Tsiq eeq 81
Aqbhee lav sav-u phao khe daoqsel
1 Ngadao nail gaq pevq nail Miqyail bhai
daoqsel gul khi tsiq eeq yaoq.
Yaqkov nail Miqyail bhai
lavqkhiq tsail nail daoqsel gul khi tsiq eeq yaoq.
2 Daoqsel gul khi tsiq eeq yaoq.
Tsail lail tsiq yaoq.
Dil-nvq heeq yaq heeq ma deeq yaoq.
3 Bhala la sivq nail aqbhee bhai maqkhaiq
bhala la lov nail aqbhee bhai maqkhaiq
daoqthaoq thaoq nail haqbhoil
nqbho jiiv yaoq.
4 Aqbhee al hai lav sav nail neq
Ilsaqleiqlav jeq-e jaq-a nail
ya tsao the nail phaq pevq nail ngaol.
Yaqkov nail Miqyail nail
aolthaq kovqthaq iqsanl pevq nail ngaol.
5 Miqyail neq, Iljiltuv milkhaoq bhai
genl dev gaq-u nee mail, daoq al juq
Ilsaqleiqlav nail jeq-e jaq-a bhai
bivq-ai thaq nail ngaol.
Maq heeq maq gaiq daiq-a nail aqthel bhai
ngal ya gaiq-a nail ngaol.
6 Aq thel al neq, niil hai ge nail ngaol:
"Nul juq nail bavqpuv khe yalkav bhai
ngal tsiq kha khi
aqlavq khe, aqliq liq nail kavjiav bhai
bhi tsiq thaq naol.
7 Nul juq haq nail aoq nail phaq kev lee khi
ngaq bhai gul-u phao
ngal nul juq bhai hevq kovq bhiq-a nail ngaol.
Nq jaiq nqdil nail lavqkhoel nee
nul juq nail hal daoq bhai
ge kovq bhiq-a nail ngaol.
Meiq lil bhaq dai khul nail
ulcuvq eel bev dov duq aqjail bhai
nul juq bhai laonq daiq-a nail ngaol.
8 Ngaq nail tsaol-aq juq-ol
ngaq-i mail savtivq bivq nail bhai nal daiq yaoq.
Ilsaqleiqlav nail jeq-e jaq-a juq-ol
ngaq nail daoq bhai
bhi nal daiq movq dee dee ail nial.
9 Nul juq yu nail miqyail juq thaq bhi jaol.
Miqyail maq ngel nail bhai uqhuq maq ya thaoq ail.
10 Ngal neq, nul juq bhai
Iljiltuv milkhaoq nee mail
hevq dol leevq-a nail
nul juq nail Heeqphaq Miqyail ngaol.
Nul juq nail moeqthaoq gaol pav yaoq.
Ngal nul juq bhai bhi jaq bhi daol naol.
11 Thail hai ngaol-aoq
ngaq nail tsaol-aq juq neq
ngaq nail daoq bhai maq nal daiq-il.
Ilsaqleiqlav nail jeq-e jaq-a juq neq
ngaq bhai maq hav bhoel ail.
12 Al heel ngel-i mail
ngal aqyu juq nail neema gaol lal dai maqkhaiq
aqyu juq nail neekhaol teevq sil nl dai maqkhaiq
khaonq ha bhiq-a nail ngaol.
13 Ngaq nail tsaol-aq juq ngaq nail daoq bhai
bhi nal daiq movq ail nial.
Ngaq nail gailkhaol bhai bhi tsao movq ail nial.
14 Al hai nl haq neq
ngal nul juq-ai neejiav jiav nail juq bhai
lavqtsail mail bhi sunq ail khi
genl dev lal nail juq bhai iqsanl
lav tsoiq bhiq nail ngaol.
15 Ngaq bhai bhe nail juq neq
ngaq nail sivtavq bhai
gee sil nail lavqkhoel nee ya gaol beiv nail ngaol.
Aqyu juq neq, nqmaq maqluv halyeel
yalkhaq dal nail bhai ya daq nail ngaol.
16 Thail hai ngaol-aoq
ngal nul juq bhai
meeq dee dee nail gov tsail bhi jaq khi
haqtsoiq khe bhaiqtsil bhaiqeel
bhi daol nail ngaol" dai, ge nail ngaol.