Tsiq eeq 106
Heeqphaq Miqyail aivq nail tsaol-aq juq nail kovtavq bhai meeq nail ngaol
1 Haq leiq lul yaq.
Heeqphaq Miqyail neq
meeq nail ngel-i mail
aivq bhai tsiq eeq bhel.
Aivq-i mail gaoq haq goil gaiq-a nail phaq neq
nqmaq maqluv halyeel ivq nail ngaol.
2 Khaq sil gaq aivq-i mail nl-a nail
bhaqaoq eeq nail ganl juq bhai
ge dov gil nia nail-aiq.
Khaq sil gaq neq, aivq pevq nail bhai geel-nvq dai
tsiq eeq gil nia nail-aiq.
3 Daol coev dai doevq khi
aq tsaq aqdaol daol dai
khaq mao iqsanl nl nail haq nail juq neq
geeqlaoq eeq nail ngaol.
4 Heeqphaq Miqyail-ol
naoq nail tsaol-aq juq bhai
gaoq haq gaiq-a bhiq-u phao
ngaq bhai iqsanl, noeq kev lavq yaoq.
Aqyu juq bhai hevq kovq bhiq-u phao
ngaq bhai iqsanl, tsao jao-ai lavq yaoq.
5 Naoq-i mail tsel dov-ai thaq nail juq
bhao lee ya lee nail bhai bhi moel lavq yaoq.
Naoq nail tsaol-aq juq lavqkhiq tsail nail bhai
teevq gaq khe-ai, bhi tsail lavq yaoq.
Al ovqtavq, naoq nail jaiq bhoil ovq nail juq nee
teevq gaq khe-ai naoq bhai bhi tsiq eeq lavq yaoq.
6 Nv juq neq
aqphiq aqbhal juq khe-ai oeqbal nl khi
haqeiv nail phaq iqsanl nl-a nail ngaol.
7 Nv juq nail aqphiq aqbhal juq neq
Iljiltuv milkhaoq bhai
Heeqphaq Miqyail-i mail nl-a nail
noeq-u maq dov nail phaq bhai
maq gov heeq nia ail.
Aqyu juq bhai mao dai pov bhi moel-a nail
gaoq haq goil gaiq-a nail phaq bhai
nioil peivq-a nail ngaol.
Al ovqtavq
iqyaq iqma aqnel nail aqjail-ai
aivq bhai lav tsoiq-a nail ngaol.
8 Thail hai ngaol-aoq, aivq neq
aivq nail bhaqaoq bhi dov lal nail haqbhoil
aivq nail aqmil bhai juq khi
aqyu juq bhai hevq kovq bhiq-a nail ngaol.
9 Aivq neq
iqyaq iqma aqnel bhai khaq bhiq-u phao
gee lee del dai, gee lai-a nail ngaol.
A bhai nee ngal-aq
aivq nail tsaol-aq juq bhai
gee lee del deel iqyaq iqma bhai
ya ail ceiv dai, hel daiq bhiq-a nail ngaol.
10 Aivq neq
aqyu juq bhai bhe nail juq nail
aqlavq lavqkhoel nee
hevq kovq bhiq khi
neejiav jiav nail juq nail
aqlavq lavqkhoel nee iqsanl
ul kovq bhiq-a nail ngaol.
11 Aqyu juq bhai neejiav jiav nail juq neq
ulcuvq bhai deq pheeq heivq gil-a nail ngaol.
Teevq gaq iqsanl maq jel ail-al.
12 Aq-u phao
aivq nail tsaol-aq juq neq
daoqma saljial bhai
neema thaq tsaol nail nee ovqtavq
aivq bhai tsiq eeq tsiq heel khi
daoqsel gul-a nail ngaol.
13 Thail hai ngaol-aoq
aqyu juq aivq-i mail nl-a nail ganl juq bhai
lavqtsail mail nioil peivq khi
aivq-i mail ge nail bhai
maq daonq dai jaol-a nail ngaol.
14 Aqyu juq haqtsoiq haqyal bhai jaol-u phao
yovq gaq nail neekhaol teevq sil nl khi
Miqyail bhai laonq daiq-a nail ngaol.
15 Al heel ngel-i mail
aivq aqyu juq-i mail hal nail phaq bivq-a nail ngaol.
Thail hai ngaol-aoq
aqyu juq bhai niaoq lal nia nail nalgoel
bhi nal lai-a nail ngaol.
