Tsiq eeq 78
Heeqphaq Miqyail khi mail aivq nail tsaol-aq juq
1 Ngaq nail tsaol-aq juq-ol
ngaq-i mail cavq bhiq
cov bhiq nail daoq bhai gaol gai khi
ngaq-i mail ge nail daoq bhai nal daiq lavq yaoq.
2 Ngal daoqma uqhuq daoq yuq khi
ge daiq bhiq naol.
Aq-u khe oil uvq-ai thaq nail ganl
niil aq-il ngal saol bhiq nail ngaol.
3 Ngadao-i mail ya gaiq daiq-a nail ganl khi
aqphiq aqbhal juq-i mail
daoq daq daq khal leevq thaq nail
ganl bhai iqsanl
niil aq-il saol bhiq nail ngaol.
4 Ganl al juq ngadao nail yaq juq bhai
oil uvq khi maq bhi jiav ail.
Heeqphaq Miqyail nail bhaqaoq khi mail
eeq nail heel nail ganl juq bhai maqkhaiq
aivq-i mail nl-a nail
noeq-u maq dov nail ganl juq bhai maqkhaiq
aqjievq lilheel juq bhai
ge bhiq ail ceevq nail ngaol.
5 Aivq neq
Yaqkov nail jeq-e jaq-a juq-ai
aivq nail ya tsao the nail phaq maqkhaiq
Ilsaqleiqlav nail tsaol-aq juq bhai
aolthaq kovqthaq maqkhaiq
bivq khi, "Nul juq nail yaq juq bhai
daoq niil juq cavq bhiq cov bhiq yaoq" dai
aqyu juq bhai daoq bivq ail ceevq-a nail ngaol.
6 Al hai cavq bhiq cov bhiq nail phaq neq
yaqhao khe yaq juq
aolthaq kovqthaq bhai heeq nia lal khi
yovqgavq nail aqjievq lilheel juq bhai iqsanl
bhi saol bhiq nail haqbhoil ngaol.
7 Al hai nl-a nail bhaq da nee
aqjievq lilheel juq
Miqyail bhai neema thaq tsaol khi
aivq-i mail nl-a nail ganl juq bhai
maq nioil peivq dai
bivq-ai thaq nail aoldaoq kovqdaoq bhai
khaq mao iqsanl hel daiq phail nail ngaol.
8 Al hai hel daiq phail haq neq
aqyu juq nail aqphiq aqbhal juq khe-ai
maq pevq ail.
Aq phiq aqbhal al juq neq
neema gaol khi daoq maq nal daiq-al.
Miqyail bhai maq juq nail nee ovqtavq
saljial iqsanl maq ivq-al.
9 Heeq nav bavq khi genl dev nail
Eil phaq leiq nail tsaol-aq juq neq
genl dev-u n-gaol tsaoq peivq gil-a nail ngaol.
10 Aqyu juq neq
Miqyail-i mail jaq-ai thaq nail
daoqma saljial bhai maq ivq dai
aivq nail aolthaq kovqthaq bhai iqsanl
maq tsao the-al.
11 Aqyu juq neq
Miqyail-i mail nl-a nail ganl juq bhai maqkhaiq
aivq-i mail nl daiq bhiq-a nail
noeq-u maq dov nail phaq bhai maqkhaiq
nioil peivq gil-a nail ngaol.
12 Noeq-u maq dov nail al neq
Iljiltuv mil khaoq
Saoq anq dai khul nail dai khaoq bhai
aqyu juq nail aqphiq aqbhal juq nail sivtavq bhai
Miqyail-i mail nl daiq bhiq-a nail phaq ngaol.
13 Aivq neq, iqyaq iqma bhai
nvq pav bhi pav ail-a nail nee ovqtavq
ulcuvq bhai ilphail khe-ai, bhi pevq ail khi
aqyu juq bhai bhi ceiv ail-a nail ngaol.
14 N gaol laol ma phao nqdil-i mail maqkhaiq
nqkiv teevq kivq kivq lao
miqjaq nail aqbhaq-i mail maqkhaiq
aqyu juq bhai gailkhaol hevq daiq bhiq-a nail ngaol.
