Tsiq eeq 110
Heeqphaq Miqyail khi mail aivq-i mail tsel dov-ai thaq nail heeq phaq
1 Heeqphaq Miqyail
ngaq nail Heeqphaq bhai ge bhiq-a nail:
"Naoq bhai neejiav jiav nail tsaol-aq bhai
naoq nail aqkhil kov-uvq bhai
ngal bhi jaol-u n-gaol kev dai
ngaq nail lavqmal phao jaol deel yaoq" dai
ge bhiq-a nail ngaol.
2 Heeqphaq Miqyail neq
naoq nail uv thaiq nail bhaqaoq bhai
Yeiqlulsaqlaiq meenq nee mail
jaol duq yaoq dao yaoq bha kev dai
bhi kev ail khi
"Naoq-ai neejiav jiav nail juq bhai
uv thaiq yaoq" dai
naoq bhai daoq bivq-a nail ngaol.
3 Naol genl dev lai-u phao
naoq nail tsaol-aq juq neq
naoq-ai nee mail teevq gaq khe-ai
sivtavq phao tsao dal laivq nail ngaol.
Nqhao lao ma khe ga lee nail tsaiqbhaiq khe-ai
gaq kav nail yaqyov-aq yaqnoil juq mao dai
naol jaol nail meeq nail haol nail gaoqjaoq bha
lal gil nail ngaol.
4 Heeqphaq Miqyail niail hai
saljial jaq-ai thaq nail ngaol:
"Naol neq, Maqlaqkhilsaqdaiv
philma joiq jaq ovq nail khe-ai
nqmaq maqluv halyeel
philma ya jiovq nail ngaol" dai
jaq-ai thaq nail saljial bhai
teevq thal-iq oil kovq nail maq bhao ail.
5 Heeqphaq Miqyail neq
naoq nail lavqmal phao
khaq mao iqsanl jaol nail ngaol.
Neema phail lal-u n-gaol, aivq neq
yu nail heeqphaq juq bhai naoq peiv bhiq nail ngaol.
6 Jeq-e jaq-a juq bhai yalkhaq dal-u phao
genl dev duq bhai
tsaol sil nail aqmaol teevq bhee ga nail ngaol.
Aivq neq
miltsaq kovtavq khe jaol nail heeqphaq juq bhai
naoq peiv bhiq nail ngaol.
7 Heeqphaq neq, gailkhaol aqjail bhai
il nail laoljaol bhai
ulcuvq daol nail lavqkhoel nee
gaq gaoq bhee lal khi genl dev gaq nail ngaol.