Tsiq eeq 107
Tsiq eeq nail haoqgavq ngaq pav teevq pav 107-150
Heeqphaq Miqyail meeq nail bhai tsiq eeq nail ganl
1 Heeqphaq Miqyail neq
meeq nail ngel-i mail, aivq bhai tsiq eeq bhel.
Aivq-i mail gaoq haq goil gaiq-a nail phaq neq
nqmaq maqluv halyeel ivq nail ngaol.
2-3 Nee jiav jiav nail juq nail aqlavq lavqkhoel nee
Heeqphaq Miqyail-i mail ul kovq dov lavq khi
nlma dov khoeq ga khoeq lavqtsel lavqmal phao jaol nail
yu nail jeq-e jaq-a nail lavqkhoel nee
tsel dov bhiq-a nail bhai ya daq-a nail juq
al nail ganl bhai ge dov yaoq.
4 Teevq pav ga nav juq
gailkhaol maq jiav nail haqaiq mildai bhai
tsao tsao ail jaol nail ngaol.
Aqyu juq neq, yovqgavq jaol lai nail haqbhoil
meenq teevq meenq bhai iqsanl
maq hal pov moel nia ail.
5 Aqyu juq neq
moevq nail sivq nail bhai ya daq khi
gaq teevq peivq ail maq aol dai
pevq ail-a nail ngaol.
6 Aqyu juq bhai
al hai haq nail aoq nail phaq kev lee khi
Heeqphaq Miqyail bhai
"Tsao jao-ai lavq yaoq" dai, gul-u phao
aivq aqyu juq bhai haq nail aoq nail lavqkhoel nee
hevq dov bhiq-a nail ngaol.
7 Aivq neq
aqyu juq ya jaol lai nail meenq bhai
gailkhaol teevq lao tsaoq hevq daiq
jaol bhiq-a nail ngaol.
8 Aqyu juq
Heeqphaq Miqyail bhai tsiq eeq dei-eiq.
Khul khi mail dai ngal-aq
aivq aqyu juq bhai
gaoq haq goil gaiq-a bhiq khi
noeq-u maq dov nail ganl juq
nl daiq bhiq-a nail ngaol.
9 Aivq neq, ulcuvq moevq nail juq bhai
ulcuvq bhi daol bov nail ngaol.
Moevq nail sivq nail juq bhai iqsanl
aqmeeq phaq teevq bov bhi jaq nail ngaol.
10 Teevq pav ga nav juq neq
nav tsee deel jaol duq bhai jaol khi
hail cav-i mail
bhi phee thaiq-ai thaq nail lavqkhoel nee
haq nail aoq nail bhai ya daq-a nail ngaol.
11 Khul khi mail dai ngal-aq, aqyu juq neq
Heeqphaq Miqyail nail daoq bhai
maq nal daiq dai
eeq dee heel dee dee nail gaq-i mail
aqyu juq nail haqbhoil
lainq-ai thaq nail phaq bhai
hel daiq theq-a nail ngel-i mail ngaol.
12 Al heel ngel-i mail, aivq aqyu juq bhai
ganl aqkav bhi nl dee dee-a nail ngaol.
Ga tsuq ail khi ngaol-aoq
aqyu juq bhai teevq gaq ail
he thul bhiq nail gaq maq jaol ail.
13 Aqyu juq bhai
al hai haq nail aoq nail phaq kev lee khi
Heeqphaq Miqyail bhai
"Tsao jao-ai lavq yaoq" dai, gul-u phao
aivq aqyu juq bhai haq nail aoq nail lavqkhoel nee
hevq dov bhiq-a nail ngaol.
14 Aivq neq, aqyu juq bhai
nav tsee deel jaol duq nail lavqkhoel nee
hevq dol lavq bhiq khi, aqyu juq bhai
phee thaiq-ai thaq nail hail cav juq bhai
he ceiv he leiv bhiq-a nail ngaol.
15 Aqyu juq
Heeqphaq Miqyail bhai tsiq eeq dei-eiq.
Khul khi mail dai ngal-aq
aivq aqyu juq bhai
gaoq haq goil gaiq-a bhiq khi
noeq-u maq dov nail ganl juq
nl daiq bhiq-a nail ngaol.
16 Aivq neq
giqheel nail lolgov bhai ngaoq khoi khi
hail cav juq bhai he ceiv he leiv bhiq-a nail ngaol.
17 Teevq pav ga nav juq neq
yaq jaoq khaq lal miq thoi juq pevq nail ngel-i mail
Miqyail bhai lav tsoiq-a nail ngaol.
Aqyu juq, yovqgavq-i mail nl-a nail
oeqbal bhaq da nee
haq nail aoq nail phaq bhai ya daq-a nail ngaol.
18 Aqyu juq neq
jaq nail daol nail phaq bhai
hel daiq movq nail neema maq aol dai
sil nail lolgov aqjail bhai kev ail-a nail ngaol.
19 Aqyu juq bhai
al hai haq nail aoq nail phaq kev lee khi
Heeqphaq Miqyail bhai
"Tsao jao-ai lavq yaoq" dai, gul-u phao
aivq aqyu juq bhai haq nail aoq nail lavqkhoel nee
hevq dov bhiq-a nail ngaol.
20 Aivq neq
daoq bivq nail lavqkhoel nee
aqyu juq nail nalgoel bhi meeq lai khi
luqdaol bhai maq ya aol ail dai
hevq dov bhiq-a nail ngaol.
21 Aqyu juq
Heeqphaq Miqyail bhai tsiq eeq dei-eiq.