15 Haqtsoiq haqyal khe lov ma bhai deeq pav khi
navq dee dee nail jaol duq khe ulcuvq mao dai
aqyu juq bhai bhi daol-a nail ngaol.
16 Aivq neq, lovphail nee mail
ulcuvq bhi il dov lee khi
laoljaol khe-ai bhi il-a nail ngaol.
17 Thail hai ngaol-aoq, aqyu juq neq
aivq bhai maq ceiv lai dai, nl laiq khi
tsalhail dai kav-ai
eeq dee heel dee dee nail Gaq bhai
lav tsoiq-a nail ngaol.
18 Aqyu juq neq
jaq movq nail jaq jaq daol daol
Miqyail bhai "Bivq lavq yaoq" dai, ge bhiq khi
aivq bhai laonq daiq-a nail ngaol.
19 Aqyu juq Miqyail bhai
neekhaol maq sil nail daoq niail hai ge nail ngaol:
"Miqyail neq, haqtsoiq haqyal niil heel bhai
nv juq bhai maldil
jaq jaq daol daol bivq lavq nia naol laiq.
20 Lovmav bhai aivq deeq-u phao
ulcuvq laoljaol khe-ai
ulcuvq il dol leevq-a nail neq ngel naol.
Thail hai ngaol-aoq, niil aq-il
ngadao juq bhai
khaqmul bhi jaq lavq nia naol laiq.
Aivq nail tsaol-aq juq bhai
haqjoil bivq lavq nia naol laiq" dai, ge nail ngaol.
21 Aqyu juq nail daoq bhai ya gaiq-u phao
Heeqphaq Miqyail neema phail lal bhiq khi
Yaqkov nail jeq-e jaq-a juq bhai
aivq nail neema phail nail phaq
miqjaq bhaol nail khe-ai, bhaol lal bhiq-a nail ngaol.
Aivq Ilsaqleiqlav nail jeq-e bhai
neema gaoq phail dee dee lal bhiq-a nail ngaol.
22 Khul khi mail dai ngal-aq, aqyu juq neq
Miqyail bhai neema maq thaq tsaol dai
aivq-i mail hevq kovq bhiq-a nail phaq bhai iqsanl
maq hav bhoel tsaol ail.
23 Aqyu juq neq
Miqyail-i mail nl bhiq-a nail niil juq bhai
neema maq thaq tsaol ail:
Aivq neq, nqtavq bhai phao lal yaoq dai
daoq bivq-a nail ngaol.
Nqtavq khe lolgov juq iqsanl
phao lal-a nail ngaol.
24 Aivq neq, aqyu juq jaq nail haqbhoil
Maqnav khaqmul maoq-aol khe-ai
bhi ga lee-a nail ngaol.
Al neq, nqtavq nee
bhi ga lee-a nail aqjal iqsanl
pevq nail ngaol.
25 Aqyu juq tsaol-aq yaq pevq khi ngaol-aoq
nqtavq gaqkhoel nail
jaq nail phaq ya jaq-a nail ngaol.
Miqyail aqyu juq bhai teevq bov bhi jaq-a nail ngaol.
26 Al ovqtavq, aivq neq
nlma dov khoeq phao khe
lilmoel bhi bhoel lal khi
aivq nail bhaqaoq-i mail
lavqtsel phao khe lilmoel iqsanl
bhi bhoe dav lavq-a nail ngaol.
27 A bhai nee ngal-aq
khaq laiq khe-ai mao nail haqjoil bhi ga lee khi
iqyaq iqma khe jiav nail tsalhail khe-ai
mao nail keivq-avq juq iqsanl
aivq nail tsaol-aq juq jaol nail bhai
bhi ga lee-a nail ngaol.
28 Keivq avq al juq neq
aqyu juq-i mail saiqgov gov khi
naq nail teevq jaoq
bhi ga bhee-ai thaq nail ngaol.
29 Al heel ngel-i mail, tsaol-aq yaq juq
neekhaol teevq sil ya jaq-a nail ngaol.
