Tsiq eeq 91
Eeq dee heel dee dee nail Gaq-i mail hel daiq phail nail ganl
1 Eeq dee heel dee dee nail Gaq nail lavqkhoel bhai
tsaoq uvq nail dai khi jaol nail gaq neq
iqsanl nail kovtavq bhai
uv thaiq nail bhaqaoq eeq nail Gaq nail
aq haiq bhai ya jaol nail ngaol.
2 Aivq neq, Heeqphaq Miqyail bhai
niail hai ge kivq nail ngaol:
"Naol neq, ngaq nail juq duq,
tavq khi mail Miqyail pevq nail ngaol.
Ngal naoq bhai neema thaq tsaol nail ngaol" dai
ge nail ngaol.
3 Miqyail neq
lavq phee yaoq phaq yaoq-ao nee bhai maqkhaiq
bhi sil nia nail nalgoel
yaoq phaq yaoq-ao nee bhai maqkhaiq
naoq bhai bhi jel-ail lavq nail ngaol.
4 Yav civ aivq nail yav yaq bhai
aqdaol-i mail uv thaiq nail khe-ai
Miqyail naoq bhai uv thaiq lavq khi
naol neq, aivq nail aqdaol nail kov-uvq bhai
ya tsaoq uvq-a nail ngaol.
Aivq-i mail saljial ivq nail phaq neq
naoq nail doeq daq duq khi
thaoq daq duq pevq nail ngaol.
5 Nqkiv lima phao khe ya moel nail
gee sil lal dee dee nail phaq bhai maqkhaiq
n-gaol phao bev-aivq lavq nail
heeqnav maq tsoe bhai maqkhaiq
6 aqnav nee kev lee nail nalgoel juq bhai maqkhaiq
n-gaol phao khe sil nia nail
haq aoq nalgoel juq bhai maqkhaiq
maq ya gee sil ail.
7 Naoq nail aqjail khe teevq hinl gaq
naoq nail lavqmal phao khe teevq meel-nvq gaq
sunq ail khi ngaol-aoq
naoq bhai khul maq pevq lal ail.
8 Haq eiv nail tsaol-aq juq bhai
khal hai nl kovq bhiq nail dai
naol ya moel nail ngaol.
9 Naol Heeqphaq Miqyail bhai juq khi
eeq dee heel dee dee nail gaq bhai
tsaoq-uvq nail lavqkhoel nee jaol haq neq
10 haqeiv nail phaq naoq bhai maq ya gaq lai dai
naoq nail ilkhaol aqjail bhai iqsanl
niaoq lal nail nalgoel maq kev lee nia ail.
11 Khul khi mail dai ngal-aq neq
khal ail nail yaoq dao yaoq-ao nee
naoq bhai bhi hel daiq phail nail dai khi
Heeqphaq Miqyail neq
aivq nail nqtavq gaqkhoel bhai
khoel-ai thaq nail ngaol.
12 Aqyu juq neq
naoq nail aqkhil lovmav bhai maq ya ga yao ail dai
aqyu juq nail aqlavq-i mail
naoq bhai tsiq nail ngaol.
13 Naol neq, al laq jaq sil khi mail
eellel eel nav nail kovtavq nee khao jel khi
gaq kav nail al laq jaq sil khi mail eellel bhai neq
aqkhil-i mail naoq thaiq nail ngaol.
14 Heeqphaq Miqyail niail hai ge nail ngaol:
''Aivq neq, ngaq bhai gaiq-a nail ngel-i mail
ngal aivq bhai hevq kovq bhiq khi
ngaq nail aqmil bhai heeq nia nail ngel-i mail
aivq bhai hel daiq phail bhiq nail ngaol.
15 Aivq ngaq bhai khul-u phao
ngal ge kovq bhiq khi
haq nail aoq nail phaq ya daq-u phao
aivq nee mail jaol naol.
Aivq bhai hevq kovq khi
thaq eeq thaq heel bhiq nail ngaol.
16 Ngal aivq bhai doevqyeel heel nail
geeqlaoq bivq khi
ngaq-i mail hevq kovq nail phaq bhai
bhi moel nail ngaol" dai, ge nail ngaol.