Tsiq eeq 105
Heeqphaq Miqyail khi mail aivq nail tsaol-aq juq
1 Heeqphaq Miqyail bhai tsiq eeq yaoq.
Aivq nail aqmil bhai gul yaoq.
Aivq-i mail nl-a hal-a nail ganl juq
jeq-e jaq-a juq iqsanl bhai ge gaiq bhiq yaoq.
2 Aivq bhai daoqsel gul yaoq.
Daoqsel gul khi aivq bhai tsiq eeq yaoq.
Aivq-i mail nl-a nail
noeq-u maq dov nail ganl iqsanl mail
ge gaiq bhiq yaoq.
3 Aivq nail meeq nail haol nail aqmil bhai
neema eeq yaoq.
Heeqphaq Miqyail bhai hal pov nail juq-ol
lavqkhiq tsail yaoq.
4 Heeqphaq Miqyail khi
aivq nail bhaqaoq bhai hal pov yaoq.
Aivq nail sivtavq bhai
khaq mao iqsanl jaol yaoq.
5-6 Miqyail nail yaqkav pevq nail
Aqbhaqlaqhaq nee mail
yavq kha lee thaq nail yaq juq-ol
aivq-i mail tsel dov-a nail
Yaqkov nail aqjievq liqdee juq-ol
aivq-i mail nl daiq lavq-a nail
noeq-u maq dov nail ganl bhai maqkhaiq
bhi heeq bhi moel nail phaq bhai maqkhaiq
yalkhaq dal lavq-a nail phaq bhai maqkhaiq
noeq kev noeq moel yaoq.
7 Aivq neq, ngadao nail
Heeqphaq Miqyail pevq nail ngaol.
Aivq nail yalkhaq dal nail phaq neq
miltsaq niil teevq heeq heeq lao nail haqbhoil ngaol.
8 Aivq neq, aivq nail daoqma saljial bhai
nqmaq maqluv halyeel noeq thaq khi
aivq-i mail jaq-ai thaq nail saljial bhai iqsanl
jeq-e aqhinl yeel bhee dai, noeq thaq nail ngaol.
9 Noeq thaq nail al neq
Aqbhaqlaqhaq bhai
bivq-a nail daoqma saljial khi
Ilcav nee jaq-a nail saljial pevq nail ngaol.
10 Al ovqtavq, Yaqkov nee iqsanl
daoqma saljial jaq-a nail ngaol.
Daoqma saljial al neq
nqmaq maqluv halyeel ivq khi
Ilsaqleiqlav jeq-e nail haqbhoil ngaol.
11 Saljial al neq, aivq niail hai jaq-a nail ngaol:
"Ngal nul juq bhai Khaqnanq milkhaoq bivq naol.
Nul juq milkhaoq al khaoq
jaiq bhoil ya nail ngaol" dai, jaq-a nail ngaol.
12 Aivq saljial jaq-u phao, aivq nail tsaol-aq juq
yu nail milkhaoq bhai micil jaol khi
daq-i pevq thail thaiq nail ngaol.
13 Aqyu juq neq
teevq dao nee teevq dao maqkhaiq
milkhaoq teevq khaoq nee teevq khaoq maqkhaiq
tsao pov tsao phal-a nail ngaol.
14 Thail hai ngaol-aoq, Heeqphaq Miqyail neq
aqyu juq bhai lav tsoiq dai
teevq gaq bhai iqsanl, maq bivq nl al.
Aqyu juq nail haqbhoil
heeqphaq juq bhai niail hai daoq bivq-a nail ngaol:
15 "Ngaq-i mail tsel dov-ai thaq nail juq bhai
thaq thoiq tsi.
Ngaq nail haqbhoil ge dan nail juq bhai iqsanl
aqdoil phaq thaq nl" dai
daoq bivq-a nail ngaol.
16 Aivq neq, aqyu juq nail milkhaoq bhai
moevq nail sivq nail phaq bhi kev lee khi
jaq nail daol nail phaq bhi peivq ail gil-u phao
17 yaqkav khe-ai, bhi gaoq jaq-a nail Yaolsai bhai
aqyu juq nail iqmoeq nee
Iljiltuv milkhaoq bhai khoel gai aivq-a nail ngaol.
18-19 Yaolsai-i mail iqmoeq-u nee
ge-ai thaq nail khe-ai
maq pevq lal nail gaiq laiq bhai
Yaolsai nail aqkhil hail cav bhi phee thaiq khi
aivq nail leelkhaol bhai iqsanl
hail bhi deivq-a nail ngaol.
Al neq, Miqyail-i mail laonq daiq nail phaq bhai
gaq lai-a nail ngaol.
20 A bhai nee ngal-aq
jeq-e jaq-a juq bhai uv thaiq nail Iljiltuv heeq phaq
Yaolsai bhai thaonq nee mail
phaiq dov bhiq-a nail ngaol.
21 Heeqphaq al gaq neq, Yaolsai bhai
aivq nail haol bhai
uv thaiq nail bhaqaoq av bhiq khi
milkhaoq khe ildaoq maoqgaiq iqsanl bhai
bhi hel daiq phail-a nail ngaol.
22 Iljiltuv heeqphaq nail
ganl nl nail juq nail kovtavq bhai
daoq bivq nia nail aqivq jiovq khi
milkhaoq khe aqivq juq bhai
cavq bhiq cov bhiq nail gaq iqsanl pevq nail ngaol.
23 Aq-u phao, Yaqkov nail phaq yaq ma yaq
Iljiltuv milkhaoq bha kev lal khi
Haq mav nail miltsaq bhai
daq-i khe-ai jaol lal-a nail ngaol.