Miqyail aqyu juq jaq movq nail phaq
bhi jaq-a nail ngaol.
30 Thail hai ngaol-aoq
aqyu juq maq jaq bov dan dai
moeqthaoq lavqkhoel bhai aol thail thaiq-u phao
31 Miqyail nail neema phail nail phaq
aqyu juq nail kovtavq bhai kev lee-a nail ngaol.
Aivq neq, Ilsaqleiqlav tsaol-aq nail lavqkhoel khe
gaq kav nail yaqyov yaqnoil juq bhai
bhi sil thaq nail ngaol.
32 Ganl al juq iqsanl bhai ya moel khi ngaol-aoq
aqyu juq neq, oeqbal gaoq nl-a nail ngaol.
Miqyail-i mail nl-a nail
noeq-u maq dov nail phaq bhai
neema maq thaq tsaol ail.
33 Al heel ngel-i mail, Miqyail neq
aqyu juq bhai aqhaq gaol dav gaol kha nail khe-ai
teevq yanq nail lavqkhoel nee bhi sil-a nail ngaol.
Aqyu juq nail aqkovq gee sil lal heeq phaq-ail
daoq loi bhi loi lai-a nail ngaol.
34 Miqyail aqyu juq bhai al hai bhi sil-u phao
jail ail ceevq-a nail juq neq
aivq bhai hav pov lal-a nail ngaol.
Al ovqtavq, aqyu juq oeqbal noeq pov khi
aivq jaol nail bha kovq lal-a nail ngaol.
35 Miqyail neq, aqyu juq nail lovphail khe-ai
pevq nail bhai maqkhaiq
eeq dee heel dee dee nail gaq neq
aqyu juq bhai ul kovq lavq-a nail bhai maqkhaiq
aqyu juq noeq kev noeq moel-a nail ngaol.
36 Thail hai ngaol-aoq, aqyu juq neq
Miqyail bhai moeqthaoq-i mail ge meeq khi
moevqlal-i mail neq
goiqbhaoq bhaoq nail daoq taivq-ail
ge-a nail ngaol.
37 Aqyu juq neq, aivq bhai saljial maq ivq ail.
Aivq-i mail ge-ai thaq nail
daoqma saljial bhai iqsanl
maq hel daiq phail ail.
38 Aqyu juq al hai pevq khi ngaol-aoq
Miqyail neq, aivq nail tsaol-aq juq bhai
gaoq haq gaiq-a nail ngaol.
Aqyu juq nail oeqbal bhai phaiq bhiq khi
aqyu juq bhai maq lav luq maq lav seil bhiq al.
Aivq neq, mao dai pov neema phail nail phaq bhai
he thaiq-ai thaq khi
aqyu juq nail kovtavq bhai
aivq nail neema phail nail phaq
maq bhi kev lee dai, jaol-a nail ngaol.
39 Aqyu juq neq
tsaol-aq yaq pevq nail bhai maqkhaiq
peivq ail nia nail lilmoel khe-ai
dul nail bhai maqkhaiq
Miqyail heeq nia nail ngaol.
40 Aqyu juq neq
tsalhail dai kav-ai
Miqyail bhai pheeq-a nail
kha dai pov bhee lal-aoq nail-aiq.
Aivq bhai mao dai pov bhi noeq haq-a nail ngaol.
41 Aqyu juq neq, teevq pov gil-aq teevq pov
Miqyail bhai laonq daiq khi
Ilsaqleiqlav tsaol-aq juq nail
Meeq nail Haol nail Miqyail bhai
neema phail lal dai nl-a nail ngaol.
42-43 Aqyu juq neq
Miqyail nail bhaqaoq bhai maqkhaiq
aqyu juq bhai
neejiav jiav nail juq nail aqlavq lavqkhoel nee
hevq dov lavq-a nail aqn bhai maqkhaiq
Iljiltuv milkhaoq khe Saoq anq dai khaoq bhai
noeq-u maq dov nail phaq khi mail
eeq nail ganl juq nl daiq bhiq-a nail bhai maqkhaiq
maq noeq moel-al.
