Tsiq eeq 83
Ilsaqleiqlav nail tsaol-aq juq bhai neejiav jiav nail juq sunq ail dai, hal nail geeqlaoq hal daoq
1 Miqyail-ol, aq tsi tsu dai thaq jaol lavq.
Maq nal daiq dai, thaq jaol lavq.
Daoq maq ge dai, thaq jaol lavq.
2 Hel daiq yaoq.
Naoq bhai neejiav jiav nail juq neq
aqthel aqkav kav dai, gul nail ngaol.
Naoq bhai bhe nail juq neq
naoq bhai lav tsoiq nail dai, lai jai nail ngaol.
3 Aqyu juq neq
naoq nail tsaol-aq juq bhai genl dev nail dai khi
maoq bhaoq khoiq nl thail thaiq nail ngaol.
Naoq-i mail hel daiq phail bhiq nail juq bhai
lav cov nail dai khi
ge pheel jaq thail thaiq nail ngaol.
4 Aqyu juq neq
"Lal yaoq. Ilsaqleiqlav nail aqmil
nqmaq maqluv halyeel peivq ail dai
aqyu juq nail jeq-e jaq-a bhai
lav cov gil bhiq bhel" dai, ge nail ngaol.
5 Aqyu juq neq
teevq gaq khe-ai ge tsaoq gaq gil khi pultavq
naoq bhai genl dev nail dai khi
munl munl ma munl-a nail ngaol.
6 Munl munl ma al juq neq
Eiqdonq, Il saq meiq lal, Maolbav khi mail
Haq gaq lal nail jeq-e juq
7 Geiqbhaqlal, Aqmol, Aqmaqlail
Pilliltiv nail jeq-e khi mail
Dulluv nail meenq yaq juq iqsanl
aol nail ngaol.
8 Aqsulliv nail jeq-e juq iqsanl
Laol tavq nee mail
yavq kha lee thaq nail yaq juq pevq nail
Aq mol khi mail Maolbav phao
aol nail ngaol.
9 Mil diq yaq nail jeq-e bhai maqkhaiq
Khil sul laoljaol aqjail bhai
genl dev yaq Sil saq laq khi
heeqphaq Yaq bhil bhai maqkhaiq
nl bhiq-a nail khe-ai
aqyu juq bhai nl bhiq yaoq.
10 Aqyu juq neq
Eiq daol la jaol duq bhai sunq ail khi
miltsaq bhai aol ail-a jaiqyaq nail aq khiq khe-ai
pevq ail-a nail ngaol.
11 Aqyu juq aqmil dov nail juq
heeqphaq nail yaqyov Ol leiq khi mail
Seiq bav khe-ai bhi sil khi
aqyu juq nail heeqphaq nail yaq juq neq
heeqphaq Seiq bal khi mail
heeqphaq Saq laq mul nav khe-ai
bhi sil dei-eiq.
12 Khul khi mail dai ngal-aq
heeqphaq al nvq gaq neq
"Ngadao juq
Miqyail nail Ilsaqleiqlav tsaol-aq nail
miltsaq bhai oil bhel" dai, ge nail ngaol.
13 Ngaq nail Miqyail-ol, aqyu juq bhai
lilmoel-i mail bhi bhoe jal aivq nail
khaqlail khe-ai maqkhaiq
lilmoel bhoe-u phao
bhoe jal aivq nia nail gov koevq khe-ai maqkhaiq
bhi pevq ail dei-eiq.
14 Haqtsoiq haqyal bhai
poiv thail thaiq nail miqjaq khe-ai maqkhaiq
gaoqjaoq bha poiv thail thaiq nail
miqjaq miqlail khe-ai maqkhaiq
15 naoq nail nqjaiq lilmoel
aqyu juq bhai bhi the kheel yaoq.
Naoq nail kav dee dee nail lilmoel-i mail
aqyu juq bhai lav gee sil bhiq yaoq.
16 Heeqphaq Miqyail-ol
aqyu juq naoq nail aqmil bhai hal pov dai
haq sil nail phaq aqyu juq bhai bhi kev lee yaoq.
17 Aqyu juq khaq mao iqsanl
ya haq sil khi ya gee sil dei-eiq.
Al ovqtavq
seiqleiq khaoqsail teevq peivq ail maq jiav dai
bhi sil dei-eiq.
18 Aqyu juq, naol teevq gaq bhai taivq-ail
Heeqphaq Miqyail dai, khul khi
miltsaq khe eeq nail heel nail gaq
pevq nail ganl bhai bhi heeq nia dei-eiq.