24 Heeqphaq Miqyail-i mail
aivq nail tsaol-aq juq bhi jeq bhi mao lal khi
aqyu juq bhai neejiav jiav nail juq nee maq tsil
gaq bhi kav jaiq lal-a nail ngaol.
25 Aivq neq, Iljiltuv tsaol-aq juq
aivq nail tsaol-aq juq bhai bhi bhe lal dai
neema lav phal bhiq-a nail ngel-i mail
aivq nail tsaol-aq juq bhai aqdoil nl nail dai khi
maoq bhaoq nl nail ngaol.
26 A bhai nee ngal-aq, aivq neq
aivq nail yaqkav Maolseiq khi
aivq-i mail tsel dov-a nail Aqlonq bhai
khoel gai-aivq-a nail ngaol.
27 Al nvq gaq neq
Iljiltuv milkhaoq yaq juq bhai
bhi heeq bhi moel nail phaq nl daiq bhiq khi
Haq mav nail miltsaq bhai
noeq-u maq dov nail phaq iqsanl
nl daiq bhiq-a nail ngaol.
28 Heeqphaq Miqyail neq
milkhaoq teevq khaoq khaoq lao nav tsee dai
bhi pevq ail-a nail ngaol.
Thail hai ngaol-aoq
Iljiltuv milkhaoq yaq juq neq
aivq nail daoq bhai maq nal daiq al.
29 Aivq neq, aqyu juq nail laoljaol juq bhai
aqsivq bhi pevq ail khi
delgil khal jaol nail juq bhi sil gil-a nail ngaol.
30 Aqyu juq nail miltsaq bhai
phaq yaq dov dee dee lal khi
heeqphaq nail iq thaiq duq bha kev dai
phaq yaq jaol bhee gil-a nail ngaol.
31 Heeqphaq Miqyail daoq bivq-u phao
yaolheel khi mail yaolthaol juq
milkhaoq teevq khaoq khaoq lao
bhee gil lal-a nail ngaol.
32 Aivq neq, milkhaoq al khaoq bhai
maoq-aol nail galduq ollov bhi ga lee khi
nqmeivq tsaoq teivq bhi teivq lal-a nail ngaol.
33 Aqyu juq nail aqheeq tsilju nail aq jiav khi
heeqpuv aqbhaol juq bhai
lav cov gil bhiq-a nail nee ovqtavq
milkhaoq khaoq lao khe doevq nail
aqbhaol juq bhai
bhi ga luq bhi gaq seil gil-a nail ngaol.
34 Aivq daoq bivq-u phao
mao dee dee khi maq ge gil tsaol nail
noelbhoel juq ga kha lee khi
35 milkhaoq khe khal jiav nail
niul seq deel aqbhaol juq jaq gil khi
aqheeq allu juq iqsanl keivq jaq gil-a nail ngaol.
36 Aivq neq, Iljiltuv milkhaoq lavqkhoel khe
iqmoeq ilmoeq bhao-a nail yaqyov juq bhai
bhi sil gil-a nail ngaol.
37 A bhai nee ngal-aq
Ilsaqleiqlav nail jeq-e jaq-a juq bhai
Iljiltuv milkhaoq nee
hevq dol-aivq-a nail ngaol.
Aqyu juq neq
phul heel-i mail lav sav-ai thaq nail
aqmaol bhai goe nail phaq iqsanl
oil dol aivq-a nail ngaol.
Aqyu juq nail lavqkhoel bhai
gaq bhaq nail juq maq aol ail.
38 Iljiltuv nail tsaol-aq juq neq
aqyu juq bhai gee sil khi
aqyu juq dov ail-u phao
lavqkhiq tsail nail ngaol.
39 Heeqphaq Miqyail neq
aivq nail tsaol-aq juq nail kovtavq bhai
nqdil-i mail lav haiq bhiq khi
nqkiv lima phao aqbhaq bhi bhaq nail haqbhoil
miqjaq bivq-a nail ngaol.
40 Aqyu juq-i mail hal nail khe-ai
aivq nq maiq laiq ma juq phaiq gai-aivq-a nail ngaol.
Aqyu juq ya jaq bov dai
nqtavq khe khaqmul bhi jaq-a nail ngaol.
41 Aivq neq, lovphail bhai phao-u phao
ulcuvq dov lal khi, tsalhail dai kav bhai
laoljaol khe-ai il lee-a nail ngaol.
42 Khul khi mail dai ngal-aq neq
aivq nail yaqkav Aqbhaqlaqhaq bhai
bivq-ai thaq nail meeq nail haol nail saljial bhai
noeq thaq nail ngaol.
43 Al heel ngel-i mail, aivq neq
aivq nail tsaol-aq juq bhai
lavqkhiq teevq tsail hevq dol aivq-a nail ngaol.
Aivq-i mail tsel dov-a nail al juq iqsanl
lavqkhiq tsail nail lavqkhoel nee gul gul ail
ail-a nail ngaol.
44 Aivq neq, aqyu juq bhai
yu nail jeq-e jaq-a nail miltsaq juq bivq khi
aqyu juq neq, yu nail daiyal khi yal gaol juq
ya gil-a nail ngaol.
45 Al hai nl bhiq-a nail neq
aivq nail tsaol-aq juq
aivq nail ya tsao the nail phaq bhai bhi tsao the khi
aivq nail aolthaq kovqthaq bhai iqsanl
bhi nal daiq nail haqbhoil ngaol.
Haq leiq lul yaq.