16 Tsal hail dai kav khe
gaq naq yavq tsoel juq bhai
aqyu juq Maolseiq bhai maqkhaiq
Heeqphaq Miqyail nail
meeq nail haol nail yaqkav
Aqlonq bhai maqkhaiq
neekhaol maq sil dai, daoq govq dov-a nail ngaol.
17 Aq-u phao, miltsaq gaol pav lal khi
Daq taq bhai maqkhaiq
Aqbhil lanq khi aivq nail munl juq bhai maqkhaiq
moevq bhoel-a nail ngaol.
18 Miqjaq neq
aqyu juq nail haoqnao the thail thaiq nail
haqeiv nail juq nail kovtavq bhai ga dav khi
poiv ha gil-a nail ngaol.
19 Ilsaqleiqlav nail tsaol-aq juq neq
Silnaq gaoqjaoq nail aqjail bhai heel nee mail
niaoqnel niaoq yaq nail maolkhoel teivq khi
uqhuq thaoq-a nail ngaol.
20 Aqyu juq neq
Miqyail nail seiqleiq khaoqsail bhai
moeqgaq jaq nail niaoqnel nail maolkhoel nee
phal-a nail ngaol.
21 Iljiltuv milkhaoq bhai
eeq dee dee nail ganl nl khi
aqyu juq bhai
hevq kovq bhiq-a nail Miqyail bhai
nioil peivq-a nail ngaol.
22 Iljiltuv milkhaoq bhai khi
iqyaq iqma aqnel bhai
aivq-i mail nl-a nail ganl juq neq
noeq-u maq dov nail ganl juq pevq nail ngaol.
23 Al heel ngel-i mail, Heeqphaq Miqyail neq
aivq nail tsaol-aq juq bhai lav cov gil naol dai
ge bhiq-a nail ngaol.
Thail hai ngaol-aoq
aivq-i mail tsel dov-ai thaq nail
yaqkav Maolseiq neq
aivq nail sivtavq bhai jaol khi
thaoq hal-a nail ngel-i mail
neema phail khi ngaol-aoq
aqyu juq bhai maq lav cov bhiq-al.
24 Aq-u phao, aqyu juq
hel daiq meeq nail Khaqnanq milkhaoq bhai
hel daiq theq-a nail ngaol.
Khul khi mail dai ngal-aq
aqyu juq Heeqphaq Miqyail nail daoqma saljial bhai
neema maq thaq tsaol nail ngel-i mail ngaol.
25 Aqyu juq neq
yovqgavq nail gaq naq yavq tsoel
lavqkhoel bhai jaol khi
daoq govq dov-a nail ngaol.
Heeqphaq Miqyail nail daoq bhai maq nal daiq-al.
26-27 Al heel ngel-i mail, aivq neq
aqyu juq bhai saljial niail hai jaq-a nail ngaol.
Tsal hail dai kav bhai
bhi sil naol dai maqkhaiq
aqyu juq nee mail
yavq kha lee thaq nail yaq juq bhai
yu nail jeq-e jaq-a juq jaol nail bha
bhi peivq ail gil dai maqkhaiq
jaq-a nail ngaol.
28 A bhai nee ngal-aq, aqphiq aqbhal al juq
Bhaqlal dai mil-ai thaq nail
thaoq phaoq aqma maolkhoel-ai
Peiqoqlav gaoqjaoq bhai uqhuq thaoq khi
aqdoevq maq doevq nail miqyail juq bhai
laol bhiq sail bhiq-a nail phaq jaq-a nail ngaol.
29 Aqyu juq al hai nl-a nail bhaq da nee
Heeqphaq Miqyail neema phail lal khi
niaoq lal nail nalgoel bhi nal lai-a nail ngaol.
30 Thail hai ngaol-aoq, Phil naq hal thul khi
oeqbal nl-a nail juq bhai yalkhaq dal-u phao
nalgoel meeq lai-a nail ngaol.
31 Aivq-i mail nl-a nail bhaq da nee
tsaq nail daol nail gaq ngaol dai
tsaol-aq yaq juq, teevq yeel nee teevq yeel
khaq mao iqsanl noeq kev nail ngaol.
32 Aq phiq aqbhal juq neq
Meiq lil bhaq laoljaol aqjail bhai
Heeqphaq Miqyail bhai
neema gaoq phail lal dai, nl-a nail ngaol.