44 Miqyail neq
Iljiltuv nail milkhaoq khe
laoljaol bhai aqsivq khe-ai
bhi pevq ail-a nail ngaol.
Al heel ngel-i mail
aqyu juq a bhai khe ulcuvq maq daol nia ail.
45 Miqyail neq, aqyu juq bhai
haq nail aoq nail phaq bivq nail
yaolheel munl munl ma bhai maqkhaiq
aqyu juq nail daiyal juq bhai
lav cov nail phaq yaq juq bhai maqkhaiq
aqyu juq jaol nail bha bhi lee-a nail ngaol.
46 Aqyu juq nail
heeqlaoq gaoqjal juq bhai bhi jaq khi
daiyal juq bhai lav cov nail haqbhoil
noelbhoel phaiq-ai leevq-a nail ngaol.
47 Aqyu juq nail
aqheeq tsilju nail aq jiav bhai
ollov aq heeq-i mail maqkhaiq
heeq guq aqbhaol juq bhai
tsaiqbhaiq-i mail maqkhaiq
lav cov gil-a nail ngaol.
48 Aqyu juq nail niaoqnel juq bhai
ollov aq heeq-i mail maqkhaiq
yaol juq khi mail civqmeiv juq bhai
covq-i mail maqkhaiq
lav cov-a nail ngaol.
49 Miqyail neq
aivq neema phail nail phaq maqkhaiq
neema bhao nail phaq maqkhaiq
neejiav jiav nail phaq maqkhaiq
aqyu juq nail kovtavq bhai bhi kev lee-a nail ngaol.
Lav luq lav seil ail nail nqtavq gaqkhoel juq iqsanl
bhi lee-a nail ngaol.
50 Aivq neq, aivq nail neema phail nail phaq bhai
maq he thaiq ail.
Aqyu juq nail doevqyeel bhai iqsanl
maq bhi jel ail.
Aqyu juq bhai niaoq lal nia nail nalgoel-i mail
sil-u kev dai, khoeq bhiq jiovq bhiq-a nail ngaol.
51 Aivq neq, Iljiltuv milkhaoq lavqkhoel khe
ilkhaol yaoq il yaoq-ao nee bhai jaol nail
uqbhao aqivq gaq bhi sil-a nail ngaol.
52 Thail hai ngaol-aoq, Miqyail neq
aivq nail tsaol-aq juq bhai
yaol bhai lovq nail gaq khe-ai
haqtsoiq haqyal bhai
hevq pal-aivq-a nail ngaol.
53 Aivq neq, aqyu juq bhai
haq nail aoq nail phaq nee hevq jel bhiq khi
hel daiq phail bhiq-a nail ngel-i mail
aqyu juq maq gee sil ail.
Thail hai ngaol-aoq, iqyaq iqma khe ulcuvq neq
aqyu juq bhai neejiav jiav nail juq bhai
bhi deq pheeq heivq gil-a nail ngaol.
54 Aivq neq, aivq nail
meeq nail haol nail milkhaoq nail
milkhaiq bhai maqkhaiq
aivq nail lavqmal lavq-i mail
oil ya-a nail gaoqjaoq bhai maqkhaiq
aqyu juq bhai hel aivq-a nail ngaol.
55 Aqyu juq lai dav-u phao
milkhaoq al khaoq khe jaol nail
jeq-e jaq-a juq bhai
aqyu juq nail sivtavq nee
the dov bhiq-a nail ngaol.
Ilsaqleiqlav nail jeq-e jaq-a juq bhai
milkhaoq al khaoq bhoil pav khi
jaiq bhoil bivq-a nail nee ovqtavq
jaol duq al dao bhai daoqthaoq thaoq khi
bhi jaol dal laivq-a nail ngaol.
56 Thail hai ngaol-aoq, aqyu juq
eeq dee heel dee dee nail Miqyail bhai
laonq daiq khi pheeq-a nail ngaol.
Al ovqtavq, aivq nail ya tsao the nail phaq bhai
maq tsao the al.
57 Aqyu juq nail aqphiq aqbhal juq khe-ai
haoqnaol naol kovq kovq daiq khi
saljial maq ivq-al.
