Tsiq eeq 92
Tsiq eeq nail daoqsel
1 Heeqphaq Miqyail bhai
tsiq eeq nail phaq maqkhaiq
eeq dee heel dee dee nail Gaq bhai
daoqsel gul khi tsiq eeq nail phaq maqkhaiq
2 nqhao phao
aivq-i mail gaoq haq goil gaiq-a nail phaq khi
kivqhail phao
aivq-i mail saljial ivq nail phaq
ge gaiq bhiq nail phaq maqkhaiq
3 neeqtsaq tsel deeq covq nail dil-nvq khi
dil-nvq heeq ma heeq yaq deeq nail maqkhaiq
kha dai meeq nail phaq pevq nail-aiq.
4 Heeqphaq Miqyail-ol
naoq-i mail nl-a nail ganl juq neq
ngaq bhai lavqkhiq bhi tsail lal-a nail ngaol.
Naoq nail aqlavq-i mail
nl-a nail ganl juq bhaq da nee
ngal lavqkhiq teevq tsail daoqsel gul nail ngaol.
5 Heeqphaq Miqyail-ol
naoq-i mail nl-a nail ganl juq neq
kha dai eeq nail-aiq.
Naoq nail nee noeq iqsanl
kha dai navq nail-aiq.
6 Nee noeq nee kha maq aol nail juq
maq heeq nia dai
yaq jaoq khaq lal miq thoi juq
maq gov heeq nia nail
teevq phaq jiav nail ngaol.
7 Khul dai ge haq neq
haqeiv nail tsaol-aq juq neq
moeqgaq juq khe-ai, lavqtsail mail eeq lal khi
aqdoil phaq nl nail juq neq
bhao lee ya lee khi ngaol-aoq
aqyu juq iqsanl mail
luq ail seil ail nail bhai ya daq nail ngaol.
8 Thail hai ngaol-aoq
Heeqphaq Miqyail-ol
naoq bhai neq, nqmaq maqluv halyeel
tsiq eeq tsiq heel bhiq nail ngaol.
9 Heeqphaq Miqyail-ol
naoq bhai neejiav jiav nail juq neq
maldil ya luq ya seil ail khi
haqeiv nail juq iqsanl mail
ya pav ya sav ail nail ngaol.
10 Thail hai ngaol-aoq
naol neq, ngaq bhai neivq niaoq khe-ai
gaq bhi aol lavq khi
aqtseel aqmeeq hoel dav lavq-a nail ngaol.
11 Nee jiav jiav nail juq sunq ail nail bhai
ngal ya moel khi
haqeiv nail juq nioil nail aqthel bhai
ya gaiq-a nail ngaol.
12 Thail hai ngaol-aoq
meeq nail haol nail tsaol-aq juq neq
dal aol aqbhaol aqpavq niul seq dai
meeq nail khe-ai, meeq khi
Leiq bhaq noq gaoqjaoq khe doevq nail
miqhuq aqbhaol khe-ai
eeq lal moe lal nail ngaol.
13 Aqyu juq neq
Heeqphaq Miqyail nail ilkhaol bhai kha khi
ngadao nail Miqyail nail
uqhuq thaoq nail ilkhaol il ma nail
khainl lavqkhoel bhai
aqbhaol aqpavq niul seq dai
meeq nail khe-ai, meeq nail ngaol.
14 Aqyu juq aqbhaol al juq khe-ai
aqkovq maoq lal nail yanq bhai iqsanl
aqheeq mao dai heeq khi
khaq mao iqsanl niul seq dai jiav nail ngaol.
15 Aqyu juq niail hai ge gaiq bhiq nail ngaol:
"Heeqphaq Miqyail neq
tsaq nail daol nail gaq pevq khi
ngaq nail lovphail pevq nail nee ovqtavq
aivq nail lavqkhoel bhai
haqeiv nail phaq teevq peivq ail maq aol ail" dai
ge gaiq nail ngaol.