Khul khi mail dai ngal-aq
aivq aqyu juq bhai
gaoq haq goil gaiq-a bhiq khi
noeq-u maq dov nail ganl juq
nl daiq bhiq-a nail ngaol.
22 Aqyu juq
geeqlaoq eeq nail laol bhiq nail phaq laol bhiq khi
aivq-i mail nl-a nail ganl juq bhai
lavqkhiq tsail nail lavqkhoel nee
daoqsel gul dei-eiq.
23 Teevq pav ga nav juq neq
iqyaq iqma bhai laovq jeeq khi
a phao nia phao ya jaq ya daol dai
ganl nl jaq keivq daol nail ngaol.
24 Aqyu juq
Heeqphaq Miqyail-i mail
nl-ai thaq nail ganl juq khi
iqyaq iqma nail kovtavq bhai
noeq-u maq dov nail ganl juq bhai iqsanl
ya moel-a nail ngaol.
25 Aivq daoq bivq-u phao
lilmoel lil ma juq bhoe lal khi
eel khaol juq thaoq lal-a nail ngaol.
26 Laovq juq neq
lilmoel-i mail bhi tsiq dil khi
ulcuvq aqnavq bhai bhi ga nevq ail nail ngaol.
Aqyu juq, al hai sil nail phaq bhai ya moel-u phao
gee sil dee dee lal bhiq khi
gaq teevq peivq ail maq aol dai
pevq ail-a nail ngaol.
27 Aqyu juq neq
jil pheeq bov nail tsaol-aq juq khe-ai
ga tsuq ail-a nail ngaol.
Aqyu juq-i mail heeq nia nail phaq iqsanl
aqnieivq teevq-eel ngaol.
28 Aqyu juq bhai
al hai haq nail aoq nail phaq kev lee khi
Heeqphaq Miqyail bhai
"Tsao jao-ai lavq yaoq" dai, gul-u phao
aivq aqyu juq bhai haq nail aoq nail lavqkhoel nee
hevq dov bhiq-a nail ngaol.
29 Aivq neq
nqjaiq lilmoel juq bhai bhi naq lai khi
eel khaol juq bhai neq, hee tsul dai
bhi pevq ail-a nail ngaol.
30 Al hai lilmoel juq naq lai-a nail ngel-i mail
aqyu juq lavqkhiq tsail nail ngaol.
Aivq neq
aqyu juq-i mail ail movq nail meenq bhai
hel daiq phail khi hevq kev bhiq-a nail ngaol.
31 Aqyu juq
Heeqphaq Miqyail bhai tsiq eeq dei-eiq.
Khul khi mail dai ngal-aq
aivq aqyu juq bhai
gaoq haq goil gaiq-a bhiq khi
noeq-u maq dov nail ganl juq
nl daiq bhiq-a nail ngaol.
32 Aqyu juq neq
tsaol-aq yaq juq jil lai duq bhai maqkhaiq
aqivq aqtsu juq maoq bhaoq nl duq bhai maqkhaiq
aivq bhai tsiq eeq tsiq heel dei-eiq.
33-34 Milkhaoq yaq juq
haqeiv nail bhaq da nee
Heeqphaq Miqyail neq
laoljaol juq bhai gee lee del dai
bhi pevq ail khi
ulcuvq laol bev bhai iqsanl
phee thaiq bhiq-a nail nee ovqtavq
miltsaq mil meeq bhai
ganl maq tsoiq nail miltsaq
cavq devq bhi pevq ail dai
lav phal bhiq-a nail ngaol.
35 Thail hai ngaol-aoq
aivq neq, tsalhail dai kav bhai
Ngaq kha juq bhi dov lal khi
aqgee aq daoq daoq nail jaol duq bhai iqsanl
ulcuvq eel bev bhi dov lal-a nail ngaol.
36 Jaol duq al juq bhai
moevq nail sivq nail juq bhi jaol-a nail ngaol.
Aqyu juq iqsanl
yovqgavq jaol nail meenq cov-a nail ngaol.
37 Aqyu juq neq, yal gaol nl jaq khi
aqheeq tsilju nail aqbhaol kha-a nail nee ovqtavq
aqheeq allu juq mao dai ya-a nail ngaol.
38 Heeqphaq Miqyail neq
aivq nail tsaol-aq juq bhai
geeqlaoq bivq-a nail ngel-i mail
yaqmiq yaqyov juq mao gao lal khi
aqyu juq nail niaoqnel juq bhai iqsanl
maq bhi theq ail dai
hel daiq phail bhiq-a nail ngaol.
39 Aivq nail tsaol-aq juq neq
bhi khoeq bhi jiovq khi
haq nail aoq nail bhaq da nee
sunq ail khi ya haq sil-u phao
40 aivq neq
al hai khoeq bhiq jiovq bhiq nail
aqivq juq bhai bhe khi
gailkhaol maq jiav nail
tsalhail dai kav bhai
bhi tsao ail nail ngaol.
41 Thail hai ngaol-aoq, aivq neq
haq nail aoq nail juq bhai hevq kovq khi
aqyu juq nail ildaoq bhai yaol juq khe-ai
bhi mao lal-a nail ngaol.
42 Daol coev dai doevq nail tsaol-aq juq neq
al hai ya moel-u phao, lavqkhiq tsail nail ngaol.
Thailhai ngaol-aoq
haqeiv nail tsaol-aq juq neq
moeqthaoq phee thaiq khi ya jaol nail ngaol.
43 Nee noeq nee kha aol nail juq neq
ganl al juq bhai
neema lavqkhoel bhai oil bhoel khi
Heeqphaq Miqyail-i mail
gaoq haq goil gaiq-a nail phaq bhai
saol-nvq dei-eiq.