
25 Tsaol-aq yaq juq ngaq bhai moel-u phao
meel naq meel naq ail uqhuq jiivq nail ngaol.
26 Ngaq nail Heeqphaq Miqyail-ol
ngaq bhai tsao jao-ai lavq yaoq.
Naoq-i mail gaoq haq gaiq-a nail phaq bhai juq khi
ngaq bhai hevq kovq lavq yaoq.
27 Heeqphaq Miqyail-ol
naol ngaq bhai hevq kovq lavq nail ganl
aqyu juq bhai bhi heeq nia yaoq.
28 Aqyu juq neq
ngaq bhai ivqkhail yavq khi ngaol-aoq
naol neq, ngaq bhai geeqlaoq bivq lavq nail ngaol.
Ngaq bhai genl dev lal nail juq neq
bhi haq sil ail dei-eiq.
Thail hai ngaol-aoq
naoq nail yaqkav pevq nail ngaq bhai neq
lavqkhiq bhi tsail lavq dei-eiq.
29 Ngaq bhai neejiav jiav nail juq neq
haq sil phaq aqgaq aqdoi khe-ai ya doi dei-eiq.
Aqyu juq neq
seiqleiq khaoqsail maq jiav nail phaq bhai
phailkhaoq heel ma doi nail khe-ai, ya doi dei-eiq.
30 Ngal Heeqphaq Miqyail bhai
"Geeq laoq eeq naol dei-eiq" dai
khaq mao iqsanl gul nail ngaol.
Tsaol-aq munl munl ma nail gaol tsi-ai
aivq bhai tsiq eeq nail ngaol.
31 Khul khi mail dai ngal-aq, aivq neq
haq nail aoq nail juq nail aqjail bhai thul phaol khi
aqyu juq bhai
yalkhaq dal-ai thaq nail juq nail
aqlavq lavqkhoel nee
hevq kovq bhiq nail ngaol.