Tsiq eeq 102
Aqkovq maq jiav lal-a nail teevq gaq-i mail hal-a nail geeqlaoq hal daoq
1 Heeqphaq Miqyail-ol
ngaq-i mail hal nail geeqlaoq hal daoq bhai
nal daiq lavq yaoq.
Ngaq-i mail gul nail bhai
nal daiq lavq yaoq.
2 Ngal haq nail aoq nail phaq kev lee-u phao
naoq nail maivphaoq thaq tsiq phaol lavq.
Ngal khul-u phao, nal daiq khi
lavqtsail mail ge kovq lavq yaoq.
3 Khul khi mail dai ngal-aq
ngaq nail doevqyeel neq
miq khoiq khe-ai, peivq ail khi
ngaq nail aqmaol iqsanl
miqjiiv khe-ai, poiv jaq thail thaiq nail ngaol.
4 Ngal neq, jaol hal maq dov dai
moeqgaq khe-ai haq khuq khuq lai khi
aqjal jaq movq nail neema maq aol ail.
5 Ngal aqthel aqkav kav dai
gul gul ail jaol khi
haqeeq nail kovtavq bhai
bavkov covq ail teevq-eel nial.
6 Ngal neq, haqtsoiq haqyal bhai
jaol nail ov ngavq khe-ai maqkhaiq
ilkhaol aq peiv aq leiv bhai jaol nail
kaoq buv khe-ai maqkhaiq, dul ail nial.
7 Ngal neq, iq thaiq-u phao
maq iq thaiq kol leevq dai haq nail ngaol.
Ngal neq, khaol poiv kovtavq bhai
teevq maol taivq-ail
gaq naq naq thail thaiq nail
keivq-avq khe-ai, dul nail ngaol.
8 Ngaq bhai neejiav jiav nail juq neq
teevq n n lao khal ge movq ail ge khi
ngaq bhai ivqkhail yavq nail ngaol.
9-10 Naoq-i mail
neema phail dee dee nail phaq bhaq da nee
ngal khaqlail bhai aqjal khe-ai
ya jaq nail ngaol.
Ngal daol nail ulcuvq bhai iqsanl
maivbhil nee kheq khi ya daol nail ngaol.
Naol neq, ngaq bhai tsiq dil lavq khi
liv kha lavq-a nail ngaol.
11 Ngaq nail doevqyeel neq
kivqhail lail ma phao khe
aq haiq khe-ai, dul nail ngaol.
Ngal neq, moeqgaq khe-ai
haq khuq khuq lai nail ngaol.
12 Thail hai ngaol-aoq
Heeqphaq Miqyail-ol, naol neq
nqmaq maqluv halyeel uv thaiq nail ngaol.
Naoq nail aqmil neq
teevq yeel nee teevq yeel ivq nail ngaol.
13 Naol thul khi
Yeiqlulsaqlaiq meenq bhai gaoq haq nail ngaol.
Meenq al meenq bhai
gaoq haq gaiq-a nail aqyanq
tsaq lal-aoq nail ngaol.
Yanq niil yanq neq
tsaq nail aqyanq pevq nail ngaol.
14 Khul khi mail dai ngal-aq
naoq nail yaqkav juq neq
Yeiqlulsaqlaiq meenq cov ail khi ngaol-aoq
gaoq gaiq-a-ai haq nail ngaol.
Meenq al meenq aq peiv aq leiv ail
jiav khi ngaol-aoq
gaoq gaoq haq-ai haq nail ngaol.
15 Yu nail jeq-e jaq-a juq iqsanl mail
Heeqphaq Miqyail nail aqmil bhai gee sil khi
miltsaq kovtavq khe heeqphaq juq iqsanl mail
aivq nail bhaqaoq bhai gee sil nail ngaol.
16 Khul khi mail dai ngal-aq
Heeqphaq Miqyail neq
Yeiqlulsaqlaiq meenq bhai
gaoq cov meeq khi
aivq nail seiqleiq khaoqsail nee dov lal nail ngaol.
17 Aivq neq
khul maq jail nail tsaol-aq juq nail
hal daoq bhai nal daiq khi
aqyu juq-i mail hal nail
geeqlaoq hal daoq bhai
ge kovq bhiq nail ngaol.
18 Heeqphaq Miqyail-i mail
nl-a nail ganl juq bhai
yaqhao khe
doevq lee jaol lee nail juq nail haqbhoil
gevq thaq gai yaoq.
Al hai gevq thaq gai nail bhaq da nee
aqyu juq aivq bhai tsiq eeq nail ngaol.
19-20 Thaonq bhai
bhi nieivq bhoel-ai thaq nail juq-i mail
meel nail aqthel bhai
nal daiq nail dai khi maqkhaiq
bhi heivq nail dai khi dal ceiv-ai thaq nail juq bhai
bhi jel-ail nail dai khi maqkhaiq
Heeqphaq Miqyail neq
nqtavq kovtavq bha jiav nail
aivq nail meeq nail haol nail aqduq nee mail
hel daiq kha-ai leevq nail ngaol.
Aivq neq, nqtavq kovtavq nee mail
miltsaq bhai hel daiq nail ngaol.
21-22 Milkhaoq doi dai jaol nail juq khi
tsaol-aq munl munl ma juq iqsanl mail
jil lal nail nee ovqtavq
Heeqphaq Miqyail bhai uqhuq thaoq lal-u phao
Yeel ovq gaoqjaoq kovtavq bhai
aivq nail aqmil gul gaiq bhiq nail ngaol.
Yeiqlulsaqlaiq meenq bhai iqsanl
aivq nail seiqleiq khaoqsail bhai tsiq eeq nail ngaol.
23 Ngal aqkovq maq jiav lal khi ngaol-aoq
Heeqphaq Miqyail neq
ngaq nail gaq bhai oil ha lavq khi
ngaq nail yeel bhi nil lee lavq nail ngaol.
24 Thail hai ngaol-aoq
ngal aivq bhai geeqlaoq niail hai hal-a nail ngaol:
"Nq maq maq luv hal yeel doevq nail
ngaq nail Miqyail-ol
ngal joiqmaoq maq maoq lai-u nee mail
ngaq nail doevqyeel bhai thaq oil kovq lavq.
25 Naol neq, aq-u nee mail
miltsaq bhai bhi ivq khi
naoq nail aqlavq-i mail
nqtavq bhai teivq-a nail ngaol.
26 Al nvq phaq neq
aqgaq aqdoi khe-ai
aq pheq aq daoq daoq ail khi
peivq ail boev ail khi ngaol-aoq
naol neq, khaq mao iqsanl doevq jaol nail ngaol.
Naol neq, aqgaq aqdoi aq khai liv ha khe-ai
al nvq phaq bhai liv ha nail ngaol.
27 Thail hai ngaol-aoq, naol neq
khaq mao iqsanl phal lal nail maq bhao ail.
Aq doevq doevq nail phaq iqsanl
teevq thal-iq, gil lai nail maq bhao ail.
28 Naoq nail yaqkav juq nail yaq juq
gee sil duq maq jiav dai, ya doevq nail ngaol.
Aqyu juq nee mail
yavq kha lee thaq nail yaq juq iqsanl
naoq nail sivtavq bhai
bhee lovq lal" dai, hal-a nail ngaol.