Tsiq eeq 79
Tsaol jeq-e bhai hevq kovq lavq yaoq dai hal nail geeqlaoq hal daoq
1 Miqyail-ol
naoq nail milkhaoq lavqkhoel bhai
yu nail jeq-e jaq-a juq
uv thaiq lal-aoq nail ngaol.
Aqyu juq neq
naoq nail meeq nail haol nail
uqhuq thaoq nail ilkhaol il ma bhai
lav jiivq lav cavq khi
Yeiqlulsaqlaiq meenq bhai iqsanl
deeq peiv-a nail ngaol.
2 Aqyu juq neq
naoq nail tsaol-aq juq nail aqmaol bhai
keivq-avq nail aqjal bhi pevq dai maqkhaiq
naoq nail yaqkav juq nail haqjoil
haqtsoiq jaiqyaq nail aqjal
bhi pevq dai maqkhaiq
liv ha-ai thaq nail ngaol.
3 Aqyu juq neq
naoq nail tsaol-aq juq nail
aqsivq bhai ulcuvq khe-ai
Yeiqlulsaqlaiq meenq bhai
bhi il khal aivq-a nail ngaol.
Sil-a nail aqmaol bhai duq pheeq nail tsaol-aq
teevq gaq iqsanl, maq jail yaoq-aol.
4 Teevq jaoq jiav bhee-ai thaq nail
meenq milkhaoq yaq juq neq
nv juq bhai khal ge movq ail ge khi
aqjail bhai jaol nail juq iqsanl
khal meel naq movq ail meel naq nail ngaol.
5 Heeqphaq Miqyail-ol, naol neq
nv juq bhai nqmaq maqluv halyeel
neema phail nail khi mail ngaol laiq.
Neema phail nail phaq
miqjaq khe-ai bhaol bhaol ail
khaq mao kev dai, bhi jiav nail-aiq.
6 Naoq bhai maq heeq nia nail
jeq-e jaq-a juq bhai maqkhaiq
naoq nail aqmil bhai maq khul nail
yu nail milkhaoq khe tsaol-aq juq bhai maqkhaiq
neema phail yaoq.
7 Khul khi mail dai ngal-aq, aqyu juq neq
Yaqkov nail jeq-e jaq-a juq bhai keivq heivq khi
aqyu juq nail jaol duq bhai iqsanl
lav luq lav seil bhiq-a nail ngaol.
8 Aq phiq aqbhal nail oeqbal bhaq da nee
nv juq bhai yalkhaq thaq dal lavq.
Niil aq il nv juq bhai
lavqtsail mail gaoq haq lavq yaoq.
Nv juq neq, noeq thunq nail phaq maq jiav dai
jaol nail ngaol.
9 Nv juq bhai hevq kovq lavq nail Miqyail-ol
tsao jao-ai lavq yaoq.
Naoq nail aqmil bhai juq khi
nv juq bhai hevq kovq nail lavqkhoel nee
oeqbal bhai phaiq lavq yaoq.
10 ''Nul juq nail Miqyail neq
kha bha jaol nail-aiq'' dai
yu nail jeq-e jaq-a juq khul khi mail
bhi nal daiq lal nail-aiq.
Aqyu juq, naoq nail yaqkav juq bhai
aqsivq lav dov bhiq-a nail ngel-i mail
naol aqyu juq bhai nl kovq bhiq nail
bhi moel lavq yaoq.
11 Thaonq bhai aol nail juq-i mail
meel nail aqthel bhai nal daiq lavq yaoq.
Nee jiav jiav nail juq-i mail bhi heivq nail dai
lainq-ai thaq nail juq bhai
naoq nail eeq dee dee nail bhaqaoq bhai juq khi
bhi jel-ail lavq yaoq.
12 Heeqphaq Miqyail-ol
teevq jaoq jiav bhee-ai thaq nail
meenq milkhaoq yaq juq bhai
sivq bhoil gaoq nl kovq bhiq dei-eiq.
Khul khi mail dai ngal-aq
aqyu juq naoq bhai khal ge movq ail
ge nail ngel-i mail ngaol.
13 Aq-u phao, yaol khe-ai dul nail
naoq nail tsaol-aq juq pevq nail nv juq neq
naoq bhai khaq mao iqsanl tsiq eeq nail ngaol.
Teevq yeel nee teevq yeel, tsiq eeq nail ngaol.