Tsiq eeq 77
Haq nail aoq nail phaq kev lee-u phao, nee sal ya nail ganl
1 Ngal neq
Miqyail bhai nioil khi gul-a nail ngaol.
Aivq bhi gaiq nail dai khi
aqkav kav dai gul-a nail ngaol.
2 Haq nail aoq nail phaq kev lee-u phao
ngal neq, Heeqphaq Miqyail bhai
geeqlaoq hal nail ngaol.
Teevq kivq kivq lao
aqlavq nvq lavq bavq dil khi
geeqlaoq hal-a nail ngaol.
Thail hai ngaol-aoq
neema sal nail phaq maq ya-al.
3 Ngal Miqyail bhai noeq kev khi
aqhaq gaol dav gaol kha-a nail ngaol.
Ngal saol-nvq daiq-u phao
neema gaq bhaq lal-a nail ngaol.
4 Naol ngaq bhai teevq kivq kivq lao
maq bhi iq thaiq lavq nail nee ovqtavq
Ngal haq aoq nl dee dee nail ngel-i mail
daoq maq ge dov kivq-il.
5 Ngal neq
jel-ail ceevq-a nail aqn aqyanq nail ganl bhai
saol-nvq daiq khi aq-u khe ganl bhai
noeq moel lal ail nial.
6 Aq-u phao, ngal teevq kivq kivq lao
daoqsel gul-a nail bhai iqsanl
noeq dov lal ail nial.
Thail hai ngaol-aoq, niil aq-il
ngal yovqgavq bhai yovqgavq
niail hai nal daiq nail ngaol:
7 "Heeqphaq Miqyail neq
ngadao bhai khaq mao iqsanl
khaonq ha nail khi mail ngaol laiq.
Ngadao juq bhai teevq pov iqsanl
neema maq tsaq yaoq-aol laiq.
8 Aivq-i mail gaoq haq goil gaiq-a nail phaq
peivq ail gil-aoq nail laiq.
Aivq-i mail saljial jaq-ai thaq nail phaq iqsanl
cov ail gil-aoq nail laiq.
9 Miqyail neq, aivq-i mail
gaoq haq goil gaiq-a nail phaq bhai
nioil peivq ail-aoq nail laiq.
Gaoq haq nail phaq nail jiq dan
neema phail nail phaq bhai
phao daiq lavq-a nail laiq" dai
nal daiq-a nail ngaol.
10 A bhai nee ngal-aq
"Ngaq-i mail noeq haq nail phaq neq
eeq dee heel dee dee nail Miqyail neq
bhaqaoq maq aol-aoq thaq nail dai,
ngal ge-a nail ngaol.
11 Thail hai ngaol-aoq
Heeqphaq Miqyail-ol
naoq-i mail nl jel-a nail ganl juq iqsanl
ngaq bhai noeq dov lal-a nail ngaol.
Aq-u naoq-i mail nl ail ceevq-a nail
noeq-u maq dov nail juq bhai iqsanl
gaoq noeq dov lal-a nail ngaol.
12 Naoq-i mail khal nl ail ceevq-a nail ganl juq iqsanl
ngaq nail ul naovq lavqkhoel bhai aol nail ngaol.
Naoq nail eeq nail heel nail ganl juq bhai
ngal saol-nvq nail ngaol.
13 Miqyail-ol
naoq-i mail nl-a nail ganl juq iqsanl mail
meeq nail haol nail ngaol.
Naoq-ai khe-ai eeq nail miq yail
yaoq gaq yaoq maq jaol ail.
14 Naol neq, noeq-u maq dov nail phaq bhai
nl daiq lavq nail Miqyail pevq nail ngaol.
Naoq nail bhaqaoq jeq-e jaq-a juq bhai
bhi moel nail ngaol.
15 Naoq nail tsaol-aq juq pevq nail
Yaqkov khi mail Yaolsai nee mail
yavq kha lee thaq nail yaq juq bhai
naoq nail aqlavq-i mail
hevq kovq bhiq-a nail ngaol.
16 Miqyail-ol, ulcuvq juq
naoq bhai ya moel-u phao
gee sil-a nail ngaol.
Iqyaq iqma aqnavq navq dee dee nail aqduq iqsanl
dao lal-a nail ngaol.
17 Nqdil juq neq
maoq-aol bhi aol lee khi
nqtavq bha covq deeq-u phao
heeqnav maq tsoe ail nail khe-ai
nqmeivq meivq nail ngaol.
18 Naoq nail nqjaiq aqthel ya gaiq khi
nqmeivq-i mail miltsaq bhai
aqbhaq bhi bhaq lee-u phao
miltsaq dao dao ail jiav lal nail ngaol.
19 Naol neq
iqyaq iqma nail lavqkhoel bhai tsao khi
ulcuvq mao dai nail kovtavq bhai tsao-u phao
naoq nail aqkhil phaq yal maq ya moel ail.
20 Naol neq, Maolseiq khi mail Aqlonq bhai juq khi
naoq nail tsaol-aq juq bhai
yaol bhai hevq daiq nail khe-ai
bhi hevq daiq-a nail ngaol.