Tsiq eeq 80
Gaoq bhi doevq jaq lal lavq yaoq dai, hal nail geeqlaoq hal daoq
1-2 Ilsaqleiqlav tsaol-aq juq bhai
yaol lovq nail khe-ai lovq nail Miqyail-ol.
Yaol juq bhai hevq daiq bhiq nail khe-ai
Yaolsai nee mail
yavq kha lee thaq nail yaq juq bhai
hevq daiq lavq nail gaq-ol
nv juq-i mail hal nail daoq bhai nal daiq lavq yaoq.
Kheiqlulbhinq nail kovtavq bhai jaol nail gaq-ol
Eil phaq leiq, Bheinqyaqminq khi mail
Maqnaqseiq nail jeq-e juq bhai
aqbhaq bhaq bhiq nail nee ovqtavq
naoq nail bhaqaoq bhai juq khi
nv juq bhai hevq kovq lee lavq yaoq.
3 Miqyail-ol, nv juq bhai
gaoq bhi doevq jaq lal lavq yaoq.
Naoq nail maivphaoq nail aqbhaq
bhi moel lavq yaoq.
Al hai nl lavq haq neq
nv juq hevq kovq nail phaq ya nail ngaol.
4 Nqtavq kovtavq khe
genl dev nail munl munl ma nail
kovtavq bhai bhaqaoq eeq nail
Heeqphaq Miqyail-ol
khaq mao kev dai
naoq nail tsaol-aq juq-i mail
hal nail geeqlaoq hal daoq bhai
neema phail khi jaol nail-aiq.
5 Naol neq, nv juq bhai khaqmul jaq nail khe-ai
noeq haq nail phaq bhi jaq lavq khi
ulcuvq bhai khaoqanq khaoq ma nee
daol nail khe-ai
maivbhil bhi daol lavq-a nail ngaol.
6 Naol neq, teevq jaoq jiav bhee-ai thaq nail
meenq milkhaoq yaq juq-i mail
nv juq bhai bhi hel daiq theq-a nail ngaol.
Nee jiav jiav nail juq iqsanl
nv juq bhai hel sil khi khal ge movq ail
ge lal-a nail ngaol.
7 Nqtavq kovtavq khe
genl dev nail munl munl ma nail kovtavq bhai
bhaqaoq eeq nail Heeqphaq Miqyail-ol
nv juq bhai gaoq bhi doevq jaq lal lavq yaoq.
Naoq nail maivphaoq nail aqbhaq
bhi moel lavq yaoq.
Al hai nl lavq haq neq
nv juq hevq kovq nail phaq ya nail ngaol.
8 Naol neq, Iljiltuv milkhaoq nee mail
aqheeq tsilju nail aqbhaol oil leevq-a nail khe-ai
naoq nail tsaol-aq juq bhai hevq dov khi
yu nail jeq-e jaq-a bhai the ha gaq-al nee ngal-aq
aqyu juq nail milkhaoq bhai
aqheeq tsilju nail aqbhaol al kha-a nail khe-ai
naoq nail tsaol-aq juq bhai bhi jaol-a nail ngaol.
9 Naol neq, aqheeq tsilju nail aqbhaol al
doevq lal nia dai
miltsaq bhai aqmeeq-ai lav jeel khi
lav meeq-a nail ngaol.
Aq bhaol al neq
daoq tsail aqnavq navq dai kha ail khi
milkhaoq teevq khaoq khaoq lao bhee ail-a nail ngaol.
10 Aq bhaol al neq, gaoqjaoq juq bhai
aivq nail aq haiq-i mail maqkhaiq
moe dee dee nail miqhuq aqbhaol bhai
aivq nail lavqmeiv juq-i mail maqkhaiq
uv thaiq-ai thaq nail ngaol.
11 Aivq nail lavqmeiv juq neq
Meildiqthiqla nail
iqyaq iqma bhai kev dai maqkhaiq
Pheqlaqtaq laoljaol bha kev dai maqkhaiq
kev ail-a nail ngaol.
12 Thail hai ngaol-aoq, Miqyail-ol
khul khi mail aqbhaol al bhaol bhai
nl jaoq-ai thaq nail khainl juq
ngaoq peiv-a nail-aiq.
Niil aq il, aqjail bhai
khal ail khal lal ceiv nail juq iqsanl mail
aqheeq tsilju nail aqheeq khoiq jaq nia nail ngaol.
13 Aq bhaol al bhaol bhai
ovq theq juq naoq bhai khi
haqtsoiq jaiqyaq juq neq, jaq nail ngaol.
14 Nqtavq kovtavq khe genl dev nail
munl munl ma nail kovtavq bhai
bhaqaoq eeq nail Heeqphaq Miqyail-ol
nv juq jaol nail bha kovq lee lavq yaoq.
Nqtavq kovtavq nee hel daiq kha-ai lee lavq yaoq.
Naoq nail tsaol-aq juq pevq nail
aqheeq tsilju nail aqbhaol al bhaol bhai
hel daiq phail lee lavq yaoq.
15 Naoq nail aqlavq-i mail kha-a nail nee ovqtavq
naoq nail yaqyov khe-ai dul nail
aqbhaol al bhaol bhai hel daiq phail lee lavq yaoq.
16 Nee jiav jiav nail juq neq
aqbhaol al bhaol bhai miqjaq kheq khi
thul ha-a nail ngaol.
Aqyu juq al hai nl-a nail bhaq da nee
khaq bhiq khi lav luq lav seil bhiq yaoq.
17 Naoq-i mail tsel dov-ai thaq nail gaq bhai
hel daiq phail bhiq yaoq.
Al gaq neq, naoq-i mail
gaq bhi kav lal nail gaq ngaol.
18 Al hai nl haq neq
nv juq teevq pov iqsanl
naoq bhai maq khaonq ha yaoq-aol.
Nv juq bhai aqlil khe-ai bhi doevq lavq haq neq
naoq nail aqmil bhai gaoq tsiq eeq nail ngaol.
19 Nqtavq kovtavq khe genl dev nail
munl munl ma nail kovtavq bhai
bhaqaoq eeq nail Heeqphaq Miqyail-ol
nv juq bhai gaoq bhi doevq jaq lal lavq yaoq.
Naoq nail maivphaoq nail aqbhaq
bhi moel lavq yaoq.
Al hai nl lavq haq neq
nv juq hevq kovq nail phaq ya nail ngaol.