Tsiq eeq 76
Gaq lai-a nail Heeqphaq Miqyail
1 Yuldav milkhaoq lavqkhoel khe juq
Miqyail bhai heeq nia nail ngaol.
Ilsaqleiqlav milkhaoq lavqkhoel bhai iqsanl
aivq nail aqmil eeq dee dee nail ngaol.
2 Aivq nail ilkhaol
Yeiqlulsaqlaiq meenq bhai jiav khi
aivq Yeel ovq gaoqjaoq bhai jaol nail ngaol.
3 Jaol duq al dao bhai aivq neq
aivq bhai neejiav jiav nail juq nail heeqnav
doeq daq duq, thaoma khi mail
genl dev nail khenkha-ao juq iqsanl bhai
ngaoq khoi ngaoq loi gil-a nail ngaol.
4 Miqyail-ol, naol neq
seiqleiq khaoqsail eeq nail ngaol.
Naol neq
haqtsoiq jaiqyaq juq jaol nail
gaoqjaoq nee maq tsil
eeq jaiq heel jaiq nail ngaol.
5 Nee jiav jiav nail juq nail lavqkhoel khe
genl dev nia jaiq nail juq neq
aqyu juq nail khenkha-ao sunq ail gil khi
aqyu juq nail aqmaol miltsaq bhai ga nail ngaol.
Aqyu juq teevq gaq iqsanl
gaq maq aol nail nee ovqtavq
aqlavq maq bavq dil nia ail.
6 Yaqkov nail Miqyail-ol
naol khaq bhiq-u phao
moeqphaq khi mail
moeqphaq bhai jeeq-nq thaq nail juq
ga kha ail khi sil gil-a nail ngaol.
7 Al heel ngel-i mail
naol teevq gaq taivq-ail
gee sil heeq phaq-ail tsaq nail ngaol.
Naol neema phail-u phao
khaq sil gaq naoq nail sivtavq bhai
jaol nia nail-aiq.
8-9 Naol yalkhaq dal nail phaq
nqtavq kovtavq nee ge gaiq-a nail ngaol.
Naol neq
miltsaq bhai khoeq nail jiovq nail-ai
ya daq nail juq bhai hevq kovq nail haqbhoil
thul lal khi yalkhaq dal bhiq-u phao
miltsaq yaq juq iqsanl
gee sil dee dee lal bhiq khi
hee tsul dai jaol nail ngaol.
10 Tsaol-aq yaq-i mail
neema phail nail phaq neq
naoq bhai tsiq eeq nail phaq
bhi dov lal nail ngaol.
Genl dev nail bhai maq sil dai
jel ail-a nail juq
naoq nail aqbhee lav sav nail ngaol.
11 Nul juq nail Heeqphaq Miqyail bhai
bivq-ai thaq nail saljial nl bhee yaoq.
Aq jail bhai jaol nail jeq-e jaq-a juq iqsanl mail
gee sil khi ev heeq phaq-ail tsaq nail
gaq jaol nail bha kovpavq oil khi lal gil yaoq.
12 Aivq neq, neema eeq nail
heeqphaq juq nail neema bhai
bhi ga maiq lee khi
miltsaq khe heeqphaq juq
gee sil lal dai, nl bhiq nail ngaol.