Tsiq eeq 103
Heeqphaq Miqyail-i mail gaoq haq goil gaiq-a nail phaq
1 Ngaq nail nee ma-ol
Heeqphaq Miqyail bhai geeqlaoq bivq yaoq.
Ngaq nail lavqkhoel bhai
khal jiav nail yaoq phaq yaoq-ao nee
aivq nail meeq nail haol nail aqmil bhai
geeqlaoq bivq yaoq.
2 Ngaq nail nee ma-ol
Heeqphaq Miqyail bhai geeqlaoq bivq yaoq.
Aivq-i mail bivq lavq-a nail geeqlaoq juq bhai
thaq nioil peivq dei-eiq.
3 Aivq neq, ngaq nail oeqbal
iqsanl bhai phaiq lavq khi
ngaq nail nalgoel juq iqsanl bhai
bhi meeq lai lavq nail ngaol.
4 Aivq neq, ngaq bhai
sil nail lavqkhoel nee hevq kovq lavq khi
gaoq haq goil gaiq-a nail phaq-i mail
leel jaoq lavq nail ngaol.
5 Aivq neq ngaq bhai
aqmeeq phaq bivq lavq khi
joelma khe-ai gaq bhi kav lavq-a nail ngaol.
6 Heeqphaq Miqyail neq
bhi khoeq bhi jiovq nail juq
jaol nail phao jaol khi
tsaq nail daol nail lavqkhoel nee
aqyu juq bhai ovq nail phaq bivq-a nail ngaol.
7 Aivq neq
aivq-i mail noeq-ai thaq nail phaq
Maolseiq bhai phao daiq bhiq khi
aivq-i mail nl-a nail ganl
Ilsaqleiqlav nail jeq-e jaq-a juq bhai
bhi moel-a nail ngaol.
8 Heeqphaq Miqyail neq, gaoq haq nia khi
neema maq phail dai
ol tsaol nail nee ovqtavq
gaoq haq goil gaiq-a nail phaq
bhee lovq nail ngaol.
9 Aivq neq, khaq mao iqsanl
oeqbal thaq khi maq jaol ail.
Khaq mao kev dai neema phail phail ail maq jaol ail.
10 Ngadao juq-i mail
daq geel-nvq nail oeqbal maq bhi daq lavq-al.
Ngadao juq nail
laiq nail tsa nail phaq jiav nail khe-ai iqsanl
maq bhi daq lavq-al.
11 Khul khi mail dai ngal-aq
nqtavq miltsaq gaiq laq moe nail khe-ai
aivq-i mail gaoq haq goil gaiq-a nail phaq neq
aivq bhai gee sil khi ev nail juq nail haqbhoil
moe nail ngaol.
12 Nl ma dov khoeq khi mail
nlma ga khoeq eq nail khe-ai
aivq neq, ngadao khi oeqbal bhai
bhi eq ail lavq-a nail ngaol.
13 Aqbhu juq neq
yaqmiq yaqyov bhai gaoq haq gaiq-a nail khe-ai
Heeqphaq Miqyail neq
aivq bhai gee sil khi ev nail juq bhai
gaoq haq gaiq-a nail ngaol.
14 Ngadao nail aqmaol bhai
khal hai teivq-a nail dai
aivq heeq nia khi
ngadao miltsaq pevq nail bhai
aivq maq nioil peivq ail.
15 Ngadao nail doevqyeel neq
moeqgaq khe-ai, dul nail ngaol.
Ngadao juq neq, haqtsoiq khe aqeiv khe-ai
eeq lal eiv lal nail ngaol.
16 Lil moel bhoe lal-u phao
aqeiv neq, bhoe khal-aivq nail khe-ai
al bhai yaqhao teevq pov maq ya moel yaoq-aol.
17-18 Thail hai ngaol-aoq
Heeqphaq Miqyail bhai gee sil khi
ev nail juq nail haqbhoil
aivq-i mail bivq-a nail
gaoq haq goil gaiq-a nail phaq neq
nqmaq maqluv halyeel ivq nail ngaol.
Aivq nail daoqma saljial bhai hel daiq phail khi
aivq nail ya tsao the nail phaq bhai
saljial ivq nail lavqkhoel nee
tsao the nail juq nail haqbhoil iqsanl
aivq nail tsaq nail daol nail phaq
aqyu juq nail
aqjievq lilheel bha kev dai kev nail ngaol.
19 Heeqphaq Miqyail neq
aivq nail joiq jaq doiqbev bev ma
nqtavq kovtavq bha bhi jiav-ai thaq khi
iqsanl bhai uv thaiq nail gaq pevq nail ngaol.
20 Bhaq aoq eeq nail nqtavq gaqkhoel juq-ol
Heeqphaq Miqyail bhai tsiq eeq yaoq.
Nul juq aivq nail daoq bhai nal daiq khi
aivq-i mail khoel nail phaq bhai
nl nail juq pevq nail ngaol.
21 Aivq neema tsaq nail khe-ai
aivq nail ganl nl nail
nqtavq gaqkhoel munl munl ma juq-ol
Heeqphaq Miqyail bhai tsiq eeq yaoq.
22 Aivq-i mail
khal uv thaiq kev-a nail bhai jaol nail
aivq-i mail teivq-ai thaq nail yaoq phaq yaoq-ao nee
Heeqphaq Miqyail bhai tsiq eeq yaoq.
Ngaq nail nee ma-ol
Heeqphaq Miqyail bhai geeqlaoq bivq yaoq.