Aqyu juq neq, aq govq govq dai
bev dov gai aivq nail heeqnav maq tsoe khe-ai
neema maq thaq tsaol kivq nail juq ngaol.
58 Aqyu juq neq
maq ngel nail miqyail juq bhai
uqhuq thaoq nail dai khi
laolduq lav sav-a nail ngel-i mail
Miqyail bhai neema bhi phail lal-a nail ngaol.
Aqyu juq-i mail uqhuq thaoq-a nail
thaoq phaoq aqma maolkhoel bhaq da nee
aivq bhai neekhaol maq sil dai
bhi pevq lal-a nail ngaol.
59 Aivq nail tsaol-aq juq
al hai nl nail bhai ya moel-u phao
Miqyail neema phail dee dee lal bhiq khi
aqyu juq bhai maldil khaonq ha-a nail ngaol.
60 Miqyail aivq nail tsaol-aq nee mail jaol nail
Sil loq meenq bhai jiav nail
haqphal saiqgov bhai iqsanl
khaonq ha-a nail ngaol.
61 Aivq nail seiqleiq khaoqsail pevq nail
daoqma saljial nail thunq bhai iqsanl
neejiav jiav nail juq-i mail bhi oil aivq-a nail ngaol.
62 Aivq neq, aivq nail tsaol-aq juq bhai
neema phail dee dee lal bhiq-a nail ngel-i mail
aqyu juq bhai thaoma-i mail
bhi heivq nail haqbhoil
neejiav jiav nail juq bhai av bhiq-a nail ngaol.
63 Yaqyov-aq yaqnoil juq genl dev nail bhai
bhi dev heivq gil-a nail ngel-i mail
aqyu juq nail yaqmai-aq yaqnoil juq
maq ya maol ail yaoq-aol.
64 Philma phil yaq juq neq
thaoma-i mail bhi heivq khi sil gil-a nail ngaol.
Aqyu juq nail khaqma miqtsiq miqma juq neq
nioil khaoq iqsanl maq ya khaoq al.
65 Aq-u phao, Heeqphaq Miqyail neq
iqjial nee mail thul lal-a nail gaq khe-ai maqkhaiq
aqheeq tsilju nail ullul-i mail
iq thaiq kol laivq khi gaq aol nail lavqkhoel nee
noeq lal-a nail genl dev yaq khe-ai maqkhaiq
thul lal-a nail ngaol.
66 Aivq bhai neejiav jiav nail juq bhai
bhi sunq ail khi
nqmaq maqluv halyeel bhi haq sil nail ngaol.
67 Aivq Yaolsai nail
aqjievq liqdee juq bhai khaonq ha khi
Eil phaq leiq nail jeq-e bhai maq tsel dov-al.
68 Thail hai ngaol-aoq
aivq neq, Yuldav nail jeq-e khi mail
aivq gaiq-a dee dee nail Yeel ovq gaoqjaoq bhai
tsel dov-a nail ngaol.
69 Gaoqjaoq al jaoq nail kovtavq bhai
uqhuq thaoq nail ilkhaol il ma
daqmoe cov-a nail ngaol.
Il khaol al neq, miltsaq khe-ai
nqmaq maqluv halyeel ivq nail ngaol.
70 Miqyail neq, aivq nail yaqkav Daq bhil bhai
yaol lovq nail jaol duq nee khul khi
tsel dov-a nail ngaol.
71 Yaol bhai lovq thail thaiq nail
nee mail khul dov khi
Yaqkov nail jeq-e jaq-a juq bhai
yaol lovq nail khe-ai bhi lovq phail-a nail ngaol.
Aqyu juq neq
Miqyail nail tsaol-aq pevq nail
Ilsaqleiqlav nail tsaol-aq juq ngaol.
72 Daq bhil neq, yaol lovq nail gaq khe-ai
neema aq see aqdaol daol dai
hel daiq phail bhiq khi
aivq-i mail nia nail phaq nee,
aqmeeq meeq dai gailkhaol
hevq daiq bhiq-a nail ngaol.