Tsiq eeq 85
Milkhaoq meeq dav lal dai, Miqyail geeqlaoq bivq nail ganl
1 Heeqphaq Miqyail-ol
naol neq, yovqgavq nail milkhaoq bhai
gaoq haq gaiq-a nail ngaol.
Yaqkov nail jeq-e jaq-a juq bhai
teevq pov gaoq bhi doevq jaq lal-a nail ngaol.
2 Naol neq, naoq nail tsaol-aq juq-i mail
nl laiq-a nail phaq bhai phaiq bhiq khi
aqyu juq nail oeqbal bhai iqsanl
phaiq bhiq-a nail ngaol.
3 Aqyu juq bhai neema maq gaoq phail mail
neema phail dee dee nail phaq sivq ail-a nail ngaol.
4 Nv juq bhai hevq kovq lavq-a nail Miqyail-ol
nv juq bhai gaoq bhi doevq jaq lal lavq yaoq.
Nv juq bhai maq ya lai nail phaq thaq bhi jiav.
5 Naol neq, nv juq bhai khaq mao iqsanl
neema phail phail ail jaol nail khi laiq.
Neema phail nail phaq
aqjievq lilheel juq iqsanl bha kev dai
maq sivq ail yaoq-aol laiq.
6 Nv juq bhai gaq aqsivq bivq lavq yaoq.
Al hai nl lavq haq neq
naoq nail tsaol-aq juq pevq nail nv juq
naoq nail lavqkhoel bhai lavqkhiq tsail nail ngaol.
7 Heeqphaq Miqyail-ol
naoq-i mail gaoq haq goil gaiq-a nail phaq bhai
bhi moel lavq khi nv juq bhai hevq kovq lavq yaoq.
8 Ngal neq, Heeqphaq Miqyail ge nail daoq bhai
nal daiq nail ngaol.
Khul khi mail dai ngal-aq
nee sal bhi ovq nail daoq
aivq bhai saljial ivq nail tsaol-aq juq bhai
ge bhiq nail ngaol.
Al heel ngel-i mail, haqeiv nail phaq thaq gaoq nl.
9 Miqyail-i mail hevq kovq nail phaq
aivq bhai gee sil khi ev nail juq nail aqjail bhai
maldil jiav nail ngaol.
Al heel ngel-i mail
aivq nail seiqleiq khaoqsail iqsanl
nv juq nail milkhaoq bhai uv thaiq lee nail ngaol.
10 Aq-u phao
aivq-i mail gaoq haq goil gaiq-a nail phaq khi mail
saljial ivq nail phaq moel tavq nail ngaol.
Tsaq nail daol nail phaq khi mail
nee sal ovq nail phaq neq
moeq saol saol nail ngaol.
11 Mal dil tsaq nail phaq neq
miltsaq nee dov lal khi
tsaq nail daol nail phaq iqsanl
nqtavq kovtavq nee
hel daiq kha-ai leevq nail ngaol.
12 Heeqphaq Miqyail neq
ngadao juq bhai
aqmeeq phaq bivq lavq nail ngaol.
Ngadao juq nail milkhaoq juq iqsanl
heeqlaoq gaoqjal juq mao dai dov lal nail ngaol.
13 Tsaq nail daol nail phaq neq
aivq nail sivtavq phao tsaol leevq khi
gailkhaol iqmoeq lav sav thaq lee nail ngaol.