Tsiq eeq 108
Gaq lai nail haqbhoil hal nail geeqlaoq hal daoq
1 Miqyail-ol
ngaq nail neema ivq dao dai jiav nail ngaol.
Ngal daoqsel gul khi naoq bhai tsiq eeq nail ngaol.
Ngaq nail neema-ol, noeq lal yaoq.
2 Ngaq nail dil-nvq
heeq ma heeq yaq juq-ol, noeq lal yaoq.
Ngal nlma bhai bhi noeq lal naol.
3 Heeqphaq Miqyail-ol
tsaol-aq yaq juq nail gaoltsi bhai
ngal naoq-ai tsiq eeq nail ngaol.
Al ovqtavq
jeq-e jaq-a juq nail gaoltsi bhai iqsanl
ngal naoq bhai daoqsel gul khi tsiq eeq nail ngaol.
4 Khul khi mail dai ngal-aq
naoq-i mail gaoq haq goil gaiq-a nail phaq neq
nqtavq kovtavq nee jaiq dai maqkhaiq
naoq-i mail saljial ivq nail phaq neq
nqdil bha kev dai maqkhaiq, kev nail ngaol.
5 Miqyail-ol, naol neq
nqtavq kovtavq moe nail nee maq tsil
eeq jaiq heel jaiq nail ngaol.
Naoq nail seiqleiq khaoqsail
miltsaq teevq heeq heeq lao bhai
bhi bhaq lee dei-eiq.
6 Naol gaiq-a nail tsaol-aq juq
hevq kovq nail phaq ya dai
nv juq-i mail hal nail daoq bhai nal daiq lavq khi
naoq nail lavqmal lavq nail bhaqaoq nee
nv juq bhai hevq kovq lavq yaoq.
7 Miqyail neq
aivq nail meeq nail haol nail
jaol duq bhai jaol khi
niail hai ge-ai thaq nail ngaol:
"Ngaq nail tsaol-aq juq bhai
Seiq khunq meenq
ngal lavqkhiq teevq tsail bhoil bhiq khi
Sulkov daikhaoq aqsal iqsanl
tsa daiq khi bhoil bhiq naol.
8 Gil lav milkhaoq ngaq nail ngaol.
Maqnaqseiq milkhaoq iqsanl ngaq nail ngaol.
Eil phaq leiq mil khaoq
ngaq nail genl dev nail uq tsaoq pevq khi
Yuldav milkhaoq neq
ngaq-i mail nieivq thaiq-ai thaq nail
heeqphaq nail heel joiqniaoq pevq nail ngaol.
9 Thail hai ngaol-aoq
Maolbav milkhaoq neq
ngal aqmaol jiivq nail
thailphail phail ma khe-ai yuq naol.
Eiqdonq milkhaoq bhai
ngaq nail saiqnaov tsaoq thaq khi
Pilliltiv milkhaoq bhai iqsanl
ngal gaq lai-a nail ganl
bhaq laoq kheq dai gul naol" dai
ge-ai thaq nail ngaol.
10 Miqyail-ol
ivq dao dai, kaovq ivq-ai thaq nail meenq bhai
khaq sil gaq ngaq bhai hel aivq lavq nail-aiq.
Eiqdonq milkhaoq bhai
khaq sil gaq ngaq bhai hel aivq lavq nail-aiq.
11 Naol nv juq bhai
maldil khaonq ha-aoq naol laiq.
Nv juq nail genl dev munl munl ma nee mail
genl dev nail bha naol maq lee yaoq-aol laiq.
12 Nee jiav jiav nail juq bhai
nv juq genl dev gaq kivq dai
tsao jao-ai lavq yaoq.
13 Miqyail nv juq nee mail jaol haq neq
nv juq gaq lai nail ngaol.
Nee jiav jiav nail juq bhai
aivq genl dev gaq nail ngaol.