Tsiq eeq 86
Tsao jao-ai lavq yaoq dai, hal nail geeqlaoq hal daoq
1 Heeqphaq Miqyail-ol
ngal neq, haq aoq nl thail thaiq nail ngaol.
Ngaq-i mail hal nail daoq bhai
nal daiq khi ge kovq lavq yaoq.
2 Ngal neq, naoq bhai saljial ivq nail ngel-i mail
ngaq bhai hel daiq phail lavq yaoq.
Ngal neq, naoq bhai neema thaq tsaol nail
yaqkav pevq nail ngel-i mail,
ngaq bhai hevq kovq lavq yaoq.
Naol neq, ngaq nail Miqyail pevq nail ngaol.
3 Heeqphaq-ol
ngaq bhai gaoq haq lavq yaoq.
Ngal neq, naoq bhai teevq n n lao gul nail ngaol.
4 Heeqphaq-ol, ngaq nail neema
naoq bhai av bhiq-a nail ngel-i mail
naoq nail yaqkav pevq nail ngaq bhai
lavqkhiq bhi tsail lal lavq yaoq.
5 Heeqphaq-ol, naoq nail lavqkhoel bhai
nv juq nail kovtavq bhai meeq nail phaq
oeqbal phaiq lavq nail phaq aol nail ngaol.
Naoq bhai geeqlaoq hal nail juq nail kovtavq-ai
gaoq haq goil gaiq-a nail phaq bhee lovq nail ngaol.
6 Heeqphaq Miqyail-ol
ngaq nail geeqlaoq hal daoq bhai
nal daiq lavq yaoq.
Tsao jao-ai lavq nail haqbhoil
ngaq-i mail gul nail aqthel bhai nal daiq lavq yaoq.
7 Haq nail aoq nail aqn kev lee khi
ngal naoq bhai khul-u phao
naol ngaq bhai ge kovq lavq nail ngaol.
8 Heeqphaq-ol, naoq-ai khe-ai dul nail
miqyail maq jaol ail.
Naoq-i mail nl-a nail khe-ai
yu nail jeq-e jaq-a nail miqyail juq maq nl daiq-al.
9 Heeqphaq-ol, naoq-i mail teivq-a nail
jeq-e jaq-a juq iqsanl mail lal khi
naoq nail sivtavq bhai
gaol beiv nail lavqkhoel nee
uqhuq thaoq nail ngaol.
Aqyu juq naoq nail aqmil bhai
tsiq eeq nail ngaol.
10 Khul khi mail dai ngal-aq
naol neq, eeq dee heel dee dee khi
noeq-u maq dov nail phaq nl nail ngaol.
Naol taivq-ail Miqyail pevq nail ngaol.
11 Heeqphaq Miqyail-ol
naoq nail maldil tsaq nail
lavqkhoel bhai tsao kivq dai
naoq nail gailkhaol ngaq bhai cavq naq lavq yaoq.
Naoq nail aqmil bhai gee sil khi ev kivq dai
ivq nail neema bivq lavq yaoq.
12 Ngaq nail Heeqphaq Miqyail-ol
naoq bhai
ngaq nail neema lavqkhoel nee tsiq eeq khi
naoq nail aqmil bhai khaq mao iqsanl
tsiq eeq tsiq heel nail ngaol.
13 Khul khi mail dai ngal-aq
naoq-i mail ngaq bhai bivq lavq-a nail
gaoq haq goil gaiq-a nail phaq neq
eeq nail ngaol.
Naol neq, ngaq bhai sil nail milkhaoq nee
hevq dov lavq-a nail ngaol.
14 Miqyail-ol, eeq movq heel movq nail juq neq
ngaq bhai genl dev lal nail ngaol.
Haq eiv nail tsaol-aq teevq munl iqsanl
ngaq bhai heivq nail dai khi, lai jai nail ngaol.
Aqyu juq naoq bhai maq ev ail.
15 Heeqphaq-ol, naol neq
gaoq haq goil gaiq-a nia nail phaq maqkhaiq
neema maq phail dai
ol tsaol nail phaq maqkhaiq
gaoq haq gaiq-a khi saljial ivq nail phaq maqkhaiq
teevq bhee aol nail Miqyail ngaol.
16 Ngal jaol nail bha lee khi
ngaq bhai gaoq haq lavq yaoq.
Naoq nail yaqkav pevq nail ngaq-ai
gaq bivq lavq khi
ngal ngaq nail aqma khe-ai
naoq nail yaqkav pevq nail ngel-i mail
ngaq bhai hevq kovq lavq yaoq.
17 Naol ngaq nail kovtavq bhai
geeqlaoq nl lavq-a nail ganl
neejiav jiav nail juq ya moel khi ya haq sil dai
salkhil phao daiq lavq yaoq.
Khul khi mail dai ngal-aq neq
Heeqphaq Miqyail-ol, naol ngaq bhai
nee sal ovq nail phaq bivq lavq khi
tsao jao-ai lavq-a nail ngaol.