Tsiq eeq 84
Heeqphaq Miqyail nail ilkhaol bhai noeq moel nail ganl
1
naoq nail uqhuq thaoq nail ilkhaol il ma neq
kha dai meeq nail ngel ail.
2 Al nail khainl lavqkhoel bhai
aol lai movq dee dee nail ngaol.
Ngaq nail neema aqmaol nee
aqdoevq doevq nail Miqyail bhai
lavqkhiq tsail nail lavqkhoel
gul khi tsiq eeq nail ngaol.
3 Ngaq nail Heeqphaq Miqyail-ol
nqtavq kovtavq khe
genl dev nail munl munl ma nail kovtavq bhai
bhaqaoq eeq nail Heeqphaq Miqyail-ol
jal tsil juq khi mail keivq bavq jil lil juq neq
yovqgavq nail aq kheel juq
naoq nail laolduq aqjail bhai lav sav khi
aqyaq phaoq ail ceevq-a nail ngaol.
4 Naoq nail ilkhaol lavqkhoel bhai jaol nail juq neq
geeqlaoq eeq nail ngaol.
Aqyu juq maq ceiv lai dai
naoq bhai daoqsel gul khi tsiq eeq nail ngaol.
5 Naoq nail lavqkhoel bhai gaq oil-a nail juq neq
geeqlaoq eeq nail ngaol.
Aqyu juq neq
Yeiqlulsaqlaiq meenq bha lai nail haqbhoil
neema gaq teevq bhee aol nail ngaol.
6 Aqyu juq neq
gaoqjaoq nvq jaoq nail gaiqlaq bhai jiav nail
Bhaq kaq dai khaoq bhai lai ceiv-u phao
ulcuvq eel bev dov lal nail ngaol.
Iqmoeq ilmoeq khe aol lee nail
maoq-aol bhaq da nee
ngaq khaq mao dai jiav lal nail ngaol.
7 Aqyu juq neq
gailkhaol niavq-al dov haq neq
gaq niavq-al gaoq aol jaiq lal khi
Yeiqlulsaqlaiq meenq bhai
Miqyail nail sivtavq bha kev lai nail ngaol.
8 Nqtavq kovtavq khe
genl dev nail munl munl ma nail kovtavq bhai
bhaqaoq eeq nail Heeqphaq Miqyail-ol
ngaq nail geeqlaoq hal daoq bhai
nal daiq lavq yaoq.
Yaqkov nail Miqyail-ol, nal daiq lavq yaoq.
9 Miqyail-ol
nv juq nail doeq daq duq pevq nail heeqphaq bhai
hel daiq phail bhiq yaoq.
Naoq-i mail aqtseel hoel dav khi
tsel dov-a nail gaq nail
maivphaoq bhai iqsanl hel daiq yaoq.
10 Naoq nail uqhuq thaoq nail ilkhaol il ma bhai
teevq n ya jaol nail neq
yaoq dao yaoq teevq hinl
ya jaol nail nee maq tsil meeq jaiq nail ngaol.
Ngaq nail Miqyail nail ilkhaol khe lolgov bhai
ya lovq nail neq
haqeiv nail tsaol-aq juq nail
ilkhaol lavqkhoel bhai
ya jaol nail nee maq tsil meeq jaiq nail ngaol.
11 Khul khi mail dai ngal-aq
Heeqphaq Miqyail neq
nv juq nail nlma khi
doeq daq duq pevq nail ngaol.
Aivq neq, nv juq bhai gaoq haq gaiq-a khi
tsiq dil lavq-a nail ngaol.
Heeqphaq Miqyail neq
tsaq nail phaq nl nail juq bhai
aqmeeq phaq bivq nail haqbhoil maq jil ha ail.
12 Nqtavq kovtavq khe
genl dev nail munl munl ma nail kovtavq bhai
bhaqaoq eeq nail Heeqphaq Miqyail-ol
naoq bhai neema thaq tsaol nail juq neq
geeqlaoq eeq nail ngaol.