Tsiq eeq 82
Heeqphaq Miqyail yu nail jeq-e jaq-a juq nail miqyail juq bhai yalkhaq dal bhiq nail ganl
1 Miqyail neq, nqtavq kovtavq khe
maoq bhaoq nl nail munl jil lai duq bhai
jaol duq oil-a nail ngaol.
Aivq neq, yu nail jeq-e jaq-a nail
miqyail juq bhai yalkhaq dal bhiq khi
niail hai ge nail ngaol:
2 "Nul juq neq, maq tsaq maq daol nail lavqkhoel nee
khaq mao kev dai, yalkhaq dal nail-aiq.
Haq eiv nail tsaol-aq juq jaol nail phao
khaq mao kev dai jaol nail-aiq.
3 Haq nail aoq nail juq khi mail
aqbhu aqma maq bhao nail juq bhai
hel daiq phail bhiq yaoq.
Bhi khoeq bhi jiovq nail juq khi
gaq hal duq maq jiav nail juq nail haqbhoil
aq tsaq aqdaol nail lavqkhoel nee
yalkhaq dal bhiq yaoq.
4 Haq nail aoq nail juq khi
moevq nail sivq nail juq bhai
hevq kovq bhiq yaoq.
Aqyu juq bhai
haqeiv nail juq nail aqlavq lavqkhoel nee
bhi jel-ail yaoq.
5 Nul juq neq
neenoeq neekha teevq peivq ail maq aol dai
maq noeq heeq maq noeq moel nia il.
Miltsaq daoqthaoq phal lal khi ngaol-aoq
nul juq aqnav nail lavqkhoel bhai tsao nail ngaol.
6 Ngal niail hai ge nail ngaol:
"Nul juq neq, miqyail juq pevq khi
eeq dee heel dee dee nail gaq nail
yaq juq pevq khi ngaol-aoq
7 nul juq neq, tsaol-aq yaq juq khe-ai, ya sil khi
miltsaq khe uv thaiq nail heeqphaq juq khe-ai
yeel ya gil nail ngaol" dai, ge-a nail ngaol.
8 Miqyail-ol, thul lal khi
miltsaq bhai yalkhaq dal lee yaoq.
Khul khi mail dai ngal-aq
jeq-e jaq-a juq iqsanl mail
naoq nail pevq nail ngaol.