Tsiq eeq 90
Tsiq eeq nail haoqgavq liq pav teevq pav 90-106
Miqyail khi mail tsaol-aq
1 Heeqphaq-ol, naol neq
teevq yeel nee teevq yeel
nv juq nail tsaoq uvq duq pevq nail ngaol.
2 Naol gaoqjaoq bhai maq bhi dov lal-u nee mail
miltsaq bhai maq teivq-u nee mail
jaol nail ngaol.
Nq maq maq luv hal yeel gil dai
naol Miqyail pevq nail ngaol.
3 Naol neq
daoq bivq khi tsaol-aq juq bhai
miltsaq gaoq bhi pevq kovq ail nail ngaol.
4 Naoq nail haqbhoil aqkovq teevq hinl kovq neq
jel lal-a nail teevq n khe-ai dul nail ngaol.
Davq nil nil dee dee nail
nqkiv teevq kivq khe-ai iqsanl dul nail ngaol.
5 Naol neq
tsaol-aq yaq juq bhai
lavqtsail mail bhi peivq ail nail ngaol.
Aqyu juq neq, nv mav khe-ai
teevq yanq taivq-ail jaol khi
nqhao khe eiv lal nail aqeiv khe-ai dul nail ngaol.
6 Aqeiv al neq, nqhao phao eiv lal khi
kivqhail phao neq
niaq lai gee lai nia nail ngaol.
7 Naol neema phail nail bhaq da nee
nv juq luq ail seil ail thail thaiq khi
neema bhao nail bhaq da nee
gee sil dee dee nail ngaol.
8 Nv juq-i mail nl-a nail laiq nail tsa nail phaq
naoq nail sivtavq bhai oil thaq-ai thaq khi
nv juq-i mail oil uvq-ai thaq nail
oeqbal juq bhai iqsanl, naol moel gil nail ngaol.
9 Nv juq neq, naol neema phail nail phaq bhai
ya daq-a nail ngel-i mail
doevqyeel nil lee khi
aq ya ya dai ge nail aqhaq khe-ai
peivq ail nia nail ngaol.
10 Nv juq neq
aqkovq sivq tsel kovq nii dai
heel ail teevq-eel ngaol.
Mal dil gaq bhee lovq nail juq neq
aqkovq eivq tsel kovq ya doevq nail ngaol.
Thail hai ngaol-aoq
yanq al juq nail gaiqlaq bhai
nv juq neq, noeq haq noeq aoq nail phaq khi mail
haq nail aoq nail phaq bhai taivq-ail
ya daq nail ngaol.
Maq maoq maq heel lal mail
nv juq peivq ail boev ail nail ngaol.
11 Naol neema phail nail phaq
kha dai eeq nail-aiq dai
khaq sil gaq heeq nia nail-aiq.
Naoq bhai gee sil dai
naol neema bhao nail phaq bhai
khaq sil gaq heeq nia nail-aiq.
12 Nv juq bhai yovqgavq nail doevqyeel
kha dai nil nail ganl heeq kivq dai
cavq lavq cov lavq yaoq.
Al hai khi pultavq nv juq
neenoeq neekha aol lal nail ngaol.
13 Heeqphaq Miqyail-ol
tsiq phaol-aivq leevq lavq yaoq.
Khaq mao kev dai ya daonq nail-aiq.
Naoq nail yaqkav pevq nail nv juq bhai
gaoq haq lavq yaoq.
14 Nv juq nail teevq yeel daoqsel gul khi
lavqkhiq tsail kivq dai
yaoq haoq yaoq-ao nee nv juq bhai
naoq-i mail gaoq haq goil gaiq-a nail phaq bivq lavq yaoq.
15 Naol haq nail aoq nail phaq bhai
bhi daq lavq-a nail khe-ai
niil aq-il lavqkhiq tsail nail phaq bhai iqsanl
teevq di bhi daq lavq yaoq.
16 Naoq nail yaqkav pevq nail nv juq bhai
naoq-i mail nl-a nail phaq bhai
gaoq bhi moel lavq yaoq.
Nv juq nail yaq juq bhai iqsanl
naoq nail seiqleiq khaoqsail bhai
bhi moel lavq yaoq.
17 Nv juq nail Heeqphaq Miqyail-ol
naoq nail geeqlaoq
nv juq nail kovtavq bhai bhi kev lee yaoq.
Khal nl nail yaoq phaq yaoq-ao nee
nv juq bhai bhi gaq lai lavq yaoq.