Aqyu juq bhaq da nee
Maolseiq haq nail aoq nail bhai ya daq-a nail ngaol.
33 Aqyu juq Maolseiq bhai
neema nal dee dee lal bhiq heeq phaq-ail
nl bhiq-a nail ngel-i mail
aivq maq saol-nvq dai, daoq ge-a nail ngaol.
34 Aqyu juq neq
Khaqnanq milkhaoq khe
jeq-e jaq-a juq bhai lav cov yaoq dai
Heeqphaq Miqyail-i mail
khoel nail khe-ai, maq nl al.
35 Thail hai ngaol-aoq
a bhai khe jaol nail tsaol-aq juq nee mail
hevq pheel maol pheel jaq khi
aqyu juq nail aolsaolkovq nail
haoqnao tsao the-a nail ngaol.
36 Aqyu juq neq, yu nail jeq-e jaq-a nail
thaoq phaoq aqma maolkhoel juq bhai
uqhuq thaoq nail ngel-i mail
lavq phee bhai phee lai-a nail khe-ai
phee gil lai-a nail ngaol.
37 Aqyu juq neq
yovqgavq nail yaqmiq yaqyov juq bhai
laol bhiq nail jaiqyaq khe-ai
neivq bhai laol bhiq-a nail ngaol.
38 Aqyu juq neq
yovqgavq nail yaqmiq yaq yov
oeqbal maq aol nail juq bhai
aqsivq heivq dov khi
Khaqnanq milkhaoq khe
thaoq phaoq aqma maolkhoel juq bhai
laol bhiq-a nail ngaol.
Aq sivq al bhaq da nee
milkhaoq bhai bhi jiivq bhi cavq lal-a nail ngaol.
39 Al hai nl-a nail bhaq da nee
yovqgavq bhai yovqgavq lav jiivq lav cavq khi
Heeqphaq Miqyail nail sivtavq bhai
mai maq lal khe-ai dul nail ngaol.
40 Al heel ngel-i mail, Heeqphaq Miqyail neq
aivq nail tsaol-aq juq bhai neema phail khi
aivq nail jaiq bhoil ovq nail juq bhai
bhe-a nail ngaol.
41 Aivq neq, aqyu juq bhai
yu nail jeq-e jaq-a juq nail
aqlavq lavqkhoel bhai khaonq ha bhiq khi
neejiav jiav nail juq-i mail bhi uv thaiq-a nail ngaol.
42 Aqyu juq neq
neejiav jiav nail juq-i mail
bhi khoeq bhi jiovq khi
aqyu juq-i mail uv thaiq nail kov-uvq bhai
ya jaol-a nail ngaol.
43 Heeqphaq Miqyail neq
aqyu juq bhai mao dai pov
hevq kovq bhiq khi ngaol-aoq
aqyu juq neq
aivq bhai khaq mao iqsanl lav tsoiq-a nail ngaol.
Al ovqtavq, aqyu juq nail oeqbal bhaq da nee
luq ail seil ail-a nail ngaol.
44 Thail hai ngaol-aoq
aqyu juq gul-u phao, aivq gaiq khi
aqyu juq-i mail haq nail aoq nail phaq bhaq da nee
aqyu juq bhai gaoq haq bhiq-a nail ngaol.
45 Aivq neq
aqyu juq nail haqbhoil saol-nvq khi
daoqma saljial bhai
noeq kev noeq moel-a nail ngaol.
Aivq-i mail gaoq haq goil gaiq-a nail bhaq da nee
neema phail nail phaq peivq ail-a nail ngaol.
46 Aqyu juq bhai
nieivq-ai thaq nail juq nail neema bhai
gaoq haq gaiq-a nail neema
oil bhoel bhiq-a nail ngaol.
47 Nv juq nail Heeqphaq Miqyail-ol
nv juq bhai hevq kovq lavq yaoq.
Naoq nail meeq nail haol nail aqmil bhai
tsiq eeq kivq dai maqkhaiq
naoq bhai neema eeq kivq dai maqkhaiq
nv juq bhai
yu nail jeq-e jaq-a juq nail lavqkhoel nee
tsel dov lavq yaoq.
48 Ilsaqleiqlav nail Heeqphaq Miqyail bhai
yanqgaol nee nqmaq maqluv halyeel
tsiq eeq bhel.
Tsaol-aq yaq juq iqsanl mail
"Aq miq" dai, ge dei-eiq.
Haq leiq lul yaq.